Khotbah GBKP Minggu Tgl. 24 April 2016

KHOTBAH GBKP MINGGU TGL. 24 APRIL 2016

Pdt. Larena br. Sinuhadji (Nd. Reynard Tarigan)

Invocatio : “Lakokenlah e, erkiteken kam kap sikerajangen Tuhan Dibatandu. IpeserapNa kam i bas kerina bangsa-bangsa doni enda nari jadi bangsaNa khusus” (Ulangen 7:6)

Ogen : Jesaya 1:10-20 (Anthiponal)

Khotbah : Perbahanen Rasul-Rasul 11:1-18

Tema : MAN KALAK SI IPILIH-NA IBEREKEN-NA KEMENANGEN

Penjelasen Bahan Pustaka Si Badia

Latar belakang bahan khotbahta e me kerna kerehen Petrus ku jabu Kornelius sekalak komandan i bas pasukan tentera Romawi. Awalna lit keberaten bas ia sendiri (pergumulen si mbages), tapi erkiteken ibereken Tuhan pengenehenen kerna uis si mbelang si idatasna lit erbage-bage rubia si empat nahe, rubia si njoler bage pe perik-perik si meliar, janah 3 kali icidahken Dibata pengenehenen e man bana. I ja nina Dibata sendiri, “Kai si enggo ikataken Dibata bersih ola ikataken la bersih”, sabab memang la nggit Petrus mansa erkiteken kerina rubia-rubia e pantangen (bdk. Perb. Rasul 10:10-). Kenca si e, lit kalak si erlegi gelah Petrus ku rumah Kornelius. Petrus reh bahkan ikatakenna, “Enggo ietehndu maka rikutken Undang-undang kalak Jahudi, la kal kami banci bengket ku bas rumah si labo kalak Jahudi, entah pe ergaul ras ia. Tapi enggo icidahken Dibata man bangku maka la banci kukataken ise pe meluat entah pe la bersih” (ay. 29). Je nari Petrus nehken Kata Dibata man kerina kalak si pulung i rumah Kornelius. Si luar biasana, nusur Kesah si Badia man kerina kalak si megiken Berita e. Kenca bage, kalak e kerina iperidiken i bas gelar Yesus Kristus.

Kenca Petrus mulih ku Jerusalem, rasul-rasul ras kalak Jahudi si enggo tek man Yesus megi berita maka si labo kalak Jahudi pe enggo ngaloken Kata Dibata. Je nari ipadang (ikritikna) Petrus erkiteken kesilang Petrus i rumah si labo kalak Jahudi dingen lenga isunatken janah enggo ka Petrus man ras kerina kalak enda. E maka alu teneng ituriken Petrus kai si enggo jadi pemena nari seh kedungenna ia i rumah Kornelius. Enggo tangkas maka Dibata mereken pemereNa man si labo kalak Jahudi la lit kurangna ras si iberekenNa man rasul-rasul asum nai tangtangna kalak enda tek man Tuhan Yesus. E maka tegas Petrus ngatakenca, “Dage, banci kin kuambati Dibata? Kenca ibegi rasul-rasul e kerina, sinik ia, je nari ipujina Dibata, nina, “Man si labo kalak Jahudi pe enggo ibereken Dibata dalan jera gelah dat kegeluhen”.

I bas ogen pemena, ipebali Tuhan bangsa Israel ras kalak kuta Sodom ras Gomora si ikernepken Tuhan erkiteken kejahatenna (Kej. 10:23-29). Kalak Israel nggeluh i bas kemunafikan, formalitas ibadah si mejile tapi la ibarengi alu perbahanen si ngena ate Dibata. La ngena ate Tuhan persembahen si la erngadi-ngadi ipersembahken, enggo medu Tuhan biri-biri si itutung jadi persembahen, leja Tuhan nandangi dareh lembu, biri-biri ras dareh kambing. Mutah ate Tuhan nganggeh bau kumenen si itutung bangsa e. Ciga ate Tuhan ngidah kerja meriah si ibahan bangsa enda guna ngerayaken bulan mbaru, wari Sabat bage pe kepulungen bangsa e i bas kebaktin-kebaktin si deban. Kerina enggo macik erkiteken dosa-dosa bangsa Israel. Adi iangkatken bangsa e tanna guna ertoto ipudiken Tuhan, amin uga gia mbuena pertotonna la ate Tuhan nggit megikenca. Si ipindoken Tuhan pertobaten si tuhu-tuhu i bas bangsa Israel (syuv : e me bhs. Ibrani berbalik, nadingken dosa ras nggeluh i bas kegeluhen si mbaru). Nina Tuhan, ngadilah erbahan kejahaten, ola nai bahan si la mehuli, tapi erlajarlah erbahan si bujur. Usahakenlah maka keadilen idalanken, sampati kalak si itindes, kai si jadi sikerajangen anak melumang ula tangko tapi berekenlah man bana janah bela hak diberu mbalu-mbalu. Perkuah ate Tuhan ngenca si banci ngalemi salah dosa bangsa Israel. Si ipindoken Tuhan kiningiteken bangsa e guna ialemi Tuhan dosa-dosana. Nina Tuhan, “Kam enggo erkubang-kubang ibahan dosa, tapi kuperidi kam maka bersih bagi salju. Aminna gia erkiteken dosandu kam enggo mbiring bagi tengguang, mulihi kam jadi mbentar bagi kapas. Adi kam erkemalangen man bangKu, ipanndu me kai si mehuli ulih tanehndu enda. Tapi adi ilawanndu Aku, mate me kam ipan pedang,” bage nina TUHAN”. Siipindoken Tuhan penyesalen i bas dosa-dosa si enggo silakoken, bertobat, dingen nggeluhken geluh bagi si ngena ate Dibata.

Aplikasi

I bas pelayanen Petrus ku jabu Kornelius ras kade-kade si labo kalak Jahudi, maka iyakini rasul-rasul maka keselamaten e labo hanya man kalak Jahudi tapi pe man kerina manusia (bdk. Joh. 3:16). La ise pe danci ngambati dahin Dibata. Banci jadi segat ate kalak Jahudi paksa si e, sabab akapna keselamaten e hanya miliknya, tapi kepeken terbuka man kerina kalak si merespon kekelengen Tuhan Yesus. Kata kunci si ikataken rasul-rasul, “Man si labo kalak Jahudi pe enggo ibereken Dibata dalan jera gelah dat kegeluhen”. Dalan jera, dalan guna pertobaten, hidup baru terbuka seluas-luasna man kalak si ngaloken perkuah ate Dibata, tujunna gelah manusia ngaloken keterkelinen, kegeluhen labo hanya i doni enda tapi kegeluhen si rasa lalap si enggo ipadanken Yesus Kristus.

Mengubah pola pikir, pola ucap, ras pola tindak si enggo berurat berakar i bas kita, entah si mejadi kebiasaan, labo hal si gampang. Tapi enggo pasti la lit si metahat i bas Dibata. Si paling penting ula bertahan i bas sikap-sikap bagi umpamana : “Aku bage kin gel-gel nari”, “Nai-nai nari bage enggo semal ilakoken bas gereja enda”, “Kita la banci nari berobah”, rsd. Si penting, nggit kita terbuka terhadap hal-hal baru, nggit erlajar, nggit ipelimbarui. Alu meteruk ukurta nggit kita ngaloken masuken bas ise nari pe terlebih nandangi sura-sura Dibata. Petrus la mbiar ia ikritik, tapi alu patuh ras mbiar man Dibata idalankenna kai si isuruh Dibata man bana.

Nggeluhlah i bas kegeluhen si mbaru sebab Kristus enggo nelamatken kita. Labo hanya terjeng aktif ikut muat bagin i bas kegiaten-kegiaten seremonial Gereja, tapi si ipindoken Tuhan e me kap kinitekenta teridah i bas kegeluhenta si tep-tep wari umpamana : nehken kekelengen, nggeluh i bas keadilen, kebujuren, nggeluh berintegritas. Aktif ku Gereja, jadi serayan entah pe pengurus, labo sada jaminen kai si ilakoken kita tep-tep wari nehken si ngena ateNa. Bagi si ikataken Pope Francis, Going to chruch does not make you a good person, ertina kegeluhen si mbaru i bas Kristus arus iawali alu kesadarenta bahwasana jadi kalak Kristen e arus nggeluh i bas orientasi si mbaru janah buah-buahna banci teridah ras ternanami sekelewetta. Amin bage gia, Gereja arus ngasup menciptakan suasana kegeluhen si mbaru enda, secara khusus man banta si enggo ipercayaken Tuhan guna ngelai sebage Pendeta, Pertua, Diaken, Emeritus, Pengurus PJJ, Kategorial.

Cataten tambahen arah Pt./Dk. nari :

Dk. Bp. Louise Sinukaban : Petrus ras Kornelius si kalak erpangkat sama-sama alu meteruk ukur nggit mpelimbarui dirina. Ngataken bujur kita, maka sialoken kegeluhen i bas Dibata nari.