Bimbingen PA Kategorial Tgl. 21 - 27 Februari 2016

BIMBINGEN PA MAMRE TGL. 21 - 27 FEBRUARI 2016

I JAPA PE BANCI INGAN ERSEMBAH (TEMPAT BERIBADAH)

Nrs. Bp. Rey Tarigan

Ogen : Masmur 139:7-12

Tema : NEMBAH DIBATA I BAS KERINA INGAN

Tujun : Mamre ngasup :

1) Nuriken maka Dibata ringan i japa pe

2) Makeken kerina kesempaten ras ingan guna mpermuliaken Dibata

Penjelasen Bahan Ogen

Masmur 139 i bas Alkitab bahasa Indonesia Terjemahan Baru (TB) ibere judul “Doa di hadapan Allah yang maha tahu” i bas Alkitab Bahasa Indonesia Sehari-hari (BIS) “Allah mahatahu dan memelihara segala-galanya”, ras i bas Pustaka si Badia, “Kai pe ieteh dingen ikelengi Dibata”. Arah telu judul enda, banci siidah bahwa Pustaka si Badianta lebih cenderung ngikuti terjemahen Alkitab BIS nari. Amin bage gia labo ngkurangi pengangkanta kerna kata Dibata enda.

I bas piga-piga buku tafsiren ikataken Masmur 139 enda Daud si nuliskenca. Rikutken Alkitab TB maka ps. 139 enda merupaken pertoton Daud. Adi sinen kerangka pertoton Daud secara keseluruhen i bas pasal enda (24 ayat), maka banci ibagi jadi empat bagin. 1) Ay. 1-6, merupaken pengakun Daud kerna Dibata si Omniscience (mahatahu), ke-mahatahuan-an (pemeteh) Dibata la lit batasna janah la banci ibatasi alu kai pe si ibahan manusia, jadi la lit kai pe si banci ibuniken manusia iadep-adepen Dibata. 2) Ay. 7-12, e me pengakun Daud kerna Dibata si Omnipresence (mahahadir), erkiteken Dibata lit entah pe ringan i japa pe maka la lit ise pe si banci buniken bana i adep-adepen Dibata, la lit ise pe si banci lawes entah pe kiam i bas adep-adepen Dibata nari seh makana la banci iidah Dibata. 3) Ay. 13-16 e me pengakun Daud kerna Dibata si Omnipotence (mahakuasa). Kuasa Dibata si la lit batasna enda teridah arah ijadikenNa manusia si istimewa, si berbeda ras sinuan-sinuan, rubia-rubia, entah pe tinepa Dibata si debanna. Keistimewaan manusia sebage tinepa Dibata enda la lit tandingenna seh asa gundari, sebab la lit ise pe kita manusia si banci erbahan replika manusia si seri bagi si enggo ijadiken Dibata. 4) Ay. 17-24 merupaken pemindon Daud i bas pertotonna. Secara tersirat i bas pertotonna enda, Daud mindo gelah ilesapken Dibata kerina kalak si jahat perukurenna, pengeranana ras perbahanenna. Tapi i bas ay. 23-24 ipindoken Daud gelah Dibata mpepayosa pemindonna enda.

Secara khusus i bas ogenta sendah, fokus kita kerna Dibata si Omnipresent (mahahadir). Ke-mahahadir-an Dibata adi irenungken secara lebih mendalam i bas bahan ogenta enda, teridah maka Dibata si reh entah ringan i japa pe labo dalam rangka mengawasi saja bagi sekalak pengawas si dahinna ngawasi ras ngelaporken kai-kai saja si enggo iabahan kita, tapi lit i je sifat Dibata si memelihara (judul i bas BIS) entah pe ngkelengi (judul i bas Pustaka si Badia). Pemeliharaan Dibata nandangi Daud enda teridah i bas ay. 10 (Alkitab TB, “juga di sana tangan-Mu akan menuntun aku, dan tangan kanan-Mu memegang aku”. BIS, “di sana pun Engkau menolong aku; di sana juga tangan-Mu membimbing aku”). Tapi si lebih penting i jenda e me pengakun Daud kerna ke-mahahadir-an Dibata i bas kegeluhenna. Arah pengakun enda me turah kesadaren i bas diri Daud makana ia ernalem man Dibata saja ras ngelakoken kai pe si iperentahken Dibata i bas kegeluhenna.

Aplikasi

Tema PA Mamre sendah e me “Nembah Dibata I Bas Kerina Ingan” alu tujun gelah Mamre ngasup nuriken maka Dibata ringan i japa pe ras makeken kerina kesempaten ras ingan guna mpermuliaken Dibata. Alu penjelasen bahan ogen i datas maka labo mesera guna nuriken maka Dibata si isembah kita ringan i japa pe. I bas PA-ta sendah Daud mereken teladan man banta maka labo hanya soal nuriken saja, tapi arus lit pengakun si tuhu-tuhu i bas dirinta kerna Dibata si ringan i japa pe. Pengakun si tuhu-tuhu enda mabai kita ku bas tujun si peduaken, e me kap makeken kerina kesempaten ras ingan guna mpermuliaken Dibata. Adi la lit pengakun maka Dibata ringan i japa pe maka tujun si peduaken enda la banci tercapai, erkiteken kita enggo terbiasa i bas budaya adi lit si ngawasisa makana tutus kita erdahin. Erkiteken melala si ngidah kita makana mejile siban pengerana ras pengelakonta. Adi la lit ise pe si ngawasi entah pe ngidah kita, maka si sebalikna si ilakoken kita, amin pe enggo iteh kita Dibata ringan i japa pe.

Makana penting kel i jenda pengakunta si tuhu-tuhu kerna ke-mahahadir-an Dibata seh makana turah kesadaran i bas dirinta maka tujun geluhta enda e me guna mpermuliaken Dibata. Adi enggo lit pengangkanta bahwa geluhta enda guna mpermuliaken Dibata, maka i japa pe kita, i bas situasi ras kondisi si kugapa pe, lit entah pe la lit si ngidah entah pe ngawasisa, kerina kesempaten e banci ipergunaken guna ngukurken, mbelasken (i bas pusuh), ras ngelakoken kerina si ngena ate Dibata.    

BIMBINGEN PA MORIA TGL. 21 - 27 FEBRUARI 2016

PA HDS I

Nrs. Bp. Rey Tarigan

Si Man Ogen : Markus 10:13-16

Tema : ALOKENLAH ANAK-ANAK BAGI AKU NGALOKEN ANAK-ANAK E

Tujun : Gelah Moria :

1) Ngasup ngaloken anak-anak e bagi Jesus ngalokensa

2) Ngergai anak-anak ras ndampingisa gelah jadi pasu-pasu bas kegeluhenna

Metode : Diskusi

Penjelasen Bahan Ogen

Markus 10:13-16 nuriken kerna pasu-pasu Yesus man anak-anak. Anak-anak i bas struktur masyarakat Yahudi i bas sada sisi memang iergai sebage karunia Dibata nari, tapi i bas sisi si deban lit pengangkan maka usia anak-anak e me termasuk i bas kelompok usia si la produktif, lenga banci mandiri (tingkat ketergantungenna man kalak si dewasa sangat tinggi), secara fisik pe rentan terhadap eksploitasi entah pe mudah itindas kalak si dewasa secara fisik, janah ianggap lenga lit “hak-hakna” i tengah masyarakat. E maka i bas sada sisi, anak-anak kurang iperhitungken keberadaanna i tengah masyarakat Yahudi entah pe igolongken ku bas kelompok masyarakat si lemah. Arah kecenderungen enda makana lit pengajuk i bas Pustaka si Badia gelah mperdiateken anak melumang (Ul. 10:18; Jes. 1:17; Jer. 22:3, 49:11; Jak. 1:27, rsd.). Mungkin enda nge si melatarbelakangi ajar-ajar Tuhan Yesus merawa nandangi orang tua si atena maba anak-anakna gelah ipasu-pasu Tuhan Yesus. Banci ka nge erkiteken lit pengangkan bahwa anak-anak e lenga pas guna ngaloken pasu-pasu i bas Yesus nari. Kenca enggo iteh Yesus peristiwa e, makana irawai Yesus ajar-ajarNa.

I bas bahan ogenta sendah, lit piga-piga hal si penting e me: 1) cara pandang Yesus nandangi anak-anak la seri bagi kalak Yahudi pada umumna si kurang ngergai keberadaan anak-anak. Sikap Yesus nandangi anak-anak e me positif seri bagi sikapNa man kalak si dewasa. 2) Arah sikap Yesus si positif nandangi anak-anak enda teridah visi ras misi Yesus si jelas nandangi anak-anak, e me anak-anak nge kap si empuna Kinirajan Dibata. I bas visi ras misi si jelas enda teridah maka anak-anak pe ialoken ras iergai keberadaanna i adep-adepen Dibata amin pe ianggap lenga seh pengangkanna kerna Dibata. Bahkan i bas ay. 15 anak-anak ibahan Tuhan Yesus jadi contoh i bas karakterna si polos denga nandangi pengangkan kerna Kinirajan Dibata, sebab memang guna tuhu-tuhu ngangkai kerna Kata Dibata entah pe Kinirajan Dibata si ibutuhken paling utama e me kap sikap si polos, mudah menyerap (menerima), terbuka, bagi sifat anak-anak. 3) Pasu-pasu Dibata berlaku man kerina kalangan termasuk anak-anak si kitik denga sekali pe.

Aplikasi

Tema PA Moria sendah e me “Alokenlah anak-anak bagi Aku ngaloken anak-anak e” alu tujun gelah Moria: 1) ngasup ngaloken anak-anak e bagi Jesus ngalokensa; 2) ngergai anak-anak ras ndampingisa gelah jadi pasu-pasu bas kegeluhenna. Tema ras tujun enda, sitik entah pe mbue, nggambarkenca uga kecenderungan sikap kalak dewasa i bas konteks si gundari nandangi anak-anak. I bas media massa nari usur sibegi berita-berita kerna kekerasan entah pe eksploitasi nandangi anak-anak. Engkai makana melala denga eksploitasi nandangi anak-anak seh jaman si modern enda? Sebab memang seh asa gundari anak-anak masih ianggap manusia si lenga kuh erkiteken usiana. Situasi si bagenda tentuna arus menjadi concern kita sebage orang tua si enggo ngaloken pasu-pasu Dibata arah kerehen anak-anak i bas jabuta sekalak-sekalak.

Tujun si pemena mabai kita gelah tuhu-tuhu ngaloken anak-anak bagi Yesus ngaloken anak-anak si kitik denga. Tujun enda banci tercapai arah sikapta si positif nandangi anak-anak. Sikap si positif bagi sikap Tuhan Yesus mabai kita ngergai anak-anak sebage manusia si kuh (manusia seutuhnya). Melala denga kita orang tua si kurang menerima keberadaan anak-anakta erkiteken umpamana gutul, berkebutuhan khusus (cacat fisik), la bagi ukurta, rsd. I bas keadaan si bage rupana tetap kita arus bersikap positif. Sikap si positif enda mabai kita ku bas visi ras misi si jelas nandangi anak-anakta. Kai visi ras misi si jelas enda? Jawabenna lit i bas tujun si peduaken e me, anak-anakta jadi pasu-pasu bas kegeluhenna bage pe man kegeluhen kalak si deban. E maka pendampingan man anak-anak menduduki peran si penting alu palas penerimaan ras penghargaan si tulus nandangi anak-anakta.
Persoalenna i bas jaman si modern enda melala orang tua si la nai lit waktuna guna mendampingi anak-anakna. Melala penyebabna, umpamana orang tua sibuk membangun karir seh makana la nai lit waktuna guna mendampingi anak-anak, erkiteken melala senna makana pendampingan man anak-anakna iserahken ku kalak si deban. Entah pe erkiteken teknologi si berkembang pesat i bas jaman enda, maka si ndauh jadi ndeher sedangken si ndeher jadi ndauh, sibuk kerina anggota keluarga dengan gadget masing-masing aminna pe radu ras pulung i bas sada rumah. Berkarir ras makeken teknologi si modern labo hal si salah, tapi rikutken ogenta sendah, arus lit komitmen i bas orang tua nari guna ngelitken waktu si berkualitas guna mendampingi anak-anak. Tuhan Yesus i bas ogenta sendah ay. 16, “Jenari idakepNa anak-anak e sekalak-sekalak, itamakenNa tanNa ku babona janah ipasu-pasuNa” (Bhs. Ind., “Lalu Ia memeluk anak-anak itu dan sambil meletakkan tangan-Nya atas mereka Ia memberkati mereka”). Sentuhan man anak-anakta sangat penting i bas jaman si serba digital ras maya enda. Bage pe pasu-pasu arah orang tua nari man anak-anakna pe sangat penting, e maka usur belasken kata-kata pasu-pasu man anak-anakta. Si terakhir, ula lupa kita ertoto man Tuhan, mindo kepentaren ras kengasupen guna mendampingi anak-anakta. 

BIMBINGEN PA PERMATA TGL. 21 - 27 FEBRUARI 2016

JAM DOA PERMATA GBKP

Tema : “Identitas yang jelas sebagai PERMATA GBKP Misioner”

Bahan Renungan : Pengkhotbah 11:9

Erkiteken metode PA PERMATA sendah “praise and worship” (Jam Doa PERMATA) e maka la lit pembahasen kerna bahan Pustaka si Badia. Bahan renungen iogeken saja i bas liturgi jam doa PERMATA si enggo isikapken.