Bimbingen PJJ Tgl. 21 - 27 Februari 2016

BIMBINGEN PJJ TGL. 21 - 27 FEBRUARI 2016

Pdt. Larena br. Sinuhadji (Nd. Rey Tarigan)

Tema : ARON DIBATA KAP KITA MAJEKEN KULA NI KRISTUS (1 Korinti 3:8-11)

Penjelasen Bahan Ogen & Renungen

Bahan ogenta (1 Kor. 3:8-11) la banci ilepasken i bas perikop (pasal 3 secara keseluruhen) bage pe kerna persoalen si lit i tengah-tengah perpulungen i Korinti. Maka terjadi perpecahen, pengkotak-kotaken sada ras si debanna. Kurang lit kiniersadan i tengah-tengah perpulungen (ps. 1:10, “Nina Paulus, kupindo man bandu ersadalah ukurndu, ersadalah sura-surandu”. Ps. 1:11, “i tengah-tengahndu lit turah perjengilen”). Bahkan i bas pasal 3 situhuna lenga bo lit pertumbuhen kiniteken i tengah-tengah perpulungen Korinti aminna enggo ialokenna Berita si Meriah. Jelas ituriken Paulus, nai pe tangtangna Paulus melayani i Korinti inemen susu nge ibereken Paulus man perpulungen sabab medanak denga kinitekenna. Sabab lenga ngasup perpulungen ibereken “nakan keras”. Janah gundari pe perpulungen lenga ngasup ngalokenca (ay. 2d). Ertina, tetap lenga lit pertumbuhen kiniteken i bas perpulungen, nggeluh rikutken biak doni denga. Sician-cianen, turah perubaten, lit kelompok-kelompok bahkan arah turah kiganjangen ukur, mbiar la teridah kerna talenta si lit bas dirina sabab iakapna si bas ia ngenca akapna si mehulina.

Paulus rembang tengah rukur la ia nggit muat kesempaten guna menonjolken dirina aminna lit sada kelompok si sangat mendukung ia (“mengaku diri golongan “Paulus”). Ikatakenna maka serayan Tuhan seri i lebe-lebe Dibata, labo lit si ganjang teruken, sabab selaku serayan Tuhan tugasna e me kap mabai perpulungen gelah nggeluh erkiniteken (paksa si e lit kebiasaan milih-milih dingen mbanding-mbadingken serayan Tuhan). Si erbanca maju dingen berbuah perpulungen e me kap Tuhan, sedangken Paulus ras serayan Tuhan si deban alat i tan Dibata. “Aku nuasa, Apolos niramsa tapi Dibata si erbahanca turah”. Arah kata-kata si e mabai kita labo perlu kita peganjangken ukur (sombong) aminna pe sekali lit kelebihenta, sabab kita labo penting, si penting dingen layak imuliaken e me kap Dibata si peturahsa. Si nuansa ras si niramsa sada aron kap, “Tapi sekalak-sekalak ibereken Dibata upahna rikutken pendahinna sekalak-sekalak”. Sada ras si debanna arus tetap bekerjasama sebage aron Dibata, tapi penghargaan (upah) ibereken Tuhan rikutken pendahinta sekalak-sekalak. Ertina i jenda ituntut selain kerjasama sebage serayan Tuhan e me kap tanggung jawabta secara pribadi man Tuhan arah kai pe si enggo iberekenNa banta.

Perpulungen e me kap bangunen Dibata. Dareh Kristus, Kesah si Badia, rikut ras serayan-serayan Tuhan si arah lebe enggo leben majeken perpulungen kalak si tek (tubuh Kristus). Genduari tanggung jawabta guna terus membangun tubuh Kristus gelah kehadiren kalak si tek tetap jadi sira ras terang  (berkat). Bangunen e enggo pajek alu mehuli erkiteken palasna Yesus Kristus. Alu bage, uga makana tetap paguh perpulungen kalak si tek, kehadirenta jadi pasu-pasu man isi doni enda, la banci lang tetap kita erpalas ku bas Yesus Kristus. Pemere, talenta, kinibayaken, rsd., si enggo sialoken kita bas Dibata nari arus tetap mampu kita me-menej-sa, dingen bekerjasama kita guna saling melengkapi ras membangun gelah gelar Tuhan tetap imuliaken. Virus-virus si la mehuli (bagi umpamana: kiniganjangen ukur, egois, erpihak-pihak, la lit kekekeleng, rsd.) merupaken penghambat guna kita banci bekerjasama majeken kula ni Kristus.

Visi GBKP 2016-2020 “GBKP menjadi kawan sekerja Allah untuk menyatakan Rahmat Allah kepada Dunia”, i bas bahasa Karo, “GBKP Aron Dibata guna jadi pasu-pasu man isi doni enda”. Ertina, kerina kita subuk serayan Tuhan, ras perpulungen e me kap aron Dibata guna membangun tubuh Kristus, sabab e me tanggung jawabta selaku kalak si enggo ngaloken keselamaten bas Ia nari. Arah erbage-bage hal kita banci membangun kula ni Kristus: talenta si pelain-lain, materi, doa, kehadiren rsd. Partisipasinta sangat iarapken kel gelah tuhu-tuhu kesempaten si lit sipergunaken alu maksimal guna kemulian Tuhan ras jadi pasu-pasu man isi doni enda. Si mehulina, alu kesadaren sendiri sibereken dirinta guna berpartisipasi i bas kegiaten kai pe (persekutuan, kesaksian, diakonia, keuangen, ide-ide kreatif, rsd.). Mari radu ras sitingkatken komitmenta i bas berpartisipasi i bas tahun enda gelah reh teremna kita si terpanggil guna geluhta jadi pasu-pasu man isi doni enda.