Bimbingen Khotbah Minggu 28 Februari 2016

BIMBINGEN KHOTBAH MINGGU 28 FEBRUARI 2016

Passion IV Okuli (Matangku tetap Nare ku Kam)

Pdt. Larena br. Sinuhadji (Nd. Reynard Tarigan)

Invocatio : “Erjabap Jesus, "Kalak si nginem lau enda muas denga. Tapi kalak si nginem lau si Kubereken man bana, lanai ia muas seh rasa lalap. Sabap lau si Kubereken e jadi sumbul si erburak-burak i bas ia dingen mereken kegeluhen si tuhu-tuhu si la erkeri-kerin.” (Johanes 4:13-14)

Ogen : 1 Korinti 10:1-13

Khotbah : Jesaya 55:1-9 (Tunggal)

Tema : SI MUAS DINGEN MELIHE DAHILAH TUHAN

Penjelasen Bahan Pustaka Si Badia

Bahan invocatiota merupaken perkataan Tuhan Yesus man sekalak diberu Samaria si sangana muat lau i sumur Jakub. Ibenai Yesus ercakap membangun komunikasi, si kin sedekah e kalak Jahudi ras kalak Samaria la pernah mehuli hubungenna (termasuk kalak Jahudi la nggit make kai pe si enggo ipake kalak Samiria). Sedangken paksa si e Yesus mindo lau inemen man diberu e. Lit kesungkanen, keberaten i bas diberu kalak Samaria ndai mereken lau e man Yesus (ay. 9,11). E maka nina Yesus, “Kalak si minem lau enda muas denga, tapi kalak si nginem lau si Kubereken man baNa lanai ia muas seh rasa lalap”. Sabab lau si ibereken Tuhan Yesus e jadi sumbul si erburak-burak man si minemsa dingen mereken kegeluhen si tuhu-tuhu si la erkeri-kerin. Si nimaksud Yesus e me kap diriNa sendiri. Maka ise si tek man baNa, idatna kegeluhen si tuhu-tuhu dingen tetap terpancar i bas semangat, sukacita, pengarapen si la erkeri-kerin sabab terhubung tetap ia ras Yesus.

I bas bahan ogen si pemena, Paulus mereken kata pertenget man perpulungen gelah tetap nggeluh bagi si ngena ate Dibata ula usih kebiasaan si nilakoken nini-nini bangsa Israel ndube. Aminna kegeluhen pertendin bangsa Israel ndube iperdiateken Musa (ay. 3, “Makan makanan rohani yang sama, dan minum minuman rohani yang sama yaitu dari gunung batu Rohani yang menyertai mereka; gunung batu itu ialah Kristus sendiri”) tapi tetap denga ndabuh ku bas dosa erkiteken kurang metenget (waspada, ula sepele, ay. 12, “Orang yang menyangka dirinya berdiri teguh, hendaklah berhati-hati; jangan sampai ia jatuh”). La ngasup bangsa Israel paksa si e nimbak peraten dagingna: nembah berhala, erlua-lua, ncubai Tuhan Dibata, jungut-jungut, rsd. Kai si enggo ialami nini-nini bangsa Israel ndube jadi pelajaren rikut pertenget man kalak Kristen paksa si e i Korinti. Gelah ula min sempat jatuh kepada dosa si enggo pernah ilakoken nini-ninina ndube, khususna penembahen berhala. Banci jadi erkiteken mbuena kiniseran si man hadapen perpulungen la nari andalkenna kuasa Tuhan tapi enggo pindona penampat man dibata-dibata si deban. E maka nina Paulus, “Kerina percuban si reh man bandu e bali nge biakna ras percuban si biasa seh man manusia si deban. Tapi Dibata setia nge i bas padanNa. Labo ipelepasNa kam icubai lebih asa gegehndu. Asum kam ngenanami percuban, iberekenNa nge gegeh man bandu gelah ngasup kam nggengkenca, janah radu ras si e iberekenNa pe dalan pulah”.

I bas bahan khotbah ilumbaken nabi Jesaya gelah bangsa Israel mulihken kempak Tuhan sabab sedekah enda enggo itadingkenNa Tuhan alu ngelakoken perbahanen-perbahanen si ngeliami gelar Tuhan. Undangen Tuhan man umatNa alu kata “marilah” (lit 5 kali). Enggo isikapken Tuhan kai si niperluken bangsaNa: lau inemen man si muas, nakan dingen pan asa puasna man si la erduit, anggur ras susu alu gratis. Sabab sedekah enda, si nilakoken bangsa Israel sia-sia, lit pe senna tapi tetap denga melihe, muas dingen lit lalap iakapna si kurangna. Ertina, amin pe lit materi, kebayaken tapi labo maba dame sejahtera, erkiteken kai si ilakoken bangsa enda di luar Tuhan. Lebih mengandalkan kuasa-kuasa si deban, bangsa-bangsa si deban, asangken mangandalken kuasa Tuhan (ay, 5).

Pendilo Tuhan e arus irespon perpulungen. Kekelengen si enggo icidahken Tuhan e arus itanggapi. Tuhan leben si berinsiatif janah kai si enggo ibahan Tuhan ula isia-siaken. Ay. 6-8 merupaken ajaken Jesaya man umat Israel guna menanggapi kekelengen Tuhan. Daramilah Tuhan tupung banci denga jumpa ras Ia (kesempaten banci jumpa ras Tuhan arus sipakeken). Ertotolah man baNa, tupung Ia ndeher denga, sabab Tuhan hanya sejauh doa. Itadingken kalak jahatlah perbahanenna si la mehuli, perukurenna si erbatu-batun, si negatif isambari alu perukuren Tuhan, perukuren si positif. Sabab Tuhan perkuah dingen simpar bas Ia pengalemi dosa. Ertina, i bas pihak Tuhan selalu terbuka untuk manusia yang mau bertobat dan berbalik kepadaNya. La lit Tuhan istilah la kualemi kam, uga pe mbelinna kesalahenta adi kita tuhu-tuhu mpeteruk dirinta ras minta ampun man Tuhan pasti ialemi Tuhan kita.

Aplikasi

I bas Minggu Passion si peempatken enda mulihi iundang Tuhan kita guna tetap ndahi Ia. Tuhan setiap saat mereken diriNa sebage solusi i bas erbage-bage persoalen si ialami kita. Marilah kam si latih dingen beraten bahan Aku jadi ingan pengadi-ngadiNdu. Tema pe ngatakenca, “Si muas dingen melihe dahilah Tuhan sabab Dibata e ulu kegeluhenta”. Melala manusia termasuk kalak Kristen asum ia lit i bas kesuliten (gambaren muas,melihe) tapi reh ku si deban di luar Tuhan (dibatana peraten kulana, si iukurina barang doni ngenca, bdk. Pil. 3:19). I bas kesulitan ekonomi erdaya narkoba, korupsi alu alasen guna kebutuhen keluarga, asangken la man, rsd. Walupe lit si ngelakoken si e, labo nari masalah ekononi si sulit sabab teremen ka kalak bayak si korupsi. Kebahagian hanya iukur secara materi. I bas pinakit si mekelek si ialamina pindona kuasa si deban si nambari. Bage pe i bas kiniseran-kiniseran si ialami kita, la kita mengandalkan kuasa Tuhan campur tangan tapi lebih kita mengandalkan gegehta ras kuasa si deban.

Teluna bahanta i bas Minggu enda mpersingeti kita gelah tetap kita mengandalken Tuhan (Okuli : matangku tetap nare ku Kam). Labo ibereken Tuhan perbeben lebih asa ngasupta dingen pasti asum kita mindo penampat baNa iberekenNa gegeh dingen dalan pulah man baNa.