BIMBINGEN PJJ GL. 14 - 20 PEBRUARI 2016
Pdt. Larena br. Sinuhadji (Nd. Rey Tarigan)
Tema
: UNDANG-UNDANG GUNA KINIRATUREN (Ulangen 6:1-3, 1 Korinti 14:33)
Penjelasen Bahan & Renungen
Perikopta ibere judul “Undang-undang pematang” (Bhs. Ind. : “Kasih
kepada Allah adalah perintah yang utama”). Pasal 6 ibenai i bas pasal 5 nari i
ja Musa mpepulung kerina bangsa Israel ras mereken Undang-undang Tuhan guna
ipelajari ras idalanken bangsa e. Undang-undang Tuhan si ibenai alu Sepuluh
Perentah Dibata, hukum-hukum keagamaan, sosial, sipil, kriminal (ps. 12-26).
Kai si enggo iperentahken Tuhan enggo idalanken Musa e me ngajarken
Undang-undang e man bangsa Israel. Janah ipindoken Musa gelah kidekah kegeluhen
bangsa Israel ras kesusurenna arus erkemalangen man Tuhan dingen ngikutken Undang-undang
(takut akan Tuhan dan melakukan perintah Tuhan dengan setia; tidak menyimpang
ke kanan atau ke kiri). Janah ulih i bas kesetian ndalanken Undang-undang Tuhan
e, e me kap ibereken Tuhan umur si gedang, mejuah-juah nggeluh i bas negeri si
enggo ipadanken Tuhan dingen jadi bangsa si mbelin. Undang-undang enda ibereken
Tuhan man bangsa Israel gelah lit pegangen bangsa e dikenca enggo bengket ku
taneh Kanaan, sabab enggo pasti melala bangsa-bangsa si deban si isekelewetna
si la erkemalangen man Dibata. Tentu adi la lit Firman Tuhan si jadi pegangen
man bangsa e enggo pasti kegeluhen bangsa e terbawa arus entah pe terikut-ikut,
e me kegeluhen si la erturi-turin, menyembah dibata-dibata si deban, la erpepah
dingen la ertujun.
Kerehen Yesus Kristus ku doni enda labo guna meneken Undang-undang
tapi guna nyempurnakenca (Mat. 5:17-19,43-44). I bas kehadiren Yesus Kristus,
maka Undang-undang e enggo isariken jadi dua bagin e me ngkelengi Tuhan Dibata
ras ngkelengi teman manusia. I bas bahan PJJnta minggu si lepas (Pilipi 3:10),
Paulus si awalna kalak Jahudi enggo mengalami perubahen kenca enggo itandaina Yesus
Kristus. Ope tandaina Kristus ernalem kel ia nandangi Undang-undang Tuhan (Torat).
Sabab akapna Undang-undang Tuhan e nelamatken ia. Tapi perkuah ate Tuhan (sola gratia) si enggo mabai ia nggeluh
erkiniteken man Tuhan. “Lanai bo kuusahaken ngerambakken diringku man Dibata arah
ndalanken undang-undang. Tapi aku enggo rembak ras Dibata arah kinitekenku man
Kristus. Dibata jine si enggo ngerembaken aku kempak diriNa erkiteken
kinitekenku” (sola fide - Pilipi 3:9).
E maka man banta pe Undang-undang Tuhan labo nari jadi beban si mberat tapi justru
membebasken kita (memerdekaken kita - bdk. Jakub 1:25c, “Pedah Dibata serta kap
dingen ngasup mbebasken - memerdekaken - manusia). Mbebasken entah pe
memerdekaken i jenda maksudna mbebasken i bas belenggu dosa nari, labo bebas
guna ngelakoken si la mehuli (Gal. 5:13).
Dibatanta e me Dibata si ratur, itepaNa doni enda ras kerina isina alu
teratur, terprogram, sistematis. Raja Daud ngakukenca maka Dibata e me Dibata si
ratur, “Sebab Ia menegakkan bagiku suatu perjanjian kekal, teratur dalam
segala-galanya dan terjamin” (2 Sam. 23:5b). I bas bahan ogenta sendah pe (1
Kor. 14:33) jelas maka Dibatanta e me Dibata si ratur. Konteks paksa si e i
perpulungen Korinti terjadi kinilaraturen i bas kegeluhen berjemaat erkiteken mbue
karunia si pelain-lain. Guna terjadi kiniraturen i bas perpulungen Korinti
makana Rasul Paulus nulisken surat enda. Jadi jelas bahwa Undang-undang Tuhan
ilitken guna kiniraturen kegeluhen. Kiniraturen sangat ibutuhken i bas
kegeluhenta, banci sibayangken adi geluhta la teratur pasti melala tujuan i bas
geluhta si la tercapai. Bahan PJJ sendah mabai kita guna mengevaluasi seh i ja perentah
Dibata ijadiken pedoman guna kiniraturen geluhta. E maka mari radu ras kita
ertekad guna ngelakoken perentah Tuhan si enggo seh man banta, sebage wujud
pengataken bujurta man Tuhan si enggo nelamatken kita sekaligus gelah terjadi
kiniraturen si lebih baik i bas geluhta.
Tidak ada komentar:
Posting Komentar