Bimbingen PJJ Tgl. 25 - 31 Oktober 2015

BIMBINGEN PJJ TGL. 25 - 31 OKTOBER 2015

Pdt. Larena br. Sinuhadji (Nd. Reynard Tarigan)

Ogen:

Esra 8:21-23; Matius 9:14-17

Tema:

ERTI ERPUASA

Tujun:

Gelah ngawan ni perpulungen:

1) Meteh erti ras makna erpuasa i bas Pustaka si Badia

2) Meteh erti erpuasa i bas ...

Penjelasan Bahan Pustaka Si Badia

Kitab Esra si jadi renungenta ngerana kerna kegeluhen bangsa Israel i bas perdalanen mulih ku Jerusalem i bas pembuangen Babil nari. Ipake Tuhan raja Persia guna mulahi bangsa Israel. Janah Esra sebage imam mabai bangsa Israel lako tetap ernalem man Tuhan i bas kegeluhen bangsa Israel bage pe i bas perdalanen mulih ku Jerusalem. Situhuna banci saja ipindona penampat raja guna banci memfasilitasi i bas kemudahen bangsa enda mulih seh ku Jerusalem, tapi Esra sebage pemimpin spiritual icidahkenna man bangsa Israel bage pe man raja Persia, uga hebatna kuasa Tuhan si tetap nampati. Janah mela kel ia, adi pindona penampat man raja gelah tentera raja si erkuda ngkawali i bas perdalanen sabab enggo ikataken Esra maka Dibata si isembah bangsa Israel, Dibata si masu-masu kalak si ernalem man baNa. E maka i jeda, iperentahken Esra kerina erpuasa dingen mpeteruk diri i lebe-lebe Dibata janah mindo gelah ikawali Dibata ia ras anak-anakna rikut ras kerina sikerajangenna.   E maka erpuasa dingen ertoto bangsa enda man Dibata gelah ikawali Tuhan janah pertoton bangsa enda ialoken Tuhan. Jelas arah perikop enda, erpuasa si iperentahken Esra dalam rangka mpeteruk diri i lebe-lebe Tuhan janah gelah tetap Tuhan si erkuasa i bas kegeluhen bangsa enda.

Bage pe i bas Matius 9:14-17 siidah kerna penungkunen ajar-ajar Johanes man Tuhan Jesus, i ja ajar-ajar Tuhan Jesus la erpuasa. Sedangken ajar-ajar Johanes ras kalak Farisi megati erpuasa. E maka penungkunen ajar-ajar Johanes e ijabab Tuhan Jesus alu sada gambaren kerja-kerja erdemu bayu. I ja i bas pesta e tuhu-tuhu lit sukacita, subuk si empo ras si sereh rikut kalak si tenahken, janah labo lit kalak si la menikmati pangan si enggo isikapken. Janah memang soal puasa labo ilarang Tuhan Jesus tapi idalanken alu motivasi si payo, labo dalam rangka ndarami keselamaten entah pe kesombongen rohani gelah ieteh kalak kita erpuasa, (bdk. Matius 6:16-18, “Nina Jesus adi kam erpuasa, erduhap kam gelah labo ieteh kalak kam erpuasa tapi Bapa si ni Surga ngidah perbahanenta e”). Puasa si iarapken Tuhan Jesus tuhu-tuhu banci nampati kita guna nggeluh i bas kegeluhen si mbaru.

Aplikasi

I bas paksa gundari melala pengajaren kerna erpuasa, secara khusus i bas kalangen Protestan. Puasa Ester, puasa la man tapi minem banci, puasa mantangken pangan-pangan berupa daging entah pe hanya nakan putih saja, puasa Daniel, rsd. Rikutken bahanta sekali enda, maka puasa adalah dalam rangka kita mpeteruk dirinta i lebe-lebe Tuhan, maka Tuhan si tetap nampati kegeluhenta. Puasa merupakan salah sada bentuk disiplin rohani guna banci kita reh rembakna ras Tuhan. Labo idalanken guna kita menyogok Tuhan, ndatken keselamaten entah pe kesombongen rohani, maka lebih badia kalak si erpuasa asangken si la pernah erpuasa.

Bimbingen Pastoral si iterbitken Moderamen GBKP kerna “Doa dan Puasa” ngatakenca, “Puasa adalah latihan kerendahan hati untuk dapat menyangkal diri. Praktek doa puasa merupakan upaya membangun kesalehan pribadi yang tidak dapat dipaksakan untuk umum. Kesalehan pribadi membuat seseorang lebih rendah hati, semakin lebih banyak bekerja daripada bicara, semakin bersungguh-sungguh melayani Tuhan dan mengasihi sesama manusia” (hlm. 15).

Alu bage, rikutken bahanta sekali enda, maka puasa banci silakoken dalam rangka membangun disiplin rohaninta, gelah reh ngasupna kita menyangkal sura-sura kedagingenta (umpamana: puasa la ngisap sada wari, puasa jungut-jungut, puasa er-Fb, rsd.). Jadi labo hanya persoalan la man ras la minem i bas piga-piga waktu, tapi apakah reh ngasupna kita membangun karakter si mehuli si nisura-suraken Tuhan Jesus bas kegeluhenta (bdk. Jesaya 58:6-7, “Enda kap puasa si ngena ateKu: Osarilah rante pengiket janah agui baban kinibujuren, janah bebaskenlah kalak si idehkendu. Raskenlah panganndu ras kalak si kelihen, janah berelah kalak musil si la lit rumahna kesilang i bas rumahndu. Berelah uis man kalak si la lit uisna, janah ola itulakndu kade-kadendu si mindo penampat”). Ula sempat puasa si ilakoken kita ndabuh ku bas ritual-ritual bagi si ilakoken kalak Jahudi, terjeng kebiasaan, pekulah-kulah gelah idah kalak lebih rohani, entah pe dalanna menyogok Tuhan. Walaupe kita ertoto ras erpuasa i bas ngalaken perbeben si ialami kita tetap otoritas entah keputusen e i bas Tuhan (bdk. 2 Samuel 12:16-23 i bas Daud ertoto ras erpuasa tupung anakna sakit mekelek, entah mawen mekuah ate Dibata. Tapi tetap keputusen i bas Tuhan, i ja anakna mate). Erpuasa si ilakoken kita, sekali nari dalam rangka membangun spiritualitasta secara pribadi.