Bimbingen Khotbah Minggu 11 Oktober 2015

BIMBINGEN KHOTBAH MINGGU 11 OKTOBER 2015

MINGGU MORIA GBKP

Pdt. Larena br. Sinuhadji (Nd. Reynard Tarigan)

Invocatio :

“Kam si njadiken tep-tep bagin i bas badanku, ibentukNdu aku i bas bertin nandeku” (Masmur 139:13)

Ogen :

2 Korinti 12:11-12 (Tunggal)

Khotbah :

Kuan-kuanen 31:28-30

Tema :

MORIA SI PENTAR

PENJELASEN BAHAN PUSTAKA SI BADIA

Perikopta secara utuh e me kap kerna kata ajar sekalak nande man anakna e me kap raja Lemuel gelah ula salah i bas muat sekalak ndehara (si jadi kembrahenna). Ndehara si pentar si ndauh ergan asangken permata. Janah icidahken i jenda kerna erbage-bage tanggung jawab, peran ras karakter si luar biasa i bas sekalak nande (ndehara). Sekalak si mehuli man perbulangenna (ay. 11), mejingkat (ay. 11-19, 24-25, 27), melumbar mere, peduli man kalak si kekurangen (ay. 20), bahasana lemah lembut (ay. 26). Arah kai si ilakokenna dat respon si mehuli i bas anak-anakna ras perbulangenna. Anak-anakna ngataken bujur man bana. Ertina, kehadiren nande e tuhu-tuhu berarti man keluargana. Arah kerja kerasna, ke-telatenan-na (“telaten” i bas bhs. Jawa nari ertina: sabar, teliti dalam mengerjakan sesuatu, cermat) i bas ngaturken jabu, kekelengen si lit bas ia termasuk man kalak si deban sangat membanggakan anak-anakna.

Perbulangenna pe mujiken ia. Perbulangenna tuhu-tuhu nggejapken maka ia banci sukses, terberita bahkan keluargana ratur erkiteken ndeharana si sangat berperan aktif, ndeharana si sangat mendukung (lit ungkapan si ngatakenca: “di balik pria-pria hebat, ada wanita-wanita yang luar biasa”). Ibandingkenna ras diberu-diberu si deban, si mehuli, tapi ndeharana ndauh ulin asangken kerina diberu si lit. Enggo pasti ndeharana si ikatakenna, ndauh ulin asangken diberu si deban, sabab labo ka mungkin iperdiatekenna keluarga demi keluarga guna ibandingkenna ras ndeharana. Janah lebih tepat adi ay. 29 enda sipahami sebage ungkapan pengakuan subjektif si secara dogmatis banci ipeseri ras bahasa si sifatna konfesional - evokatif bagi pengakuan iman (konfesional [konfesi]: berusaha menyuarakan apa yang diyakini [diimani], evokatif: membangkitkan panggilan untuk mempercayai [mengimani] sesuatu). Alu bage, banci sipahami lit penggejapen entah pe penilaian si subjektif maka perbulangen ndai, mengakui melalui suatu ungkapan keyakinan bahwa ndeharana ndauh ulin asangken diberu-diberu si deban, labo dalam rangka secara sengaja membanding-bandingken ras ndehara kalak si deban. Tapi si pasti i jenda lit hal si positif, e me perbulangenna tuhu-tuhu menghargai kai si enggo ilakoken ndeharana. Sabab lit perbulangen si sama sekali la lit pengataken bujurna, penghargaanna man ndeharana, amin sekali enggo ilakokenna tanggung jawabna alu mehuli. Sabab pujian e penting dalam rangka membangun keharmonisen i bas keluarga.

Bahkan penulis Kuan-kuanen, sangat menghargai kinijelen batin ibandingken kinijelen rupa (fisik) si banci masap. Sebab melala diberu si lebih mperdiateken kinijelen rupa asangken kinijelen batin (inner beauty). Alu erbage-bage cara mem-“vermak” (make over) sekitar wajah (hidung, pipi, mata, alis, dagu, dahi) guna banci terlihat cantik. Tapi lenga bo tentu “cantik di luar” dibarengi “cantik di dalam.” Sabab Firman Tuhan sendiri ngatakenca, “Rupa si mejile la terteki.” Ertina, rupa mejile banci jadi penuh dengan kebohongan, kemunafikan, kekerasan, rsd. E maka perikopta sangat menghargai ndehara si erkemalangen man Tuhan. Ndehara si malang man Tuhan, kinijelenna terpancar i bas ayona nari, ras la ibuat-ibuat dingen tahan rasa lalap (bdk. 1 Pet. 3:4, “Tapi bahanlah maka jilendu e rehna i bas pusuhndu nari, kinijelen si la ermasap-masap, e me lemah lembut, dingen ukur teneng. Enda me kinijelen si meherga kel i lebe-lebe Dibata”).

Pengogenta ngerana kerna kesaksin Paulus kerna dirina man perpulungen Korinti si enggo luar biasa ndahiken dahin pelayanenna, dingen banci ipebali ras rasul-rasul si deban, i ja megenggeng Paulus i bas kerina pelayanenna, mbue tanda-tanda sengget si enggo ibahanna, ilakokenna perbahanen-perbahanen si ngelebihi kuasa manusia, rsd. Tapi sama sekali la lit respon si mehuli, pujian, pengataken bujur i bas perpulungen Korinti man Rasul Paulus. Amin bage gia tetap nge idahikenna dahin pelayanenne e alu tutus erkiteken keleng atena man Tuhan si enggo ndilo ia erdahin guna mpembarken Kata Dibata.

APLIKASI

Piga-piga hal si perlu itekanken i bas renungenta dalam rangka HUT Moria GBKP si pe-58-ken:

1. Nderaha si pentar e me kap dambaan setiap keluarga: anak-anak, perbulangen ras kalak i sekelewetna. Enggo pasti palas kepentaren erkiteken erkemalangen man Tuhan. Mbiar man Tuhan nge si mendorong sekalak Moria entah pe nande alu dem tanggung jawab ndalanken kerina tugas-tugasna labo erkiteken paksaan. Subuk ngaturken keluarga, mendidik anak-anak, mperdiateken kebutuhen suami ras anak-anak, bage pe berkarier. Janah si e kerina memang idalanken alu kerjasama i tengah-tengah jabu. Tapi peran sekalak pernanden sangat berarti kel (bdk. Perikop).
2. Kinijelen arah bas nari “inner beauty” arus terus iusahaken ras ilumban sekalak pernanden. Labo berarti kinijelen arah darat nari la penting, si e pe tentu perlu iperdiateken alu porsi si seimbang.
3. Keluarga enggo seharusna mbereken apresiasi, pujian, penghargaan, ngataken bujur i bas kai si mehuli si enggo ilakoken sekalak nande. Nande si ibereken kesempaten man Tuhan guna natang tuah (invocatio), mpebelin-mbelin anak, ngaturken keluarga, rsd. Memang labo guna ndarami pujian makana kita erlumba ngelakoken si mehuli, tapi respon positif secara tidak langsung mereken keriahen ukur, semangat guna tole-tolen erbahan si mehuli. Maka ia pe mengevaluasi diri, kai si enggo idalankenna sedekah enda la sia-sia, tapi tuhu-tuhu bermakna man keluargana bahkan kalak si deban. Walau pe lit ka bas kinatana, anggota keluarga la ngataken bujur, la nehken pujian, ula surut i bas ngelakoken si mehuli. Mbue ndehara entah pe nande si terkadang putus asa, erkiteken kurang iergai bahkan kai si enggo ilakokenna alu dem perjuangen sama sekali la iapresiasi perbulangenna. Labo hanya pendahin i bas rumah tangga idalankenna, nampati keluarga ka i bas erdahin ngelitken kebutuhan jabu, ras terlibat aktif i bas Gereja. Tapi sama sekali kurang iergai, bahkan dianggap hal si biasa. Ula surut ras putus asa guna erbahan si mehuli, maka palasta erbahan si mehuli e me kap erkiteken kekelengenta ras kesetianta man Tuhan.
4. Selamat HUT Moria GBKP si pe-58-ken. Jadilah Moria ras ndehara si pentar, si erguna man keluarga, gereja, masyarakat ras kemulian man Tuhan.