Bimbingen PJJ Tgl. 11 - 17 Oktober 2015

BIMBINGEN PJJ TGL. 11 - 17 OKTOBER 2015

(Pdt. Larena br. Sinuhadji)

Ogen :

Keluaren 20:12, Kuan-kuanen 23:22-25

Tema :

ENGKELENGI ORANG TUA

Tujun :

Gelah ngawan ni perpulungen  :

1) Meteh palas ngkelengi orang tua

2) Ncidahken kekelegen si mbelin man orang tua

3) Ndalanken cara si mehuli i bas ngkelengi orang tua

Penjelasen Bahan Pustaka Si Badia

Keluaren 20:12 merupaken pedah si pelimaken i bas 10 Pedah Dibata. Isina, e me kap gelah mehamat man orang tua, bapa ras nande gelah banci kam ndekah nggeluh i bas negeri si ibereken Tuhan man banta. 10 Perentah Dibata enda pe isuratken i bas kitab Ulangen 5:16, “Hamati nande ras bapandu, enda me perentahKu, Tuhan Dibatandu, gelah mejuah-juah, janah cawir metua i bas negeri si ibereken Tuhan man bandu (Israel)”. Ertina jelas, maka mehamat man orang tua, engkelengi orang tua merupaken perentah Tuhan man banta. Ras i bas kita nehken kehamaten, kekelengen man orang tua, maka Tuhan pe masu-masu kita, ndekah kita nggeluh i bas negeri si ibereken Tuhan banta rikut iberekenna kejuah-juahen banta.

Bage pe i bas kitab Kuan-kuanen e me kap kata nasehat gelah mehamat ka man orang tua. Erbage-bage hal banci silakoken i bas kita ngehamati orang tuanta, subuk patuh megiken kata ajar orang tua, ngkelengi ras ngergai orang tua amin sekali enggo metua. Banci jadi erkiteken enggo beluh ras meganjang persekolahen anak e, kurang nari hamatna man orang tua, sabab enggo iakapna ketinggalan jaman pemeteh orang tua. Sada kemalemen ate man orang tua adi anakna erkemalangen man Dibata. Ertina, bangga orang tua adi anakna sukses sekolah, mantap pendahinna, tapi reh banggana orang tua e adi anakna tetap kalak si patuh man Tuhan. Sabab yakin kel orang tua, arah kesuksesan si idatken anakNa, tetap banci ipermuliakenna Tuhan Dibata ras geluhna pe jadi pasu-pasu (berkat) man kalak si deban, termasuk man orang tuana. Ertina, keberhasilen-keberhasilen si idatkenna labo e erbahanca ia sombong tapi tetap meteruk ukurna.

Aplikasi

Orang tuanta e me kap wakil Tuhan i tengah-tengah doni enda. Benaken bas bertin nari seh enggo dewasa bahkan erjabu kekelengen orang tua tetap icidahkenna man anak-anakna. Isekolahken, ididik, ikelengi, icukupi kerina kebutuhen anak e ras melala denga si deban si ilakoken orang tua. Rikutken perentah Tuhan man banta, maka sebage anak kita arus menghormati orang tuanta. I bas Padan si Mbaru, mulihi Paulus mpersingeti guna banci anak-anak ngehamati orang tuana. Efesus 6:1-3, “O kam anak-anak! Ikutkenlah ajar orang tuandu, sue ras peraten Tuhan sabap patut idalankenndu. Pehagalah nande-bapandu, e me pedah si pemena ibereken Dibata radu ras padanNa. E me, gelah mejuah-juah kam, janah ndekah kam nggeluh i doni enda." Alu erbage-bage cara kita banci ngehamati orang tua. I bas kita patuh megiken kata ajar orang tuanta. Tapi di kenca pengajaren e bertentangen ras ajaren Tuhan, maka pang kita nulaksa alu cara si mehuli (bdk. Perb. Rasul 4:19, 5:29); i bas kita engkelengi ia, mperdiatekenca amin sekali gundari enggo kidauehen ras orang tuanta. Ertelepon guna nungkuni kabar orang tuanta, kesehatenna, SMS mereken ayat-ayat pergegeh, mereken keperlun orang tuanta rikutken kengasupenta. Janah si tuhu-tuhu mereken kemalemen ate man orang tua, di kenca begina berita maka anak-anakna ersada arih ersenina - erturang, ersada arihna i tengah-tengah keluarga, ras anakna e rikut ras keluargana tetap nggeluh erkemalangen man Tuhan.

Melala kasus, i ja orang tua kurang iperdiateken ras ikelengi anak-anakna, sidalih-dalihen i bas merawat orang tua di kenca enggo sakit. Bahkan lit deba si sama sekali menelantarkan orang tuana. Ulangen 27:16 “Dibata numpahi tep-tep kalak si la mehamat man nande ras bapana. E maka kerina bangsa e ngaloisa, Amin!” Bandingken, i bas Absalom mpelawes bapana Daud ras ibunuhna atena bapana. Akhirna ia sendiri si mate (2 Sam. 18). Mari tupung bereken Tuhan denga kesempaten man banta guna ngkelengi orang tuanta, sikelengi ras siperdiateken orang tuanta, tanda kita ngehamati orang tuanta. Sabab di kenca enggo mate orang tua, la lit nari si banci silakoken guna menyenangkan hati orang tua. Tupung sehat denga orang tuanta, banci denga ipanna pangan-pangan si ntabeh si ibaba kita, ipakena baju si itukur kita si ibereken man bana. Di kenca enggo sakit ras la banci erkai pe, situhuna kai pe si ibereken kita (acara peradaten nehken kehamaten man orang tua) la lit nari ertina man bana, terjeng formalitas ngenca. I bas kita tetap ngkelengi orang tua, tandana kita patuh man perentah Tuhan ras Tuhan tetap memberkati kita. Ngkelengi orang tua i jenda termasuk ngkelengi simetuanta (bapak ibu mertua). Si e kerina iidah anak-anakta ras jadi teladan man anak-anakta.