SUPLEMEN RENUNGAN PEKAN DOA GBKP 2026

SUPLEMEN RENUNGAN PEKAN DOA GBKP 2026

Pdt. Larena Sinuhadji (Nd. ReyRapha Tarigan)

Liturgi Kebaktin Pekan Doa GBKP 2026 silahkan klik:

https://drive.google.com/file/d/1LRi6hL4CoFmTHHfXsFoWsRAqhCSowYui/view?usp=sharing

WARI PEMENA - MINGGU 17 MEI 2026

ERTOTO ALU MENGISNGIS (Daniel 9:20-23)

Penaruh

Bujur ninta man Tuhan Dibata erkiteken la tergejap enggo seh ka kita ku Pekan Doa GBKP i bas tahun enda. Adi sioge Kata Penaruh i bas Buku Liturgi Ras Renungen Kebaktin Pekan Doa tahun enda, i je ikataken maka tema besar i bas Pekan Doa-nta tahun 2026 e me “Ertoto alu mengisngis.” Tema enda encidahkenca uga sikap Daniel i bas ia ertoto man Dibata. Alu bage iarapken i bas Pekan Doa tahun 2026 enda erbahanca kita kerina perpulungen GBKP reh ngasupna ertoto sebage sada kebiasaan nggeluh, njadiken ertoto sebage sarana perjumpan ras Dibata, bage pe gelah kita kerina ngidah maka ulih jawaben toto lit i bas kuasa Dibata. I bas kesempaten enda radu ras kita erlajar arah Daniel nari.

Mpebagesi Ogen

Perikop ogenta sendah lit i bas konteks toto pertobaten Daniel guna bangsa Israel si sangana lit i bas pembuangen i Babilon. Enggo radu ras siteh maka bangsa Israel iambekken ku Babilon erkiteken la setia ersembah man Dibata (bdk. 2 Raj. 24-25). Jerusalem ras Rumah Pertoton ihancurken i bas tahun 586 SM. I bas paksa pembuangen e, turah penungkunen, inget denga kin Dibata man bangsa si ikelengiNa? Enggo ioge Daniel nubuaten nabi Jeremia maka 70 tahun dekahna bangsa e lit i bas pembuangen i Babilon (Dan. 9:2; Jer. 25:11-12). Nubuaten e erbahanca Daniel ertoto, erpuasa, make uis guni, ras kundul i bas abu (9:3). Jadi toto Daniel labo terjeng toto pribadi, tapi toto solidaritas nasional ras spiritual.

Adi sioge kerina bindu 9, lit telu bagin. Bagin si pemena ay. 1-3 nuriken antusen Daniel kerna nubuaten Jeremia. Si peduaken, ay. 4-19 nuriken kerna pertoton Daniel si ngakuken dosa ras mindo perkuah ate Dibata nari. Si peteluken, ay. 20-27 e me jawaben Dibata erkelangken malekat Gabriel kerna pertoton Daniel. Ogenta sendah masuk ku bas bagi si peteluken. Tapi adi fokus renungenta sendah erkaiten ras sikap Daniel i bas ia ertoto, maka mehuli situhuna adi sioge ay. 4 nari seh ay. 20. Lit piga-piga hal si akap kami penting guna sirenungken.

Si pemena i bas ay. 20 teridah maka Daniel sekalak si meteruk ukur. Amin pe la ituriken sitik pe si la mehuli kerna dirina i bas Kitab Daniel, tapi meteruk ukurna i lebe-lebe Dibata, iakukenna dosa-dosana.

Si peduaken, i bas ay. 4-20, teridah maka Daniel labo sekalak si egois, si hanya ngukurken dirina jine. Ertoto ia guna kiniulin bangsana si sangana lit i bas kiniseran. Lit spiritualitas solidaritas i bas diri Daniel si erbahanca mediate (berempati) ia nandangi perbeben kalak si deban.

Si peteluken, malekat Gabriel i bas ay. 21 encidahkenca maka Dibata labo ndauh, Dibata ndeher ras kalak si tek man baNa. Janah i bas ay. 23 ikataken maka keleng ate Dibata nandangi kalak si tutus bagi Daniel.

Si peempatken, Dibata labo terjeng ndeher ras engkelengi kalak si tek man baNa, tapi Dibata pe mereken pengertin. Ay. 22 i bas terj. Bhs. Ind., nina, “memberi akal budi kepadamu untuk mengerti.” Enda penting kel akap kami sebab guna meteh sura-sura Dibata i bas geluhta, si ibutuhken e me kepentaren i bas Dibata nari.

Pengkenaina 

Tema i bas Pekan Doa wari si pemena sendah e me “Ertoto alu mengisngis.” Lit dua kali kata “mengisngis” enda isebutken i bas ogenta sendah ay. 20 ras 23. Adi sioge i bas terj. Bhs. Ind., nina “menyampaikan permohonan” entah pe “memohon.” Adi rikutken Kamus Karo - Indonesia (Darwin Prinst) “ngisngis” ertina membujuk atau memohon, bertekun, dengan tetap hati, tidak putus asa. “Mengisngis” ertina memohon dengan sungguh-sungguh, memohon dengan sangat. Rikutken erti mengisngis ndai, Alkitab bhs. Karo mereken pengertin man banta maka pemindon Daniel si isehken i bas pertotonna e bersifat urgent, sangat penting, janah cara Daniel ertoto pe banci ikataken tuhu-tuhu khusyuk (fokus hati dan pikiran hanya kepada Allah). Enda akap kami si jadi renungenta i bas Pekan Doa wari si pemena enda. Penungkunenna, enggo kin kita ertoto alu mengisngis?

Hal penting si deban si akap kami perlu jadi renungenta e me, si pemena spiritualitas solidaritas. Enggo kin lit i bas dirinta mediate, kepedulian, nandangi perbeben kalak si deban, khususna nandangi bangsa ras negaranta? Adi enggo, uga caranta notokenca sedekah enda? Apakah rusur siinget ras sitotoken entah lang? Adi enggo, puji Tuhan! Adi lenga tentu renungenta sendah mpersingeti kita gelah reh mengisngisna kita notoken bangsa ras negaranta, bage pe pergumulen si nialami senina turangta si lit i sekelewetta. Si peduaken, enggo nge pertotonta sedekah enda ilakoken alu meteruk ukur? Kiniteruken ukur erbahanca kita sedar kerna keterbatasenta bage pe kelemahenta selaku manusia i lebe-lebe Dibata. Adi enggo tentu la pernah kita lupa mindo pengalemi dosa i bas Dibata nari setiap kita ertoto. Si peteluken, enggo nge pengertin si ibereken Dibata man banta sipakeken guna ngantusi kai sura-sura Dibata i bas kegeluhenta? Adi enggo, puji Tuhan! Ertina pertotonta labo terjeng mindo hal-hal si sifatna pemenuhan kebutuhen fisik semata, tapi tuhu-tuhu nambahi pengertin entah pe kepentaren i bas Dibata nari. 

WARI PEDUAKEN - SENIN 18 MEI 2026

ERTOTO MAN TUHAN (Lukas 6:12-16)

Penaruh

Adi sisungkun AI kai erti doa, bagenda nina, “Doa dalam Kristen adalah persekutuan, percakapan, dan komunikasi pribadi antara orang percaya dengan Allah sebagai Bapa. Ini adalah ungkapan kasih, ketergantungan, penyembahan, ucapan syukur, dan permohonan yang didasarkan pada hubungan intim, bukan sekadar meminta. Doa adalah napas hidup orang Kristen yang dilakukan tanpa henti (1 Tes. 5:17) sebagai wujud ketaatan dan kasih kepada Tuhan.” Ertina kerina kalak si tek man Yesus Kristus enggo pasti ertoto man Dibata i bas Yesus Kristus. I bas kesempaten enda radu ras kita mulihi erlajar kerna ertoto man Dibata erpalasken teks ogenta sendah.

Mpebagesi Ogen

Perikop si jadi ogenta sendah termasuk ku bas turi-turin awal pelayanen Yesus i Galilea. Kenca enggo ilakoken Yesus erbage-bage tanda sengget, bage pe turi-turin kerna perdebatenNa ras pemimpin agama Yahudi kerna wari Sabat, i bas bindu 5-6, selanjutna ibahan Yesus sada hal si penting e me milih 12 ajar-ajarNa jadi rasul. Adi sinen i bas konteks sosial-religius paksa si e, kai si ilakoken Yesus labo semal sebab IA sendiri si milih ajar-ajarNa. Dua belas ajar-ajar (rasul) e me simbol dua belas suku Israel si enggo ipelimbarui.

I bas konteks Injil Lukas, ertoto rusur ilakoken sope peristiwa penting, umpamana: sanga Yesus ibaptis (Luk. 3:21); sope pengakun Petrus (Luk. 9:18); sope Yesus ipermuliaken Dibata (Luk. 9:28); ras sanga i Getsemani (Luk. 22:39-46). Emaka i bas ogenta sendah pe, ituriken Lukas maka sope milih rasul-rasul, ertoto lebe Yesus man Dibata BapaNa. Enda encidahkenca maka lit hubungen si ndeher antara Yesus ras Dibata BapaNa.

I bas ay. 12 ituriken maka lawes Yesus ku datas sada uruk-uruk guna ertoto man Dibata. I bas terj. Bhs. Ind., ikataken, “IA berdoa kepada Allah sepanjang malam.” Enda encidahkenca maka kepemimpinen Kristen labo ibenaken i bas strategi manusia nari, tapi i bas erpengendes man Dibata nari. Selain si e, Lukas encidahkenca maka: keputusen penting harus ilakoken i bas suasana si teneng, toto e me media guna meteh kai si jadi peraten Dibata, janah pelayanen harus ibenaken alu kiniersadaan ras Dibata.

Ay. 13 nurikenca maka kenca enggo dung Yesus ertoto, idiloNa ajar-ajarNa, je nari ipilihNa 12 kalak si igelari rasul. Lit perbedaan antara ajar-ajar ras rasul. Ajar-ajar (murid) ertina pengikut (pembelajar), sedangken rasul ertina yang diutus. Kata “rasul” asalna i bas kata apostellein nari si ertina mengutus. Maka identitas gereja tangtangna nari bersifat misioner. Ertina gereja e me komunitas si iutus ku tengah-tengah doni enda guna ndalanken misi keselamaten i bas Yesus Kristus. Ay. 14-16 e me gelar-gelar 12 rasul si enggo ipilih Yesus.

Pengkenaina

Tema i bas Pekan Doa wari si peduaken enda e me “Ertoto man Tuhan.” Akap kami, si pemena lebe, enda sada persinget man banta maka ras Tuhan Dibata kita jumpa ras ngerana sanga kita ertoto. Ertina harus lit waktu khusus i bas kita ertoto, waktu si spesial, prime time. Bagi ogenta sendah encidahkenca maka lit waktu khusus Yesus i bas IA ertoto. Memang payo setiap saat kita ertoto, tapi ogenta sendah ngajuk kita kerina gelah ngelitken waktu si khusus guna kita ertoto man Dibata. Si peduaken, ogenta sendah mereken teladan man banta maka sope kita erbahan keputusen-keputusen, babalah kerina rencana kegeluhenta ku lebe-lebe Dibata arah pertotonta. Alu bage kai pe keputusen si ibahan kita, enggo leben sibaba i bas pertotonta man Dibata.

Emaka mari ras-ras sievaluasi dirinta, apakah enggo lit waktu khusus si ibahan kita guna ertoto secara pribadi? Adi enggo, puji Tuhan! Tetaplah sipertahanken si enggo ilakoken kita sedekah enda. Adi lenga, marilah sibahan waktu khusus, waktu si spesial guna kita jumpa ras Dibata i bas pertotonta. Berikutna, enggo nge sibaba kerina rencana geluhta ku lebe-lebe Dibata i bas pertotonta? Adi enggo, puji Tuhan! Adi lenga, benakenlah notoken kerina rencana i bas geluhta, gelah kerina keputusen si ibahan kita tuhu-tuhu lit i teruh ipasu-pasu Dibata.

WARI PETELUKEN - SELASA 19 MEI 2026

TUHAN ALOKEN TENDINGKU (Perb. Rasul 7:54-60)

Penaruh

I bas wari si peteluken enda radu ras kita erlajar arah Istepanus nari, sekalak tokoh Alkitab si luar biasa i bas Padan Si Mbaru, khususna i bas turi-turin kerna perkembangen Gereja i bas Perbahanen Rasul. Engkai maka luar biasa? Erkiteken ia jadi martir si pemenana i bas kekristenan. Nggit ia engkorbanken nyawana guna membela kinitekenna man Dibata i bas Yesus Kristus.

Mpebagesi Ogen

Si jadi ogenta sendah lit i teruh judul perikop “Istepanus ibenteri alu batu.” I bas terj. Bhs. Ind., nina, “Stefanus dibunuh - Saulus hadir.” Terj. Bhs. Ind., akap kami lebih jelas encidahkenca kai si terjadi i bas perikop ogenta sendah, Stefanus ibunuh bage pe i jenda nari gelar Saulus entah pe Paulus ipetandaken.

Sope kita bengket ku bas ogenta sendah, mehuli adi siorati lebe ise Istepanus enda. Istepanus termasuk ku bas pitu kalak si ipilih guna ngelai diberu mbalu-mbalu kalak Jahudi si make cakap Junani, erkiteken la ngaloken pelayanen si seri bagi diberu mbalu-mbalu kalak Jahudi si make cakap Jahudi. I bas Perb. Rasul bindu 6 ituriken maka Istepanus enda sekalak serayan si dem alu kiniteken dingen Kesah Si Badia, dem lias ate ras kuasa i bas Dibata nari si erbahanca ngasup ia erbahan tanda-tanda sengget si mbelin i tengah-tengah jelma si nterem, dem alu kepentaren Dibata nari, ayona bali ras ayo malekat, janah pang ia ersaksi kerna kinitekenna i lebe-lebe pengadilen agama. Erkiteken kinipangenna membela kinitekenna i lebe-lebe jelma si nterem, erbahanca ia mate ibenteri alu batu.

Si jadi ogenta sendah nuriken kerna detik-detik terakhir Istepanus sope ia mate ngadap ku Dibata. Ituriken maka Istepanus si dem alu Kesah Si Badia natap ku langit, idahna terang si ersinalsal i bas Dibata nari, janah idahna Yesus tedis arah kemuhen Dibata. Enda sada pengalamen si luar biasa akap kami, sebab labo kerina kalak banci ngidah Yesus tedis arah kemuhen Dibata. Asum Istepanus ibenteri, ertoto ia man Tuhan nina, “O Tuhan Yesus, alokenlah tendingku!” Erjimpuh ia janah nina alu sora megang, “O Tuhan, ula min ikira Kam dosa kalak enda.” Kenca ikatakenna si enda, mate ia.

Menarik i jenda maka ituriken Yesus tedis arah kemuhen Dibata. Yesus labo kundul tapi tedis. Tek kita maka antusenna, ialo-alo Yesus Istepanus. “O Tuhan Yesus, alokenlah tendingku” i bas terj. Bhs. Ind., nina, “Ya Tuhan Yesus, terimalah rohku.” Kai si ibelasken Istepanus enda menam seri ras si ibelasken Yesus sope IA mate i kayu persilang. Enda encidahkenca maka Istepanus ikut muat bagin i bas pola kegeluhen Kristus. Martiria (kesaksin), labo terjeng mati demi iman, tapi nggeluh ras mate i bas pola Kristus: mengasihi, mengampuni, dan menyerahkan diri kepada Allah.

Pengekenaina

Ogenta sendah nuriken kerna sekalak tokoh Alkitab si dem alu kiniteken, dem alu Kesah Si Badia, dem lias ate ras kuasa i bas Dibata, janah dem alu kepentaren i bas Dibata nari. Istepanus labo terjeng ipengasup Dibata erbahan tanda-tanda sengget, tapi ia pe pang ersaksi kerna kinitekenna man Dibata i bas Yesus Kristus, berani mengambil resiko kehilangan nyawa karena Kristus. Si enda kerina tentuna labo terjadi secara instan, tek kita maka lit proses si gedang si idalani Istepanus, salah sadana enggo pasti Istepanus sekalak pendoa si luar biasa. Emaka kita pe iajuk gelah tutus ertoto bagi Istepanus.

Sada poin penting si banci iteladani arah Istepanus nari e me nggeluh ras mate i bas pola Kristus: mengasihi, mengampuni, dan menyerahkan diri kepada Allah. Enda pe banci jadi usihen i bas kita ertoto. Pertotonta harus ipalasi alu pola Kristus: dem alu keleng ate, pengampunan, ras pengendesen diri seutuhna man Dibata i bas Yesus Kristus. Tema Pekan Doanta sendah, ngajuk kita gelah erpengendes man Dibata, tek kita maka kai pe si terjadi i bas geluhta, tetap lit i teruh keleng ate Dibata guna kiniulin kegeluhenta.

WARI PEEMPATKEN - RABU 20 MEI 2026

ERLEBUH SUARI BERNGI MAN TUHAN (Masmur 55:17-20)

Penaruh

Adi sisungkin AI alu penungkunen: mengapa orang khusyuk berdoa ketika berada dalam kesulitan? Bagenda nina jawabenna: “Orang cenderung berdoa dengan khusyuk saat berada dalam kesulitan karena situasi tersebut memaksa mereka melepaskan ego dan menyadari keterbatasan diri di hadapan Sang Pencipta. Dalam kondisi terdesak, fokus manusia terpusat sepenuhnya pada harapan akan pertolongan, yang menghasilkan doa tulus dan penuh penghayatan (khusyuk).” Kira-kira bage kang nge si ialami Pemasmur i bas ogenta sendah.

Mpebagesi Ogen

Masmur 55 enda lit i bas konteks kegeluhen Pemasmur, e me Daud, si mengalami pengkhianatan i bas teman dekatna (sahabat) nari. I bas tradisi Israel, pengkhianatan sekalak sahabat labo terjeng soal psikologis tapi termasuk ku bas persoalen teologis, sebab relasi persahabatan ipandang sebage ruang perjanjian ras kesetiaan. Emaka i jenda Pemasmur terluka secara emosional, bage pe ceda kepercayaanna nandangi relasi sosialna.

I bas pengalamen si bagenda rupana, Pemasmur labo ersura-sura guna membalas dendam, tapi erlebuh ia man Dibata i bas pertotonna. I jenda teridah spiritualitas Masmur: ertoto labo pelarian dari konflik, tapi sada cara guna bertahan i tengah konflik.

Ay. 17 “Tapi erlebuh aku man TUHAN Dibata, je nari isampatiNa nge aku,” encidahkenca jeritan eksistensial Pemasmur si sangana ceda kel erkiteken pengkhianatan sahabatna. I tengah situasi si bagenda rupana, lit denga kepeken pihak si nggit megiken keluh kesahna, e me Tuhan Dibata.

Ay. 18, “Suari ras berngi aku erlebuh dingen tangis, janah ibegiken TUHAN nge sorangku.” I jenda teridah maka ertoto labo ritual sesaat, tapi ritme hidup. Ritme hidup enda maksudna ertoto labo sekali-sekali tapi terus-menerus, ilakoken alu ratur setiap wari, suari ras berngi. I jenda nari teridah spiritualitas Pemasmur si pang ia mengekspresikan dirina apa adanya i lebe-lebe Dibata, sebab tek Pemasmur maka ialoken Tuhan nge ekspresina ndai.

Ay. 19-20 encidahkenca kiniteken Pemasmur, amin pe lenga dung perbeben si nialamina, tapi tek ia maka Dibata pasti mereken serpang pulah, kejuah-juahen ras kemenangen i bas perbebenna nari.

Pengkenaina

I bas Pekan Doa wari si sendah, radu ras kita erlajar arah Pemasmur nari i bas pertotonna man Dibata. Kai si banci siusih arah Pemasmur nari? Si pemena lebe, ertoto labo caranta kiam i bas masalahta nari, tapi satu-satunya cara guna tetap bertahan, megenggeng, i tengah-tengah perbeben, pergumulen, masalah, entah pe kiniseran si ialami kita.

Si peduaken, sue ras tema Pekan Doanta sendah, ertoto labo terjeng ritual sesaat, tapi ritme hidup. Ertoto labo sekali-sekali silakoken, sangana kita butuh ngenca, tapi harus terus-menerus silakoken alu ratur setiap wari, suari ras berngi. Enggo isaksiken Pemasmur maka erkiteken ertoto ia alu ratur, maka la ilakokenna si la ngena ate Dibata, la ia balas dendam. Emaka erlebuhlah terus man Dibata i bas situasi ras kondisi si kugana pe: senang - susah, sehat - sakit, sukses - gagal, rsd.-na. Gelah ipengasup Dibata kita bijak ngalokenca.

Si peteluken, teklah kita bagi Pemasmur, amin pe lenga dung masalah si nialami kita, tek kita maka Dibata pasti mereken serpang pulah, kejuah-juahen ras kemenangen i bas perbebenta nari.

WARI PELIMAKEN - KAMIS 21 MEI 2026

TATAP JANAH DENGKEHKEN PERTOTONKU TUHAN (Nehemia 1:4-11)

Mpebagesi Ogen & Aplikasi

Nehemia e me kalak Yahudi juru minuman Raja Persia Arthasasta. Ia tokoh penting i bas pembangunen mulihi tembok Jerusalem si enggo hancur. Poin- poin penting i bas ogenta sendah:

Si pemena, Nehemia kalak si peduli (peka) nandangi kiniseran Yerusalem. Asum ibegina arah seninana Hanani kerna kondisi tembok Jerusalem si sontar denga ras pintu-pintu gerbangna lenga ipekena kenca iciluk, bage pe bangsa Israel si lit i bas kiniseran si mbelin, ceda atena ras erpuasa. Janah ertoto ia man Tuhan. Kai silakoken Nehemia, mpersingeti kita: 1) Jangan mati rasa terhadap penderitaan. Milikilah empati. 2) Milikilah kepedulian nandangi keluarga, gereja, bangsa ras lingkungen sosialta.

Si peduaken, pertoton menjadi respon utama asum lit pergumulen si ialamina. Labo respon terakhir. Melala kalak asum lit pergumulen ialamina, panik, merawa entah ndarami solusi si instan, tapi Nehemia ngajarkenca maka si utamana e me ernalem man Tuhan. Ertoto ia suari ras berngi.

Si peteluken, mengakui dosa i lebe-lebe Tuhan. Nehemia la nalahken generasi si deban, tapi ia menyadari kesalahenna ras kesalahen bangsaNa. “Ngaku aku maka kami, bangsa Israel enggo erdosa. Nini-niningku ras aku enggo erdosa.” I bas paksa genduari, budaya si berkembang e me saling menyalahkan. Pemerintah menyalahkan rakyat, bage pe sebalikna. Keluarga saling menyalahkan. Tapi Nehemia, ngajarkenca introspeksi diri, bertobat ras menyadari kesalahenna ras bangsana.

Si peempatken, ay. 10-11, Nehemia mindo gelah isehken Dibata pertotonNa. Ras dekahna Nehemia ertoto kurang lebih 4 bulan. Ibenaken i bas bulan Kislew ras berakhir i bas bulan Nisan (bindu 2:1, “I bas sada wari, empat bulan kenca sindai …”).

Si pelimaken, totoken si idahinkenndu, dahinken si itotokenndu. Memang perikop enda ngerana kerna pertoton Nehemia, si kedungenna melahirkan tindakan nyata i ja ibangunna mulihi tembok Yerusalem. Pertoton si enggo ipenangkih kita, harus sidahiken. Ras sope kita ndahikenca, harus ka sitotoken.  Adi siterusken perikopta, bindu 3 tembok Yerusalem ipajekken ka mulihi.

WARI PEENEMKEN - JUMAT 22 MEI 2026

MESEKSEK MINDO MAN TUHAN (Keluaren 32:11-14)

Mpebagesi Ogen & Aplikasi

Bagin enda merupaken pertoton Musa kenca bangsa Israel ibahanna ras isembahna anak lembu emas. Nembeh kel ate Tuhan, janah ikernepken Tuhan ateNa bangsa Israel. Poin-poin pentingna e me :

Si pemena, Musa jadi perantara umat ras Tuhan. I bas dosa si ilakoken bangsa Israel, Musa sebage pemimpin, la ia buang badan, tapi bertanggung jawab mindo perkuah ate Tuhan. Banyak pemimpin, ketika terjadi persoalen menyelamatkan dirinya sendiri dan tidak bertanggung jawab.

Si peduaken, alu meseksek ipindokenna man Tuhan gelah ula ikernepken Tuhan bangsaNa, si enggo iselamatkenNa i Mesir nari. Musa mindo alu meseksek, meminta dengan bersungguh-sungguh, terus-menerus. PUSH: Pray Until Something Happened (berdoa sampai sesuatu terjadi).

Si peteluken, pertoton si ipenangkih Musa, turah arah relasina si ndeher ras Tuhan. I ja isingetken Musa man Tuhan maka: 1) Bangsa Israel e me umat Tuhan, bangsa pilihen Tuhan (“Tuhan, engkai maka bage rawaNdu man bangsaNdu?”). 2) Tuhan sendiri enggo nelamatken bangsa enda i bas bangsa Mesir nari. Adi enggo iselamatken Tuhan, engkai ibunuh Tuhan ka ateNa? 3) ipersingeti Musa kerina padan Dibata man Abraham, Ishak ras Jakub. Maka ibereken Tuhan kesusurenna, si teremna bagi buena bintang-bintang i langit.

Artina, pertoton si ipenangkih Musa, labo hanya sekedar ritual, tapi percakapen i bas relasi si ndeher ras Tuhan.

Si peempatken, Tuhan megiken pertoton Musa. Ay. 14, “Erkusur ukur Tuhan ras la isehkenNa cilaka si enggo isurakenNa nandangi banga Israel.” Enda ngatakenca man banta, Dibata si isembah kita, labo Dibata si kaku, dingin, tapi Dibata si terbuka terhadap ruang dialog ras manusia. Beliden perkuah ate Dibata asangken rawaNa. 

WARI PEPITUKEN - SABTU 23 MEI 2026

TUHAN SI PEKENA-KENA (Masmur 27:7-10)

Mpebagesi Ogen & Aplikasi

Perikop enda ibere judul “Pertoton muji Tuhan” (terj. Bhs. Ind., “Aman dalam perlindungan Allah”). Daud tetap ndarami Tuhan aminna paksa si e lit ia bas kebiaren, tekanen. Iman yang tetap bertahan di tengah rasa takut dan kesendirian. Piga-piga point penting:

Si pemena, Daud tetap erlebuh man Tuhan. Ibangunna relasi ras Tuhan. “O Tuhan begiken min tupung aku erlebuh man baNdu. Mekuah min ateNdu aku dingen aloi min aku.”

 

Si peduaken, ras Tuhan sendiri metedeh ateNa kita ndeher ras IA (Tuhan menghendaki relasi yang dekat). Nina Tuhan, “Mari sembah Aku. Ningku, minter aku reh.” “Carilah wajahKu dan Daud menjawab, maka wajahMu ku cari ya Tuhan.” Bhs. Karo: “Sembah Aku” (terj. Bhs. Ind., carilah wajahKu) enda saling melengkapi. Ertina, ketedehen ate Tuhan, IA ngenca isembah, rindu akan hadiratNya, nandai Tuhan lebih dekat.

Si peteluken, ay. 9, mbiaren Daud man Tuhan asangken man musuh-musuhna. Alu jujur, ikatakenNa man Tuhan, “Ula Kam cebuni man bangku, ula kam nembeh man bangku.” Daud lebih takut ketika kehilangan hadirat Tuhan entah pe itadingken (itundalken) Tuhan. Adi musuh man lawanen, lit denga Tuhan si nampati. Tapi adi enggo itadingken Tuhan, la lit nari si banci nampati. Emaka pelcik kel ukurna ngatakenca “Kam kap penampatku. Ula tadingken aku.”

Si peempatken, ay. 10, manusia, bahkan orang terdekatta sekali pe banci nadingken kita, Tapi Tuhan tetap mpekena-kena kegeluhenta. Keleng ate manusia terbatas, tapi keleng ate Dibata la pernah erkeri-kerin. Masmur enda mpetetap ukurta, banci saja kita itolak, ikhianati, itadingken, tapi Tuhan tetap ngaloken kita ras mpekena-kena geluhta.

Si pelimaken, aminna lenga idah ras alami Daud jawaban doa ibas Tuhan nari, tapi tetap ia ernalem man Tuhan (ay. 14, “Ernalemlah man Tuhan. Teklah, tetapkenlah ukurndu. Ernalemlah man Tuhan”).

Meditasi :

1. Rende KEE 176:1
2. Pemimpin: “Mari erpengendes kita man Tuhan, tek kita Tuhan ngenca ingan penalementa” (ertoto)
3. Rende KEE 176 :1
4. Pemimpin: “Kataken, O Tuhan begiken min tupung aku erlebuh man baNdu. Mekuah min ateNdu dingen aloi min aku” (iulihi … kataken man Tuhan kai pingko-pingkonta)
5. Pemimpin: “Nina Tuhan, mari sembah Aku, … kataken man Tuhan, reh aku Tuhan.”
6. Rende KEE 207 bagin refreinna saja, “Reh aku Tuhan …”
7. Pemimpin: “Yesus Kristus Anak Dibata, keleng kel ateku Kam” (iulihi 4 kali)
8. Rende KEE 379:1
9. Pemimpin: “Tuhan petetap ukur, la aku mbiar ... itadingken bapa ras nandeku pe aku, tapi Tuhan mpekena-kena aku” (ertoto)