PA Kategorial GBKP Tgl. 15 - 21 Maret 2020

PA MORIA GBKP TGL. 15 - 21 MARET 2020

Pdt. Larena br. Sinuhadji (Nd. Rey Rapha Tarigan)

Tema : GELUHKU E ME IBADAH RAS PERSEMBAHENKU MAN DIBATA

Tujun : Gelah Moria :

1) Meteh maka kegeluhen erpengendes man Dibata e me persembahen si tuhu-tuhu.

2) Nembah man Dibata arah kerina bentuk perukuren, pengerana, ras pendahin si tep-tep wari.

Metode PA : Sharing Pengalaman.

1. Oge perikop Roma 12:1-2 (telu kali)

2. Kai si ioge kita?

- Paulus mpersingeti perpulungen i Roma gelah nginget perkuah ate Tuhan si mbelin si enggo isehken Tuhan man perpulungen (terj. BIS-BIMK: “Allah sangat baik kepada kita. Itu sebabnya saya minta dengan sangat supaya kalian mempersembahkan dirimu sebagai suatu kurban hidup yang khusus untuk Allah dan yang menyenangkan hatiNya. Ibadatmu kepada Allah seharusnya demikian”, BECAUSE OF GOD'S GREAT MERCY TO US). Ertina, i jenda Paulus mpersingeti kerna kekelengen Tuhan si enggo isehken Tuhan arah penebusen Yesus Kristus. Ula sempat ilupaken perpulungen.

- Ipindoken Paulus, maka perpulungen ngendesken kulana jadi persembahen si nggeluh rikutken si ngena ateNa. Persembahen si ibaba e me geluhta sendiri, labo rubia-rubia (biri-biri/domba asum ndube umat Tuhan nehken persembahen man baNa). Ertina, labo hanya dalam bentuk materi tapi geluhta, kulanta pe ipersembahken man Tuhan. Konsep kalak Yunani, maka ibedaken tubuh, roh ras jiwa. Tubuh/kula e fana, janah i bas kita mate, masap me kula, mulihi jadi taneh. Sedangken roh ras jiwa, mulih ku Dibata. Arah pemahamen enda, maka nteremen perpulungen si semena-mena/ate-ate nandangi kula, sebab kenca kita mate, jadi abu ka. Sedangken situhuna, tubuh, roh ras jiwa la banci ipisahken, kerina sada kesatuan. Kai pe si ilakoken kita termasuk arah kulanta enda pe sipertanggungjawabken man Dibata (bdk. 2 Kor. 5:10, “Sabap kerina kita la banci lang ngadap ku lebe-lebe Kristus guna iadiliNa, gelah sekalak-sekalak ngaloken kai si patut ialokenna rikutken kai si enggo ibahanna arah kulana paksa ia nggeluh, subuk perbahanen si mehuli entah si jahat”). Emaka arah pengerananta, perbahanenta, perukurenta si mehuli, e termasuk persembahenta si nggeluh man Tuhan.

- Sabab bage me arusna kita ersembah man Tuhan sue ras biakta selaku mahluk si rukur, (terj. TB-LAI Roma 12:1, “Karena itu, saudara-saudara, demi kemurahan Allah aku menasihatkan kamu, supaya kamu mempersembahkan tubuhmu sebagai persembahan yang hidup, yang kudus dan yang berkenan kepada Allah: itu adalah ibadahmu yang sejati”). Mempersembahken tubuh e me persembahen si nggeluh (labo mate), si kudus - tanpa cacat (badia) ras si ngena iakap Dibata. Ras merupaken ibadahta si sejati. Ertina, ibadah e labo terjeng bas ingan persekutuan, ibadah formal, termasuk i bas kita banci nehken perbahanen si mehuli arah geluhta pribadi lepas pribadi e me termasuk ibadahta man Tuhan.

- Roma 12:2, “Ola pelepas dirindu jadi seri ras doni enda. Walaupe tading i doni, tapi kalak si tek arus tetap berbeda ras doni i sekelewetna. Entah pe la terpengaruh i bas kondisi doni si dem kegelapen.

- Tapi berelah maka perukurenndu ipelimbarui Dibata. Gelah la seri ras doni, maka perukurenta arus ipelimbarui Dibata (bdk. Bahan PJJ minggu si lepas, perukuren si mbaru erkiteken penebusen Kristus si arus tetap ipelimbarui katawari paksa pe). Be transformed (by God) by renewing of your mind, ertina perubahen perukuren e hanya banci ilakoken Dibata arah kita tek man baNa.

Rikutken bahanta sekali enda, maka selaku kalak si enggo itebus Tuhan, maka arus kita ngasup ngataken bujur man Tuhan alu ngendesken geluhta jadi persembahen si nggeluh man baNa. Labo terjeng bas ibadah saja tapi i bas kerina pengkebet geluhta. Ibadah formal: kebaktin Minggu, PA, PJJ, rsd., nampati kita guna reh ngasupna nggeluhken geluhta sentudu bagi si ngena ate Dibata. Ula petembil, kebaktin-kebaktin si ikuti kita la mpengaruhi perbahanenta. Seh makana geluhta tetap la jadi sira ras terang.

PA MAMRE GBKP TGL. 15 - 21 MARET 2020

Nrs. Pdt. L. Sinuhadji (Bp. Rey Rapha Tarigan)

TI, Manfaat & Tujuanna

Ogen : Kuan-kuanen 1:1-7

Tema : ERLAJAR GELAH PENTAR

Tujun : Gelah Mamre :

1) Meteh maka erkemalangen man Dibata mpengasup kita nggeluh pentar, bujur, adil ras benar

2) Meteh pentingna erlajar kerna pengelolaan informasi & TI ras makekenca guna kemulian Dibata

Metode : Diskusi

Kuan-kuanen entah pe Amsal (Ibr. Mashal, Misyle) ertina “ucapan orang bijak”, “perumpamaan atau peribahasa berhikmat” si itulisken Raja Salomo. Judul ogenta i bas Pustaka Si Badia nina, “Tujun pengajaren enda”, i bas terj. I bas terj. TB-LAI nina, “Tujuan Amsal ini”, janah i bas terj. BIS-BIMK nina, “Nilai petuah-petuah Salomo”.

Tujun pengajaren-pengajaren Salomo rikutken ay. 2-3 nina, guna nampati kalak gelah pentar, ngelakoken pengajaren si mehuli, ngantusi ranan si mbages ertina, ngajarken nggeluh pentar, bujur, adil, ras benar (terj. BIS-BIMK, “Tujuannya ialah untuk menolong orang mengetahui bagaimana menjadi bijaksana, dan tahu tata tertib hidup serta dapat memahami ungkapan-ungkapan yang mengandung arti yang dalam … mengajarkan bagaimana orang dapat hidup dengan bijaksana, jujur, adil dan benar”).

Adi rikutken terj. TB-LAI, tujuan Kitab Amsal ini adalah untuk memberi hikmat dan pengertian mengenai perilaku yang bijak, kebenaran, keadilan, dan kejujuran (ay. 2-3), sehingga : 1) Orang yang tidak berpengalaman menjadi orang bijak (ay. 4). 2) Kaum muda memperoleh pengetahuan dan kebijaksanaan (ay. 4). 3) Orang bijak menjadi lebih bijak lagi (ay. 5-6).

Guna ndatken kerina si jadi tujun i datas nina ay. 7, si pemenana si la banci la lit i bas kita e me mehamat dingen erkemalangen man Tuhan, nggit ngergai entah pe mperdiateken kepentaren, janah nggit erlajar ras iajari. I bas terj. Bhs. Ind., “harus mempunyai rasa hormat dan takut kepada Tuhan, menghargai hikmat, dan mau diajar”.

Tema khusus i bas PA-ta sendah e me “Erlajar gelah pentar”, i teruh tema umum “TI, manfaat ras tujunna”, alu tujun gelah, si pemena, Mamre meteh maka erkemalangen man Dibata mpengasup Mamre nggeluh pentar, bujur, adil ras benar. Si peduaken gelah Mamre meteh pentingna erlajar kerna pengelolaan informasi & TI ras makekenca guna kemulian Dibata.

Kerna tujun si pemena akap kami kerina kita enggo meng-amin-ken maka erkemalangen man Dibata mpengasup kita nggeluh pentar, bujur, adil ras benar. Cuma akap kami rikutken ogenta sendah, perlu ka sitambahi, labo terjeng erkemalangen man Dibata, tapi pe harus lit i bas dirinta kininggiten guna ngergai entah pe mperdiateken kepentaren, janah nggit kita erlajar ras iajari. Penungkunenna apakah enggo lit i bas dirinta karakter erkemalangen man Dibata, kininggiten ngergai (mperdiateken) kepentaren, kininggiten guna erlajar ras kiniteruken ukur guna iajari? Mari radu ras sievaluasi dirinta.

Tujun si peduaken kerna pengelolaan informasi, Teknologi Informasi (TI), ras makekenca guna kemulian Dibata. Akap kami enda merupaken output i bas tujun si pemena nari. Wujud konkrit nggeluh pentar, bujur, adil ras benar, salah sadana e me mengelola TI alu pentar, bujur, adil ras benar guna kemulian Dibata. Mengelola TI alu pentar umpamana, lit i bas kita sifat kritis, baik i bas kita ngaloken informasi bage pe i bas kita menyebarken informasi. Mengelola TI alu bujur umpamana, la kita nggit ibayar guna menyebarken informasi si la mehuli, Mengelola TI alu adil umpamana, kepentingenta i bas kita menyebarken informasi e me guna membela kaum yang lemah. Mengelola TI alu benar umpamana, siikutken undang-undang si berlaku i bas negaranta i bas pengelolaan TI.

Banci sidiskusiken terdauhen, bentuk-bentuk konkrit kai nari si banci sibahan kita, baik secara pribadi bage pe berkelompok, i bas pengelolaan TI enda gelah kita banci mengelola TI alu pentar, bujur, adil ras benar guna kemulian Dibata.