PJJ GBKP Tgl. 15 - 21 Maret 2020

PJJ GBKP TGL. 15 - 21 MARET 2020

Pdt. Larena br. Sinuhadji (Nd. Rey Rapha Tarigan)

Tema : BERITAKENLAH SI MEHULI (Perb. Rasul 15:22-27)

TI : Guna & Tujun

Latar belakang Perb. Rasul 15 e me litna persoalen i Antiokia i ja reh piga-piga kalak si kurang ertanggung jawab si erbahanca bingung perpulungen kalak si tek, maka labo banci kalak enda terkelin ibahan Dibata adi la kin kalak enda isunatken bagi iaturken Undang-undang Musa. Pengajaren enda ilawan Barnabas ras Paulus seh maka terjadi perjengilen si mesangat. Erkiteken semakin meruncing persoalen e, maka ibaba persoalen e ku Yerusalem guna banci icakapken Rasul-rasul ras Pertua-pertua. Hasil persidangen i Yerusalem mereken jalan keluar si terbaik erkiteken litna kiniersadan arih. I ja piga-piga Rasul mereken pendapat gelah ula nari nuhsahi kalak Kristen si labo kalak Yahudi alu aturen-aturen si labo prinsip. Emaka sue arih kalak enda maka ibahan surat man si labo kalak Yahudi si enggo tek man Yesus ras itetapken ngawan perpulungen utusen si berkat ras Paulus bage Barnabas ku Antiokia e me Silas ras Yudas (Barsabas). Kalak enda duana ihamati i bas perpulungen. Surat si ibaba kalak enda tuhu-tuhu petetap ukur perpulungen i Antiokia ras dungi persoalen si terjadi. Isi surat e :

- Nehken kata mejuah-juah man perpulungen.

- Maka enggo ibegi Rasul-rasul berita i ja lit piga-piga i bas Rasul/Pertua si labo iutus, nuhsahi ukur perpulungen si erbahanca gulut ukur perpulungen arah pengajarenna.

- Iutus Rasul-rasul Yudas ras Silas gelah ngataken langsung surat si enggo ibahan Rasul man perpulungen i Antiokia: “Ola pan pangan si enggo ipersembahken man dibata-dibata palsu, ola pan dareh, ola pan asuh-asuhen si mate la igeleh, janah ola erlagu la mehuli”.

Tanggung jawab kalak si tek, selain bersekutu ras melayani e me bersaksi, meritaken Berita Si Mehuli. Erberita, labo hanya terbatas melalui kata-kata, ucapan tapi arah kai si lit bas kita si banci ipakeken guna nehken Berita Si Mehuli. I bas perikop enda, Rasul-rasul make media surat guna nehken berita si mehuli man perpulungen i Antiokia. Selain surat, termasuk jelmana si maba surat e me Silas ras Yudas e me tuhu-tuhu kalak si terteki, si ihamati i bas perpulungen. Ertina, surat si ibabana tetap terjaga kebenarenna, la itukang-tukangi.

I bas jaman genduari enda, Teknologi Informasi banci sipake guna nehken berita si mehuli. TI banci ipakeken guna tujun si mehuli tergantung bas kita si makekenca. Ertina, kuncina kita. Umpamana :

- Sermon Digital.

- Erbahan WA group: Baca Alkitab, nehken RH, informasi kegiaten, rsd.

- Nehken Kata Dibata.

- Mereken kata-kata inspirasi, motivasi.

- Nehken berita/kegiaten bas Runggun.

Contoh-contoh i datas merupaken cara si banci ipake kita guna nehken berita si mehuli arah Teknologi Informasi.