PJJ GBKP Tgl. 22 - 28 Maret 2020

PJJ GBKP TGL. 22 - 28 MARET 2020

Pdt. Larena br. Sinuhadji (Nd. Rey Rapha Tarigan)

Tema : DAHILAH TUHAN (Jesaya 45:22-25)

Judul i bas perikop enda “Tuhan doni enda ras gana-gana Babilon” (terj. TB - LAI, “Seruan kepada bangsa-bangsa supaya kembali kepada Tuhan”. Judul ps. 45 “Tuhan memakai Kores sebagai alatNya”).

Adi siperdiateken konteks i bas perikop enda, maka melala bangsa-bangsa bas doni enda si nembah man dibata-dibata si deban, nembah man patung, kayu, bahkan bangsa Isreal sendiri si enggo nandai Dibata la ia erkemalangen man Dibata, malah megombang ras la mehamat man Dibata, isembahna dibata-dibata si deban.

La ate Tuhan, kalak enda terjerumus ndauh maka isedarken Tuhan (ay. 20), “O kam kalak motu, si erbaris siarak-araken maba gana-gana kayu: kam kalak si ertoto man gana-ganandu, si la ngasup ngkelini geluhndu. Aku ngenca Tuhan, la si deban, si ngasup ngkelini kam”.

Kenca enggo isedarkenNa umat manusia bahkan bangsa pilihenNa sendiri maka uga pe hebatna gana-gana tetap lebih hebat ras erkuasa Tuhan. Bahkan gana-gana, berhala la ngasup ngkelini manusia. Awalna banci jadi, dibata palsu e ibelai-belaina kita, ikelengina kita tapi kedungenna bene kita bana. Maka iperentahken Tuhan manusia guna ndahi IA, berbalik ku IA. Enda seruan bertobat guna nandingken dibata-dibata si deban ras ersembah man Dibata saja, Dibata si mada kuasa.

Engkai maka arus sidahi Tuhan?

- Tuhan ngenca si ngasup ngkelini manusia, jelas dibata-dibata si deban la ngasup ngkelini geluhta. Sabab dibata-dibata sideban setara ras kita, ia pe ciptaan. Ciptaan hanya mampu dilindungi oleh penciptaNya. Emaka rusur lit si ngatakenca “ula kita ernalem man manusia sabab banci kari kita kecewa”. Pas kel, sabab manusia terbatas. Terbatas gegehta, kuasanta guna ngkelengi. Tapi Dibata si nepa manusia, la terbatas kuasaNa guna ngkelengi kita.

- Tuhan ngenca Dibata la lit si deban. Ay. 18, Dibata si nepa doni enda ras kerina isina. Dibata si erkuasa dingen si ngaturken sinasa lit. Ertina, ciptaan, uga pe hebatna la man pajuhen, la man sembahen, sabab enggo pasti hebaten Dibata. Dibata ngenca silayak isembah. Adi nai nembah kita dibata-dibata si deban; kayu, patung, lembu emas, begu jabunta, rsd. Genduari, bas jaman modern enda; enggo lebih modern ka si man pajuhenta; sen, kalak bayak, Hp-ta rsd. Ertina, pusuh ukurta lebih berpaut man si e kerina asangken man Tuhan. Lebih kita mengandalken senta, dekingta si kalak erkuasa, Hp-ta asangken man Tuhan si mada geluhta.

- Janji Tuhan ya dan amin. Adi Dibata erpadan, la mobah, la ingkar janji. Adi manusia erpadan, murah kel erkusur ukurna. Murah melasken janji, tapi gampang ka ngingkarisa. Tapi Dibatanta setia i bas padanNa. “Padah si Ku bahan tuhu, janah la mobah-obah”. Bahkan anakNa si tonggal pe iberekenNa man banta gelah banci kita terkelin.

- Tuhan mereken kemenangen ras kuasa. Beliden kuasa Tuhan asangken kuasa kai pe bas doni enda. Arah kuasa si lit bas Ia maka ngasup Ia nampati kita anak-anakNa, bahkan musuh pe ipake Tuhan guna banci nampati kita. Bdk. bindu 45, Tuhan memakai Kores sebagai alatNya. Awalna bangsa Isreal itaban Babel selama 70 tahun. Kedungenna Babil italuken Persia, ras ipake Tuhan raja Persia e me Kores guna maba mulih bangsa Israel ku Jerusalem.

Adi sitarik ku bas peristiwa si genduari ialami kita, subuk secara nasional bahkan global alu litna penyebaren virus Corona, i ja waktu 1 bulan setengah, enggo kurang lebih 12.944 si mate. Indonesia, positif  686 kalak ras si mate, 55 kalak, si enggo sehat 30 kalak. Pdt. Stephen Tong ngatakenca i bas khotbahna, maka kerugian akibat Corona enda secara global, 12.000 milyar dollar. Maka situhuna, tidak ada yang dapat dibanggakan, disombongkan manusia. Alu virus Corona, subuk kalak bayak, mesera, pejabat la pejabat banci ikenaina. Bangsa Eropa, Amerika si biasana menggangap diri bangsa si besar, hebat. Tapi genduari i Italia, lebih 4.000 kalak enggo mate akibat Corona. Bahkan si naruhken mayat labo nari mobil jenasah tapi enggo isampati mobil tentera si berderet panjang naruhken mayat si la terhitung buena.

Sada ngenca si arus siakui, Dibata ngenca si ngasup nampati kita i bas persoalen enda, sabab Dibata si mereken kemenangen ras erkuasa i bas geluhta. Mbue hal si banci siban jadi hikmah i bas persoalen enda:

- Kita enggo lebih peduli soal kesehaten ras kebersihen.

- Seluruh dunia saling membantu, bekerja sama (genduari waktuna Tiongkok, Korea Selatan dan Jepang membantu Eropa, Amerika juga Indonesia).

- Manusia saling membantu (Wardah menyumbang 40 M untuk penyedian prasarana kesehatan, Yayasan Buddha Tzu Chi Indonesia menggalang dana 500 M, Jack Ma lewat Jack Ma Foundation menyumbang  2 juta masker, 150 ribu test kit Covid 19, 20 ribu baju pelindung ke 4 negara Asia Tenggara termasuk Indonesia, relawan-relawan, dokter-dokter, mahasiswa kedokteran tingkat akhir diperbantukan rsd. Walau pe lit nge kalak si mengambil kesempatan dalam kesempiten, muat keuntungen i bas kiniseran si enggo ialami kita.

- Kualitas hubungenta i bas jabunta reh ulina.

- Ibadah i keluarganta bagi si ilakoken jemaat mula-mula ndube mulai kembali ihidupken.

- Kualitas udara semakin baik erkiteken kendaraan bermotor semakin berkurang i bas dalan.

Tema “Dahilah Tuhan”, leben enggo Tuhan ndarami kita, kelengiNa kita. Bahkan nggit IA nadingken 99 kalak si benar lako ndarami sekalak si papak. Mari sirespon keleng ate Tuhan si enggo iberekenNa banta alu kita erkemalangen man baNa.

Kesempaten i bas paksa enda sipake jadi titik balik guna kita tuhu-tuhu ertutus ate nembah baNa, bulat ukurta kerina mindo pengalemi dosa i bas Dibata nari ras mindo penampat man Tuhan. Gelah alu bage rikutken janji Tuhan, kerina manusia, i lebengKu pagi erjimpuh, janah erpadan, maka rasa lalap tutus atena nembah. Emaka erpadanlah kita, ula hanya i bas paksa genduari kita ertutus ate ersembah man baNa, paksa si reh pe, asum enggo aman, bene virus Corona, tetaplah sipuji, sisembah, simuliaken Tuhan Dibatanta.

Diskusi : Kai nge si jadi kendala maka kita entah ras jabunta, kurang tutus ersembah man Tuhan subuk i tengah keluarga bage pe i bas perpulungen ras darami solusina gelah ku lebe enda reh tutusna kita ras keluarganta ersembah man Tuhan.

https://www.youtube.com/watch?v=bPACbzvOmH0