PJJ GBKP Tgl. 8 - 14 Maret 2020

PJJ GBKP TGL. 8 - 14 MARET 2020

Pdt. Larena br. Sinuhadji (Nd. Rey Rapha Tarigan)

Tema : PERUKUREN SI MBARU (2 Korinti 5:16-19)

Evaluasi Entrepreuneuship

Perukuren sangat mempengaruhi ku bas pengerana rikut ras perbahanenta. Adi positif perukurenta enggo pasti pengerana ras perbahanenta pe mehuli, positif. Kebalikenna adi perukurenta macik, negatif, maka pengerananta rikut perbahanenta pe la mehuli. Deba mungkin banci ibunikenna, i ja pengeranana mejile (manis), perbahanenna pe mehuli tapi situhuna topeng ngenca; istilah si rusur sipake geluh si munafik. Sada paksa waktu tanpa isedarina ndarat nge si la mehuli e, sabab e enggo karakterna.

Bahan PJJ sekali enda ngerana kerna perukuren si mbaru. Judul bas bahan ogenta “Erdame ras Dibata arah Kristus” (Terj. TB-LAI: “Pelayanan untuk Pandamaian”). Tangtangna Dibata nepa manusia ras kerina isina mehuli kerina, bahkan manusia banci ercakap-cakap ras Dibata. Tapi kedungenna manusia la patuh man Dibata, ipebalina atena dirina ras Dibata (Kej. 3:5). Erkiteken pemberontaken manusia man Dibata (dosa) mahanca enggo nembeh ate Dibata man manusia. Manusia ermusuhen ras Dibata (ay. 18). Puji Tuhan, beliden kepeken keleng ate Dibata asangken pernembeh ateNa. Arah Kristus Yesus, iperdameken mulihi hubungen Dibata ras manusia. Manusia si gelgel nari ermusuhen ras Dibata enggo ibahanNa jadi temanNa (bdk. 1 Yoh. 3:1, “kita igelari anak-anak Dibata”). La iperkiraken Dibata kelepaken manusia. I bas enggo itebusNa dosa-dosanta ras kelepakenta maka la nari kita manusia si male (si ndekah) tapi manusia si mbaru si arus terus-menerus ipelimbarui Dibata arah KesahNa Si Badia. Ras enda secara pribadi terjadi i bas Paulus.

Sope itandaiNa Kristus, selaku kalak Yahudi tutus kel ia eragama. Bahkan rikutken kesaksinna, maka asangken kerina temanna si kalak Yahudi si sebekbek ras ia, lebihen ia i bas ndalaken agama Yahudina. Ketutusenna e me erbahanca iayak-ayakna kalak Kristen ras igasgasina (Gal. 1:13-14). Tapi kenca enggo itangkap Kristus, tek man Kristus, itandaina Kristus Yesus maka geluhna ipelimbarui Tuhan. Geluhna si nai sope itandaina Kristus ras genduari kenca enggo tandaina Kristus berubah. (Lagu “Aku berubah sungguh berubah waktu ku s’rahkan hidupku. Aku berubah sungguh ku berubah waktu s’rahkan semua).

Adi rikutken teks, nai pengerganna nandangi sekalak manusia rikutken pertimbangen manusia. Si bayak, si erkuasa, si erpangkat, e nge si ihamati, iergai. Tapi kebalikenna, adi la merupa, la lit jabatenna, la lit kedudukenna, la lit senna, kurang iergai. Termasuk pengerganta/na nandangi Kristus rikutken pertimbangen manusia. Enterem paksa si e jelma la ngaloken Yesus, sabab enggo itandai kalak ise IA, ise orang tuana, e me anak tukang kayu, si secara status sosial ras ekonomi kurang ndatken tempat i masyarakat. Tapi genduari lanai bage perbahanenna, sebab enggo tangkas man bana kerina manusia seri i lebe-lebe Dibata (ay. 16).

Kalak si ersada ras Kristus ia me tinepa si mbaru, si male enggo lepas janah nehenlah si mbaru enggo reh (terj. TB-LAI, “jadi siapa yang ada di dalam Kristus, ia adalah ciptaan yang baru, yang lama sudah berlalu, sesungguhnya yang baru sudah datang”). Geluh si mbaru ertina, sukat-sukat geluhna ersada ras Kristus. Persadanna ras Kristus Yesus mabai ia tetap ipelimbarui wari lepas wari. Arah KataNa, pertotonna, persadanna ras Kristus subuk secara pribadi entah pe ras-ras mabai ia ipelimbarui. Adi tinepa si mbaru enggo pasti perukuren pe mbaru. Intina, lit perbedaan geluhta si nai ras si genduari, la nari bagi si gel-gel. Perukuren si mbaru berarti perukuren si mehuli, si maba kemelemen ate, si membangun. La nari ngukuri diri sendiri (egois) ras la meganjang ukur, si enggo ngergaken manusia labo erpalasken pertimbangen manusia (harta, pangkat).

Ikaitken ras evaluasi kerna enterpreunership i ja tahun nderbih Gerejanta menitikberatken kerna kewirausahaan. Adi kerna data, pertambahan anggota perpulungen GBKP si membangun usaha si mbaru lenga ieteh kami. Tapi paling tidak jiwa enterpreunership arus enggo nggeluh i bas anggota perpulungen GBKP. Antara lain: mau mencoba sesuatu yang baru (berinovasi), kreatif, berani mengambil resiko, kerja ras tekun, nggit kerja sama ras kalak si deban, labo hanya ngukuri diri sendiri tapi pe guna kemajun kalak si deban, rsd. Pola pikir si e nge si arus nggeluh i bas anggota GBKP.