PJJ GBKP Tgl. 8 - 14 April 2018

PJJ GBKP TGL. 8 - 14 APRIL 2018

Pdt. Larena br. Sinuhadji (Nd. Rey Tarigan)

POLITIK DAN PILKADA

128 TAHUN SEHNA BERITA SI MERIAH

Tema : SUKAT-SUKAT PEMIMPIN SI NGENA ATE DIBATA (Ulangen 17:14-20)

Uga kin sukat-sukat pemimpin si jadi sura-suranta dingen si ngena ate Dibata? Sabab biasana kita memiliki gambaren kerna pemimpin si bakal memimpin kita. Enggo pasti kalak si erkemalangen man Dibata kai pe agamana. Ertina, labo hanya terjeng er-agama tapi tuhu-tuhu iaplikasikenna ajaren-ajaren agamana. Berintegritas, jujur, lebih ngukurken kerna kesejahteraan masyarakat asangken dirina, jabuna entah kelompokna. Pemimpin si sederhana, labo aji mumpung. Mumpung jadi pemimpin, anak-anakna, keluargana, ikut ngaloken kemudahen i bas erbage-bage hal, termasuk usaha bage pe masuk ku bas pemerintahen. Pemimpin si berprinsip seh makana la murah ijola-joleken kalak si lit i sekelewetna, si berani guna erbahan keputusen ras ngelakokenca, termasuk man kalak si erkuasa i bas negeri enda.

Bahan ogenta sekali enda merupaken syarat-syarat si ibahan Musa man bangsa Israel i bas sura-surana memilih sekalak raja guna jadi pemimpin bangsa Israel kenca enggo inganina taneh Kanaan. Si pemena lebe, arus i bas kalangen bangsa Israel sendiri, ula i bas bangsa si deban nari. Termasuk kalak bayak, sabab ikataken arus melala kudana si banci ipake tenterana. La banci melala ndeharana, sabab banci jadi itundalkenna Tuhan, lebih condong ukurna ku ndehara-ndeharana. La banci ia mpebayak bana alu pirak ras emas seh makana la nari iukurkenna kesejahteraan rayatna. Ia arus kalak si nggit erlajar arah Kata Dibata, gelah alu bage ngasup ia mengaplikasikenca ras tetap pehaga Tuhan alu ngikutken perentah-perentahNa. Tetap rendah hati, la iakapken ganjangen ia asangken temanna kalak Israel si deban.

Mulihi i bas ogenta sekali enda ipersingeti man banta gelah berhati-hati i bas memilih pemimpin, secara khusus i bas Pilkada 27 Juni 2018 i ja 171 daerah (17 Provinsi, 115 kabupaten, ras 39 kota) i erbage-bage daerah i Indonesia. Arah erbage-bage informasi termasuk percakapen i PA-PA kategorial ras PJJ bahkan seminar Gereja ras Politik si ibahan subuk Moderamen, Klasis bage pe Runggun, merupaken pendidiken politik man perpulungenta gelah tuhu-tuhu pentar i bas mpergunaken hak sorana. Tentuna ula kita terkecoh seh makana bali ras membeli kucing bas karung. Pemimpin si ipilih kita, siarapken banci jadi usihen, la meranggap seh makana erbage-bage cara ilakokenna guna nambahi pundi-pundina, korupsi, nggit ngaloken sisip, la makeken kekuasaan guna bersikap rate-ate man rayat, keluargana harmonis, ula si mbue ndeharana subuk si resmi bage pe si terbuni. Kalak si tuhu-tuhu erkemalangen man Tuhan, labo terjeng er-agama saja. Si mampu mengayomi kerina golongen agama ras suku si pelain-lain i negaranta enda. Tentuna labo gampang kita memilih memimpin si bage. Kinatana, melala denga pemilih si ikut-ikuten, tergoda ras money politik, rsd. Maka daramilah, calon pemimpin si ngena ate Dibata si banci mereken kesejahteraan ras kemakmuran man rayat. Terlebih enggo kita seh ku bas 128 tahun Berita si Meriah (18 April). Enggo seharusna anggota GBKP reh dewasana, mampu jadi sira ras terang i bas kegeluhenna.