PJJ GBKP Tgl. 1 - 7 April 2018

PJJ GBKP TGL. 1 - 7 APRIL 2018

Pdt. Larena br. Sinuhadji (Nd. Rey Tarigan)

HUT KAKR 128 TAHUN

HAK ANAK DAN GEREJA RAMAH ANAK

Tema : PELEPAS ANAK-ANAK E REH NDAHI AKU

(Markus 10:13-16; Matius 18:10)

Bahan ogenta sekali enda ngerana kerna perhatian Yesus nandangi anak-anak si berbanding terbalik ras ajar-ajarNa. Ituriken i bas ogen, maka lit me piga-piga kalak maba anak-anak man Yesus. Adi sibandingken ras Lukas 18:15 i je ikataken reh me piga-piga orangtua maba anak-anakna man Yesus. Ertina, kitab Injil Lukas lebih tegas ncidahken peran orangtua, e me kap bapa ras nande si ertanggung jawab nandangi anak-anakna. Orangtua si ngangkai maka anak-anak e benaken kitik-kitik nari arus nggeluh erkemalangen man Tuhan. Tapi kepeken lit ambaten bas ajar-ajar nari, merawa ajar-ajar man kalak ndai. Banci jadi la akapna penting kel anak-anak sabab biasa rusur ngganggui. Pelayanen Yesus  hanya fokus man kalak dewasa labo man anak-anak. Tapi justru sebaliknya, iidah Yesus perbahanen ajar-ajarNa merawa IA man ajar-ajarNa, “Pelepas anak-anak e reh ndahi aku, ola ambati, sabab kalak si bage kap empuna kinirajan surga”. Yesus mengapresiasi anak-anak selaku pewaris kinirajan Dibata. Sabab biak anak-anak umumna polos (apa adanya) la lit kemunafiken, sikap bergantung (kepercayaanna) man orangtua si total. Je nari idakep Yesus anak-anak e sekalak-sekalak, itamakenNa tanNa ku babona ras ipasu-pasuNa. Ertina, kerina anak iidah Yesus seri ras la erdobahen. Setiap anak meherga ras penting, maka setiap anak idakep ras ipasu-pasu Yesus. Erbage-bage kondisi anak-anak si nibaba orangtuana, banci jadi lit si berkebutuhen khusus, lit si mbiring warna kulitna, lit si keriting bukna tapi kerina seri ras meherga i lebe-lebe Yesus.

Konteks i bas Matius 18:10 e me kap penungkunen ajar-ajar Yesus kerna ise si mbelinna i bas kinirajan surga. Guna njawab penungkunen ajar-ajarNa maka idilo Yesus sekalak anak-anak si kitik denga ras itempatkenNa i lebe-lebena. Si iarapken Yesus e me kap sikap merendahkan diri bali ras anak-anak, la lit penonjolen diri (kesombangan). Emaka nina Yesus ola la meherga anak-anak si kitik enda, sabab lit malekatna si katawari pe natap ku ayo Bapangku i surga.

I bas buku bimbingenta enggo melala contoh-contoh si ibahan dalam rangka kita peduli man anak-anakta khusus KAKR rikut ras guru-guruna. Sada pengidahta maka maka anak-anak e me kap masa depan keluarga, masa depan gereja ras masa depan bangsa. Alu bage la banci lang arus sipersiapken kerinana si berkaiten guna kiniulin anak-anakta ku lebe. Subuk i bas pelayanen KAKR ula nari ianaktiriken, subuk inganna, fasilitas, anggaren guna kebutuhen anak-anak. Piga-piga Runggun lit denga si la lit gedung KAKR-na, ngajar tanpa lit persiapen (sermon guru), anggaren guna anak-anak la lit, bahkan lit deba guru e dua ngenca sedangken anak-anak lebih 40 kalak. Pembinaan guna guru kurang idukung. Tentu, adi bage denga silakoken seri ras kita ngambati anak-anak jumpa ras Yesus.

Anak-anakta arus iperdiateken subuk kebutuhen jasmani ras rohanina. Ras e lebe tanggung jawab orangtua i tengah-tengah keluarga. Kiniersadan arih bapa ras nande, maka anak e me kap pemere Dibata si tuhu meherga si arus tuhu-tuhu ikelengi, iperdiateken kebutuhenna secara utuh. Sabab anak-anak merupaken masa depan keluarga, gereja ras negara.