PA Kategorial GBKP Tgl. 8 - 14 April 2018

PA MORIA TGL. 8 - 14 APRIL 2018

Pdt. Larena br. Sinuhadji (Nd. Rey Tarigan)

REALITA KEGELUHEN ERPOLITIK I BAS MORIA

Ogen : Bilangen 13:25-33

Tema : IKUT NENTUKEN KEGELUHEN BANGSA

Tujun : Gelah Moria :

1) Pang bagi Kaleb ras Josua nuriken pengidahna kerna kuta Kanaan (berbeda ras mayoritas)

2) Ikut nentuken kegeluhen bangsa alu nehken sora ras pilihenna (ola golput)

Adi ngerana kita kerna pemimpin i bas negaranta enda, sangat itentuken i bas pilihen ras keputusenta. Adi pentar kita, mampu berpikir objektif la terpengaruh si nterem. Ngasup kita rukur kerna kemampuanna termasuk latar belakangna si banci mendukung i bas kepemimpinenna kelak, tentu banci sipilih pemimpin si mehuli. Sedangken kebalikenna, adi la pentar kita, tentu la kita berpikir realistis ras objektif. Kita ikut uga nina si nterem, banci jadi terkecoh kita kerna kinibayaken ras kinijelanna i bas darat nari. Bahkan melala penceramah agama si genduari ngatakenca, “pilihlah si seiman, la pe ia berintegritas, pernah pe ia korupsi si penting pemimpinta enggo seiman”. Tentuna, pernyataan enda la pas, sabab sura-suranta pemimpinta si erkemalangen man Tuhan, si ngasup mabai masyarakat e lebih sejahtera, bahkan banci jadi contoh man masyarakat si nterem.

Ogenta ngerana kerna laporen i bas sepuluh dua mata-mata bangsa Israel si enggo isuruh Musa guna mpepayo kondisi ras situasi daerah Kanaan. Empat puluh wari enggo iselidikina daerah e, janah iturikenna man Musa ras Harun rikut ras kerina perpulungen kerna kai si enggo iidahna ras icidahkenna asil buah pangan si enggo ibabana. Kerina ngatakenca maka taneh Kanaan e tuhu-tuhu mehuli ras mehumur. Tapi nina si sepuluh kalak, kalak si ringan i je tuhu-tuhu megegeh, janah kutana ibentengi alu mehuli. Ras si erbahanca kalak enda mbiar i je lit manusia raksasa, kesusuren Enak. Bahkan ipebelangna berita palsu i tengah-tengah bangsa Israel, maka asil taneh e la cukup mere man kalak si ringan i je pe, ras perban nterem kalak si gedang mbelin, bagi labang ngenca iakap kami man kami, nina si sepuluh kalak ndai. Ertina, ipekitikna bana lupa ia kerna kuasa Tuhan si sedekah enda enggo icidahken si ngasup erbahan kai pe. Tapi Josua ras Kaleb berbeda ras sepuluh kalak ndai. Josua ras Kaleb mereken motivasi ras semangat man bangsa Israel nina, “maka arus siserang ras sikuasi taneh Kanaan, sabab kita pe cukup megegeh guna ngkuasaisa”. Bahkan i bas bindu 14, asum bangsa Israel jungut-jungut man Musa ras Harun, Josua ras Kaleb mulihi mereken motivasi man kalak Israel. Maka negeri si iselidikina e me negeri si tuhu-tuhu mehuli. Janah adi ngena ate Tuhan, la banci lang ibaba ras ibereken Tuhan taneh si mehuli ras mehumur e man bangsa Israel.

Moria termasuk bagin i bas masyarakat, si la banci lang pilihenna, keputusenna sangat menentuken kegeluhen bangsa. Janah iarapken Moria aminna pe banci kataken termasuk minoritas tapi sada soranta sangat menentuken kegeluhen bangsata. Emaka si pemena i bas Pilkada enda, ula sempat kita golput. Si peduaken, erlajar arah kai si enggo icidahken Josua ras Kaleb, pang berbeda ras si nterem sabab ietehna kai si idalankenna si benar. Terkadang kita la pang berbeda. Padahal enggo sieteh  calon pemimpin ndai sedekah enda latar belakangna la mehuli. Tapi perban ia sada kiniteken ras kita, bahkan sada suku ka, akhirna kita ikut si nterem. Janah enggo ka lit pemerena man banta, entah kaos, sen entah janji-janji si deban si bakal sialoken adi ia enggo terpilih.

PA MAMRE TGL. 8 - 14 APRIL 2018

Nrs. Pdt. Larena Sinuhadji (Bp. Rey Tarigan)

HUT KAKR

Ogen : Efesus 5:1-2; 6:4

Tema : MAMRE RAMAH ANAK

Tujun : Gelah Mamre :

1) Meteh maka engkelengi anak e me tanda ia sekalu anak-anak Dibata

2) Ngasup engkelengi anakna sue ras kebutuhen anak e

Metode : Ceramah

Ogenta sendah akap kami enggo biasa sioge kita adi ngerana kita kerna pendidiken man anak, entah pe uga si mehulina kita orangtua nehken kekelengen man anak-anakta. Ogenta termasuk i bas bagin pendungi surat rasul Paulus man perpulungen i Efesus, benaken bindu 4 seh 6, si isina pedah-pedah entah pengajuk gelah perpulungen i kota Efesus tetap nggeluh ersada i bas sada kula, nggeluh i bas kegeluhen si mbaru entah pe nggeluh i bas terang Kristus, bage pe pedah-pedah kerna menjalin relasi si mehuli antara perbulangen ras ndehara, anak ras orangtua, bage pe antara tuan ras hamba.

Secara khusus si jadi bahan ogenta sendah, si pemena rasul Paulus ngatakenca nina, “Erkiteken kam anak-anak kekelengen Dibata, usihlah IA. Geluhndu arus erpalasken keleng ate, bagi Kristus enggo engkelengi kita, dingen ngendesken kesahNa man gunanta. IA enggo mpersembahken diriNa jadi persembahen si merim si ngena ate Dibata”. Adi i bas terj. Alkitab TB-LAI, ay. 1 jelas i je ipake Paulus anding-andingen anak-anak guna nggambarken kerna kepatuhen nandangi Dibata, “Sebab itu jadilah penurut-penurut Allah, seperti anak-anak yang kekasih”. Amin pe Paulus la ia erjabu, la lit pupusna, tapi itehna kerna karakter anak-anak si mehuli si patuh nandangi orangtuana. Kepatuhen anak-anak nandangi orangtuana labo terjadi secara otomatis tapi alu proses didiken ras teladan i bas orangtuana nari erpalasken keleng ate Dibata i bas Kristus bage pe pengorbanenNa si arus leben igejapken orangtua.

Si peduaken, ikataken Paulus nina, “Kam orangtua! Ola pesega-sega anakndu si erbahanca ia merawa. Tapi i bas mpebelin-belin ia ajari dingen tegu-tegulah ia bagi si ngena ate Tuhan”. Kata “orangtua” i bas Pustaka Si Badia iterjemahken lebih spesifik i bas Alkitab TB-LAI nina “bapa-bapa”. Latar belakangna erkiteken paksa si e melala denga kalak Kristen si berbudaya Yunani si memperlakuken anak-anakna seri ras budak (kitik denga enggo ipaksa erdahin i bas pendahin bapana, banci idayaken bagi budak, ras ate-ate orangtuana). Budaya si bagenda rupana tentuna arus sihapusken ras siganti alu pola relasi ras pengajaren si mbaru i bas Kristus e me alu negu-negu bagi si ngena ate Tuhan. I bas sisi si deban orangtua si pernah ipebelin-belin alu cara-cara budaya si ndekah iajuk gelah memutus rantai pola relasi ras pengajaren si la mehuli si erbahanca ceda ukur anak-anak, janah memulai budaya baru alu pola relasi ras pengajaren si ngena ate Tuhan.

“Ajari dingen tegu-tegulah ia bagi si ngena ate Tuhan” i bas Alkitab BIS-BIMK iterjemahken “besarkanlah mereka dengan tata tertib dan pengajaran Tuhan” i bas Alkitab TB-LAI iterjemahken “didiklah mereka di dalam ajaran dan nasihat Tuhan”. Tata tertib ras pengajaren Tuhan akap kami enggo iteh kita e me kerina pengajaren si lit i bas Pustaka Si Badia, umpamana pedah si pelimaken i bas 10 pedah Tuhan, mehamat man orangtua (Kel. 20:12; Ul. 5:16). Selaku orangtua, kita ncidahkenca alu pengerana ras perbahanenta (teladan) kerna cara si mehuli sue ras peraten Dibata i bas kita ngehamati orangtuanta i lebe-lebe anak-anakta. Tata tertib ras pengajaren si deban umpamana kerna ngekelengi Dibata asa ukur, asa tendi, ras asa gegeh si lit bas kita (Mat. 22:37-40), si icidahken orangtua alu ertoto ras ngoge Pustaka Si Badia secara teratur i rumah, beribadah alu tutus, rsd. Tata tertib ras pengajaran si deban umpamana ngajarkenca alu teladan kerna ulih Kesah Si Badia (Gal. 5:22-23) : lit kekelengen, lit keriahen, lit kemalemen ate, lit kesabaren, idalankenna perbahanen si mehuli, mehuli ia, setia, meteruk ukurna, ngasup engkuasai diri.

PA-nta sendah i bas rangka HUT KAKR si pe-128-ken, alu tema “Mamre ramah anak” ras tujun gelah Mamre meteh maka engkelengi anak e me tanda ia sekalu anak-anak Dibata bage pe gelah ngasup engkelengi anakna sue ras kebutuhen anak e. Ngataken bujur kita man Dibata erkiteken enggo iarak-arakNa lembaga kategorial anak ras remaja seh 128 tahun (18 April). Lembaga kategorial anak ras remaja i bas Gerejanta ibere gelar KAKR, Kebaktian Anak Kebaktian Remaja. Igelari “kebaktian” tujunna gelah pembinaan man anak ras remaja tuhu-tuhu serius ilaksanaken bagi pembinaan man kalak dewasa. Pembinaan i bas anak ras remaja labo terjeng kebaktian setiap minggu, erpalasken GBP KAKR lit bentuk-bentuk pembinaan si deban si mencakup pembinaan anak, pembinaan orangtua, pembinaan guru ras pembinaan organisasi, si tujunna gelah semakin meningkatken kualitas pelayanen i bas kategorial anak ras remaja. Emaka mari radu ras sidukung pelayanen KAKR i bas Runggunta masing-masing, si ibenaken alu engkelengi anak-anakta i rumah, iterusken alu dukungen baik secara moril ras materil pembinaan man anak ras remaja i bas KAKR.