PA Kategorial GBKP Tgl. 15 - 21 April 2018

PA MORIA TGL. 15 - 21 APRIL 2018

Pdt. Larena br. Sinuhadji (Nd. Rey Tarigan)

HARI ULANG TAHUN KAKR GBKP

Ogen : Masmur 127:3; Kolose 3:21

Tema : BEGIKEN AKU NANDE

Tujun : Gelah Moria :

1) Meteh maka anak e me pemere Dibata si meherga si kin arus ijaga, iperdiateken ras itumpak-tumpak perdalinna. 2) Ngangkai maka bena-benana kegutulen anak-anak (kenakalan anak) erkiteken la idatca hakna i bas keluarga nari

Metode : Nobar

Adi siperdiateken i bas Masmur 127:3 lit penerjemahen si berbeda i bas bahasa Karo ras bahasa Indonesia. TB-LAI nina, “Sesungguhnya, anak-anak lelaki adalah milih pusaka dari Tuhan, dan buah kandungan adalah suatu upah”. Sedangken bahasa Karo nina, “Situhuna, Tuhan kap si mereken anak-anak e, pasu-pasu i bas Tuhan nari kap ia”. Adi siperdiateken, maka i bas terjemahen bahasa Karo lebih ngergai kerina jenis kelamin, la hanya dilaki. Banci jadi enda sangat ipengaruhi budaya patriakal si sangat menghargai dilaki. Maka Tuhan si mereken anak-anak, subuk dilaki ras diberu, ras e merupaken pasu-pasu idur Dibata nari. Anak merupaken pasu-pasu (berkat) i bas Dibata nari ras rusur sikataken maka anak e pemere si meherga i bas Dibata nari. Ndauh ergan asangken emas, perak, juma, ras erta-ertanta si deban. Adi meherga, maka arus sijaga, siperdiateken, situmpak-tumpak perdalinenna benaken kitik-kitik nari. Kai si menjadi kebutuhenna tetap sicukupi, subuk kasih sayang, guna pendidikenna, geluh spiritualitasna, hakna guna ibegiken terlebih asum lit sura-sura ras persoalenna. Tapi mekatep si terjadi, anak e meherga bas konsep, tapi i bas perbahanen melala orangtua si la mediate nandangi anakna. Alu alasen sibuk ndarami materi guna anak ka. Payo i bas sada dampar, tapi ula sempat anak terlantar ras kurang iperdiateken erkiteken si e.

Kolose 3:21 nina, “O, kam orangtua ola rusursa junguti anakndu gelah ola bene ukurna”. I bas suratna man perpulungen Kolose, Paulus mpersingeti orangtua gelah ula rusursa junguti anakna, gelah ola bene ukurna (TB-LAI nina, “Hai bapa-bapa, janganlah sakiti hati anakmu, supaya jangan tawar hatinya”). Bahasa Indonesia iterjemahken “bapa-bapa” erkiteken melala denga kalak Kristen si berbudaya Yunani si memperlakukan anak-anakna seri ras budak. Kitik denga pe enggo ipaksa erdahin i bas pendahin si kasar, idayaken bagi budak, ate-ate orang tuana man anakna. Tapi terjemahen bahasa Karo mengakomodir kehadiren bapa ras nande sebage orangtua si arusna ngkelengi anakna. Ula rusursa ijunguti, ertina i jenda rusur konflik orangtua ras anak, bahkan anak menjadi objek si mekatep irawai, ijunguti, isalahken. Labo berarti la banci ijunguti asum lit kesalahenna, tapi si mehulina komunikasi si asertif, saling menghargai, termasuk hak ras kebutuhen anak. Sabab adi rusursa pe ijunguti, labo hanya erbahanca anak e kitik ukurna, tapi erbahanca ia tertekan, bodoh, tertutup, bahkan bena-benana ia menjadi anak si nakal i luaren sebage bentuk pemberontakenna.

Tema-nta i bas PA sekali enda, “Begiken aku nande”. Banci jadi tema enda muncul erkiteken anak siberlakuken sebage objek labo sebage subjek, si banci kita berkomunikasi ras, kai si menjadi kebutuhenna, sura-surana, bage pe kita sebage orangtua. Mekatep si terjadi kita (orangtua) rusur ateta si ibegiken, menentuken kai si menjadi sura-surana, keinginenna, kai si menjadi kebutuhen, tanpa pernah kita nungkun man bana. Anak-anak SD, SMP melala mengalami stress erkiteken orangtua memaksa anakna gelah ndatken juara, menjadi kalak si hebat, emaka erbage-bage kursus, les seh tengah berngi seh makana waktu untuk bersosialisasi enggo la nai lit.

Payo, setiap anak berbeda rikutken fase perkembangen ras pertumbuhenna. Tapi si paling penting, kita hadir sebage orangtua, sebage pendengar anak-anakta. Mulai kitik-kitik nari sibiasaken ia terbuka ras kita, ras kita nggit megiken ia, nungkuni kai si menjadi kebutuhenna, sura-surana, si erbahanca latih ukurna, persoalenna i sekolah bage pe ras temanna, rsd. Kesibuken pe salah sada alasen orangtua, kurang megiken anak-anakna, piah dungna anak mencari kalak si deban ras e bena-benana kegutulen anak erkiteken salah inganna curhat.

Anak merupaken pemere Dibata si meherga kel, janah anak masa depan keluarga, gereja ras bangsa negaranta. Emaka la banci lang, ibenai i tengah-tengah jabu tuhu-tuhu sikelengi, siperdiateken, situmpak-tumpak perdalinenna gelah bertumbuh menjadi anak sierkemalangen man Tuhan, berbudi luhur, keleng atena keluarga, ras sesama.

PA MAMRE TGL. 15 - 21 APRIL 2018

Nrs. Pdt. Larena Sinuhadji (Bp. Rey Tarigan)

PENDIDIKAN DEMOKRASI (NGERGAKEN DEMOKRASI)

Ogen : Perb. Rasul 15:6-21

Tema : DEMOKRASI

Tujun : Gelah Mamre :

1) Meteh kerna prinsip-prinsip demokrasi

2) Ngasup makeken prinsip-prinsip demokrasi i bas geluhna

Metode : Diskusi

Adi ngerana kita kerna demokrasi situhuna Tuhanta Yesus Kristus enggo ngajarken kerna prinsip-prinsip si menam seri ras demokrasi. Umpamana, Yesus la membeda-bedaken kalak, seri kerina ibahanNa, kerina ielaiNa alu mehuli. Hukum kasih i bas Mat. 22:37-40 umpamana, e me sada prinsip si mbages kerna kesetaraan i antara manusia si saling engkelengi sada ras si debanna. Si berbeda antara demokrasi doni enda ras ajaren Kristus e me kerina kalak si tek nembah ras ersukuten man Dibata, entah pe Kata Dibata si jadi pedoman. Sementara demokrasi bas doni enda merujuk ku prinsip-prinsip si umum rikutken pemeteh ras pengalamen manusia i bas sejarah, umpamana hak azasi manusia, kesetaraan, kebebasan entah pe kemerdekaan warga negara, rsd. Amin pe lit perbedaan, tapi akap kami la lit pertentangen antara ajaren Kristus ras ajaren demokrasi doni enda sepanjang demokrasi e tuhu-tuhu ipergunaken guna kebenaran, keadilan ras kesejahteraan rakyat.

Ogenta sendah akap kami enggo rusur sioge, e me kerna sidang i Yerusalem. Sidang rasul-rasul i Yerusalem ibahan erkiteken lit persoalen i bas perpulungen i Antiokia i ja lit pengajaren si ngatakenca maka kalak si tek si labo kalak Yahudi arus leben isunatken bagi iaturken Undang-undang Musa maka terkelin ibahan Dibata (ay. 1-2). I bas rasul-rasul pe lit dua pendapat si berbeda, lit si mempertahanken kewajiban sunat man kalak si tek si labo kalak Yahudi, si debanna ngatakenca maka sunat e labo hal si wajib ilaksanaken. Leben Petrus ngerana mewakili kelompok si labo mewajibken sunat man kalak si tek si labo kalak Yahudi (ay. 8-11). Intina, lit i bas ay. 11, sunat e labo menentuken keterkelinen kalak si tek tapi erkiteken lias ate Tuhan Yesus.

Kenca enggo ngerana Petrus, maka sinik kerina kalak si pulung e, rukur i bas pusuh perukurenna masing-masing. I bas sada tafsiren ikataken maka kai si ikataken Petrus e “menjernihkan suasana dan mempersiapkan pikiran dan hati untuk mengambil keputusan bersama”. Ertina i bas proses sidang enda si niutamaken “hati dan pikiran yang jernih” asangken mpertahanken pendapat secara irasional bage pe emosional janah la nggit ngakuken kebenaren pendapat kalak si deban secara objektif. I bas suasana pusuh perukuren si bersih e maka banci ibegiken pendapat Barnabas ras Paulus. I bas si e tek kita maka Kesah Si Badia nge si erdahin mereken pusuh perukuren si bersih i bas sidang enda.

Kenca Petrus, Barnabas ras Paulus ngerana, maka seh ku giliren Jakup (Yakobus) ngerana mewakili kelompok si mewajibken sunat man kalak si tek si labo kalak Yahudi bagepe aturen-aturen si deban sue ras Undang-undang Musa (ay. 13-21). Intina lit i bas ay. 19-21, teridah maka ialoken Jakup pendapat kerna sunat si labo wajib hukumna man kalak si tek si labo kalak Yahudi. Tapi lit denga aturen-aturen rikutken Undang-undang Musa si arus ilakoken kalak si tek si labo kalak Yahudi. Adi rikutken 1 Kor. 8:1-13, teridah maka aturen kerna pangan-pangan enda arus ilakoken alu pertimbangen gelah ula jadi batu antuken si mempengaruhi kiniteken kalak si tek si deban, tapi labo merupaken syarat keselamaten.

Selain sidang i Yerusalem si jadi bahan ogenta sendah situhuna erbahan sidang (runggu) guna muat keputusen bersama i antara rasul-rasul enggo semal ilaksanaken, umpamana i bas Perb. Rasul 1:23-26, isepakati maka Matias si gantiken Yudas. I bas Perb. Rasul 6:1-6, ibahan keputusen ipilih 7 kalak si khusus dahinna ngelaken pangan si tep-tep wari. I bas Perb. 13:1-3, ibahan sada keputusen maka Barnabas ras Saul (Paulus) itetapken guna ndahiken dahin si enggo itetapken Dibata man bana. I bas proses sidang enda teridah maka rasul-rasul situhuna enggo ncidahken prinsip-prinsip si i bas doni enda igelari “demokratis”, umpamana, labo lit si merasa diri paling berkuasa, lit pe jabaten bas rasul-rasul tapi tujunna guna ngelai ras nehken Kata Dibata, kerina banci berpendapat, menghargai pendapat orang lain dengan hati dan pikiran yang jernih, iupayaken gelah erbahan keputusen-keputusen si mewaliki pendapat-pendapat si berbeda erpalasken Kata Dibata, rsd.

PA-nta sendah ngajuk kita gelah makeken prinsip-prinsip demokrasi i bas geluhta. Akap kami si lebih tepat, e me gelah kita makeken prinsip-prinsip demokrasi erpalasken ajaren-ajaren Kristus bagi si enggo iteladanken rasul-rasul i bas ogenta sendah. Dibata si mpegegehi kita.