Bimbingen PJJ Tgl. 20 - 26 September 2015

BIMBINGEN PJJ TGL. 20 - 26 SEPTEMBER 2015

Pdt. Larena br. Sinuhadji (Nd. Reynard Tarigan)

Ogen :

Masmur 78:5-8

Tema :

KEBAKTIN I BAS JABU

Tujun :

Gelah ngawan ni perpulungen :

1) Meteh pentingna ngelakoken kebaktin i bas jabu

2) Ngasup tetap ngerembaken jabuna ku Dibata

Penjelasen Bahan Pustaka Si Badia

1. Perikopta merupaken bagin pujin si rusur iendeken bangsa Israel kerna kuasa ras keleng ate Tuhan si arus tetap ituriken man kerina kesusurenna.
2. Secara khusus si jadi bahan renungenta, maka i je Pemasmur jelas ngelumbakenca maka Tuhan enggo mereken pedahNa, perentahNa man kesusuren Jakub. Janah tugas nini-nininta (sepuh) ngajarken man anak-anakna. Bdk. i bas Ul. 6, kerna undang-undang pematang si arus siajarken ras ipersingeti orang tua bangsa Israel man anak-anakna, subuk sangana i rumah, i bas perdalanen, sangana ngadi-ngadi entah pe sangana erdahin. Lebe orang tua arus nggeluh i bas perentah Tuhan e, je nari iajarken. Penting i jenda keteladanan ras pengajaren si la erngadi-ngadi.
3. Bahkan kai si enggo idalanken orang tua, idalanken anak-anak si arah pudi ka. Secara estafet, hal si mehuli si enggo idalanken orang tua, idalanken anak-anakna. Bahkan adi pengajaren Kata Dibata idalanken sekalak nande si sangana natang tuah, maka anak si bas bertinna pe ikut nggejapken Firman Tuhan si ipelajari orang tuana.
4. Tujunna enggo jelas maka kerina kesusuren si arah pudi tetap ernalem man Dibata, tetap iingetna kerna keleng ate Dibata si enggo iberekenNa. Tetap patuh man perentah Dibata. Janah pengalamen nini-ninina ndube si la malang man Tuhan, si memberontak man Tuhan dingen lit akibatna, banci isilahina. La ia ikut terbawa arus bagi si enggo pernah ilakoken nini-ninina ndube bahkan la terbawa arus jaman erkiteken penalamenna tetap Dibata ras KataNa.

Aplikasi

1. Jabu e me kap persekutuan si kitikna i bas masyarakat. Lit si ngatakenca, adi jabu-jabu hancur maka masyarakat pe akan hancur. E maka la banci lang, keluarga lebe arus iperlengkapi gelah tetap paguh, nteguh, harmonis seh makana la terbawa arus jaman.
2. Salah sada cara mbentengi keluarga alu kita erbahan kebaktin i bas jabu. Banci sada wari sekali entah seminggu sekali. Tapi si mehulina sada wari sekali, sabab Iblis imbangta gawah-gawah ku jah ku je bagi singa si erngaung guna ndarami si man jerngemenna (1 Pet. 5:8). Iblis setiap saat mengganggu kita, e maka pusuh ras tendinta pe arus tetap idemi alu Kata ras KesahNa. Konsep kebaktin i bas jabu ula formil gelah ola membosanken piah dungna hanya terjeng formalitas ngenca tapi la lit kerinduan bas anggota jabu guna ngelakokenca. Kerina anggota jabu ilibatken. Arah kebaktin i bas jabu pe banci orang tua mendengar suka-duka pengalamen anak-anak si ialamina. Arah kebaktin i bas jabu, selain keluarga tetap dibentengi alu Firman Tuhan, tetap penalemen keluarga e man Tuhan, keluarga pe semakin nteguh kiniersadanna. Anak-anak i bas masa pertumbuhenna ras pencarian identitas, la idaramina kalak si deban tapi orang tua ras keluarga menjadi orang terdekat man bana. Komunikasi antara suami-istri, orang tua ras anak tetap terjalin alu mehuli.
3. Si erbahanca jadi tantangen si mberat kita ngelakoken kebaktin i bas jabu e me kap kurang megegeh tekad i bas kita ngelakokenca. Guna si e lebe orang tua, bapa ras nande ersada arih guna erbahan kebaktin i bas jabu.