Bimbingen PJJ Tgl. 13 - 19 September 2015

BIMBINGEN PJJ TGL. 13 - 19 SEPTEMBER 2015

MINGGU PERDAMEN (HAM)

Pdt. Larena br. Sinuhadji (Nd. Reynard Tarigan)

Ogen:

Matius 22:34-40

Tema:

NGGELUH RADU SIKELENG-KELENGEN

Tujun:

Gelah ngawan ni perpulungen:

1) Meteh maka sikeleng-kelengen e me inti pedah Dibata man manusia

2) Ngelumbaken geluh sikeleng-kelengen

PENJELASEN BAHAN PUSTAKA SI BADIA

Bahan Pustaka si Badia sekali enda terkenal alu sebuten “Hukum Kasih.” Ibenai alu penungkunen si sifatna menjebak arah guru agama nari si atena ncubai Tuhan Jesus, alu penungkunen, perentah apai si pentingna i bas kerina Undang-undang Agama? (Bhs. Ind. : “Hukum manakah yang terutama dalam hukum Taurat?”). E maka ijabab Jesus, ngkelengi Dibata ras ngkelengi manusia. Jabapen Tuhan Jesus enda situhuna merupaken intisari i bas 10 Pedah Dibata. Pedah 1-4 e me kap ngkelengi Dibata, ras pedah 5-10 e me kap ngkelengi manusia. Bobot lebih i bas ajaren Tuhan Jesus kerna Hukum Taurat (10 Pedah Dibata), maka arus ngkelengi Tuhan Dibata asa ukurndu, asa tendindu dingen asa gegehndu (totalitas holistik dalam mengasihi Tuhan). Ras si peduaken ngkelengi manusia bagi kita ngkelengi dirinta jine. Arah kai si ikataken Tuhan Jesus, maka itekankenNa i bas kita ngkelengi manusia arus seri kekelengen si ibereken kita bagi kita ngkelengi dirinta. Ngkelengi dirinta jine isejajarken ras ngkelengi manusia. Erkiteken pada umumna, manusia lebih ngukurken dirina sendiri (egois). E maka i jenda itekanken Tuhan Jesus guna banci ngkelengi kalak si deban bagi ngkelengi dirina sendiri. Adi kita ngukurken guna dirinta pasti siukurken ras sibereken si terbaik, bage pe iarapken Tuhan i bas kita ngkelengi temanta. Bahkan i bas khotbah Jesus i datas uruk, lit ajaren si ngatakenca kelengilah temanndu, janah elem-elemlah man imbang-imbangndu. Tapi ajaren Jesus, kelengilah imbang-imbangndu, janah ertotolah man Dibata kerna kalak si erbahanca kam ngenanami kiniseran (Mat. 5:43-44).

APLIKASI

Minggu enda i bas PJJ-nta igelari Minggu Perdamen/HAM. HAM e me kap hak si ibereken Dibata man manusia benaken manusia tubuh ku doni enda (hak-hak yang telah dipunyai seseorang sejak ia dalam kandungan). Secara resmi HAM enda enggo ideklarasiken PBB secara universal i bas Tgl. 10 Des. 1948. HAM enda misalna: hak untuk hidup layak, hak untuk memeluk suatu agama/kepercayaan, hak untuk beribadah menurut agama/kepercayaan yang dianutnya, hak untuk mendapatkan pekerjaan yang layak, rsd. Tentuna HAM enda pada dasarna arus iakui ras iergai secara universal erkiteken HAM enda merupaken palas perdamen i bas doni enda. Tapi melala denga pelanggaren HAM si terjadi seh gundari si erbahanca la lit perdamen bas doni enda. Peperangen, pembunuhan, pemerkosaan, penyiksaan, pelecehan, rsd.  Syarat mutlak geluh i bas perdamen e me kap saling mengasihi bagi si enggo iajarken Tuhan Jesus. E maka kai si banci silakoken dalam rangka mewujudken geluh sikeleng-kelengen? Ibenaken i bas lingkungen si kitikna e me kap keluarga, tetangga, teman sada perpulungen, ras kalak si lit isekelewetta. Walau pe kadang, si terjadi kalak si deban nge si la ngkelengi kita, entah pe pernah kita jadi korban pelanggaren HAM. Labo e erbahanca kita surut ras ngadi nehken kekelengen. Teruslah kita erbahan si mehuli i bas kegeluhenta sabab e kin biakta selaku kalak si tek rikut bagi si enggo iperentahken Tuhan.