Bimbingen Khotbah Minggu 4 Oktober 2015

BIMBINGEN KHOTBAH MINGGU 4 OKTOBER 2015

MINGGU BUDAYA

Pdt. Larena br. Sinuhadji (Nd. Reynard Tarigan)

Invocatio :

“Tapi man banta sada ngenca Dibata, e me Bapanta. I bas Ia nari me rehna kerina si nasa lit, janah kempak Ia me pe perlawesta. Janah sada ngenca Tuhan, e me Jesus Kristus. Arah Ia me kerina si nasa lit ijadiken, dingen arah Ia kita nggeluh.” (1 Korinti 8:6)

Ogen :

Masmur 150:1-6 (Responsoria)

Khotbah :

Keluaren 12:21-28 (Tunggal)

Tema :

PERBAHANEN DIBATA JADI ADAT KEGELUHEN

Penjelasen Bahan Pustaka Si Badia

Pengogen si pemena merupaken seruan Pemasmur gelah kerina si erkesah memuji Tuhan. Ertina, memuji lit limitna, sabab adi la nari kita erkesah la nari kita banci muji Tuhan. E maka tupung ibereken Tuhan waktu ras kesempaten, rikutken napas kegeluhen, tetaplah kita muji Tuhan. Pujian si isehken man Tuhan erkiteken perbahanen Tuhan simbisa ras erkiteken kemulianNa si meganjangna. Pujian si labo hanya isehken i rumahNa si badia. Alat-alat musik rikut ras tarian banci ipake guna muji Tuhan guna naksiken perbahanenNa si mbelin.

Bahan Khotbah, nuriken kerna tulah si pesepuluhken man bangsa Mesir ras kelepasen man bangsa Israel (Paskah). Dibata ersura-sura mulahi kalak Israel i bas perbudaken Mesir nari, tapi tetap la ibere raja Firaun. Enggo pe erbage-bage mara nderpa bangsa Mesir (lau jadi dareh, katak, rengit, laneng ratah, asuh-asuhen mate kerina, bareh, udan baho, labang ras gelap), tetap la ibere raja Firaun, erkiteken Tuhan sendiri enggo mengerasken ukur Firaun (Ps. 11:10). Ope ibahan Tuhan tulah si pesepuluhken, e me kap kematen anak dilaki sintua bangsa Mesir, subuk manusia bage pe asuh-asuhen, ibereken Tuhan perentah man Musa ras Harun gelah ilakoken kerina kalak Israel. I ja selama sada minggu kalak Israel la banci ipanna roti si itama ragi (wari raya roti la tama ragi). Je nari arus ikurbanken sada anak biri-biri entah pe anak kambing si umurna setahun denga, kenca bage geleh. Buat pe sada batang hisop, si icebuken ku bas baskom si isin dareh biri-biri entah kambing, je nari sapuken darehna ku duana binangun pintun ras beloti si berteng i babo pintun rumah kalak Israel. Dingen ise pe la banci nadingken rumahna seh erpagi-pagi. Dareh e jadi sada tanda maka rumah kalak Israel ilewati malekat kematen. Enda me pengertin Paskah (Bhs. Ibr. : Pesakh, ertina melewatkan, makna menyelamatkan. Bhs. Ing. si tepat e me Passover) i bas kalak Israel, maka Tuhan enggo menyelamatkan bangsa Israel i bas mara nari, i ja anak dilaki sintua i bas bangsa Israel tetap nggeluh. Janah rikutken tema-nta situhuna si jadi fokus e me kap i bas ay. 24-25 maka Dibata sendiri enggo netapken Paskah jadi sada peraturen si arus idalanken kenca enggo seh pe bangsa enda i taneh Kanaan, ras ipesusurna ku anak-anakna, jadi adat agama. Bahkan adi lit penungkun anak-anak pe, arus mampu orang tua njelaskennca maka Paskah ngingetken kerna perbahanen Dibata si mbelin, dingen pehaga Tuhan sebab enggo iselamatkenna bangsa Israel. Paskah arus terus-menerus irayaken seh ku kesusuren si arah pudi jadi sada ketetapen i tengah-tengah kegeluhen bangsa Israel guna nginget kerna perbahanen Dibata si mbelin. Perbahanen Dibata jadi perayaan kiniteken si arus idalanken bangsa Israel turun-temurun (bdk. Ibr. 11:28, “erkiteken kinitekenna maka ia ngelitken Paskah”). Enda me kaitenna ras tema, nginget perbahanen Dibata si mbelin ras mpehaga Tuhan si enggo nelamatken, em si arus itradisiken, ibudayaken secara turun-temurun. Itradisiken entah pe ibudayaken i jenda maksudna labo iterusken bage-bage saja (kebiasaan) tapi la nai siangkai kai maknana. Si payo e me secara sadar dipahami dengan baik untuk kemudian iterusken ku generasi berikutna.

Aplikasi

Kamus Besar Bahasa Indonesia (KBBI) ngatakenca, maka adat adalah aturan yang lazim dilakukan sejak dahulu kala, kebiasaan, sikap hidup yang sudah menjadi kebiasaan. Kebiasaan e enggo jadi sada kesepaken ras-ras guna idalanken sada kelompok lingkungen entah pe suku. Janah adat (kebiasaan) e iperluken gelah manusia banci nggeluh alu mehuli dingen ratur. E maka penting kel, adat (kebiasaan) tetap iterangi alu Kata Dibata, gelah mengarahken kerina adat istiadatta (kebiasaannta) tetap tujunna guna mpermuliaken Tuhan (ogen). E maka adi lit adat kebiasaanta si enggo bertentangen ras kinitekenna pang kita nulaksa. Ras rikutken bahan khotbahta, maka kepeken kebiasan si banci ipakeken jadi adat kegeluhenta e me kap perbahanen Dibata, si intina mpermuliaken Tuhan Dibata. Sebage contoh: ndilo wari udan, perumah begu kebiasan si gegel nari ilakoken leluhurta, tapi enggo pasti la nari mpermuliaken Dibata. Sabab cara-cara si idalanken enggo bertentangen ras kinitekenta.

Helmut Richard Niebuhr, sekalak Pendeta, teolog, AS nari, i bas bukuna si terkenal e me Christ and Culture nulisken 5 sikap nandangi budaya, bagenda nina:

1. Sikap si radikal, e me sikap si la mengakui hubungen iman ras budaya. Iman rehna i bas Dibata nari, sifatna kudus, sedangken budaya rehna i bas manusia nari, ras sifatna cemar/dosa. E maka sikap si pemena enda, menolak mentah-mentah kerina adat istidat leluhur. Siinget, awalna pe marenda gendang ras rengget la banci teraloken i bas GBKP, tapi kedungenna, banci bengket ras ipake guna alat mpermuliaken Tuhan.
2. Sikap si akomodatif, e me sikap si mengakomodasi budaya. Sikap enda kebaliken i bas sikap si radikal, i ja la lit ipertentangken sama sekali antara iman ras budaya, adat istiadat iakomodasi ku bas iman Kristen.
3. Sikap si sintetik, e me sikap si i ja budaya ras iman ialoken i bas sada kesatuan si saling melengkapi. Sikap si peteluken enda merupaken bagin i bas sikap si pedukaken i datas. Gereja Khatolik umumna make sikap si peduaken ras si petelukan enda.
4. Sikap si dualistik, e me sikap si mendua, si idalanken kalak si nggeluh i bas dua dunia (amfibi). Sebage contoh, i bas wari Minggu, cukup keras ia menentang hal-hal si berkaiten ras budaya si la nari membangun iman Kristen. Tapi i bas wari-wari si deban, labo akapna masalah ndalanken hal-hal si ndai enggo tegas i tulakna.
5. Sikap si transformatif, e me sikap i ja adat istiadat iterangi alu Kata Dibata. Lit i je sikap kritis ras selektif. Iman Kristen harus tetap menjadi warna ras nafas kebudayaan.

Sikap si apai si sedekah enda ilakoken kita? Sikap transformatif nge si arusna sipake guna kita banci kritis ras selektif nandangi adat istiadat si lit. Adat istiadat i jenda labo saja berkaiten ras warisan leluhur, tapi adat istiadat entah pe budaya modern si berkembang i bas paksa enda. I je me fungsina Gereja guna banci secara kritis memilih kebiasan-kebiasan si enggo mentradisi si banci denga ipake guna alat Berita si Meriah (memuliaken Tuhan), bage pe kebiasaan-kebiasaan si berkembang i bas paksa enda. E maka adi lit adat (kebiasaan) si enggo ncurnaken gelar Tuhan, si bertentangen ras Kata Dibata, pang kita nulaksa. Hal si deban, mari radu ras sipahami ras sihayati alu payo adat, kebiasaan, budaya Karo, si sedekah enda enggo iakui i bas GBKP entah pe enggo iterangi alu Kata Dibata, gelah bagi bangsa Israel, banci ka iterangken, iajarken, ipesusur man generasi mudanta.