Bimbingen Khotbah Minggu 20 September 2015

BIMBINGEN KHOTBAH MINGGU 20 SEPTEMBER 2015

Pdt. Larena br. Sinuhadji (Nd. Reynard Tarigan)

Invocatio:

“Petelukaliken nungkun Jesus man Simon Petrus nina, "O Simon, anak Johanes, keleng kin atendu Aku?" Getem kal pusuh Simon Petrus sabap telu kali enggo Jesus nungkun man bana, "Keleng kin atendu Aku?" E maka erjabap Simon Petrus, "O Tuhan, kai pe ietehNdu kap. IetehNdu pe maka keleng ateku Kam!" Nina Jesus man bana, "Permakanilah biri-biringKu” (Johanes 21:17)

Ogen:

Johanes 21:15-19 (Tunggal)

Khotbah:

2 Raja-raja 4:8-13 (Tunggal)

Tema:

TUMPAK-TUMPAK SERAYAN TUHAN

PENJELASAN BAHAN PUSTAKA SI BADIA           

Perikop enda e me kap kerna turin-turin nabi Elisa ras diberu si bayak i Sunem nari. Sekalak diberu ras perbulangenna si ersada arihna guna nikapken ingan tading man Elisa, dikenca Elisa reh ku rumahna. Ibenai alu undangen i bas diberu enda man Elisa guna man i rumahna. Janah mulai je nari, adi Elisa reh ku Sunem, i rumah diberu e ia rusur man. Kenca enggo rusur Elisa reh ku rumahna, e maka arih diberu enda ndai ras perbulangenna gelah erbahan ingan tading khusus man Elisa (sada bilik i babo tarum, enggo lit i je ingan medem, sada meja, sada kursi ras sada lampu), sabab tek ia, Elisa sekalak si badia. Kiniulin jabu enda tuhu-tuhu isehkenna alu la ngarapken balas. Hal enda teridah, tupung isuruh Elisa si Gehasi, e me kap suruh-suruhenna, nungkuni diberu ndai kerna kai si niperlukenna. Janah erkiteken lit kedekaten Elisa ras raja bage pe puanglima, banci ka ia mpeseh kata kerna kai si niperluken diberu enda ras jabuna. Tapi jabapen diberu enda luar biasa maka kerina keperlunna enggo cukup idatna i tengah-tengah bangsana.

I bas pengogen si pemena, e me kap kerna percakapen Jesus ras Simon Petrus kenca Jesus keke i bas si mate nari. Percakapen enda intina e me kap mpetetap ukur man Simon selaku ajar-ajar Tuhan guna banci mpermakani perpulungen. Telu kali lit penungkunen si seri ipeseh Tuhan Jesus, “O Simon anak Johanes keleng kin atendu Aku asangen ate kalak enda?” Ijabap Simon, maka keleng atena Jesus. E maka tole nina Jesus mpermakanilah biri-biri Tuhan. Telu kali penungkunen si seri ipesehken Tuhan Jesus man Simon, si erbahanca getem kel pusuh Simon Petrus. Sabap iingetna maka pernah ipersokenna Jesus telu kali. Banci jadi telu kali penungkunen si seri sibahan Tuhan Jesus enda dalam rangka gelah ietehNa kesungguhen Simon Petrus i bas ngkelengi Tuhan Jesus. Banci ka gelah Simon Petrus ola asal jabap saja, tapi enggo iukurkenna konsekuensina ras resiko si arus idalanken i bas ia ngkelengi Tuhan Jesus bage pe mpermakani perpulungen Tuhan.

APLIKASI

Arah dua bahan renungenta sekali enda maka banci sidat piga-piga kesimpulen :

1. Serayan Tuhan i bas ndahiken dahin pelayanenna, arus lit dasar sebage palas si benar, e me ngkelengi Tuhan. Em si arus jadi satu-satunya kepentingen entah pe satu-satunya motivasi i bas pelayanen.
2. Tentu saja kepentingen entah pe motivasi i bas pelayanen mempengaruhi tanggung jabab serayan i bas tetap setia mpermakani perpulungen sebage tanda keleng atena man Tuhan Jesus Kepala Gereja. Geluh pertendin perpulungen arus tetap iarak-arak ras ipenuhi.  
3. Serayan Tuhan i bas ndahiken dahin pelayanenna, arus tetap idukung perpulungen subuk secara moril ras materil. Labo hanya materi, tapi arah erbage-bage talenta si enggo ibereken Dibata banta. Adi sikaitken bas perikop, memang diberu Sunem enda, kalak bayak, ras arah kebayakenna ia mendukung pelayanen nabi Elisa. Dukungen doa, kerjasama si mehuli, mereken ide-ide si kreatif ras membangun perpulungen, ikut terlibat aktif i bas pelayanen bage pe mendukung i bas dana.
4. I bas perpulungen numpak-numpak serayan Tuhan si e kerina ilakoken alu tulus, la lit sura-sura si terbuni. Bagi si ilakokoen diberu Sunem enda ndai. Janah i bas mendukung pelayanen man Tuhan arah gerejaNa bage pe serayanNa, maka geluhta pe tetap ipasu-pasu Tuhan.