Bimbingen Khotbah Minggu 13 September 2015

BIMBINGEN KHOTBAH MINGGU 13 SEPTEMBER 2015

Pdt. Larena br. Sinuhadji (Nd. Reynard Tarigan)

Invocatio:

“Tapi nina Esau, “Bas aku pe enggo bias agingku, la padah iberekenndu bangku.” (Kejadin 33:9)

Ogen:

Kolose 1:18-22 (Responsoria)

Khotbah:

Kejadin 33:1-15 (Tunggal)

Tema:

NGGELUH ERDAME

PEMBAHASEN BAHAN PUSTAKA SI BADIA

Esau ras Jakub e me kap anak kembar Ishak ras Ribka (Kej. 5:19-26). Duana kalak enda bertumbuh i bas kekelengen orang tua si saling membedakan, i ja Ishak ngenan atena Esau erkiteken ntabeh akapna man bekas Esau erburu, tapi Ribka ngenan atena Jakup, sabab biakna persinik, dekahen tading i rumah. Kenca kalak enda dewasa terjadi konflik, rubat mbelin si erbahaca kalak enda sirang. Persoalenna erkiteken hak kesulungen. I bas Kej. 27, banci siidah maka hak kesulungen Esau ndabuh man Jakub erkiteken pertakin si ibahan Jakub ras nandena. Tupung Iskak ngerana ras Esau maka lit sura-surana masu-masu Esau erkiteken ia enggo metua, dingen lanai bo ndekah nggeluh, janah suruhna Esau ku kerangen erburu rubia-rubia janah tasakenna gelah banci ipan Iskah. Kepeken ibegi Ribka. Jakub alu penampat Ribka make kekurangen Ishak si enggo seleng matana, nipu bapana. Kedungenna Iskak masu-masu Jakub si kin iakapna Esau, erkiteken paksa si e ipake Jakub baju Esau, itamakenna kulit kambing i bas tanna ras bas kerahungna.Tapi situhuna adi sioge Kej. 25:29-34 i je teridah maka Jakub labo nangko pasu-pasu i bas Esau nari, tapi pasu-pasu e situhuna enggo inubatken man bana. Tupung bas bertinna denga pe, Tuhan ngerana man Ribka, maka lit dua bangsa i bas bertinna, dua bangsa si ermusuhen. Gegehen agina asa kakana, sintua jadi suruh-suruhen singuda. Labo terjeng je saja, Esau sendiri la akapna meherga hak kesulungen e. Teridah tupung mulih ia erburu nari, janah melihe kel akapna, sedangken Jakub sangana nasaken kacang megara. E maka ipindona man Jakub gelah iberekenna pangan e erkiteken melihe kel akapna. Ialoi Jakub, maka banci ibereken pangan kacang megara enda, adi ibereken Esau hakna selaku anak sintua. Esau sangat memandang rendah hak kesulungen e, e maka nggit ia nukarkenca. Bahkan ersumpah Esau, iberekenna hak kinituanna man Jakub, kenca bage ibereken Jakub man Esau roti ras kuah kacang megara e. Banci isimpulken, payo memang hak kesulungen e enggo inubuatken Tuhan man Jakub, sura-sura Dibata, Jakublah Bapa Leluhur bangsa Israel, walau pe labo ia anak sintua. Tapi i bas dampar si deban, beliden kearun ate Ribka ras Jakub, seh makana iaturken pertakin, si erbahanca Jakub dat pasu-pasu bas Ishak nari.

Kenca peristiwa si e, esura-sura Esau mbunuh Jakub. E maka isuruh nandena, Jakub menyelamatken diri, lawes ku rumah mamana, turang Ribka si Laban. Kurang lebih 20 tahun Jakub tading ras Laban. 7 tahun lebe ia erdahin guna ndatken Rahel (kepeken Lea ibereken Laban), Jenari 7 tahunka erdahin guna ndatken Rahel, jenari 6 tahun ka ia tading ras Laban (Kej. 3138-42). 20 tahun hidup dalam penderitaan, subuk Esau, Jakub, bage pe Ishak ras Ribka. Erkiteken konflik, perubaten maka keluarga enda lit i bas keadaan la dame. Adi sungkun pusuhna masing-masing, pasti sitedehen, tapi erkiteken mbiar, harga diri maka tetap lit i bas kesirangen.

Tapi i bas perikop enda, siidah maka lit inisiatif i bas Jakub mulih ku kutana, jumpai Esau. Walau pe situhuna mbiar kel Jakub ras erbebe kel ia i bas jumpai Esau, entah tetap denga merawa abangna ndai, terlebih ieteh Jakub, Esau reh ras 400 anak buahna. Ibahanna erbage-bage strategi ras enggo isikapkenna erbage-bage pemere man abangna Esau. I bas si e pe ertoto Jakub mindo penampat i bas Dibata nari, gelah kerina rencanana erdalan alu mehuli erkiteken pertolongen Tuhan (Kej. 32:9). Terbukti kai si jadi kebiaren Jakub la terbukti. Jakub ras Esau erdame. Ipelebena suruh-suruhenna, si enggo jadi ndeharana ras anakna arah lebe kel, je nari Lea ras anakna, janah si arah pudina e me Rahel ras Jusup. Jakub sebage bapa, erdalan ngelebei kerina, enda bukti ia berani ngkorbanken dirina. Je nari nembah mungkuk ia pitu kali seh ku taneh ndeheri seninana. Tapi kiam Esau jumpai Jakub ras iemaina. Tangis ia duana. Rindu yang sudah lama tertahan terlampiaskan i bas paksa si e. Waktu si erbahanca kinirawan si lit bas diri Esau nese-nese sitik bene. Bage pe kebiaren bas diri Jakub bene erkiteken ketedehen atena jumpa ras erdame ras seninana. Jakub erkiteken ietehna sebage posisi si salah, tuhu-tuhu ia mpeteruk dirina, guna mindo perkuah atena seninana. Sempat ilebuhna seninana tuanku (“E mindo perkuah atendu, tuanku”). Meseksek kel ipindoken Jakub gelah ialoken Esau pemere si enggo isikapken guna iberekenna man Esau, tapi la nggit Esau ngaloken erkiteken nina bas ia pe enggo bias. Tapi tetap meseksek tetap ipindoken Jakub gelah ialoken Esau, ras sempat ia ngerena, “Ngidah ayondu saja bali kuakap bagi natap ayo Dibata, perban ulinna perbahanenndu man bangku.” Bagem igejapken Jakub kekelengen senina si la pernah bage ipikirkenna, seh maka senang kel ukurna. Janah tuhu-tahu igejapken Jakub si e kerina erkiteken perbahanen Tuhan si enggo masu-masu geluhna.

I bas ogen si pemena, jelas maka Jesus Kristus Anak Dibata si tonggal si ndameken manusia ras Dibata. Dibata mereken perdamen arah kematen AnakNa i kayu persilang, gelah kerina sinasa lit mulihken man baNa, subuk i surga bage pe i doni. Nai kita imbang Dibata erkiteken dosa ras kesalahenta (perbahanen ras perukuren si jahat). Tapi gundari Dibata ras manusia enggo erdame erkiteken Jesus Kristus, gelah banci kita badia, bersih, dingen la erpandangen i bas adep-adepenNa. Erkiteken si e tetaplah kita nggeluh guna kemulian man Tuhan, nggeluh tetap erpengarapen man Tuhan.

APLIKASI

Dibata erinisiatif ndameken diriNa ras manusia i bas kematen Jesus Kristus. Kegeluhenta si nai asum kita imbang Dibata ndauh kel beda ras geluhta si genduari kenca Dibata erdame ras kita. Biak-biak dosa enggo itangtangi i bas kita nari. Bage pe siidah, Esau ras Jakub si akhirna erdame kenca 20 tahun la nai jumpa erkiteken perubaten si lit bas ia. Janah rekonsiliasi, perdamen banci terjadi erkiteken kedua belah pihak nggit guna erdame. Jakub berinisiatif jumpa ras seninana, bage pe Esau merespon alu reh maba perdamean. Banci sibayangken, bicara Esau la nggit erdame, tetap ia ikuasi kemarahan, dendam, sakit hati, enggo pasti la banci terjadi perdamean antara Jakub ras Esau. Tapi, Jakub, Esau saling merendahkan hati dan merendahkan dirinya, piah dungna terjadi perdamean.

Konflik, turah persoalen, “sikiu” (sikitiken ukur), hal si biasa terjadi i bas relasinta sada ras si debanna. Banci jadi erkiteken perbedaan pendapat, sura-sura, kepentingen, rsd. Tapi si paling penting i bas litna persoalen si turah, arus iselesaiken. Saling mengintrospeksi diri, ras berani mengatakan “maaf” adi erkiteken lit salah si ilakokenna. Janah adi teman enggo minta maaf, pihak si merasa isakiti pe arus ka mereken maaf (saling memaafkan). Uga pe sakitna ukurta perbahanenna, adi enggo reh ia minta maaf banta, ula kita bertahan. Siinget, maka kita pe enggo leben iampuni Dibata dosa-dosanta, kita enggo iperdameken ras Dibata. E maka nggeluhlah kita erdame sada ras si debanna.