Bimbingen Khotbah Minggu 23 Agustus 2015

BIMBINGEN KHOTBAH MINGGU 23 AGUSTUS 2015

Pdt. Larena br. Sinuhadji (Nd. Reynard Tarigan)

Invocatio :

“Tek Abraham man Tuhan janah erkiteken kinitekenna e ialoken Tuhan ia selaku kalak benar”

(Kejadin 15:6)

Ogen :

Epesus 4:17-24 (Tunggal)

Khotbah :

Kejadin 15:1-6

Tema :

MAMRE SI ERKINITEKEN

Penjelasen Bahan Pustaka Si Badia

Perikopta ibere judul “Perpadanen Dibata ras Abram,” ras ibenai alu kata kenca kejadin si ndai kerina. Kejadin siapai? Kejadin i ja Abram mbebasken anak seninana Lut ras erta bendana si ikut iangkut empat kalak raja si memerangi kota Sodom ras Gomora (bdk. Kej. 14). Kenca kejadin si e, Melkisedek ras raja-raja si deban ncidahken penghargaanna man Abram (Kej. 14:17 - Melkisedek masu-masu Abram). Kenca kejadin si e me reh Tuhan alu sada pengenehenen man Abram, nina “Ola kam mbiar Abram, aku ngampang-ngampangi kam, janah mbelin kel upahndu kubereken.” Banci jadi kenca peristiwa si e Abram mbiar, entah lit serangen balik si ilakoken raja si empat ndai. E maka i bas pengenehenenna ipetetap Tuhan ukur Abram maka Tuhan tetap ngampang-ngampangi Abram (Tuhan menjadi perisai bagi Abram). Janah kebiaren Abram si peduaken igejapken umurna ras ndeharana Sarai enggo metua sedangken lenga lit anakna (Kej. 12, tupung ia idilo Tuhan umurna 75 tahun, sedangken i bas ps. 16:16 umurna 86 tahun), banci jadi sekitar umur 80-85 tahun paksa Tuhan encidahken diriNa alu sada pengenehenen, lenga lit sinusurna, lenga lit si ngaloken tading-tadingen i bas ia nari. E maka nina Abram njababsa, “Kai gunana upah si iberekenNdu man bangku e, adi labo lit anakku? La lit ibeberekenNdu anak kupupus, janah erkiteken si e, sekalak i bas budakku Elieser me enggo jadi si ngalo tading-tadingengenku.” Man Abram ndauh pentingen anak asangken kerina upah ras erta benda si enggo ibereken Tuhan man baNa. Anakna me si jadi sinusurna si ngaloken tading-tadingen bas ia nari. I bas si e, bagi si ragu Abram kerna padan Tuhan man bana, tupung Tuhan ndilo ia, maka ibahan Tuhan enterem pagi sinusurna (ps. 12). Tapi realitana lenga teridah. Tuhan erpadan man Abram, maka labo Elieser si ngaloken tading-tadingen i bas ia nari, tapi anak si nipupusna sendiri nge. Je nari ibabai Tuhan Abram ndarat lako meligai bintang-bintang i langit. Bagi buena bintang-bintang e, bage me pagi teremna sinusur Abram. Abram tek kerna kai si nikataken Tuhan. Janah erkiteken kinitekenna e, ialoken  Tuhan ia selaku kalak benar. Abram ibenarken labo erkiteken geluhna badia (sieteh nge lit kesalahen Abram, ps. 12 erbual ngataken Sarai turangna gelah banci ia selamat), tapi erkiteken perbahanen Tuhan sendiri, erkiteken kiniteken Abram. Tek Abram, aminna pe lenga bo idahna, pasti Tuhan merekenca man bana.

Bahan pengogenta si pemena ngerana kerna kegeluhen si mbaru i bas Kristus. Banci jadi lit bas perpulungen e, si tetap denga nggeluh i bas kegeluhen si ndekah (nggeluh bagi kalak si la nandai Dibata, si la erguna perukurenna, ipelepasna dirina italuken sura-sura si jahat ras ilakokekenna kerina si la mehuli alu la alang-alangen). Tegas Paulus ngatakenca, “Maka kegeluhen si male arus itangtangi ras ipakeken manusia si mbaru.” Gambaren bagi kalak si ridi, itangtangi baju si ndekah, si enggo melket ras ipake baju si bersih, nandakenca lit perubahen sebelum ia ridi ras kenca ia enggo ridi. Bage pe kalak si tek arus lit perbedaanna, perubahenna i bas karakterna, perbahanenna kenca enggo ia itebus Jesus Kristus ras tek man baNa.

Aplikasi

I bas Tgl. 26 Agustus 2015 Mamre GBKP berusia 20 tahun. Rikutken bahanta (ogen ras khotbah), iarapken Mamre GBKP jadi Mamre si erkiniteken. Rikutken gelarna, Mamre sada ingan i ja Abram ngalo-ngalo utusen i bas Dibata nari (Tuhan sendiri si ncidahken baNa man Abram), i ja ialo-alona ras ijamuna Tuhan alu ukur si tutus. Abram si awalna mbiar, dingen la tetap ukurna ipetetap Tuhan ukurna, ras mulihi tek nandangi perpadanen Tuhan. Aminna pe melala kebiaren i bas kegeluhenta, khususna Mamre GBKP sebage imam i tengah-tengah keluarga, tetap tek nandangi pengkawali Tuhan, maka Tuhan setia i bas ngampang-ngampangi kegeluhenta. Kebiaren si nderpa kegeluhenta, labo mabai kita ngelakoken hal-hal si bertentangen ras sura-sura Tuhan. I ja lit kalak erkiteken mbiar ngalaken tantangen kegeluhen enda, menghalalkan segala cara i bas ndarami rejeki (pemalsuan, penipuan, korupsi, rsd). Tapi iarapken Mamre GBKP tetap mengandalkan Tuhan i bas kegeluhena ras kinitekenna e teridah arah perbahanen.

Megati kel kalak jadi Mamre erkiteken perubahen status arah anak perana nari ku perbapan. Kenca enggo ipasu-pasu perjabun si dilaki otomatis jadi Mamre GBKP. Padahal karakterna lenga bo encidahken selaku ia Mamre si erkiniteken. Ku Gereja pe la pernah, i bas pengkebet geluhna rusuren ia jadi batu antuken. Kalak si erkiniteken arus icidahkenna kinitekenna e arah perbahanenna. Arusna lit min perubahen si mehuli terus-menerus si icidahken i bas kegeluhen Mamre (ogen). Kegeluhen pertendin bapa i tengah-tengah jabu mbelin kel pengaruhna kempak anak jabuna. Bdk. Mas. 128:4, “Bage me ipasu-pasu Tuhan man kalak (dilaki) si malang man Tuhan.