Bimbingen Khotbah Minggu 9 Agustus 2015

BIMBINGEN KHOTBAH MINGGU 9 AGUSTUS 2015

MINGGU HAM

Pdt. Larena br. Sinuhadji (Nd. Reynard Tarigan)

Invocatio :

“Kam anak-anak Dibata. Kam ikelengi dingen ipilih Dibata jadi sikerajangenNa. E maka pakekenlah paken ate perkuah, mehuli, rukur meteruk, lemah-lembut dingen saber.” (Kolose 3:12)

Ogen :

2 Samuel 12:1-12 (Tunggal)

Khotbah :

Kolose 3:5-11 (Responsoria)

Tema :

MANUSIA SI MBARU

Penjelasen Bahan Pustaka Si Badia

Surat Paulus man Perpulungen Kolose si ibere judul “Kegeluhen Si Male Ras Kegeluhen Si Mbaru”, merupaken surat si mpertegas kerna kalak si enggo nggeluh i bas Tuhan ras lenga nggeluh i bas Tuhan. Lit kesadaren turah i bas diri sendiri kenca enggo sitandai ras tek man Tuhan Jesus Kristus, maka Tuhan Jesus enggo ngalemi salah dosanta, ras nggeluh kita i bas kegeluhen si isurakenNa. Peran perkuah ate Dibata mbelin i bas kita nadingken kuasa dosa entah pe kerincuhen ngelakoken dosa, tapi i bas surat enda lit ka i je respon manusia. Lit turah kesadaren i bas diri sendiri guna mbunuh biak-biak doni si la mehuli ras ngambekenca. Pedoman Penafsiran Alkitab LAI, ngatakenca kata “mematikan” merupaken kata kiasan si sangat kuat ertina. Ula bere kesempaten man dosa tumbuh sumbur menguasai kita. Piga-piga dosa si icontohken Paulus antara lain: erlua-lua, erlagu la mehuli, peraten daging, sura-sura si jahat, rangap (rangap e me nembah man berhala), merawa, ngamuk ras segat ate, cikurak entah pe melasken cakap melket, perguak. Sabab enggo sitangtangi manusia si male ras kebiasanna, ras enggo sipakeken manusia si mbaru si tetap ipelimbarui Dibata si njadiken manusia rikutken tempasNa jine. Ertina, kerembakenta ras Tuhan subuk arah Kata ras KesahNa, si tetap erdahin bas kita, mpengasup kita mpelimbarui kegeluhenta.

Bahan Pengogenta ngerana kerna teguran si isehken Tuhan arah nabi Natan erkiteken dosa si enggo ilakoken raja Daud. Si menarik i jenda, i bas ay. 13 ras seterusna, raja Daud langsung ia sedar ras menyesal (bdk. ras raja Saul si lalap berkilah kenca enggo ipersingeti Tuhan, 1 Sam. 13 & 15). Mas. 51 e me syair ende-enden penyesalan raja Daud. I bas salah sada artikel ikataken bagenda, “Satu hal yang menjadi kekuatan spiritualitas Daud adalah keberanian dan ketulusannya untuk mengakui setiap dosa dan kesalahannya. Saat Daud ditegur oleh nabi Natan dengan cara menunjuk hidungnya, Daud sama sekali tidak marah dan menggunakan kekuasaannya dengan membungkam dan menghukum nabi Natan. Sebaliknya Daud menerima setiap perkataan hukuman Allah yang dikatakan oleh nabi Natan. Di hadapan hamba Allah tersebut, Daud merendahkan dirinya”. Keberanian dan ketulusan untuk mengakui setiap dosa dan kesalahan e me ciri-ciri manusia si mbaru.

Invocationta merupaken lanjuten i bas surat Paulus man perpulungen Kolose, maka kalak si enggo tek man Dibata, e me kap anak-anak Dibata. Sebage anak-anak Dibata perbahanenta arus ngusih Dibata. E maka arus sipakeken paken ate perkuah, mehuli, rukur meteruk, lemah lembut dingen saber.

Pengkenaina

Terkadang alergi kita dengan kata “manusia baru” entah pe “hidup baru”, padahal enda jelas bahasa Pustaka si Badia. Gelah tetap nggeluh sebage manusia si mbaru memang la banci instan, tapi arus terus-menerus geluhta ipelimbarui Dibata. Tek man Tuhan Jesus labo secara otomatis lepas kita i bas kerina dosa si biasa silakoken, tapi tek kita maka Tuhan Jesus enggo ngalemi salah dosanta. E maka, kinitekenta man Tuhan Jesus, kerembakenta arah KataNa ras KesahNa si Badia mpengasup kita nadingken perbahanen-pebahanen si gel-gel (kedangingen) si senang kita ngelakokenca (bahasa Paulus: “Nai kam nggeluh rikutken lagu-langkah si la mehuli”). Hal si deban si ncidahken maka geluhta enggo ipelimbarui Dibata e me ngasup kita ipersingeti (itegur, ikoreksi) ras ngasup kita ngakuken dosa-dosanta bagi raja Daud.

Nadingken perbahanen si male ras nggeluh i bas kegeluhen si mbaru arus teridah i bas kerina dampar geluhta. Labo hanya secara formal aktif i gereja bahkan mungkin sebage Serayan Tuhan, tapi teridah i bas kerina pengkebet geluhna: perukuren, kata ras perbahanen ras kata wari pe, termasuk bas rumahna, gereja, lingkungen erdahin, rsd., tetap ngasup ia ncidahken kegeluhen si mbaru. Sabab lit deba kalak nggeluh i dua dunia, berbeda i gereja ras i rumahna entah pe i bas inganna erdahin. I gereja banci badia kel, tapi i rumah sama sekali berbeda.

Secara khusus i bas minggu enda, minggu Hak Asasi Manusia (HAM), ilumbaken maka kehadirenta tuhu-tuhu banci menghargai kerina manusia, subuk beda suku, agama, tingkat sosial, tingkat pendidiken rsd. Terkadang status sebage pemimpin, kepala, kalak bayak, erpangkat erbahanca kita sepele man pegawaita, entah pe kalak si teruhen asangken kita.