Bimbingen PJJ Tgl. 16 - 22 Agustus 2015

BIMBINGEN PJJ TGL 16 - 22 AGUSTUS 2015

HUT RI 70 TAHUN

(Pdt. Larena Sinuhadji)

Ogen :

Ulangen 6:10-15

Tema :

Ergakenlah Kemerdekaan

Tujun :

Gelah ngawan ni perpulungen :

1) Nggejapken uga Dibata enggo mereken kemerdekaan man bangsata

2) Ngasup ngergaken ras ngisi kemerdekaan si enggo ibereken Dibata

Penjelasen Bahan Pustaka Si Badia

Bahanta ngerana kerna kata persinget man bangsa Israel gelah tetap erkemalangen man Tuhan. I bas perikop enda icidahken Musa nandangi bangsa enda maka si genduari ialoken bangsa Israel pelin-pelin erkiteken perbahanen ras perkuah ate Tuhan. Rikutken janji Tuhan man nini-nini bangsa Israel, Abraham, Ishak ras Jakub maka ibereken sada negeri rikut ras kuta-kuta si mbelin si labo bangsa Israel majekennca. I bas kerina rumah melala barang si mehuli si labo bangsa enda namakenca. Idapetina sumur si la bekas bangsa enda ngkali ras peken anggur bage pe saitun si la bekas bangsa enda nuan. Jelas maka la lit i je peran entah andil bangsa Israel arah kai si enggo ialokenna tapi kerina erkiteken perbahanen Tuhan. E maka nina Musa jaga maka gelah ola bangsa Israel ngelupaken Tuhan si enggo mulahi bangsa enda i bas perbudaken Mesir nari. Mbiar lah man Tuhan ras Tuhan saja si isembah bangsa enda. Ola sembah dibata-dibata si deban, si enggo semal ilakoken bangsa-bangsa isekelewet bangsa Israel kari. Sabab mbiar kel Tuhan enggo terkontaminasi, terbawa arus hal-hal si la mehuli si biasa ilakoken bangsa-bangsa sekelewet bangsa Israel. Adi ilanggar bangsa enda, tuhu-tuhu Tuhan merawa, i ja ikernepkenna bangsa enda, sabab Tuhan Dibata si mecimberu.

Aplikasi

Tgl. 17 Agustus si lepas kita mperingeti Indonesia Merdeka 70 tahun. Bujur ninta man Tuhan. Sigejapken maka kemerdekaan e erkiteken perbahanen Tuhan man bangsata secara khusus pejuang-pejuang kemerdekaanta. Bambu runcing, senjata seadanya ipasu-pasu Tuhan banci mengalahken Belanda ras Jepang.

Tugasta gundari ngergaken ras mengisi kemerdekaan si enggo ibereken Dibata. Piga hal-hal si banci silakoken kita :

1. Ola lupaken Tuhan, tetap erkemalangen man Tuhan. Sikataken bujur man Tuhan si enggo mereken kemerdekaan man bangsata. Pancasila dasar negaranta, janah sila pertama ikataken, Ketuhanan yang Maha Esa. Bahkan bangsanta rusur igelari bangsa si beragama. Tapi kinatana melala denga praktek-praktek perdukunen erdalan. Gelah sukses usaha pindo penglaris. Gelah naik jabaten, menang i bas pemilihen kepala daerah reh ku dukun. Iklan “orang pintar” sangat laris manis diminati. Ate Tuhan Ia saja si isembah kita i bas kerina dampar geluhta.
2. Bergandengan tangan, bekerjasama walupe erbage-bage agama, suku, bahasa i tengah-tengah bangsa ras negeranta enda. Bagi nina Presidenta Joko Widodo, “Bekerja-bekerja dan bekerja.”
3. Ula kita dekahen junggut-junggut, pesimis, i bas erbage-bage persoalen ras ketimpangen si lit denga i bas negaranta enda. Kai si banci silakoken dalanken alu tutus. Bagi bangsa Israel, enggo pe ibebasken Tuhan, dekahen ia jungut-jungut asum ijumpaina kiniseran i gurun Pasir ras senangen akapna mulih ku Mesir tetap jadi budak. Kita kalak si enggo imerdekakan Tuhan, cidahkenlah maka karakterta, karakter kalak si enggo merdeka. Tangguh, tekun, pekerja keras, disiplin, ertanggung jawab rsd.
4. Tebarken kasih labo kebencian.
5. Ertoto guna pemimpin-pemimpin bangsata ras negaranta gelah tetap ipasu-pasu Tuhan. Bagi nina Jeremia, “Erdahinlah guna kiniulin kota-kota ku ja kam enggo Kubuang jadi tabanen. Ertotolah guna keperlun kota e sabab adi sikap ia kam pe ikut sikap” (Jeremia 29:7). Kita tading bas negaranta sendiri, labo kita kalak tabanen. Enggo me seharusna kita tetap maba pemimpin-pemimpinta i bas pertotonta.
6. Kerina e arus ibenaken bas dirinta sendiri, ula timai kalak si deban. Bagi nina Bunda Teresa “Don't wait for leaders. Do it yourself, person to person!” (Ula timai para pemimpin, entah pe kalak si deban, guna ngelakoken hal-hal si mehuli, lakokenndulah!”).
7. Merdeka! Merdeka! Merdeka!