Bimbingen Khotbah Minggu 6 September 2015

BIMBINGEN KHOTBAH MINGGU 6 SEPTEMBER 2015

Minggu XIV Kenca Trinitatis - Minggu PERMATA GBKP

(Pdt. Larena br. Sinuhadji)

Invocatio :

“O Anakku, pindolah pemeteh, seksekilah ndatken pengertinna. Daramilah e desken ndarami emas, ayakilah e desken ndarami erta di terbuni” (Kuan-kuanen 2:3-4)

Ogen :

Kuan-kuanen 23:12-15

Khotbah :

1 Timotius 4:12-16 (Tunggal)

Tema :

PERMATA JADI USIHEN

Kata Penaruh

I bas melala referensi rusur ikataken bagenda, kegagalan seorang pemimpin, pendidik, orang tua, hamba-hamba Tuhan i bas ndalanken tanggung jawabna e me kap adi la banci ia jadi teladan, entah pe usihen. Ertina labo hanya terjeng ngerana, ngajari, mereken petuah tapi uga geluhta enda berdampak man kalak si deban. I bas salah sada bukuna Zig Ziglar, sekalak penulis ras motivator AS nari, mereken sada contoh kerna sekalak anak perana si tiba-tiba ngadi ia erdalan ras tulihkenna ku das (menengadah ke atas melihat ke langit). La ndekahsa i pudina enggo ka melala kalak ngadi ngenehen ku das ka. E maka isungkun sekalak si isampingna kel, “De, ada apa memang di atas?” Ijababna, “Oh tidak ada apa-apa Bu, saya memang mau melihat saja ke atas”. Bagem ilustrasi enda, ncidahken man banta uga hebatna perbahanen sesekalak si banci mpengaruhi kalak si deban. Gundari tading sipilih kita pengaruh si apai ateta sicidahken i bas geluhta, si positif entah si negatif?

Penjelasen Bahan Pustaka Si Badia Ras Aplikasina

Ilumbaken Rasul Paulus man Timotius anak rohanina, gelah banci pelayanenna berhasil, la kalak anggap sepele, mapas bana, arus ia jadi teladan. Umur si nguda denga labo jadi persoalen, si penting banci jadi usihen. Sabab lit ka deba, enggo pe meganjang umurna, medanak denga perukurenna bahkan la jadi usihen kegeluhenna. Jadi usia labo jadi patoken, si penting kegeluhenna jadi teladan.

Tapi memang dua kali lebih mberat tanggung jawab sekalak orang muda adi ia jadi pemimpin. Sabab umumna adi orang muda, kalak minter sepele, ianggap kurang pengalaman, belum banyak makan asam garam, masih hijau, rsd. Bagem umumna ibelasken kalak. Banci jadi paksa Timotius melayani i Efesus ngudaan ia asangken pemimpin ras perpulungenna si ilayanina.  E maka, gelah ola perpulungen anggap enteng, mapas man Timotius, maka arus ia jadi usihen i bas pengeranana, i bas lagu langkahna, i bas nehken keleng ate, i bas kinitekenna bage pe i bas ukurna bujur (Bhs. Ind. : “Jadilah teladan bagi orang-orang percaya, dalam perkataanmu, dalam tingkah lakumu, dalam kasihmu, dalam kesetiaanmu dan dalam kesucianmu”). Jelas, Timotius arus jadi teladan man kalak si tek, jadi contoh si mehuli nandangi perpulungen si ilayanina.

I bas pengerana. Penungkunen-penungkunen evaluatif man banta, kata-kata si uga si ikataken kita? Si kasar, menyakitkan, menuduh, melukai, menghakimi, merendahkan entah kata-kata si erbahanca ate malem, memotivasi, membangun, mpepalem pusuh? Rukur nge kita lebe ope sibelasken, entah kenca enggo sibelasken makana kita sadar, erkadiola enggo salah kata-kata sipedarat kita? Apakah kita termasuk kalak si terteki arah kata-katanta, entah kata-kata ngenca mejile, tapi kita sendiri la ngasup mbuktikenca entah pe ngelakokenca? Enggo jelas adi arah kata-kata saja kita la jadi pasu-pasu (berkat), tentu kalak pe sepele banta. Pemasmur ngatakenca bagenda, “O TUHAN, jagai min babahku, eruk min biberku (Mas. 141:3). Bage pe i bas Lukas 6:45, “Kalak si bujur tentu ndarat i bas ia nari si mehuli, reh i bas pusuh peratenna si mehuli nari; janah kalak si jahat ndarat me kejahaten i bas pusuh peratenna si jahat nari. Sabap kai si ibelasken kalak arah babahna, e reh i bas pusuh peratenna nari”. Adi pusuh peratenta iterangi alu Kata Dibata, maka iajariNa kita guna alu pentar melasken kai si arus sibelasken. Tapi adi pusuhta dem alu nembeh ate, cian ate, hal-hal si la mehuli, enggo pasti kata-kata si ndarat pe kata-kata si la membangun.

I bas perbahanen. Lit istilah si usur ibegiken kita e me NATO (no action talk only), maksud istilah enda e me, ula ka kata-kata ngenca mejile, mehuli, tapi perbahanen jauh panggang dari api. Lit ka si ngatakenca, “Seribu kata-kata la lit kai pe ertina, ibandingken sada perbahanen si mehuli si banci igejapken kalak”. Kita me surat-surat Kristus si banci ioge jelma si nterem. Kai nge kira-kira si teroge kalak si deban arah pengkebet geluhta, damai sejahtera, entah perpecahen, perjengilen, mabuk-mabukan, rsd.?

I bas kekelengen. Selaku per-Berita si Meriah, kekelengen si lit bas Timotius, la erdobahen (la erpilihen) si isehkenna man perpulungen, kekelengen si tulus. Tidak ada udang di balik batu. Sabab kadang, sikelengi kalak erkiteken lit sura-suranta, gelah banci ka sampatina kita. Mehuli kalak maka mehuli ka kita bana. Ajaren Tuhan Jesus, man kalak si erbahan jahat banta pe, arus ka ngasup kita ngkelengisa, bahkan sitotoken.

I bas kiniteken (“kesetiaan” Yun.: pistis). Si imaksudken i jenda, si pemena lebe e me kesetian si tutus man Tuhan, bage pe si peduaken, e me kesetian si tulus i bas membangun relasi ras kalak si deban. Tuhan ngenca Dibata si ngasup nampati kita, la lit dibata-dibata si deban. Terkadang, tupung senang sitadingken Tuhan, tupung susah je silebuh Dibata, e me gelarna labo tutus. Kesetianta i bas membangun relasi ras teman e me kesetian si tulus, labo erkiteken lit kepentingen-kepentingen negatif. Bage pe i bas membangun relasi ras pasangenta, la lit je perselingkuhen.

I bas ukur si bujur (kesucian). Engkai makana kekudusen enda merupaken salah sada nasehat Rasul Paulus man Timotius? Erkiteken masa muda e me masa pancaroba, masa mencari identitas si jelas, masa si rentan man kaum muda terjerumus ku hal-hal si la mehuli. E maka i bas masa-masa si rentan enda Timotius arus tetap njagai kekudusenna. Bage pe man banta, erkiteken siinget geluhta, kulanta, enggo itebus Tuhan alu darehNa si meherga, janah kulanta enda e me kap ingan Kesah si Badia, e maka perlu tetap sijaga kekudusen geluhta.

Timotius arus alu tutus makeken waktu ras kesempaten si lit, subuk i bas ngogeken Kata Dibata i tengah-tengah perpulungen, i bas ngiah-ngiahi ras ngajarisa seh ngayak Paulus reh ka guna erbahan perkunjungen. Bage pe, la isia-siakenna pemere (karunia) si enggo ibereken Dibata man bana asum ndube ia itangkuhken. Arah kai si nilakoken Timotius la banci lang, perpulungen pe ngidah semangat ras kemajuan i bas diri Timotius i bas melayani (Bhs. Ind. : “Bertekunlah”, lit i je unsur ketutusen, kesetian, ketulusen i bas tugas si idalankenna).

I bas bahan pengogenta si pemena, icidahken man banta kerna tanggung jawab orang tua (guru) i bas mendidik anak-anak. Arah erbage-bage cara, subuk arah pendidiken formal, non-formal, nasehat-nasehat orang tua, pendampingan, motivasi, terlebih orang tua jadi teladan nandangi anak-anakna. Sada keriahen ukur ras kemalemen ate man orang tua ngidah kedewasaan rukur, kepentaren i bas anak-anakna (bdk. Kuan-kuanen 23:15).

Kata Penutup

I bas Pustaka si Badia, melala contoh-contoh kerna kehebaten orang muda, i ja i bas kiningundanna enggo ipake Tuhan guna jadi pasu-pasu (berkat) man kalak si deban, misalna: Jeremia, Daniel, Jusuf, ras Titus. I bas Negaranta pe, Sumpah Pemuda Tgl. 28 Oktober 1928 iprakarsai orang-orang muda, Reformasi 1998 imotori mahasiswa, ras melala pe contoh-contoh si deban si ncidahken peran penting kaum muda. Hal si seri iarapken kita arah Persadan Man Anak Gerejanta entah pe PERMATA baik sebage lembaga bage pe sebage pribadi.

E maka i bas HUT PERMATA si pe-67-ken, iarapken kaum muda GBKP jadi rudang-rudang i tengah-tengah keluarga, gereja ras masyarakat, jadi teladan i bas kegeluhenna. Payo memang, la lit kita si sempurna (no body perfect) uga pe mehulina jelma pasti lit kekurangenna. Tapi ula jadiken istilah enda sebage pembenaren i bas kelemahen entah pe kekurangen si lit bas kita seh makana la lit perjuangen si terulin si banci silakoken. Masa muda sekali ngenca, e maka berekenlah si terbaik man Tuhan. Mari radu ras sitotoken ras sidukung PERMATA-nta.