Bimbingen PJJ Tgl. 23 - 29 Agustus 2015

BIMBINGEN PJJ TGL 23 - 29 AGUSTUS 2015

Pdt. Larena br. Sinuhadji (Nd. Reynard Tarigan)

Ogen:

Daniel 1:11-16

Tema:

NJAGAI KESEHATAN KULA

Tujun:

Gelah ngawan ni perpulungen:

1) Meteh bagi Daniel mantangken pangan si la perlu ipan

2) Ngasup njaga kesehaten kulana alu ‘mengkonsumsi’ pangan si mereken kesehaten daging kulana

Penjelasen Bahan Pustaka Si Badia

Bangsa Israel itaban bangsa Babel. Kenca piga-piga waktu isuruh raja Nebukadnesar, Aspenas, e me penghulu juak-juakna guna milih piga-piga anak perana i bas kalak Israel si ibuang ku Babel, e me kap kesusuren raja ras si bayak. Labo e saja, tapi kalak si ipilih e arus mejile rupana, pentar kel, mbages pemetehna, pedas nangkap pelajaren, janah la lit sitik pe pandangen i bas kulana, gelah banci ia erdahin i bas istana raja. Janah iperentahken raja pe maka tep-tep wari kalak pilihen e arus ibereken pangan ras anggur, seri ras si ibereken man kalak si ringan i bas istana raja. Kenca telu tahun ndalani masa karantina, maka kalak ndai kerina arus ngadap i lebe-lebe raja. I bas kalak si terpilih e ikut me Daniel, Hananya, Misael ras Asaria. Kalak enda empatna i bas suku Juda nari. E maka enggo itetapken Daniel i bas ukurna maka la ia nggit ngelanggar aturen agamana aminna pe enggo isikapken pangan-pangan si ntabeh ras lau anggur. Janah ipindokenna penampat man Aspenas ras bekas jujuren Dibata melias ras mesayang Aspenas man bana. Tapi tetap lit keraguan i bas Aspenas erkiteken la iinem ras ipan Daniel ras teman-temanna pangan si enggo isikapken istana maka banci kari kalak enda la sehat, la mbestang dagingna bagi anak perana si deban. Tentu adi bage si terjadi ibunuh raja nge si Aspenas. Tapi Daniel ras teman-teman tetap i bas prinsipna. E maka ijumpai Daniel penjaga si enggo isuruh Aspenas lako ngurus Daniel ras teman-temanna gelah mpepayo kalak enda i bas sepuluh wari. Bereken man kalak enda gule-gulen saja man panganna ras lau saja inemenna. Kenca bage, banci ibandingken, apai nge mbestangen, anak perana si man pangan si isikapken i bas istana entah Daniel ras teman-temanna? Kenca bage, maka enggo banci ibanna keputusen rikutken pengidah penjaga si isuruh Aspenas ndai. Kepeken kenca enggo sepuluh wari berlalu, teridah ulin rupana dingen mbestangen dagingna kerina asangken kerina anak perana si man pangan bas istana nari. E maka mulai i bas paksa e enggo ibere penjaga ndai kalak enda terus man gule-gulen saja ras lau inemen. Dingen la pernah ipananna pangan raja ras lau anggur si enggo isikapken bas istana nari.

Aplikasi

Umumna kurang pentar kita i bas memilih pangan-panganta. E maka megati si jadi pertimbangenta nikapken pangan e me kap labo pangan si sehat tapi pangan si ntabeh. Adi la ntabeh pangan i rumah, mekatep kita nukur pangan si ntabeh rikutken seleranta. Tapi la pernah siukurken resikona. Salah sada penyebab mbuena pinakit i bas paksa gundari enda e me erkiteken makanan-makanan instan ras mbuena bumbu-bumbu penyedap i bas pangan-pangan ndai. Jadi la lit ertina, tutus kita ertoto gelah Tuhan mereken kesehaten si sempurna man banta adi baginta pe la silakoken alu mehuli e me njagai kesehaten kulanta alu mengkonsumsi pangan-pagan ras minem inemen si sehat.

I bas minggu kesehaten enda, Firman Tuhan mpersingeti kita gelah ngasup kita njaga kesehaten kula alu mengkonsumsi pangan si mereken kesehaten daging kula. Arus sibiasakan pola makan si sehat. Kurangi makan daging. Nehen saja adi kita ku Medan, daerah P. Bulan sekitarna, jarak piga-piga meter ngenca RM BPK. Labo berarti la banci man daging, tapi perlu lit keseimbangen. Daging perlu tapi ula mbuesa, si perlu ipebue e me kap sayur-sayuren segar adi banci si organik ras buah-buahan, bage pe minum perlu ipebue, sada wari 3-4 liter. Arah bahan pengogenta, labo perdebaten kerna mantangken ras la mantangken pangan si jadi intina, tapi ibabai kita uga kita banci menguasai diri khususna i bas menjaga pola makan sehat.