Bimbingen Khotbah Minggu 2 November 2014

BIMBINGEN KHOTBAH MINGGU 2 NOVEMBER 2014

(Pdt. Larena Sinuhadji)

Intriotus :

“Engkai maka ndele ateku? Engkai maka susah kuakap? Ku Dibata saja aku erpengarapen, jenari kupuji ka Ia tole, si engkelini aku dingen penampatku” [Masmur 42:6]

Ogen:

1 Tesalonika 2:9-13 (Tunggal)

Khotbah :

Masmur 43:1-5 (Responsoria)

Tema :

DIBATA INGAN PENGARAPENTA

Bena Kata

Pengarapen e penting, sebab dikenca kita nggeluh tanpa pengarapen e me si erbahanca banci kita putus asa, pesimis, bahkan sakit, stress ras la sitik si akirna mengakiri geluhna alu dalan pintas. Emaka ibas Roma 12:12 ngatakenca, “Meriahlah atendu i bas kam erpengarapen, megenggenglah kam i bas kiniseranndu, janah ertotolah kam man Dibata la erngadi-ngadi.” Ku ise kita erpengarepen? Enggo pasti man Dibata si mada geluhta. Sabab adi manusia ingan pengarapenta enggo pasti kita kecewa.

Isi

Bahan khotbahta seri ras bahan introitusta, ija konteksna paksa si e bangsa Israel lit ibas pembuangen Babel. Pembuangen e me sekolah guna pemurnian diri gelah reh ulina ka kegeluhen bangsa  Israel ku lebe enda. Masa 70 tahun pembuangen, masa guna banci mengevaluasi ras mpelimbarui.

Enggo pasti ibas pembuangen Babel menderita. Sada lebe bangsa Israel sebage tawanan, budak si la banci bebas erkai pe. La banci ia erban sebab budak, kebijaken ras perbahanen kai pe si idalankenna arus sepengetahuan ras seijin pemerentah Babel. Si benar pe silakoken banci jadi salah ibas pemandangen bangsa Babel (bdk. Daniel ras teman-temanna,  padahal jelas kalak enda kalak si tutus, benar, berintegritas), apaika si salah silakoken enggo pasti dua kali kiniseran sialami bangsa e. Idaram-daramina kesalahen, ifitnah, ipalitken si jahat man bangsa enda. Ras enda me si igambarken Pemasmur ibas perikopta, “Kapiti perkarangku nandangi kerina kalak jahat. Cidahkenlah maka labo aku ersalah, pulahi min aku ibas kalak jahat ras penipu nari.” Enggo pe ipalitken si jahat, la ka banci bebas ersembah ras ertoto man Tuhan, sabab situasi pembuangen.

Tapi bagem bages penandai Pemasmur kerna Dibata maka Dibata emekap pengawal si sejati. Dibata ulu kemalemen atena, inganna erpengarapen. Ku Tuhan itungkaskenna isi pusuhna, kesusahenna, kedelen atena. Ibas penggejapenna bagi itadingken Tuhan Pemasmur  (bdk. Tupung Jesus isalibken serko Ia, “Eli, Eli lama Sabakthani … Allahku, Allahku mengapa Engkau meninggalkan Aku?”). Ndele atena, ceda atena, susah ukurna … bageme situasi Pemasmur. Banci jadi adi kondisi entah pe situasi si ialamina ipediatna ... erbahanca ia stress ras reh dauhna ia labuh. Tapi Pemasmur ngendesken geluhna man Tuhan. Pengarapenna man Tuhan saja. Ibas tuhu-tuhu ia erpengendes man Tuhan, terjadi perubahen. Si awalna ndele atena, susah iakapna berubah jadi lit semangat si mbaru. Sabab tek kel Pemasmur maka Dibata e ngenca si banci ngkelini ras nampati ia. Ercakap-cakap ia ras dirina sendiri, sebab enggo idatana sada kesimpulen … engkai maka susah ukurna, ras ndele atena? Sabab adi situasi si e ipejangjang la banci lang erbahanca reh burukna keadaanna, banci jadi sakit/stress. Enggo idat Pemasmur tampukna maka Dibata ngenca si banci nampati ia. Enggo ibayangken Pemasmur ibas pertolongen si ibahan Tuhan, erbahnca ia banci mulih ku Sion, idahina rumah Tuhan si badia, i je me ia rende muji Tuhan, ngkuitna kulcapi. Jelas lit perubahen tupung Tuhan siandalken ibas kerina keadaan geluhta, secara khusus ibas kiniseran si alami kita.

Ogen

Paulus pe ngenanami kiniseran ibas ia meritaken Berita si Meriah, secara khusus tupung ia melayani i Tesalonika. Ija si tuhuna ope ia ku Tesalonika pe, enggo leben ia ngenanami penikasaan i Pilipi (ay. 2). Tapi tangkas igejapi Paulus maka Tuhan ngenca si nampati ia. Ipetetap Dibata ukurna lako banci setia nehken berita si mehuli amin erbage-bage kiniseran si man bentasen. Terlebih ibas ia nehken pelayanen i Tesalonika, bagi anakna kel ibahanna perpulungen e. Erdahin Paulus suari ras berngi gelah ula ia memberatken perpulungen ibas ia nehken pelayanenna. Janah si erbanca meriah ukur Paulus, labo saja ia ialoken perpulungen e, tapi ibegiken ras ialoken perpulungen kata Dibata si enggo ipeseh Paulus, labo bagi kata si rehna ibas manusia nari, tapi bagi kata si rehna ibas Dibata nari.

Aplikasi

Geluh Pemasmur ras Paulus banci jadi usihen man banta. Persoalan, perbeben, kiniseran adalah hal si biasa sialami kita ibas kita nggeluh i doni si dem perbeben enda, terlebih selaku kita kalak Kristen si tutus. Enggo pasti kiniseran e dua kali lipat, sabab kita tetap ngelumbaken ras nggeluhken kebenaren si umumna gundari jelma menginginkan ketidakbenaran. Semakin banyak orang terbawa arus jaman, semakin senang dunia. Si paling penting tetaplah Tuhan ingan pengendesenta ula si deban. Banci jadi keluarga, teman sebage inganta sharing ibas persoalen si alami kita, gelah banci sitik terangkat bebanta e, tapi labo manusia inganta ernalem. Tetap Tuhan ulu pengarenta. Cara Tuhan luar biasa nampati kita ibas perbeben si alami kita.

Motto Pegadaian “Mengatasi masalah dengan tanpa masalah” si tuhu perlu denga ikaji, isungkun, payo nge? Adi ras Dibata payo. Beliden gegeh Tuhan asangken persoalen si alami kita. Si penting ula sempat labuh kinitekenta. Megegeh kita ertoto, rende, muji Ia dingen tetap siusur-usur silakoken si mehuli ibas kegeluhenta. Arah si e pe geluhta jadi kesaksin man kalak si deban. Lit pernah sekalak teman mereken SMS, “Mengapa doa melegakan? Karena Tuhan mendengarkan.’ “Allah peduli, Allah mengerti segala persoalan yang kita alami. Tak akan pernah dibiarkannya kubergumul sendiri sebab Allah mengerti.” Ya, Dibatanta me ngenca si ngasup nampati kita dingen ulu pengarapenta.