SUPLEMEN PJJ GBKP TGL. 5 - 11 NOVEMBER 2023

Pdt. Larena br. Sinuhadji (Nd. ReyRapha Tarigan)

ERBERITA, ERKINITEKEN RAS KEKELENGEN

(2 Timotius 1:11-14)

Menyongsong Sasaran Pelayanan GBKP Thn. 2024

Salah sada cabang olah raga atletik eme lari estafet. Ciri-ciri i bas lomba lari estafet eme jumlah pesertana, biasana sada regu lit 4 kalak, janah sada ciri si teridah kel i bas lomba lari estafet enda, masing-masing regu lit sada tongkatna si igelari tongkat estafet. Pelari si pemena kiam seh ku garis batas janah isehkena tongkat estafet e ku pelari berikutna, ras seterusna seh ku finish.

Tongkat estafet i bas lomba lari estafet enda rusur ijadiken anding-andingen penerusen kepemimpinen entah pe keberlanjuten kepemimpinen. Rasul Paulus i bas ogenta sendah lit i bas proses nehken tongkat estafet kepemimpinen Gereja ku muridna eme Timotius. I ja i bas surat-suratna man Timotius, Paulus ngajarken erbage-bage hal guna ilanjutken Timotius i bas pelayanen, gelah ndigan kari seh paksana Paulus lanari banci melayani, kerina tugas pelayanen enggo iserahken man Timotius.

I bas ogenta sendah, paling tidak lit empat hal si arus ilanjutken Timotius i bas pelayanen. Si pemena tetap er-Berita Si Meriah amin pe melala tantangen si arus ihadapi. Kita pe iajuk gelah tetap er-Berita Si Meriah i bas jamanta gundari enda. Enggo piga-piga kali kita erlajar kerna er-Berita Si Meriah, baik i bas PA-PA Kategorial bage pe i bas PJJ. Sebab memang rikutken Amanat Agung, tugasta eme er-Berita Si Meriah. Ertina arah piga-piga kali kita erlajar kerna si e, iarapken tetap lit semangat i bas dirinta guna er-Berita Si Meriah alu erbage-bage metode.

Si peduaken tetap njemak alu paguh ras ngajaren alu tutus ajaren-ajaren si benar sue ras si enggo iajarken Paulus erpalasken ajaren-ajaren Yesus Kristus. I bas jamanta gundari enda, melala ajaren-ajaren si erbahanca kita ndauh ras Dibata. Contohna, budaya hedonis, mengejar kenikmatan, emaka melala kalak si terjerat pornografi, narkoba, rsd. Budaya hidup serba instan, konsumeris, si erbahanca melala kalak si terjerat pinjol, judi online, rsd. Ras melala denga budaya-budaya si deban si erbahanca melala kalak ndabuh ku bas erbage-bage dosa. Emaka i bas si e tetaplah paguh njemak ajaren-ajaren si benar sue ras Kata Dibata alu rajin ngoge Pustaka Si Badia, rajin megiken lagu-lagu rohani, rajin ngikuti kebaktin-kebaktin, PJJ, PA-PA Kategorial, rsd.

Si peteluken tetap nggeluh i bas kiniteken ras kekelengen i bas Yesus Kristus. Paulus i bas surat Roma 1:17 ngatakenca maka arah Berita Si Meriah tangkas uga Dibata ngerembakken manusia kempak diriNa. Si enda ibenaken i bas kiniteken ras erkendungen i bas kiniteken. Berita Si Meriah eme kerna kesalamaten i bas Kristus Yesus enggo sialoken asum kita tek. Janah kiniteken e arus tetap ipelihara seh ku ujungna la banci ngadi i tengah dalan amin uga pe si terjadi (bdk. Ketangkasen 2:10c, “Tatap tetaplah kinitekenndu man bangKu seh mate pe gelah Kubereken man bandu rudang-rudang kegeluhen tanda kemenangenndu.” Ras tetap nggeluh i bas kekelengen. Inti Berita Si Meriah eme keleng ate Yesus Kristus man kerina manusia si erdosa gelah banci kita terkelin. Selaku kalak si enggo ngaloken keleng ate Kristus, tetap kita nggeluh i bas keleng ateNa. Naturta, tetap ngkelengi Tuhan ras sesama.

Si peempatken tetap nggeluh ersada ras Kesah Si Badia gelah ngasup kita menjaga erta-erta simehuli si enggo iendesken Dibata man banta. Erta si mehergana labo emas, perak, entah kinibayakenta si deban sebab e banci lesap dalam sekejap mata dingen la banci sibaba asum kita mulih ku rumah Bapa. Tapi erta si mehergana eme kinitekenta man Yesus Kristus (keyakinan dan iman kita kepada Yesus Kristus).

Tahun Pelayanen 2023 tik nari enggo dung, kerina si mehuli si enggo sicapai sedekah tahun 2023 arus tetap ipertahanken. Memang adi siukurken terbagesen, situhuna waktu sada tahun terlalu singkat guna mencapai tujun si itetapken i bas setiap tahun pelayanen. Tapi i bas si e kita arus erkomitmen gelah kerina si mehuli si enggo icapai sedekah tahun pelayanen 2023 tetap ipertahanken, bahkan semakin itingkatken. Adi enggo melala ilibatken perpulungen ku bas pelayanen gereja arah Tim si lit (tim PRT, tim doa, paduan suara, singers, ngalo-ngalo, erbahan bunga gereja i bas ibadah minggu, kepanitiaan rsd.), enda me si tetap perlu ipertahanken ras itingkatken. Sekecil apapun pelayanan yang kita lakukan, sangat berharga di mata Tuhan. Walaupe enggo keri tahun 2023 sasaran pelayanen maka jemaat menjadi subyek tetap silumbaken ras silakoken. Maka siarapken 70% kehadiren jemaat banci tercapai.

Janah adi reh teremna perpulungen si ikut muat bagin i bas erkebaktin, melayani alu kesadaren sendiri, ertina perpulungenta reh dewasana i bas erkiniteken. Maka i bas Sasaran Pelayanen GBKP tahun 2024  enggo kita lebih maju, untuk menjadi berkat secara eksternal, eme “Berkarya dan berguna untuk orang lain.” Kalak si nggit berkarya ras erguna man kalak si deban eme kalak si enggo dung dengan dirina sendiri. Hal konkrit kai si banci silakoken? Sada lebe memperkuat Gereja Tangguh Bencana, di mana kehadirannya cepat tanggap mendampingi ketika terjadi bencana-bencana di berbagai daerah. Gereja yang ramah terhadap penyandang disabilitas, bekerja sama dengan suku dan agama lain dan juga pemerintah setempat untuk menjaga keamanan, kebersihan dan perdamaian.

Tema i bas PJJ sendah, “Erberita, erkiniteken ras kekelengen” arus terus-menerus nggeluh i bas dirinta selaku kalak si tek si enggo ngaloken keselamaten. Tandana kita enggo selamat geluhta arus ernanam man sekelewetta. Tuhan nampati kita.