SUPLEMEN PA MAMRE GBKP TGL. 5 - 11 NOVEMBER 2023

Pdt. Larena br. Sinuhadji (Nd. ReyRapha Tarigan)

Teks : Johanes 15:1-8

Tema : ERBUAH MERAMIS

Tujun : Gelah Mamre :

- Meteh maka kalak si ersada ras Tuhan erbuah meramis

- Nuratken perbahanen si mehuli guna ilakoken man kalak si deban

Penaruh

Tanah Karo terkenal nai nari sebage daerah penghasil buah-buahan ras sayur-sayuran. Salah sada buah si terkenal eme rimo entah pe jeruk. Perjuma rimo tentu itehna kel kai saja si arus ilakokenna gelah batang rimona erbuah meramis. Ibenaken alu cara pengolahen lahan, pemilihen bibit si mejile, tehnik penanamen, pemilihen pupuk si mejile, seh ku perawaten, rsd.-na. Kerina proses ndai saling berkaiten sada ras si debanna. Rimo alu kualitas si mejile tentuna turah i bas batang rimo si mejile nari. Batang rimo si mejile turah i bas bibit ras taneh alu kualitas si mejile, ras seterusna.

I bas kesempaten enda erlajar kita kerna kiniteken si erbuah meramis rikutken ogenta sendah alu anding-andingen batang anggur si tuhu-tuhu.

Mpebagesi Teks

Teks ogenta sendah lit i teruh judul perikop “Yesus kap batang anggur si tuhu-tuhu,” i bas terj. TB-LAI “Pokok anggur yang benar.” Batang anggur entah pe pokok anggur eme anding-andingen erkiniteken si tuhu-tuhu man Dibata i bas Yesus Kristus. 

Erpalasken Ese. 15:1-8; 19:10-14; Jes. 5:1-7; Mas. 80:9-17 perikop enda banci ikataken antitesis Israel sebage bangsa pilihen Dibata. Pedoman Penafsiran Alkitab Injil Yohanes i bas Lembaga Alkitab Indonesia nari ngatakenca, “Di dalam Yoh. 15:1 ini Yesus digambarkan sebagai pokok anggur yang benar dengan maksud untuk mempertentangkanNya dengan Israel. Israel telah ditanam Allah sebagai “pokok anggur yang benar,” namun yang merosot akhlaknya dan menjadi tidak berguna.” Ertina perikop enda secara garis besar ngatakenca, ula min bagi bangsa Israel si mengaku dirina bangsa pilihen Dibata tapi la ngasup ncibalken dirina sebage bangsa pilihen Dibata. 

Lit dua karakteristik ajar-ajar Yesus i bas perikop enda. Si pemena eme ajar-ajar si la erbuah. La erbuah i jenda ertina la ia ngasup ncibalken dirina selaku kalak si erkiniteken alu ngelakoken kerina si jadi peraten Dibata i bas kegeluhen si tep-tep wari. Engkai maka la ngasup? Erkiteken la tetap i bas Dibata entah pe la ersada ras Dibata. Melala hal si jadi sebab ajar-ajar la ersada ras Dibata, banci erkiteken merincuh denga kenikmaten doni enda, banci erkiteken kiniseran, banci erkiteken erta kebayaken, lenga dewasa kinitekenna, rsd.-na. I bas ay. 5 ikataken, “Sabab adi la kin ras Aku labo kam ngasup erbahan kai pe,” janah i bas ay. 6 ikataken maka ise pe si la tetap ras Dibata banci mate kinitekenna. Ertina ay. 5 enda ndai ncidahkenca maka Dibata labo terjeng nehken kataNa man ajar-ajar gelah ilakoken, tapi Dibata pe si mpengasup ajar-ajar ngelakoken kerina si jadi peraten Dibata, alu syarat tetap ersada ras Dibata.  

Karakteristik si peduaken eme ajar-ajar si erbuah meramis. Enda me karakteristik ajar-ajar si ideal, tetap ersada ras Dibata. Kiniersadaan ras Dibata erbahanca Kata Dibata tetap nggeluh i bas diri ajar-ajar, janah ipengasup Dibata guna erbuah meramis, entah pe ngelakoken kerina si jadi peraten Dibata i bas kegeluhen si tep-tep wari. I bas ay. 7 ikataken, “Adi kam tetap i bas Aku janah KatangKu tetap nggeluh i bas kam, banci ipindondu kai pe atendu, janah ialokenndu me kai si ipindondu e.” Ertina labo terjeng ipengasup Dibata kita ngelakoken kerina si jadi peratenNa, tapi ibereken Dibata pe kai pe si ipindoken kita. Kai pe si ipindoken i jenda tentuna pemindon si sue ras peraten Dibata.

Karakteristik ajar-ajar si erbuah meramis e labo hal si murah. Lit proses si arus idalani. I bas ay. 2 ikataken, “Dahan-dahan si la erbuah itektekNa, janah dahan-dahan si erbuah ibersihkenNa alu mutiki tunas-tunas si la erguna gelah reh buena buahna.” Ertina kegeluhen kalak si tek si erbuah meramis labo kegeluhen si mulus dem alu kesenangen, tapi arus ibentasina pengalamen-pengalamen geluh si mesui si tujunna gelah semakin imurniken kualitas kinitekenna. Tapi amin bage gia, tetap ipengasup Dibata mentasisa asal tetap ersada ras Dibata.

I bas ay. 8 ikataken, “Adi melala buahndu, kam me ajar-ajarKu, janah i bas si e ermulia me BapangKu.” I bas tafsiren LAI ikataken bagenda, “Kalau kalian melakukan banyak pekerjaan baik, dengan demikian menunjukkan bahwa kalian adalah muridKu, maka kalian menunjukkan kepada orang-orang betapa mulianya (ajaibnya) BapaKu.” Enda nge si jadi perayaken kalak si tek man Dibata i bas Yesus Kristus, ngelakoken kerina si jadi peraten Dibata gelah gelar Dibata imuliaken i tengah-tengah doni enda.

Versi Audio silahkan klik : https://youtu.be/mC1fPyMqiyM

Pengkenaina

Tema ras tujun si pemena i bas PA-ta sendah ngajuk kita kerina khususna, kam Mamre, gelah ncibalken dirinta selaku pengikut Kristus si tuhu-tuhu. Erbuah meramis ertina ngelakoken kerina si jadi peraten Dibata i bas kegeluhenta si tep-tep wari. Erbuah meramis i jenda labo terjeng erbuah saja, tapi ernanam mehuli man sekelewetta, ertina ise pe si ndeher ras kita banci igejapkenna keleng ate Kristus arah pengkebet geluhta.

I bas si e tuhu-tuhu kita ncidahken identitasta selaku pengikut Kristus si ersada ras Dibata. Kiniersadaan ras Dibata erbahanca Kata Dibata tetap nggeluh i bas kita, janah ipengasup Dibata pe kita ngelakoken kerina si jadi peratenNa i bas kegeluhenta, janah i bas si e gelar Dibata termulia. Tapi perlu ka isadari maka melala tantangen i bas kita erbuah meramis, melala pengalamen-pengalamen si mesui si arus ibentasi kita erkiteken ngelakoken perentah Dibata. Tapi ula sempat kerina tantangen si reh nderpa kita erbahanca kita kisat entah pe mbiar guna tetap erbuah meramis. Emaka sipindolah gegeh i bas Dibata nari gelah ipengasupNa kita tetap erbuah meramis.

I bas PA-ta sendah, sue ras tujun si peduaken, ibereken kesempaten man Mamre gelah erbahan daftar rencana perbahanen-perbahanen si sue ras peraten Dibata guna ilakoken i bas kegeluhen si tep-tep wari. Emaka bahanlah daftar e, silakoken, janah sievaluasi kendala kai saja si ihadapi i bas ngelakokenca. Sibabalah kerina kendala si ihadapi i bas pertoton gelah ipengasup Dibata Mamre mengatasi kerina kendala si ihadapi.