SUPLEMEN PJJ GBKP TGL. 12 - 18 NOVEMBER 2023

Pdt. Larena br. Sinuhadji (Nd. ReyRapha Tarigan)

BERSIH DINGEN LA ERPANDANGEN

(2 Petrus 3:9-15) -  ADVEN

Lit kuan-kuan bahasa Latin nari nina, “Memento mori,” terjemahenna kurang lebih “ingatlah akan kematianmu.” Kuan-kuan enda ngajuk kerina si ngogesa gelah sedar maka kegeluhenta i tengah-tengah doni enda lit batasna, i bas paksana kari kerina manusia mate, lawes nadingken doni enda. Kenca enggo mate, lawes nadingken doni enda, waktu la nari banci siputar mulihken ku paksa kita nggeluh denga i doni enda. Emaka lit kuan-kuan bahasa Latin nina, “Carpe diem, quam minimum credula postero” terjemahen bebasna kurang lebih, “manfaatkanlah hari ini semaksimal mungkin, karena hari esok belum tentu ada.”

I bas kiniteken kalak Kristen pe lit keyakinen kerna kematen, i ja geluh manusia i doni enda lit batas waktuna, i bas sada paksa waktu, alu erbage-bage sebab, kerina jelma harus menghadapi kematen. Selain kerna kematen, tek kita kerna pendungi jaman, i ja Yesus Kristus reh si peduakaliken guna ngeranaken (menghakimi) si nggeluh denga ras si enggo mate.

Ogenta sendah lit i teruh judul perikop “Padan kerehen Tuhan si peduakaliken.” Sue ras judul perikop, Rasul Petrus ngajuk perpulungen kalak si tek paksa si e gelah tetap yakin maka padan Tuhan kerna kerehenNa si peduakaliken pasti igenapi (ay. 9). Emaka ula sempat terpengaruh kalak si kegeluhenna ikuasai kerincuhen daging megombang man perpulungen alu ngatakenca maka padan kerna kerehen Tuhan e la lit.

Pemahamen si ngatakenca maka Tuhan la reh si peduakaliken mbelin kel konsekuensina man kiniteken kalak si tek. Si pemena lebe, kiniteken man Yesus Kristus tentu ipertanyaken kebenarenna, sebab Tuhan Yesus sendiri si ngatakenca maka reh IA si peduakaliken i bas Kitab Injil (bdk. Mat. 25:31-46; Mrk. 13:24-37; Luk. 17:22-30; Yoh. 14:18-24; rsd.). Si peduaken, konsep kerna kegeluhen kenca kematen, surga ras neraka pe enggo pasti ipertanyaken kebenarenna (bdk. ay. 13). Adi la nari lit kegeluhen kenca kematen, surga ras neraka, emaka konsep kerna erpengarapen pe bene. Adi e si terjadi, enggo pasti bene gegeh perpulungen paksa si e, erkiteken enggo la nai lit gunana erpengarapen man Kristus i tengah-tengah kiniseran si mberat si ialami. Si peteluken, melala kalak si ikuasai kerincuhen daging, bage pe guru-guru perguak, si berusaha nirangken perpulungen ras Dibata (bdk. 2 Pet. 2:1-3, 10-12, 17). Alu bage perpulungen ijerumusken guna ngelakoken erbage-bage dosa, sebab adi Tuhan la nari reh si peduakaliken, penghakimen ras neraka pe la nari lit.

Emaka i bas si e Rasul Petrus ngajuk perpulungen gelah, si pemena, tetap paguh i bas kiniteken maka Dibata la melet ngelakoken kai si nggo ipandankenNa (ay. 9). Si peduaken, sanga nimai denga wari kerehen Tuhan, perpulungen iajuk gelah tetap nggeluh bagi si ngena ate Tuhan, janah erpengendes man Dibata (ay. 11). Si peteluken, sope wari Tuhan reh Rasul Petrus ngajuk perpulungen gelah erpala-pala nggeluh bersih, la erpandangen i lebe-lebe Dibata, janah nggeluh alu dame ras Dibata (ay. 14). Si peempatken, makeken waktu si lit guna ngelakoken kerina si ngena ate Dibata semaksimal mungkin (ay. 15).

Versi Audio silahkan klik : https://youtu.be/A1QMEU4s-Kk

Wari sendah eme wari terakhir kita ngelakoken PJJ i bas tahun 2023 enda. Arapenta tentuna i bas kerina PJJ si enggo ilakoken sedekah tahun 2023 enda reh meningkatna kualitas erkiniteken i bas dirinta bage pe i bas jabuta masing-masing, alu bage semakin meningkat ka kualitas ras kuantitas pelayanen i tengah-tengah gerejanta GBKP. Ngataken bujur ka kita man Tuhan erkiteken iatankenNa denga kita bengketi penghujung tahun 2023 enda. Enggo lanai ndekah bengket kita ku masa-masa Adven. Adven i bas kata adventus nari ertina “kerehen.” Kerehen i jenda tentu maksudna kerehen Dibata. I bas masa Adven enda ndai ersikap kita guna mperingeti Natal sekaligus ersikap kita guna ngalo-ngalo kerehen Dibata si peduakaliken.

I bas masa-masa penantian enda, mulihi kita isingetken maka kerehen Dibata si peduakaliken la ise pe si metehsa, emaka kita harus tetap ersikap katawari paksa pe. Adi perpulungen paksa Rasul Petrus nggeluh denga, melala tantangen, perbeben, ras kiniseran si harus ihadapi i bas masa-masa nimai kerehen wari Tuhan. I bas jamanta gundari pe melala godaan-godaan si erbahanca kalak si tek sirang ras Dibata. Kemajun teknologi erbahanca melala kalak si terjerat judi online, prostitusi online, game online, pinjol, rsd.-na., i bas si e kita harus metenget! Ula sempat bene kinitekenta, sebab la lit ise pe si meteh ndigan wari kematenna reh. Emaka mari radu ras kita ngikutken kai si enggo ipedahken Rasul Petrus, tetap nggeluh bagi si ngena ate Tuhan, erpengendes man Dibata, erpala-pala nggeluh bersih, la erpandangen i lebe-lebe Dibata, nggeluh alu dame ras Dibata, ras makeken waktu si lit guna ngelakoken kerina si ngena ate Dibata semaksimal mungkin.

Emaka payo bagi kuan-kuan bahasa Latin i datas, “Memento mori” nggeluhlah alu nginget maka geluh enda lit batas waktuna, lit paksana kita mate nadingken doni enda. “Carpe diem, quam minimum credula postero” manfaatkanlah hari ini semaksimal mungkin, karena hari esok belum tentu ada. Alu kata si deban, pakekenlah waktu si lit guna ngelakoken kerina si jadi peraten Dibata semaksimal mungkin, sebab la ise pe si meteh ndigan Tuhan reh, entah pe ndigan kita mate nadingken doni enda.

Bujur ikataken kami man kam kerina si enggo reh ku bas channel YouTube enda bage pe si enggo reh ku bas blogspot Pdt. Larena Sinuhadji. Melala denga kekurangen kami i bas nehken suplemen PJJ bage pe PA-PA Kategorial, emaka i bas si e mindo maaf kami. Totokendulah kami gelah reh ergiah-giahna melayani Tuhan i bas waktu si reh enda. Selamat memasuki masa Adven, persiapan-persiapan Natal, ras perayaan-perayaan Natal i bas tahun 2023 enda i bas runggunta masing-masing. Dame Kristus ras kita. Bage pe selamat menyambut Tahun Baru 2024. Tek kita maka Dibata tetap ras kita i bas tahun 2024.