SUPLEMEN PA MAMRE GBKP TGL. 12 - 18 NOVEMBER 2023

Pdt. Larena br. Sinuhadji (Nd. ReyRapha Tarigan)

Teks : Roma 16:17-19

Tema : METENGET NIMAI WARI KEREHEN TUHAN

Tujun : Gelah Mamre :

- Njagai kiniersadan, tetap patuh man Tuhan, bersih dingen pentar i bas nimai

- Ngasup ncidahken aksi Natal arah evaluasi diri guna ndalanken si mehuli

Mungkin siinget denga salah sada acara i bas stasiun televisi RCTI gelarna “Sergap,” i bas setiap pendungi acara e lit sekalak tokoh gelarna Bang Napi si ngatakenca, “Ingat! Kejahatan terjadi bukan semata-mata karena ada niat dari pelakunya, tetapi juga karena ada kesempatan! Waspadalah! Waspadalah!” Kai si ikataken Bang Napi enda ndai eme persinget man banta gelah metenget, ula sempat kita jadi korban kejahaten. I bas geluhta si tep-tep wari pe rusur kita sebage orang tua mereken persinget man anak-anakta gelah metenget, umpamana sope ia berkat ku sekolah rusur sikataken “hati-hati di jalan,” “baik-baik di sekolah,” rsd. Tujunna jelas gelah anak-anakta selamat.

I bas PA-ta sendah Rasul Paulus pe nehken persinget man perpulungen i Roma arah suratna gelah metenget nandangi hal-hal si banci erbahanca perpulungen lepak ndauh sirang ras kiniteken man Dibata i bas Yesus Kristus. 

Teks si jadi ogenta sendah, eme bagin pendungi surat Paulus man perpulungen kalak si tek i kota Roma alu judul perikop “Kata pertenget.” I bas perikop enda jelas Paulus mereken persinget man perpulungen gelah metenget nandangi dua hal. Si pemena, Rasul Paulus ngajuk perpulungen gelah metenget nandangi anggota-anggota perpulungen si jahat. I bas piga-piga penafsir ikataken maka si jahat enda ndai eme guru-guru perguak. Kai si ikataken Paulus enda ncidahkenca kondisi perpulungen kalak si tek paksa si e. Ratana i bas perpulungen-perpulungen kalak si tek, melala denga kalak si jadi anggota perpulungen alu tujun si la mehuli. I bas ay. 17-18 ituriken ciri-ciri anggota perpulungen si jahat ndai: dahinna maba perpecahen, mabai perpulungen si deban papak, melayani hanya guna kepentingen dirina sendiri saja, janah anggota-anggota perpulungen si bujur-bujur ukurna itipui gelah ngelakoken kejahaten. I bas si e alu tegas Rasul Paulus ngingetkenca man perpulungen, “Ola ndeherindu kalak si bage!” Sebab memang man anggota perpulungen si lenga dewasa kinitekenna enggo pasti banci terpengaruh ajaren-ajaren si lepak.

Si peduaken Rasul Paulus ngingetken maka sedekah enda perpulungen kalak si tek i Roma enggo jadi jadi usihen i bas kepatuhen nandangi Dibata. I bas si e Rasul Paulus ngajuk perpulungen gelah teladan e ndai tetap ipertahanken. Kepatuhen man Dibata enda teridah arah perbahanen-perbahanen si mehuli alu ukur si bersih erpalasken kepentaren i bas Dibata nari. Ate Paulus gelah ku je sajalah konsentrasi perpulungen iarahken, ula sempat konsentrasi terganggu erkiteken hal-hal si jahat si la sue ras peraten Dibata.

PA Mamre i bas kesempaten enda eme PA si terakhir i bas tahun 2023. Ngataken bujur kita man Dibata erkiteken iarak-arakNa denga kita seh ku penghujung tahun 2023 enda. Arah kerina bahan-bahan PA si enggo ilaksanaken sedekah tahun 2023 enda iarapken kualitas erkiniteken kam kerina Mamre kekelengen kami reh meningkatna, i bas si e semakin meningkat ka dukungen kerina Mamre man kerina dahin-dahin pelayanen i bas GBKP guna kemulian gelar Dibata i bas Yesus Kristus.

Versi Audio silahkan klik : https://youtu.be/8QaLoVYiM4I

PA-ta sendah ngajuk kita kerina, khususna kam Mamre kekelengen kami, gelah tetap waspada, metenget, sebab la ise pe si teh ndigan wari kerehen Tuhan, kedungen doni enda, entah pe ndigan waktuna kita nandingken doni enda. Emaka i bas tujun si pemena PA-ta sendah, iajuk kam kerina Mamre gelah njagai kiniersadan, tetap patuh man Tuhan, bersih dingen pentar i bas nimai kedungen geluhta i doni enda. Hal-hal konkrit si banci silakoken umpamana, setia ngoge ras erlajar kerna Kata Dibata, ertoto alu la erngadi-ngadi, tutus (rajin) ngikuti kerina dahin-dahin pelayanen, rsd.-na si intina, la lit nari waktunta guna ngukurken hal-hal si la mehuli. Janah i bas si e keselamaten si enggo ialoken kita labo bene i bas dirinta nari seh kita nadingken doni enda.

I bas tujun si peduaken PA-ta sendah, iajuk kam kerina Mamre gelah mengevaluasi diri. I bas si e tentu banci sisungkun dirinta, hal-hal positif kai saja si enggo ilakoken sedekah tahun 2023? Hal-hal si positif i jenda tentuna labo terjeng itujuken man kalak si deban saja, tapi si utamana itujuken guna diri sendiri. Ertina melala hal positif sebage wujud perobahenta ku si mehuli. I bas si e tentuna harus leben kita ngataken bujur man Dibata erkiteken ipengasupNa kam ngelakoken hal-hal si mehuli guna mperobahi diri sendiri bage pe hal-hal si positif si ilakoken guna kalak si deban. Hal-hal si mehuli e ndai harus tetap sipertahanken adi banci lebih sitingkatken kualitas ras kuantitasna. Berikutna, banci ka sisungkun dirinta, hal-hal negatif kai saja si sedekah tahun 2023 lenga banci siperobahi? I bas si e pindolah gegeh i bas Dibata nari gelah ipengasupNa kam guna mperobahisa.

Si terakhir, i bas PA-ta sendah pe iajuk kam kerina Mamre kekelengen kami gelah idukungndu kerina rangkaian Natal tahun enda, benaken masa Advent nari, persiapan-persiapan Natal, seh ku kerina perayaan-perayaan Natalna. Si e kerina ilakoken sebage wadah perbahanen si nyata i bas erkiniteken man Dibata. Selamat memasuki masa-masa Advent, merayakan Natal tahun 2023, bage pe menyambut Tahun Baru 2024. Kami ngataken bujur i bas kerehenndu ku bas channel kami enda bage pe ku bas blogspot kami. Mindo maaf kami i bas kerina kekurangen kami sedekah tahun 2023, janah totokenndulah kami gelah tetap setia melayani Tuhan i bas tahun si reh enda. Dibata si masu-masu kita kerina.