Pekan Kebaktin Keluarga (PKK) GBKP 2018

PEKAN KEBAKTIN KELUARGA (PKK) GBKP

Tema Umum :

JABU SI ERSEMBAH MAN DIBATA (Bdk. 1 Kro. 28:9)

WARI I 18 NOVEMBER 2018

Pdt. Larena br. Sinuhadji (Nd. Reynard Tarigan)

Invocatio : Kerina kalak si nembah man baNdu, e me temanku, kerina si ngikutken undang-undangNdu.

(Masmur 119:63)

Ogen : Kej. 49:9-15

Khotbah : Efesus 2:19-22

Tema : IRANGGUT JADI SADA KELUARGA

Penjelasen Bahan Pustaka Si Badia & Aplikasi

Kenca Paulus mengalami pertobaten sejati cara perukuren ras perbahanen pe berubah. Adi nai lebih ia ngukurken sura-surana, kehebaten bangsaNa, genduari uga makana sura-sura Tuhan ipelebekenNa. Adi nai sura-sura menyiksa kalak Kristen genduari nehken kekelengen siutamana i bas geluhna.  Cara rukurna gelgel maka kalak Jahudi me si mehergana i bas Dibata, sedangken bangsa sideban desken warga kelas dua. Genduari kenca enggo tandaita Jesus, maka ietehna kerina bangsa meherga i lebe-lebe Dibata. Kerina kalak meherga, janah kerina enggo iperdameken ras Jesus Kristus i bas Ia mate i kayu persilang (Ef 2:16). Janah enda salah sada pengajaren kerna erti gereja (eklesiologi) rikutken teologi Paulus, maka kerina siberbeda-beda banci iranggut jadi sada i bas Kristus.

Emaka i bas bahan kotbahta, nina Paulus si labo kalak Jahudi lanai nari kalak tandang ntah pe asing. Genduari enggo jadi sada warga ras anak-anak Dibata dingen enggo jadi anggota keluarga Dibata. Tangkas ituriken Paulus maka si la kalak Jahudia enggo jadi sada warga ras anak-anak Dibata (istilah politik). La nari lit istilah warga kelas dua sierbahanca terjadi perlakuan sipelain-lain. Labo hanya sada warga ras anak-anak Dibata, tapi pe enggo jadi anggota keluarga Dibata.  Bapanta sada eme Dibata i bas Jesus Kristus. Ay. 18 Erkiteken Kristus me maka kita dua mbelahna ndat hak ngadap man Bapa arah si badia e.

Jenari iterusken Paulus nehken pengajaren, alu gambaren sada bangunen. Kristus palasna, pengajaren rasul-rasul e majekenca. Ertina, maka kerehen rasul e penting kerna Jesus palas kegeluhen simbaru. Ija kinierbagen perpulungen siersada ras Kristus iranggut jadi sada rumah, i ja Dibata ringan alu kesahNa. Ertina persadan kalak Sitek, sigejapken merupaken inganta jumpa ras Dibata ras temanta sada kiniteken amin pelain-lain suku, bangsa, tingkat pendidiken, sosial ras sideban.

Tema i bahan PKK wari pemena iranggut jadi sada keluarga. Lembaga sikitikna sienggo ipersadaken Dibata eme keluarga. Persadan sikitikna dingen sindeherna. Dingen simpersadaken keluarga emekap Dibata bapanta i bas Jesus Kristus palas jabu e. alu bage uga maka keluarga tetap paguh, utuh ras mpermuliaken Dibata i bas kegeluhen jabu e, eme siterus menerus arus iupayaken.

Janah gereja eme ingan persadan kalak sitek, beda suku, bahasa, bangsa, rsd Dibata sijadi palas bangunen persadanta. Emaka siarus siupayaken kita, tetap nggeluh ersada aminna mbue perbedaanna. Ula erkitken perbedaan silit maka murah terjadi perjenggilen bahkan perpecahen ntah pe gap-gap/kelompok. Adi labo anggota sektorna melala perpulungen la ia terkena reh ngapuli-ngapuli ntah pe mengunjungi kalak si sakit.

Jusuf aminna ia pernah iambeken senina-seninana tapi kedungenna ia banci mpersadaken senina-senina rikut ras kerina anak-anakna i Mesir. Jusuf la hanya ngukurken dirina sendiri tapi nandangi keluarga arah bapana Jakub. Nggeluh i bas persadan sierbahanca kita megegeh dingen mbue simehuli sibanci si lakoken. Tapi kebalikenna, asum sitadingken persadan e  ntah pe labo kita nggeluh i bas persadan e maka mate me pertendinta. Desken api unggun, adi sekali kayu mpeserap dirina i bas persadan api unggun e, lambat laun pasti nimpet me kayu siawalna gara ndai. Bage me kegeluhenta ula kita sirang ras Kristus ras ula si sirangi kalak sitek i bas persadanta.

WARI II 19 NOVEMBER 2018

Pdt. Larena br. Sinuhadji (Nd. Reynard Tarigan)

Invocatio : O Tuhan sangap kel bangsa si nembah man banNdu alu rende, kiniulinNdu nalsali geluhna (Masmur 89:16)

Ogen : Jakub 1:25-27

Khotbah : Keluaren 20:1-11

Tema : LEBEKENLAH TUHAN I BAS KEGELUHEN JABU!

Penjelasen Bahan Pustaka Si Badia & Aplikasi

Bahan kotbahta ngerana kerna sepuluh pedah Dibata, pedah siibereken Dibata man bangsa Israel kenca enggo ndarat i bas perbudaken bangsa Mesir nari. Erkiteken enggo icidahken Dibata keleng ateNa i bas maba ndarat bangsa e i Mesir nari, maka la banci lang bangsa e arus tetap setia erkemalangen man Dibata. Biasana pedah enda ibagi dua, pedah 1-4 ken ngerana kerna kesetian bangsa e ersembah man Tuhan. Sembah Dibata saja, ula sembah sideban. Ula ibahan gana-gana ntah gambar-gambaren simenyerupai Dibata. Ula melasken gelar Dibata alu sembarangen, alu tujun si jahat ras inget bagepe pebadiaken wari sabat. Sedangken Pedah 5-10 siberkaiten ras sesama manusia. Mehamat man orang tua, ola munuh, ula erlua-lua, ula nangko, ula ibahan-bahani salah kalak bage pe ola mengga atendu barang kali. Janah kehadiren Jesus enggo menyempurnaken pedah Tuhan enda alu tindaken siaktif ras positif ras merupaken perentah sipentingna guna banci silakoken i bas kerina uu agama, sipemena ngkelengi Tuhan Dibata asa ukur, asa tendi ras asa gegehta lit. Sedangken sipeduaken, ngkelengi teman manusia bagi kita ngkelengi dirinta jine.

Bahan ogenta ngerana kerna aplikasi konkrit arah pengkebet geluhta tandana kita kalak sinandai Dibata. Labo hanya menguasai rumusan-rumusan teologis kitab Suci tapi lebih asa sie ndalanken kata Dibata i bas kegeluhenna. Eme makeken dilah alu mehuli, ija kata-kata sibelasken kita, kata-kata si membangun. Dingen jadi kita berkat man kalak sideban, secara khusus kalak simembutuhken penampat bas kita nari, eme anak melumang, kalak simbalu silit i bas kiniseran dingen njagai dirinta gelah ula icedaken doni enda (band. Roma 12:2b Ola pelepas dirindu jadi seri ras doni enda, tapi berelah maka perukurenndu ipelimbarui Dibata).

Bahan Invocationta mereken tole semangat man banta gelah tetap kita nembah man Dibata alu dem ketutusen ras kiniteken sabab sinalsal Tuhan ngkawali kegeluhenta dingen iberekenNa pe kiniulin man banta. Jadi ula nari kita setengah-setengah ntah pe song-song ersembah man Tuhan, sabab kesangapen jadi sikerajangenta. Enggo jelas, di luar Tuhan la banci sidatken kemalemen ate situhu-tuhu.

Tema i bas wari peduaken pekan kebaktin keluarganta eme Lebekenlah Tuhan i bas kegeluhen jabu! Ertina, Dibata i bas Jesus Kristus tetap siutama ras pertama i bas kerina dampar geluhta. Mat. 6:333 Tapi si pentingna kal, daramilah lebe KinirajanNa, janah dalankenlah si ngena ateNa, maka icukupiNa kai si perlu man bandu. Adi la nai Dibata sebage siutama ras pertama ibas geluhta bage pe jabunta enggo pasti arus kita jera dingen berubah. Labo kinibayaken, jabaten, pangkat, pacar, kesehaten, kade-kade siutama tetaplah Dibata i bas bagin sipuncana kel. Ula erkiteken lit kerja-kerja, la nari kita erkebaktin i bas wari minggu. Maka kebiasaan si e enggo ibeneken i ja la nari i bahan kalak erkerja i bas wari minggu. Janah adi ilakokenna pe kenca karaben maka ibenaken acara. Ula erkiteken materi, jabaten, kiniteken la nari kita inget ersmbah man Tuhan. Ula erkiteken kinibayaken sibakal sitadingkenken nggit  ngelakoken perbahanen si la mehuli. Mpelebeken sura-sura Dibata berarti sura-suranta iteruh sura-sura Dibata. Adi sungkun ukurta, nembeh ateta temanta sienggo nakiti ukurta bahkan silakoken si la mehuli pe man banta. Tapi erkiteken sipelebe sura-sura Dibata maka nggit kita ngalami salahna dingen erbahan simehuli bana. Keleng ateta anakta, tapi ula erkiteken anakta la pernah nari kita ku gereja ras kegeiaten gereja sideban. Alasen siusur siban, anakku kitik denga. Tuhan enggo nelematken kita i bas dosa-dosa nari, maka tetaplah Ia sipelebeken i bas kegeluhenta.

WARI III 20 NOVEMBER 2018

Ella Novita br. Tarigan (Mhs. Praktek F.Th. UKSW)

Invocatio : Ajarkenlah man anak uga kearusen nggeluh maka ikutkena asa umurna nggeluh (Kuan-kuanen22:6)

Ogen : Ulangen 6:1-3

Khotbah : Matius 5:17-20

Tema : PENGAJAREN TUHAN NGKUHI ORAT NGGELUH

Invocatio (kuanen 22:6), isina emekap tentang pengajaren  man kalak si lenga erpengalamen ntah pe kalak si nguda denga, si pada umumna langa bo cerdik ras pentar.  Enda sebagai Persinget man banta,  khususna man orangtua  gelah meteh kuga cara  mendidik / ngajari anak singuda denga. Iajari anak asum ia kitik denga kerna kearusen nggeluh ( cara hidup), biak simehuli ras si la mehuli,  segelah asa segedang geluhna la ia ngikutken kearusen nggeluh bagi si ngena ate Dibata.

Bahan ogenta Ulangen 6:1-3, isina  emekap  pengajaren Musa kempak bangsa Israel  asum ia nggeluh denga, ope denga bangsa Israel ku Kanaan,  Musa  mengulangi ras meneguhken  karna perpadan bangsa Israel  dingen mereken prentah guna ndalanken kerina UU (taurat) si patuhi bangsa Israel. Bangsa Israel ibebasken Tuhan i bas taneh Mesir nari, taneh perbudaken, sebab ate Tuhan naruhken bangsa Israel ku taneh siipadanken Tuhan eme taneh Kanaan. Taneh sidem alu dadih ras tengguli. Tapi bangsa  Israel sinandangi bengket ku taneh Kanaan eme kesusuren simbaru. Angkaten si pemena singaloken undang-undang Tuhan i deleng Sinai, nggo mate. Emaka paksa angkaten simbaru bangsa Israel ngadi-ngadi i dataran Moab, erpidato me Musa.

Pidato Musa man bangsa Israel isina eme gelahna bangsa Israel ngikutken kerina undang-undang Tuhan. Sebab adi bangsa Israel ngikutken undang-undang Tuhan, maka sialoken bangsa Israel eme umur si gedang ras nggeluh alu mejuah-juah ras jadi bangsa simbelin. Tuhan mereken jaminen kegeluhen man bangsa Israel, subuk umur bagepe kemalemen ate. Kemalemen ate la saja kerna kegeluhen pertendin, tapi pe kegeluhen jasmani. Sebab i taneh Kanaan siilambangkan dadih ras tengguli, situhuna sada simbol pasu-pasu Tuhan man bangsa Israel arah taneh Kanaan. Ibereken Tuhan taneh Kanaan tanah kesuburan.

Bangsa Israel arus ngikutken undang-undang siiajarken Musa. Undang-undang e me sepuluh pedah Dibata. Bangsa Israel arus ngkelengi ras ersembah man Tuhan saja. Ula lit dibata-dibata sideban man bangsa Israel. Bagepe kegeluhen bangsa Israel arus nggeluh badia ras ndalanken keleng ate. Enda memang jadi penekanan man bangsa Israel, sebab taneh Kanaan sinandangi iianina, taneh silit jelmana (penduduk) ras lit agamana. Saja agama ras dibatana la seri ras agama ras Dibata bangsa Israel. Emaka nggeluh alu ersembah man Dibata saja (monoteisme) merupakan hal simutlak man bangsa Israel. Matuhi UUD e harus jadi komitmen man bangsa Israel.

 Bahan khotbah Matius 5:17-20,  bahan oratenta  ibas bahan Khotbah,   emekap  salah sada bagin khotbah Jesus i  datas uruk ( Bukit).  Janah sekali enda Jesus mereken sada penjelasen  kerna hubungenna ras Undang-undang Musa ras si ajarken nabi-nabi. Nina Jesus, IA reh labo guna encedai undang-undang si enggo ipeseh Musa Ntah pe Nabi-nabi . Tapi IA reh guna  menggenapi Hukum Musa, labo ngapuskensa tapi Yesus Kristus memulihkan ras mengoreksi ajaren si enggo keliru. Hal enda ilumbaken Tuhan Jesus erkiteken litna kecugiaan i bas kalak Jahudi (pemimpin-pemimpin agama Jahudi), maka pengajaren Tuhan Jesus bertentangen ras undang-undang si ibereken Musa ras para nabi.

Jesus menggenapi Undang-undang Musa arah jatidiriNa sendiri bage pe arah kai si iajarkenNa ras idalankenNa. Berbeda ras pemimpin-pemimin agama Jahudi si hanya mereken undang-undang tapi la idalankenna undang-undang e (piga-piga kali Tuhan Jesus ngatakennca maka guru-guru agama ras kalak Parisi pekulah-kulah, bdk. Mat. 23, Mrk. 12:40, Luk. 11:39-42). E maka nina Tuhan Jesus, labo banci kita bengket ku bas Kinirajan Surga adi la kin tutusen erbahan si ngena ate Dibata asa guru-guru agama ras kalak Parisi. Maka i bas bagin si deban pe Tuhan Jesus ngerana, “Labo kerina kalak si erlebuh man bangKu, O Tuhan, Tuhan bengket ku bas Kinirajan Surga, tapi kalak si ngelakoken si ngena ate Dibata. Jelas si iarapken Tuhan Jesus e me kap arah kai pe si nilakoken kita tuhu-tuhu si ngena ate Dibata. Sedangken kalak Parisi ras guru-guru agama, memberlakukan undang-undang enda hanya sebage tampilen luar ngenca (kelihatannya saleh, kudus), tapi kai si ngena ate Dibata la idalankenna i bas kegeluhenna, e me kap ngkelengi Tuhan Dibata ras ngkelengi sesama manusia. Jelas, maka arah kerehen Tuhan Jesus labo ncedai entah pe meneken undang-undang ras tradisi kalak Jahudi si enggo lit, melainkan mpepintersa gelah sue bagi si ngena ate Dibata. Memperbaharui pemahaman.

  Tema kebaktin pekan keluarga wari pe-3 enda” pengajaren tuhan Ngkuhi orat Nggeluh”, jadi guna banci ngkuhi orat nggeluh harus nge si eteh kerna ajaren Dibata, Mesera nge ngkuhi orat nggeluh arah kata Dibata,  adi la kita pernah ngoge Pustaka Si Badia, bagepe megiken Kata Dibata arah khotbah ras sidebanna. Sebab undang-undang Dibata lit ibas Pustaka Si Badia, bagepe pengajaren kata Dibata lit ibas khotbah (kebaktin minggu, PJJ ras PA). Emakana guna ngkuhi orat nggeluh harus menda sibaca ras si antusi Pustaka Sibadia.

Tep-tep manusia si nggeluh i babo Pertibi enda lit bas orat nggeluh si man paken ntah man dalanken segelah kegeluhen lit ibas kiniraturen. Selaku kalak karo tentuna  lit orat nggeluh siniajarken  ras sinisusurken  nini-nininta nai seh pasa  genduari. Kata “orat” ertina aturen, tata krama, adat. Kalak simeteh orat emekap kalak si meteh adat, nggeluh bagi aturen si lit, janah aturen si ajarken ninita nai ikuhi alu Undang-Undang Dibata, ija adina kalak karo biasana ikelengina  ras itatang-tatangna kel sangkep nggeluhna. saja,  emakaan adina palaseken undang-undang Dibata labo hanya sangkep nggeluhta saja ngenca si kelengi, tapi kerina tinepana si kelengi, kekelengen e kekelengen si la ersibar.  Alu bage maka orat nggeluh kalak karo ndai nggo ikuhi alu kata Dibata      

 Ibas invocation pe mpesingetken kita, khususna oangtua segelah ngajarken orat nggeluh nandangi anak-anak itengah jabu,segelah anak-anak itengah jabu banci nggeluh rikutken  orat nggeluh khususna orat nggeluh/ adat  kalak karo. Umpamana,  mulai kitik-kitik nari ajari ia guna ngerana alu sopan, la mekarus, la meros, ajari biakna ertutur, uga ia biak impal, uga biak Turang ras sidebanna, segelah ula kari akapna impalna padahal turangna.  Jadi mulai kitik-kitik nari memang arus i ajari, segelah ola papak dalan anak si nguda.

Kalak si la meteh orat emekap kalak si la ngikuti peraturen,  nggelu bagi ate-atena, emakana perbahanena pe labo ernanam man sekelewetna. Ula kita bali bagi kalak farisi si etehna Undang-undang tapi la idalankena. Ula sieteh karna sikeleng kelengen tapi hanya bas teori saja tapi perlu ibas praktek.

HARI IV 21 NOVEMBER 2018

Nrs. Pdt. Larena (Bp. Rey Tarigan)

Invocatio : Ula kam papak! Pergaulen si la mehuli, encedaken biak simehuli (I Kor 15:33)

Ogen : I Sam 2:12-17 (Iogeken simada Jabu)

Khotbah : Roma 6:12-14

Tema : PAKEKENLAH RINGRINGNDU NEHKEN SI NGENA ATE-NA

Penjelasen Bahan Pustaka Si Badia & Aplikasi

Salah sada pengajaren Rasul Paulus i bas suratna man perpulungen kalak si tek i kota Roma, e me kerna lias ate Dibata (kasih karunia, anugerah keselamatan). Pengajaren enda paksa si e rusur denga isalahertiken. Enda teridah i bas penungkunen Rasul Paulus i bas bindu 6:1-2, nina, “Kuga dage ninta genduari? Siusur-usur dage erbahan dosa gelah erbelinna lias ate Dibata? Tentu lang! Kita enggo mate nandangi dosa; kuga banci kita terus nggeluh i bas dosa?” Jadi melala denga perpulungen si secara sadar ras sengaja ngelakoken erbage-bage dosa sebab bas ukurna gelah erbelinna lias ate Dibata. I bas si e itegasken Rasul Paulus i bas bahan khotbahta, si pemena, olanai pelepas dosa ngerajai kulandu, janah ola iikutken kinirincuhenna. Si peduaken, ola pelepas ringringndu ipake dosa guna ndalanken si jahat, tapi endeskenlah dirindu man Dibata guna ipake Dibata ngelakoken si ngena ateNa. Si peteluken, sedarilah maka geluh si mbaru e me nggeluh i teruh lias ate Dibata.

Nggeluh i bas keselamaten e me nggeluh i bas kegeluhen si mbaru si orientasina enggo robah total i bas dosa nari ku bas lias ate Dibata. Ertina geluhta enggo tuhu-tuhu ikuasai Dibata lanai i teruh kuasa dosa. I bas si e tentuna arus lit i bas kita kesadaren si mbages maka geluhta enda e me geluh si mbaru i bas Kristus. Si peduaken, berekenlah Kesah Si Badia ngerajai perukurenta, gelah i bas si e, si lit i bas pusuh ukurta lanai dosa tapi kerina hal si mehuli sue ras peraten Dibata. Emaka tutuslah kita ertoto ras ngoge Pustaka Si Badia gelah sora Kesah Si Badia rusur ersora i bas pusuh ukurta. Si peteluken, ula siandalken gegeh beluhta i bas ngelawan kuasa dosa tapi endeskenlah dirinta man Dibata, gelah ipegegehiNa kita ngelawan kuasa dosa janah ngelakoken kerina si jadi peratenNa.

Ogenta si pemena mereken pembelajaren man banta, ola kita bagi anak-anak imam Eli si enggo itehna kerina hal si mehuli tapi si idalankenna kerina si la mehuli i lebe-lebe Dibata. Kita enggo iselamatken Dibata alu pengorbanen Yesus Kristus i kayu persilang. Ratana kita enggo meteh kerna keselamaten bage pe nggeluh i bas keselamaten. Tapi melala denga kita si bagi anak-anak imam Eli, enggo siteh salah tapi tetap denga silakoken. Emaka mari radu ras kita menyadari statusta sebage anak-anak Dibata si enggo iselamatken, si peduaken berekenlah Kesah Si Badia erkuasa i bas dirinta, si peteluken endeskenlah dirinta man Dibata.

Tambahen sada nari i bas invocatio, penting i bas kita membatasi pergaulenta gelah banci siciptaken kondisi pergaulen si lebih sehat ras ermanfaat guna pertumbuhen kinitekenta. Emaka sibenakenlah i bas jabuta sekalak-sekalak, ciptakenlah kondisi jabu si erkemalangen man Dibata. I bas si e tentuna pasti lit dampakna i bas lingkup masyarakat si lebih luas. Dibata si mpegegehi kita.

WARI V 22 NOVEMBER 2018

Ella Novita br. Tarigan (Mhs. Praktek F.Th. UKSW)

Invocation :  Erdahinlah kam maka kam nggeluh, adi ngeranai janah kundul-kundul saja ngenca, musil kam( Kuan-kuanen 14:23)

Ogen :  Kejadian 30:25-30

Kotbah  : Perbahanen Rasul 18 : 1 – 4

Tema : RASKEN BAS DAHIN (ENTREPRENEURSHIP)

Tema umum KPK ta (Kebaktin Pekan Keluarga) 2018 enda nina, “Jadi Jabu Si Ersembah man Dibata”. Ersembah man Dibata luas cakupenna. Ersembah labo terbatas ibas kebaktin Minggu i gereja saja, i PJJ, PA kategorial saja. Ersembah man Dibata labo terjeng wari Minggu saja. Ersembah man Dibata pe wari Senen seh wari Sabtu. Ersembah man Dibata e tep-tep wari kap. Janah erdahin termasuk ersembah kap. Erdahin (kerja) e ibadah. Emaka ibas berngi si pelimaken KPK ta tema si seh man banta eme “Rasken Bas Dahin” (Enterpreneurship).

   Invocation  Kuan-kuanen 14:23, mpersingeti guna tetap erdahin,  sebabna dibata pe erdahin mulai nai-nai nari asa genduari, mulai ia nepa kita, bagepe tetap njagai, nampati, ras ngkelengi kita, jadi kita pe sebagai anakna Patut ngelakoken bagi sinilakoken Dibata. Arah erdahin nge makanaa banci si penuhi kebutuhenta, adina la erdahin makaana labo baci kita nggeluh.  Adina kundul-kundul ras ngerana saja ngenca kita, makana musil nge. Janah kata enda labo hanya  sebagai teori saja tapi enggo i lakoken Salomo subuk ia mimpin bangsa israel, perbahan tutus atena erdahin makana bangsa Israel banci jadi kerajaan si megah, janah ia pe jadi raja si seh kel bayakna.

Bahan Ogenta kejadian  30:24-30, Jakup erdahin alu tutus ras erbintuas man mamana Laban, Jakub nggeluh 14 tahun i rumah  Laban, sedekah Jakub nggeluh ras Laban, teridah kel Tuhan masu-masu Laban. Ibas kurun waktu e, laban lalap nahan Jakup gelah  la lawes ibas ia nari.  Erkiteken jakub sebagai kalak si rajin erdahin janah erkemalange man dibata, makana ia jadi pasu-pasu nandangi mamana Laban, asuhen-asuhen si ndube nggo merih kerinana. Emaka ipindo Jakup man Laban gelah ipediat Laban, ia ras keluargana (ndehara ras anakna), lawes arah rumah Laban nari guna erdahin man dirina jine ras angota jabuna.

Bahan Khotbah, Perbahanen Rasul 18 : 1 – 4, bas Tahun 52 SM Kaisar Roma Claudius medarat perintah gunda empedarat kerina kalak Jahudi ibas kota Roma nari. Teridah maka, tupung e terjadi penyiksaan man kalak kristen si erbanca turah perubaten ibas kota e. tapi La diate Claudius kal kerna si e. ibas ukurna hanya untuk empedarat kalak Yahudi ibas Roma nari. Emaka ibas paksa e lit sekalak kalak Yahudi si ergelar Aquilla, tangtangna kel ia pindah ku Roma arah Pontus nari. Ibas sada sisi kalak enda erdahin alu ras-ras “jadi tukang kemah” (kis 18). Emaka setiap kalak Yahudi ibas perjanjian Baru iajarken segeleh memiliki potensi ibas erdahin mulai kitik-kitik nari. Perban ibas paksa e tenda emekap bagin sipenting ibas kegeluhen kalak Ibarni, emaka orangtua Akuilla milih guna ngajarken anakna uga cara erban tenda. Tenda si ibanna e terbuat ibas kulit ambing si ipotong sekalak si memang ahli janah kulit babi e ijait alu mejile. Kenca idat Aquila keahlianna ibas erban tenda emaka I ajarina ka diberuna, segelah diberuna e banci nampati ia erdahin.

Emaka ibas paksa ia I Korintus denga, idaramina pasar segelah ia banci mbuka took tenda, emaka kenca langa ia ndekah mbuka toko tenda kalak Yahudi sideban pe ikut erban tenda. Janah rasul Pulus per eh ku Korinti guna ndahiken dahinna ibas mberitaken berita si meriah. Lako mendukung dahinna erberita si meriah, rasul Paulus pe erdahin. Erdahin ia erbahan tenda/ kemah. Si enda ilakoken Paulus gelah ia la jadi beban man perpulungen. si enda idahikenna gelah ia jadi usihen man kalak si tek. Akwila ras ndeharana pe erdahin. Kebetuleh seri pendahin ras kinibelunenna ras rasul Paulus eme beluh erbahan tenda. Paulus erdahin, Akwila ras ndeharana pe erdahin. Erdahin e wajib man manusia. Erdahin e hakekat manusia kin (bnd Kejadin 1:28; 2:15). Erdahin labo sada kutuken. Erdahin pe labo sada hukumen erkiteken manusia sipemena eme Adam enggo ndabuh ku bas dosa. Si eteh Dibata pe erdahin kap. Tapi nina Jesus man kalak Jahudi e, “BapangKu erdahin kap lalap; emaka Aku pe arus erdahin” (Joh. 5:17). Tuhanta Jesus Kristus jine pe erdahin. emaka kita selaku anak-anakNa pe arus dage erdahin. Tole banci si idah ibas invocatiota Kuan-Kuanen 14:23 nina, “Erdahinlah maka kam nggeluh, adi ngeranai janah kundul-kundul saja ngenca, musil me kam”. Erkiteken seri pendahin Paulus ras Akwila emeka Paulus kesilang i rumah Akwila ras Priskila. Banci jadi kerjasama ras si sampat-sampaten ia bas ndahiken dahinna. Saling melengkapi ras menyempurnaken ia bas erbahan tenda. Bas ogenta pe enggo tangkas uga Jakup erdahin alu tutus ras erbintuas man mamana Laban (Kejadin 30:25-30).

   La banci lang kita erdahin. Erdahin e kearusen nggeluh kin. Erdahin e sura-sura ras si ngena ate Dibata kin ibas geluhta. Arah erdahin kita nggeluh. Arah erdahin ibereken Dibata rejeki ras keperlun geluhta. “Rulih adi mejingkat, liah adi mekisat”, nina nininta si nuria. Ula la erdahin tapi erdahinlah. Ula ngerana apai ka ngeranai saja dingen kundul-kundul saja. Si enda mpereh kemusilen ngenca man banta. Dahikenlah dahinta alu tutus. Kai si banci si dahiken, dahikenlah. Ula tertima-tima, ula tertaren-taren. Si erdahin nggeluh me.

Adi Bagi nina temata, marilah si rasken bas dahin. Erdahinlah kita bagi perkis. Erdahin alu tutus erdahin alu ras-ras, aminna perkis binatang si kitik tapi melala kel kelebihen-kelebihen si ibas ia guna jadi usihen,  perkis e mejingkat( ngasup  ngurus dirina sendiri) tanpa komando,tertip, ratur la ia rubat-rubat aminna pe sada lintasen/baris, ngukurken masa depan, janah sihamaten ia adina jumpa. Siraskenlah dahinta, Ula kita pertewas. Jadilah mejingkat. Kerjasama ras sama-sama kerja. “Gotong royong”. Uga pe belinna dahin e adi iras-rasken tembe nge. Adi si raskelah bas dahin maka kai pe labo lit metahat. Jabu si ersembah man Dibata eme jabu si erdahin dingen nge Rasken Bas Dahin. Ras-ras erdahin dingen erdahin ras jadi kesemalem bas jabu. La lit si la erdahin, tapi kerina erdahin ras erdahin ras-ras sue ras gegeh ras pemeteh si lit ibas jabu. Jabu si nge Rasken Bas Dahin uga pe dat pujin dingen nggeluh bas kiniulin.

Adina ibas erdahin e ula min ndatken keuntungen sepihak saja, bagi laban si tahanna Jakub lawes rumahn nari labo perbahan keleng atena tapi morah atena adina lawes Jakub, karna lanai kari lit si erdahin nandangi ia bagi Jakub si  nggit ia la iupahi pe. Lit je keuntungen bisnis mbiar ia rezekina pe lawes adina Jakub lawes. Emakana bagi Aquila ras Priskila lah si mampu ia kerjasama ras Paulus, janah sikeleng kelengen ia labo guna ndarami keuntungen saja.  Adina ibas tengah jabu perlu kang kerja sama ibas ndahiken kai pe, labo hanya nande saja ngenca erdahin guna mbersihken rumah, erdakan, nuci ras sidebanna.  Tapi perlu kang i ras-rasken bapa itengah jabu pe banci nampati, rikutken anak pe segeah dahin e la mengel-ngel kel ngedungisa.

Entrepreneurship ertina emekap sekalak jelma si memilki jiwa kerjasama, semangat janah pang muat keputusen. Bagi aquilia ras Persila si memilki kerja keras ras usaha guna erbahan Tenda, janah banci ka ia kerjasama ras Paulus.

WARI VI 23 NOVEMBER 2018

Pdt. Larena br. Sinuhadji (Nd. Reynard Tarigan)

Invocatio : “Jenari, nina Jesus, “Dage ersikap-sikaplah sabab la ietehndu warina ntah pe jamna Tuhan reh” (Matius 25:13)

Ogen : 2 Raja-raja 4:8-10

Khotbah : Ketangkasen 3:7-13

Tema :             ERSIKAPLAH! DIBATA REH ME

Penjelasen Bahan Pustaka Si Badia & Aplikasi

Bahanta wari pe-enamken ngerana kerna persikapenta ope denga reh Tuhan  subuk arah kematenta ntah peduakaliken. Kai saja persikapenta, tentu kinitekenta man Jesus ras buah kininitekenta si arus sicidahken kita i bas kerina dampar geluhta. Ras enda banci teridah arah telu na perikopta.

Invocatio, turin-turin kerna 5 kalak bodoh ras 5 kalak pentar i bas nimai pengantin sidilako. 5 kalak diberu sipentar tuhu-tuhu enggo ersikap, i ja minak lampu tambahen pe enggo ibabana sabab la ietehna jam piga si empo seh. Emaka asum reh pengantin dilaki ikut ia bengket ku bas guna erpesta meriah ukur. Sedangken 5 diberu silenge la nari banci masuk, erkiteken pintun enggo ieruk asum kalak enda nukur minak tambahen.

Bahan ogenta ngerana kerna sikap simelayani ras dem kekelengen i bas keluarga diberu sibayak i Sunem nari. Aminna pe keluarga enda bayak, tapi labo meganjang ukur ras pelit, malah tuhu-tuhu jadi berkat. Ibenai alu itenahken diberu enda ndai Elia man asum reh Elia ku Sunem. Ertina, lit ije sikap proaktif, la lebe sungkuni ntah pe iayaken maka bergerak nampati tapi enggo lit ukur ersuruh guna nampati. Terdauhen asa si e, ersada arihna ras perbulangenna guna nikapken si lebih maksimal man Elia, sabab yakin kel ia, maka Elia eme kap kalak sibadia. Emaka isikapkenna ingan medemna, sada meja,sada kursi ras sada lampu, gelah banci reh kenca Elia langsung lit inganna khusus. Ertina, diberu kalak bayak i Sunem ras perbulangenna enggo banci makeken silit bas ia guna jadi berkat man kalak sideban khususna hamba Tuhan.

Bahan Kotbahta teridah kerna persikapen tuhu-tuhu siilakoken perpulungen Philadelpia amin sekali mbue tantangen ras perbeben selaku pengikut Kristus. Ijenda Dibata ipetandaken sebagai Dibata sibadia, bujur dingen medolat. Sabab adi enggo ieruk Tuhan la ise pe banci nalangisa bage pe adi enggo italangi Tuhan la ise pe banci ngeruksa (ay 7, ay. 8c lit dua kali). Ras mbue hal sipositif sibanci siidah i bas perpulungen Philadelpia asum lit na kiniseran e : Perpulungen enda labo asa kai kel gegehna, sedar kel ia maka gegehna kurang emaka tetap ia ernalem man Tuhan. Ija enggo ikutkenna kata Tuhan dingen la ipersokenna gelar Tuhan. Bahkan kuasa iblis pe banci italuken perpulungen enda labo erkiteken gegehna tapi erkiteken Tuhan. Tuhan sendiri si erbahanca kuasa setan iblis nembah erjimpuh man perpulungen Tuhan. Dingen si enda pe encidahken maka keleng ate Tuhan nandangi perpulungen si tetap ernalem baNa. Hal sideban, sibanci siidah arah perpulungen enda, emekap perpulungen tetap bertekun amin kai pe jadi (megenggeng, Hupomone (Yun: sabar, tekun). Ijagana tetap dirina ngikutken perentah Tuhan alu saber, emaka Tuhan sendiri hadir nampati perpulungen gelah tetap terkelin i bas paksa kesusahen si nandangi reh. Perpulungen arus tetap metenget, maka melala rusur godaan ras rintangen sikatawari paksa atena meneken kiniteken perpulungen. Jaga si lit ibas perpulungen gelah ola ise pe si reh guna merebut pemere kemenagen e. Kalak si tetap setia, enggo pasti ipasu-pasu Tuhan, ija ibahan Tuhan jadi binangun i bas rumah Tuhan, isuratken perpulungen e i bas gelar Dibata bage pe gelar kuta Dibata eme Jerusalem simbaru. Jelas arah bahan kotbah, uga perpulungen tetap setia ernalem man Tuhan amin mbue kel kiniseran la iadalkenna gegehna jine tapi tetap ernalem man Tuhan. Bahkan i bas kiniseran sialamina labo ka ngadi perpulungen enda erbahan simehuli, tetap geluhna jadi berkat man kalak sideban ija kiniteken, kesabaren, kinigenggengen perpulungen jadi usihen man perpulungen sideban.

Tema i bas berngi peenamken : Ersikaplah, Dibata reh Me. Ndigan reh Dibata? La ise pe metehsa sabab kerehenNa bagi pinangko. Sipenting tugasta ersikap. Buah kinitekentat arus sicidahken kita, siimplimentasiken i bas geluhta teptep wari subuh senang ras susah. Asum senang, bayak, erpangkat tetap meteruk ukurta, sisehken kekelengen man kalak sideban simembutuhkan. Dingen asum kita menderita, labo ka kita jungut-jungut ntah pe sipindo gegeh sideban tapi tetap mengandalken Tuhan sierbahanca kita mampu bersyukur, memuji Tuhan dingen geluhta tetap jadi kesaksin man kalak sideban. Hidup ini adalah kesempaten, hidup ini untuk melayani Tuhan, jangan sia-siapken hidup yang telah Tuhan bri, Hidup ini arus jadi berkat. Ula kari reh Tuhan la lit persiapenta, kinitekenta la sijaga, maka tading me kita. Labo hanya rajin gereja ras beribadah sebab e pei adi la sicidahken singena ateNa i bas geluhta labo kita itandai Tuhan (band. Mat. 7:21-23). Tuhan Jesus memberkati.

WARI VII 24 NOVEMBER 2018

Pdt. Larena br. Sinuhadji (Nd. Reynard Tarigan)

Invocatio : Anak e reh belinna dingen reh gegehna; pentar Ia dingen tetap ipasu-pasu Dibata (Lukas 2:40)

Ogen : Masmur 24:1-10

Khotbah : Matius 1:18-25

Tema : JABU SI NGALOKEN KETUBUHEN TUHAN YESUS

Penjelasen Bahan Pustaka Si Badia & Aplikasi

Bahan Kotbah ngelumbaken kerna berita ketubuhen Tuhan Jesus, ija lebe ijumpai Malekat Dibata guna mpetetap ukur Jusuf (Band. Lukas  1:26-; Malekat Gabriel njumpai Maria tunangen Jusuf). Ituriken maka Maria tunangen Jusuf enggo mehuli kulana arah kuasa kesah siBadia. Tentu saja Jusuf sengget, erkiteken ia kalak bujur, la pernah sekali pe ilakokenna si la mehuli man Maria. Janah pe, la lit sura-surana ngaduken Maria gelah ola Mela iakap Maria, saja ngenca ersura-sura ia nirangken Maria  alu sinik-sinik. Asum Jusuf rukur-rukur guna nirangken Maria, reh Malekat Tuhan arah nipina guna mpetetap ukurna gelah ula mbiar muat Maria jadi ndeharana. Sabab anak si lit ibas bertinna jadi erkiteken kuasa Kesah Dibata. Anak siipupus Maria pagi anak dilaki, janah arus ibahan Jusuf gelarna Jesus-Sabab Ia me pagi sinebusi bangsaNa i bas dosa-dosa nari. Kai si enggo ikataken Malekat Tuhan e merupaken penggenapen i bas nubuaten Nabi, “singuda-nguda e pagi mehuli kulana, jenari ipupusna sekalak anak dilaki. Anak e pagi igelari Immanuel (Dibata pagi ras kita). Aminna mberat sinikataken Malekat Tuhan baNa, Jusuf tetap ngikutken kata malekatTuhan e, ija ialokenna Maria jadi ndeharana.

I bas ogen sipemena, ilumbaken kerna Dibata raja simulia, simada doni enda ras kerina isina. Janah sibanci bengket njumpai Dibata eme kalak sibersih perukuren ras perbahanenna, si la ersumpah guak ntah nembah gana-gana.

Tema i bas wari terakhir Pekan Kebaktin Keluarganta eme Jabu singaloken Ketubuhen Jesus Kristus. Bagi Jusuf ras Maria siap ipake Dibata jadi alatNa guna nehken keselamaten man doni enda, maka jabunta pe iarapken bagi jabu Jusuf.

Jabu si patuh ndalanken sura-sura Tuhan amin sekali mberat siman alanken. Banci jadi Jusuf icap dilaki si la mehuli, Maria icemooh ntah pe isingkirken anak kuta. Tapi Pustaka sibadia la pernah ncidahken man banta kerna kejadin si e man banta. Ertina, kuasa Dibata, kuasa kesah Sibadia sindungi sada persada persoalan simberat ialami Jusuf ras Maria. Ertina, sipaling penting lebe banta, patuh kita ndalanken sura-sura Dibata, subuk sibagi ukurta ntah pe si la bagi ukurta. Sabab mekatep siterjadi, asum sibagi ukurta (keberhasilan, sehat, keberuntungan, sukses) ije ngenca kita nggit ngalokenca. Tapi si la bagi ukurta (kegagalan, kiniseran, kemalangen) mberat kita ngalokenca bahkan berontak ras erpenulak kita.

Jabu si saling melengkapi sada ras sidebanna, bagi Jusuf ras Maria, aminna pe tantangna la ngasup Jusuf ngaloken kekurangen i bas diri Maria sabab enggo leben mehuli kula. Tapi kedungenna erkiteken pengertin ibereken Malekat Tuhan, Jusuf nggit ngaloken Maria. Ingat padan perjabun, nggit ngaloken pasangenta i bas susah senang, ceda ate ras meriah ukur, sehat sakit rsd. I bas perdalanen perjabun aminna lit kekurangen pasangenta tapi la perlu ipebelin sierbahanca turah perjengilen. Emaka pebuai sikap saling mengasihi, nggit berkorban, sabar menghadapi pasangen gelah alu bage tetap banci terjadi keharmonisen i bas jabu.

Nggit ngukuri simehuli kerna pasangenta. Jusuf la lit sura-surana si la mehuli man Maria aminna pe enggo ietehna mehuli kula Maria. I bas jabu, asa bancina pikirenta tetap positif kerna pasangenta ras nggit kita rukur kerna kiniulin pasangenta. Apresiasi-apresiasi simehuli sibiasaken sibereken man pasangenta rikutken kai siibahanna.

Janah invocationta pe ngerana kerna pertumbuhan subuk secara fisik ras pertendin Jesus Kristus sebagai manusia. Ertina, keluarga Kristen pe ula mengalami kemunduran rohani, tapi ambah warina reh dewasana kinitekenta ras enda teridah arah pengkebet geluhta, subuk secara pribadi,  keluarga ras i bas masyarakat. Adi nai la pernah gereja, la lit ibadah keluarga, menggo i bas nehken persembahen, kurang mediate man isi jabu, kurang  peduli man sekelewet ras genduari terjadi perubahen ku arah simehuli.