Khotbah GBKP Minggu Tgl. 5 Juni 2016

KHOTBAH GBKP MINGGU TGL. 5 JUNI 2016

(MINGGU II KENCA TRINITATIS - MINGGU ETIKA KERJA)

Pdt. Larena br. Sinuhadji (Nd. Rey Tarigan)

Invocatio : “Erdahinlah maka kam nggeluh adi ngeranai janah kundul-kundul ngenca musil me kam” (Kuan-kuanen 14:23)

Ogen : Matius 21:28-32 (Tunggal)

Khotbah : Pengerana 9:10-12 (Tunggal)

Tema : ERDAHINLAH

Penjelasen Bahan Pustaka Si Badia

Bapa Gereja, Johanes Calvin ngatakenca, “Erdahin e me kap ibadah”. Ertina, ibadah e labo hanya si berkaiten ras rende muji Tuhan, ertoto, ngikuti kebaktin-kebaktin bas Gereja, tapi pe keseluruhen kegeluhenta, termasuk erdahin, e me ibadah. Rikutken bahan khotbahta, kitab Pengerana ngelumbakenca maka sidahikenlah dahinta asa gegehta, sabab denggo bas doni kematen la nai lit dahin  si man dahinken. Ertina, arus beluh (pentar) kita makeken waktu. Waktuna erdahin, erdahinlah kita, waktuna pekesahken, istirahatlah kita. Sabab lit ka deba erdahin over time, enggo mbuesa waktuna erdahin piah dungna sakit erkiteken kurang istirahat.

Berikutna si icidahken Pengerana man banta, ola kita sombong, sabab persoalen entah pe perbeben banci ngkenai kerina manusia. Ula kita metudasa. Lenga bo pasti kalak si meter kiam si menang i bas perlumbaan. Kalak si megegeh labo lalap menang i bas peperangen. Labo kalak si cerdik rusur ndatken kebayaken, rsd. Ertina, cara ras sikap i bas kita erdahin sangat mempengaruhi ulih pendahinta. E maka iperluken kecerdasen intelektual, emosional ras spiritual. Janah i bas si e tetap kita erpengendes man Dibata si ngaturken kegeluhenta.

Ogenta ngerana kerna  perumpamaan dua kalak anak si nggambarken kalak si bertobat ras kalak si benar akapna bana dingen la lit pertobaten i bas ia. Ituriken Tuhan Yesus kerna sekalak perbapan i ja lit dua anakna dilaki. Anak si ntua, isuruh bapana erdahin ku kebun anggur. Iueken anakna ndai tapi la idahikenna. Je nari ikatakenna ka man anakna si nguda bali penuruhna man anakna si ntua ndai. Lang nina anakna si nguda ndai. Tapi dungna erkadiola ia, e maka lawes ia erdahin ku kebun anggur e. Isungkun Tuhan Yesus man imam-imam si mbelin ras pemimpin-pemimpin kalak Yahudi, si apai nge i bas si dua kalak e ndalanken sura-sura bapana? Jawabenna, anak si nguda. E maka nina Yesus, leben nge pemungut cukai ras diberu si dahinna erlua-lua bengket ku bas Kinirajan Dibata asang kerina kalak enda. Sabab enggo pe Johanes peridiken nuduhken dalan kegeluhen si ituduhken Dibata janah la ia tek, tapi pengalo cuke ras diberu-diberu si pendahinna erlua-lua e tek.

Pengkenaina

Minggu enda bengket kita ku bas Minggu Etika Kerja. Etika kerja si nimaksudken i jenda erpalasken bahan Pustaka si Badia sendah e me: 1) Erdahin e me ibadah ras anugerah si ibereken Dibata man banta. Alu bage sada kebanggaan ras ucapan syukur man banta banci kita erdahin rikutken dahin si ibereken Tuhan banta. 2) Arah pendahinta banci kita mengaktualisasiken dirinta (berkarya) rikutken peraten Dibata man banta ras arah si e pe Dibata imuliaken (bdk. Fil. 1:22a). 3) Erdahin e me penugasen Tuhan man banta, sabab seh asa gundari pe Dibata tetap erdahin (bdk. Yoh. 5:17). 4) I bas kita erdahin banci kita ncukupi kebutuhen geluhta sekaligus jadi pasu-pasu man kalak si deban (bdk. Ef. 4:28). 5) Sidahiken dahinta asa gegehta, tapi arus lit keseimbangen antara erdahin, istirahat, ras menikmati hasil pendahinta.