PJJ GBKP Tgl. 29 Mei - 4 Juni 2016

PJJ GBKP TGL. 29 MEI - 4 JUNI 2016

Pdt. Larena br. Sinuhadji (Nd. Rey Tarigan)

Tema : PERSEMBAHEN SI PAYO (Masmur 50:1-23)

Penjelasen Bahan Ogen & Perenungen

Bahan ogenta encidahken man banta maka kerina sinasa lit Dibata si madasa (ay. 10-11, “Sabab sikerajangenKu nge kap rubia-rubi i kerangen, bage pe asuh-asuhen i das deleng-deleng si meribu-ribu. Aku nge empuna kerina perik-perik i bas awang-awang bage pe kerina si nggeluh i bas mbalmbal si mbelang”). Ertina labo erkiteken merhat ras butuh Tuhan maka sisehken persembahenta man Tuhan, sabab Tuhan kap empuna doni ras kerina si lit i je. Palasta mere man Tuhan sebage pengataken bujurta man Tuhan si enggo mereken keselamaten, si memelihara (ay. 15) ras si ncukupken kerina kebutuhen geluhta. Jadi kai pe bentukna persembahen man Tuhan (pengakuan iman, guna pembangunen gereja, guna kegiaten pengumpulen dana membangun sarana prasarana gereja) si e kerina labo sumbangen, entah pe mere tapi pengataken bujurta man Tuhan. Sabab kerina si lit i bas kita rehna i bas Dibata nari, kita tading ngulihkenca saja man Tuhan. Adi mere entah pe sumbangen man Tuhan, berarti kekurangen Tuhan maka sibereken man baNa.

I bas kita nehken persembahen e man Tuhan merupaken pehagaken (mpermuliaken) Tuhan. Alu bage situhuna banci nge sievaluasi persembahenta man Tuhan, enggo siakap Payo? Motivasinta i bas persembahen e me sebage pengataken bujur man Tuhan. Ertina, adi lenga bo sigejapken maka geluhta ipasu-pasu Tuhan la lit ertina sisehken persembahenta, kolektenta, perpuluhenta, rsd. I bas kita nehken pengataken bujur man Tuhan sibereken alu pusuh si bersih, ula terpaksa dingen ula jungut-jungut. I bas PJJ sendah isingetken mulihi kita kerna pengataken bujurta man Dibata erkiteken kerina si lit bas kita rehna i bas Dibata nari. Tading uga kita menatalayanken kerina si lit e gelah banci jadi pasu-pasu man banta, man gerejanta, bage pe man kerina kalak i sekelewetta. E maka sipindolah gegeh arah Dibata nari gelah ngasup kita menatalayanken kerina si enggo iberekenNa man banta.