PJJ GBKP Tgl. 8 - 14 Mei 2016

PJJ GBKP TGL. 8 - 14 MEI 2016

Pdt. Larena br. Sinuhadji (Nd. Rey Tarigan)

Tema : KESAH SI IPADANKEN YESUS (Johanes 16:12-15; Epesus 1:13-14)

Penjelasen Bahan Ogen & Perenungen

Bahan ogenta si pemena (Yoh. 16:12-15) e me masuk i bas pedah-pedah terakhir Tuhan Yesus man ajar-ajarNa sope IA bengket ku bas kiniseran ras kematen. Salah sada pedahNa man ajar-ajarNa e me kerna Kesah si ipadanken Yesus man ajar-ajarNa kenca IA nangkih ku surga. Kesah i jenda e me Kesah si naksiken kebenaren kerna Dibata (bhs. Ind., “Roh Kebenaran”) si mpetangkas kebenaren kerna Dibata alu serta (bhs. Ind., “IA akan memimpin kamu ke dalam seluruh kebenaran). Kebenaren i jenda e me Yesus Kristus (bdk. Yoh. 1:9; 6:30; 14:6; 15:1; 18:37). I bas ogenta si peduaken (Ep. 1:13-14) enggo tangkas man rasul Paulus bahwasana padan Yesus Kristus kerna Kesah enda ndai enggo igenepi, e maka ikataken rasul Paulus, “Asum ibegindu berita si tuhu-tuhu (kebenaren), Berita Si Meriah si maba keselamaten man bandu, tek kam man Kristus, janah itamaken Dibata cap i bas kam, tandana kam sikerajangenNa, alu mereken Kesah si Badia si enggo ipadankenNa”. Kesah si Badia e me jaminen bahwa kita e me sikerajangen Dibata.

Kesah si Badia i bas jaman Padan si Ndekah ibereken man pribadi-pribadi : Imam, hakim, nabi, raja-raja. I bas jaman Padan si Mbaru Kesah si Badia ibereken man kerina kalak si tek. Kesah e merupaken cap maka kita sikerajangen Kristus. Kesah e jadi jaminen maka sialoken keselamaten si enggo ipadanken Dibata ras isempurnaken i bas pendungi jaman. E maka gelah ola pulah keselamaten e tetap kita setia ras taat man Tuhan. Ketaatenta man Tuhan erbahanca Kesah e tetap erdahin i bas geluhta. Kesah si Badia si jadi penampat banta rasa lalap seh rasa lalap. Kesah si Badia si naksiken kebenaran kerna Dibata. Kalak si idemi Kesah si Badia ngasup dingen pang ia menyuaraken kebenaran Dibata. La ia mbiar sebab Kesah si Badia si ngajari ia. Tentu menjadi bahan perenungen man banta kerina, apakah Kesah si Badia si ipadanken Yesus e enggo nggeluh i bas dirinta? Kai indikatorna? Ndai enggo piga-piga isebutken e me, lit kesetian ras ketaatan i bas dirinta, pang kita ngataken si benar sue ras Kata Dibata, lit i bas kita 9 ulih Kesah si Badia (Gal. 5:22-23), rsd. Intina, adi Kesah si Badia lit erdahin i bas kita, maka geluhta semakin irobah, ipelimbarui wari lepas wari.