PJJ GBKP Tgl. 1 - 7 Mei 2016

PJJ GBKP TGL. 1 - 7 MEI 2016

Pdt. Larena br. Sinuhadji (Nd. Rey Tarigan)

Tema : KENANGKIHEN JESUS KU SURGA JADI KERIAHEN UKUR (Lukas 24:50-53)

Kenca Tuhan Yesus mate, keke i bas si mate nari, maka selama 40 wari lit kesempaten man baNa guna ncidahken diriNa man ajar-ajarNa, maka Yesus tuhu-tuhu enggo keke i bas si mate nari. Perb. Rasul 1:3, “Empat puluh wari dekahna kenca kematenNa, icidah-cidahkenNa baNa man rasul-rasul e alu erbage-bage cara guna mbuktiken maka Ia nggeluh. Tangkas idah rasul-rasul e Yesus, janah ngerana Ia rasul-rasul e kerina kerna kinirajan Dibata”.

Ope kenangkihenNa ku Surga, i bas Injil Lukas si jadi bahan renungenta maka Yesus mbuka perukuren ajar-ajarNa maka iangka ajar-ajar min kerna si tersurat i bas Pustaka si Badia, maka kiniseran Tuhan Yesus, kematenNa, kekekenNa ras kenangkihenNa ku surga enggo inubuatken ras isuratken i bas Undang-undang Musa, kitab Nabi-nabi bage pe i bas Masmur janah enggo kerina tergenepi (ay. 44). Sekali nari i jenda icidahken Tuhan Yesus lit kesinambungen, kesatuan antara PL ras PB. PB la banci berdiri sendiri tanpa PL. Lit tersurat maka Mesias si ipadanken Dibata e arus ngenanami kiniseran, janah i bas wari si peteluken arus keke IA i bas si mate nari. Bage pe berita i bas gelarNa berita kerna dosa ras jera arus ipeseh man kerina jelma, man kerina bangsa, benaken Jerusalem nari. Tapi arus itimai ajar-ajar lebe seh ipesusur Dibata kuasa Kesah si Badia si mpengasup ajar-ajar jadi saksi Tuhan.

Je nari ibabai Tuhan Yesus ajar-ajarNa ku darat kuta, seh ku kuta Betani. IangkatNa tanNA janah ipasu-pasuNa ajar-ajarNa. Asum IA masu-masu, sirang IA ras ajar-ajarNa, iangkat IA ku surga. Nembah erjimpuh kalak e man baNa, je nari meriah ukurna mulih ku Jerusalem. Gedang-gedang wari ipujina Dibata i Rumah Pertoton. Banci siidah lit perobahen i bas diri ajar-ajar, si awalna la tetap ukur, mbiar (bdk. Luk. 24:38, “Engkai maka kam mbiar, engkai maka turah ukur la tetap i bas kam?”. Joh. 20:19b, “Perbahan mbiar ia kalak Jahudi si erkuasa e maka ierukna pintun”). Adi siidah i bas Perb. Rasul 1, kenca mulih kalak enda kerina ku Jerusalem, ajar-ajar Yesus, Maria nande Yesus, diberu-diberu si nai-nai nari setia ngarak-ngarak Yesus bage senina-senina Yesus, si pulung kurang lebih 120 kalak, kerina kalak enda tutus pulung ertoto. Ope nusurna Kesah si Badia, kalak enda kerina tutus pulung ertoto, muji Tuhan ras ermeriah ukur. Paling tidak, tindaken kongkrit si banci ilakoken kita ope Pentakosta, i je kita tutus ertoto (tambahi ketutusenta), rende muji Tuhan, ula cikurak, ula mbue junggut-junggut, mandangi kalak tapi pebue ertoto ras ermeriah ukur i bas Tuhan. Gelah asum kita merayaken nusurna Kesah si Badia, lit gegeh man banta, kuasa man banta tole guna jadi saksi Tuhan. Kai si arus siberitaken kita? Berita kerna jera ras pengalemi dosa. Hidup baru, bertobat, jera ras robah i bas kegeluhenta erkiteken kekelengen Yesus. Tuhan si luar biasa perkeleng i bas kegeluhenta, uga pe mbelinna dosanta, asum kita reh alu meteruk ukur, mindo pengalemi dosa i bas Ia nari, Tuhan reh alu keleng ateNa ngalemi salah dosanta ras la nari inget-ingetna keselahenta.

Secara fisik Yesus la ras ajar-ajarNa, la nari IA ras pengikut-pengikutNa tapi Kesah si Badia, si enggo iberekenNa tetap nemani ras nampati segedang-gedang geluhta seh pendungi jaman. Joh. 16:7b, “Sabab adi la Aku lawes, labo reh Penampat e. Tapi adi Aku lawes, Kusuruh me IA ndahi kam”. Kesah si Badia si katawari paksa pe nampati ras ngapuli kalak si tek i bas erbage-bage keadaan geluhna. La nari ceda ateta, sabab Kesah si Badia si mpengasup kita ermeriah ukur. Meriahlah ukurta katawari paksa pe i bas persadanta ras Tuhan.