Khotbah GBKP Minggu Tgl. 8 Mei 2016

KHOTBAH GBKP MINGGU TGL. 8 MEI 2016

Minggu Eksaudi (Begiken Min O Yahwe)

Pdt. Larena br. Sinuhadji (Nd. Reynard Tarigan)

Invocatio : “Dage ola kam mbiar, sabab Aku kap ras kam” (Jesaya 43:5a)

Ogen : Johanes 17:20-28 (Tunggal)

Khotbah : Masmur 97:1-12 (Responsoria)

Tema : KITA IMENANGKEN ARAH PERBEBENTA

Penjelasen Bahan Pustaka Si Badia

Bagin khotbah enda e me kap kerna puji-pujin man Tuhan si ipenangkih Pemasmur, si ibere judul “Dibata kap Raja Mulia” (Alkitab TB-LAI, “Tuhan adalah Raja”). Piga-piga hal banci siidah arah Masmur enda. Si pemena lebe, e me kap Tuhan si erkuasa, si teridah arah embun dingen kegelapen. Api ernala-nala iadep-adepenNa, kilap nerangi doni. Iadep-adepen Tuhan, deleng-deleng melengas desken lilin. Tuhan si mada kuasa si ngkuasai doni enda (ay. 1-6,9). Si peduaken, ula nembah man dibata-dibata si deban, seyakaten man Dibata i bas Yesus Kristus. Erkiteken kalak si nembah man gana-gana ijuruken me (ay. 7-9). Si peteluken, respon kalak si enggo ngaloken kekelengen Tuhan arus tetap ncidahken kepatuhenna man Tuhan. Ciga ate kejahaten, mpebincar keleng ate Kristus i bas kegeluhen si tep-tep wari, meriah ukur dingen ngasup ngataken bujur man Dibata arah kai si enggo ialokenna i bas Tuhan nari.

Bahan ogenta, e me kap bagin i bas pertoton syafaat Tuhan Yesus man ajar-ajarNa. Lit dua penekanenna, si pemena gelah perpulungen  tetap membangun kiniersadan ras Tuhan. Janah si peduaken, gelah perpulungen pe banci tetap ersada ras teman-temanna si sada kiniteken. Arah kiniersadan si paguh maka tek doni enda maka Tuhan Yesus nge si nuruh ajar-ajarNa.

Pengkenaina

Minggu enda igelari Minggu Eksaudi (begiken min o Yahwe) si ipalasi i bas kitab Masmur 27:7, “O Tuhan begiken min tupung aku erlebuh man banNdu, mekuah min ateNdu dingen aloi min aku”. Adi tetap kita ernalem ras mengandalken Tuhan i bas kegeluhenta, maka la lit persoalen si la banci iatasi. Tema : “Kita imenangken arah perbebenta”. Perbebenta merupaken salah sada cara si ipake Dibata guna mendewasaken kinitekenta ras makeken kuasa si enggo ibereken Dibata man banta. Ipemenangna kita arah perbebenta, guna nuduhken kuasa Tuhan si mbelin ras la pernah gagal i bas kegeluhenta. Mungkin banci jadi erkiteken perbeben e, kote kita, tapi tetaplah kita ernalem man Tuhan. La lit alasen man banta guna tek dingen ernalem man kuasa-kuasa si deban di luar Tuhan. Bahan khotbahta enggo encidahken kerna kemahakuasaan Tuhan. Dingen kalak si ernalem man kuasa-kuasa si deban ijuruken nge. Siaminken kuasa Dibata si la ersibar gegehNa si banci nampati kita. Bahkan invocatio mpetetap ukur man banta, gelah ola mbiar sabab Dibata tetap ras kita.

Selain tetap kita ernalem nandangi kuasa Tuhan, maka arah membangun kiniersadan sada ras si debanna secara khusus kalak si tek, maka banci kita megegeh ngalaken perbeben si mberat. Kiniersadan si paguh i bas perpulungen erbahanca kuat i bas kita ngalaken perbeben e. Sabab enggo pasti i je lit saling mendoaken, saling menolong, mendengar persoalen teman janah asa bancina teman mereken solusi si terbaik. Kita imenangken arah perbebenta asum kita mengandalken Tuhan ras tetap membangun kiniersadanta kalak si tek man baNa.