PA Kategorial GBKP Tgl. 1 - 7 Mei 2016

PA MAMRE GBKP TGL. 1 - 7 MEI 2016

Nrs. Bp. Rey Tarigan

Mamre kurang menyadari potensi dirina

Ogen : Keluaren 31:1-11

Tema : MAKEKEN PENGERTIN, KEBELUHEN RAS KENGASUPEN

Tujun : Mamre Ngasup :

1) Nuriken erbage-bage talenta si ibereken Dibata man bana

2) Makeken talenta si lit guna kemajun Mamre

Metode : Nggargari potensi si lit

Penjelasen Bahan Ogen

Bahan ogenta sendah nuriken kerna perentah Dibata man Musa gelah erbahan kerina si niperluken guna Kemah Perjumpan (Kemah Suci) ingan ersembah kalak Israel man Dibata. Janah kerina si niperluken guna si e arus sue ras kerina si enggo ipedahken Dibata man Musa (ay. 11). Adi sinen secara keseluruhen benaken Kel. 25 seh ps. 31, kerina isina berkaiten ras rincian kai-kai saja si arus ibahan ras ilakoken kalak Israel i bas ibadah man Dibata. Erkiteken ibadah man Dibata e arus ilakoken alu tutus, maka kerina peralaten si nibutuhken pe arus isikapken alu tutus ras sempurna. Dibata enggo nentuken ise-ise saja si pantas i bas pengenehenen Dibata guna erbahan peralaten-peralaten ndai. Besalel, Oholiap ras tukang-tukang si deban enggo itunjuk Dibata guna si e. Si menarik i jenda e me : 1) Kesah Dibata lit i bas kalak si ndahiken dahin e. 2) Kerina kebeluhen (talenta, potensi) si lit i bas kalak si enggo ipilih Dibata e, rehna i bas Dibata nari. 3) Janah kerina potensi si lit e ipergunaken guna kemulian gelar Dibata.

Pengkenaina

Adi sinen i bas turi-turin Dibata nepa doni enda ras isina i bas Kitap Kejadin, teridah maka Dibata njadiken doni enda labo asal saja. Apaika sanga Dibata njadiken manusia. Manusia itepa Dibata alu kekhususen si berbeda i bas tinepa si debanna. Manusia ijadiken Dibata sentudu ras tempas Dibata janah lit Kesah Dibata i bas manusia (Kej. 2:7). Ertina, Dibata makeken kuasa si lit i bas DiriNa alu maksimal guna nepa doni enda ras kerina isina termasuk manusia, e maka hasilna pe tuhu-tuhu mehuli (Kej. 1:31). I bas bahan ogenta pe teridah bahwa Dibata ngarapken gelah bangsa Israel makeken kerina potensi si lit alu maksimal guna pembangunen Kemah Perjumpan gelah hasilna pe tuhu-tuhu mehuli.

Arah tema ras tujun PA Mamre sendah, iajuk kita guna menyadari erbage-bage kebeluhen, talenta, potensi si enggo ibereken Dibata man banta, janah iajuk kita guna makekenca i bas kegeluhenta si tep-tep wari bage pe guna peningkaten pelayanen i bas gerejanta, khususna Mamre.

PA PERMATA GBKP TGL. 2 - 8 MEI 2016

Nrs. Bp. Rey Tarigan

(TRANSFORMASI 1 : TRANSFORMASI POSISI)

2 Korinti 5:15-19

Gelah PERMATA GBKP :

1) Nuriken pengertin kegeluhen si mbaru

2) Nuriken kerna contoh kegeluhen si ndekah ras kegeluhen si mbaru

3) Naksiken kegeluhen si mbaru i bas Dibata (transformasi posisi)

Penjelasen Bahan Ogen

Kata “tobat” i bas Kamus Besar Bahasa Indonesia (KBBI) ertina : 1) Sadar dan menyesal akan dosa (perbuatan yang salah atau jahat) dan berniat akan memperbaiki tingkah laku dan perbuatannya; 2) Kembali kepada jalan yang benar. “Bertobat” ertina : 1) Menyesal dan berniat hendak memperbaiki perbuatan yang salah; 2) Kembali kepada Tuhan atau jalan yang benar. Adi sibadingken ras kata-kata “tobat” entah pe “pertobatan” i bas Pustaka si Badia khususna Padan si Mbaru (umumna kata si ipake i bas bahasa Yunani nari e me metanoia ras epistrephô) ertina mencakup kerina erti si lit i bas KBBI. Bedana, adi i bas Padan si Mbaru, termasuk i bas surat-surat rasul Paulus, “tobat” ras “pertobaten” la banci ipisahken ras : 1) Anugerah keselamaten i bas Kristus ras kiniteken man Kristus; 2) Pengalemi dosa ras kegeluhen si mbaru; 3) Proses si la erngadi-ngadi i bas rangka pengudusan, lit i je peran sentral Kesah si Badia. E maka alu kerangka kerna pertobaten enda, banci iangka kita kai si nimaksudken rasul Paulus i bas bahan ogenta sendah, ikatakenna i bas ay. 17, “Adi kalak ersada ras Kristus, ia me tinepa si mbaru, si male enggo lepas janah nehenlah, si mbaru enggo reh”. Pernyataan rasul Paulus enda e me kerna pertobaten. Contoh si nyata kegeluhen si mbaru enda banci siidah arah kegeluhen rasul Paulus sendiri. Lit perobahen si nyata i bas kegeluhen rasul Paulus sope ia nandai Kristus ras kenca enggo ia nandai Kristus. Tapi pertobaten si ialami rasul Paulus labo merupaken proses si instan, lit proses si idalani rasul Paulus, ras proses e labo proses si murah (bdk. Gal. 1:11-24; Fil. 2:5-7; 3:4-14). Adi ngerana kita kerna kegeluhen si mbaru i bas Kristus, la banci lang ngerana kita kerna pertobaten bagi si enggo ijelasken i datas.

Pengkenaina

PA PERMATA wari si sendah merupaken rangkaian bahan si membahas kerna transformasi. Secara khusus i bas tema ras tujun PA si sendah, iajuk PERMATA gelah ngangkai kai si nimaksudken kegeluhen si mbaru, bedana ras kegeluhen si male, janah ngasup naksiken kegeluhen si mbaru e i bas geluhna. Si pemena lebe tentu saja perlu isungkun, enggo entah lenga PERMATA ndalanken proses pertobaten i bas geluhna? Adi lenga, umpamana, tentu pengangkan kerna geluh si mbaru enda lenga lengkap amin pe iteh kita kai ertina geluh si mbaru. Mungkin perlu siorati pengalamen geluh rasul Paulus i bas pertobatenna si banci sioge i bas Perb. Rasul 9:1-9; 22:6-16; 26:12-18; Gal. 1:11-24 ras Fil. 3:4-14, gelah semakin mbages pengertin kerna kegeluhen si mbaru enda.

Arah pengalamen rasul Paulus i bas pertobatenna, teridah bahwa geluh si mbaru e me tuhu-tuhu berbalik arah 180° i bas kegeluhen si ndekah ku kegeluhen si mbaru, orientasi geluhna berubah arah, la nai berorientasi ku bas sura-sura dirina sebage manusia perdosa, tapi berorientasi ku sura-sura Kristus. Geluh si mbaru e teridah arah pengkebet geluhna ras menghasilken kerina si mehuli sue ras sura-sura Kristus. Tapi i bas si e kerina, geluh si mbaru si idalanken Paulus, merupaken proses si la erngadi-ngadi seh ku kedungen geluhna.