PA MORIA TGL. 20 - 26 MARET 2016
Pdt. Larena br. Sinuhadji (Nd. Reynard Tarigan)
Ogen : Pengerana 10:7-10
Tujun : Gelah Moria :
1) Erlajar desken nggarut
sekin seh entelap
2) Nggit erlajar arah
program pembinaan siaturken runggun gereja bage pe Moria
Metode PA : Erbahan Program
Kursus
Stephen R. Covey
menceritakan kisah inspiratif kerna sekalak penebang batang kayu si melamar
guna banci erdahin i sebuah pabrik pengolahen kayu. Akhirna ia ialoken erdahin
i je ras senang nandangi gaji si bakal ialokenna. Ia erdahin alu tutus.
Ibereken bosna gergaji man bana guna alatna erdahin ras ituduhkenna batang kayu
siapai saja si enggo banci itabahna. Wari pemena banci itabahna 18 batang. “Selamat
ya”, nina bosna, “pertahankan!”
Erkiteken termotivasi arah kata-kata bosna ndai reh
tutusna lah ia erdahin. Tapi berikutna 15 batang kayu ngenca banci tebangna.
Wari berikutna enggo ka reh menurunna 13 batang kayu ngenca. Wari lepas wari
reh sitikna batang kayu si itabaha. Kedungenna dahina bosna ras minta maaf ia
erkiteken kinerjana si semakin buruk. La ietehna kai sierbahanca ia bage.
Jenari sungkuni bosna ia, “Ndigan si terakhirna garutndu gergajindu e?” Nina, “la
lit waktuku guna nggarut gergajiku pak, me enggo tehna sibuk kel aku”.
Bagem me kira-kira kegeluhenta i bas jaman gundari enda. Seh kel
sibuka ngurusi dari A-Z seh enggo lupa “nggarut
gergajinta”. La lit salahna kita tutus erdahin bahkan memang arus tutus
erdahin, tapi dahin-dahin si penting pe (prioritas) arus siutamaken.
Perikopta mbue ngerana kerna
perbandingen kalak si pentar ras kalak si lenge. “Suruh-suruhen ngersak kuda,
tapi tuan erdalan bali ras suruh-suruhen. Kalak si ngkuruk lubang, ia jine
gedap seh ku bas”. Janah khususna ay. 10 ngatakenca, “Kune sekinndu la ntelap
tapi la igarutndu, terpaksa ka erdahin ersusah-susah. Pergunakenlah ukurndu si jore,
je nari bahan lebe rencana”. Arah perikop e jelas, maka pasti lit nge ulih arah
kai si ilakoken kita. Ras penting kita ngukurken kerna rancangen kerna
sada-sada hal si bakal silakoken kita. Ula asal menggo ras mekarus. Gelah dahinta
pedas dung dingen hasilna pe maksimal maka penting erbahan perencanaan ras
pemeteh si lit bas kita arus terus menerus i upgrade, ipelimbarui. Erlajar
segedang geluh, ras ula cepat merasa puas.
Secara khusus i bas Moria,
bahanlah pembinaan-pembinaan subuk si berkaiten ras membangun kiniteken ras keterampilen
i bas bidang-bidang si deban si banci mperlengkapi Moria (memasak, membuat kue,
sampah daur ulang, merias wajah, rsd.). Ras Tata Gereja si mbaru 2015-2025
menjelaskan maka fokus utama e me pemberdayaan warga gereja gelah banci jadi
pelaku utama (subyek) i bas melaksanaken misi GBKP. Fokus utama gereja jemaat
si arus terus-menerus iperlengkapi ras iberdayaken. E maka salah sada hal si
banci nampati ope ngelakoken program e me erbahan perencanaan, salah sadana e
me alu erbahan PME (Program, Monitoring, ras Evaluasi).
PA MAMRE TGL. 20 - 26 MARET 2016
Nrs. Bp. Rey Tarigan
Panggilan, Komitmen (Tugas Pengurus)
Ogen : 2 Raja-raja 23:24-25
Tema : Setia I Bas Keputusen
Tujun : Mamre :
1) Erlajar arah kesetian Raja
Josia i bas ndalani kepengurusen Mamre
2) Tetap setia i bas ndalani
program-program Mamre
Metode : Membuat Komitmen
Bahan ogenta (Ps.
23:1-30) nuriken kerna reformasi si ilakoken Raja Josia (Josia ertina : Tuhan
menopang). Josia e me raja si pe-15-ken Kerajan Juda kenca Kerajaan Israel
terbagi dua jadi Kerajaan Israel ras Kerajaan Juda. Kerna kai-kai saja
perobahen si enggo ilakoken Raja Josia enda enggo cukup jelas penjelasen i bas
Buku PA Mamrenta. Si jadi penekanen i bas bimbingen enda guna nambahi si enggo
lit i bas Buku PA Mamrenta e me, reformasi entah pe perobahen si tuhu-tuhu si
ilakoken Raja Josia i tengah-tengah Kerajan Juda ibenaken alu perobahen si
tuhu-tuhu i bas dirina sendiri. I bas Ps. 22:2 memang je ituriken bahwasana
Raja Josia e me raja si “Ngelakoken kai si ngena ate TUHAN; iikutkenna usihen
si mehuli si ibahan ninina Raja Daud, dingen sitik pe ia la nimpang i bas
kerina Undang-undang Dibata nari”. Lit perbedaan terjemahen adi sibandingken
ras Alkitab bahasa Indonesia Terjemahan Baru (TB - LAI), je ikataken: “Ia
melakukan apa yang benar di mata TUHAN dan hidup sama seperti Daud, bapa
leluhurnya, dan tidak menyimpang ke kanan atau ke kiri”. I bas Alkitab TB - LAI
la lit je ikataken “Undang-undang Dibata nari”. Mungkin e maksudna kai si ngena
ate Dibata bagi si nilakoken Raja Daud, labo Undang-undang Tuhan i bas bentuk
kitap. Ertina banci ikataken bahwasana kiniulin si ilakoken Raja Josia, sope ia
megiken ras ngoge Kata Dibata secara langsung, e erkiteken ia ngusih kai si
benar bagi si ilakoken Raja Daud arah turi-turin kalak kerna Raja Daud, labo
erkiteken ia ngoge Kata Dibata secara langsung.
Titik krusial
perobahen i bas Raja Josia enda lit i bas ps. 22:11, je ikataken “Kenca ibegi
raja isi kitap e icaingkenna uisna perban biarna”. I bas bahasa Indonesia : “Segera
sesudah raja mendengar perkataan kitab Taurat itu, dikoyakkannyalah pakaiannya”.
Icaingkenna uisna e sebage simbolisasi pertobaten, si e terjadi kenca enggo
ibegi isi kitap e, ertina perobahen si tuhu-tuhu terjadi kenca Kata Dibata seh
man Raja Josia. Kenca enggo 57 tahun (Raja Manase 55 tahun & Raja Amon 2
tahun, duana raja si jahat i lebe-lebe Dibata - 2 Raj. 21) ndekahna bangsa
Israel la pernah idahna ras la pernah iogena kitap Undang-undang (Taurat), i
bas pemerentahen Raja Josia enda mulihi kitap Undang-undang e iogeken, ibegiken
ras ijadiken palas. Banci ikataken perobahen si tuhu-tuhu (pertobatan) banci
terjadi labo erpalasken kai nina kalak kerna Kata Dibata tapi alu tuhu-tuhu
ngoge ras mempelajari Kata Dibata secara pribadi.
Bahan ogenta khususna
ay. 25 je ikataken “La enggo pernah lit sekalak raja pe bagi Raja Josia
tutusna, nembah TUHAN asa atena, asa ukurna ras asa gegehna ngikutken kerina
Undang-undang Musa. Kenca ia pe lanai enggo pernah lit raja si bagi ia e
patuhna”. I bas Alkitab TB - LAI lebih jelas ikataken : “Sebelum dia tidak ada
raja seperti dia yang berbalik kepada TUHAN dengan segenap hatinya, dengan
segenap jiwanya dan dengan segenap kekuatannya, sesuai dengan segala Taurat
Musa; dan sesudah dia tidak ada bangkit lagi yang seperti dia”. I bas Alkitab
TB - LAI jelas je ikataken kerna perobahen si tuhu-tuhu (jera - bertobat) Raja
Josia, “berbalik kepada TUHAN dengan segenap hatinya, dengan segenap
jiwanya dan dengan segenap kekuatannya”. Em kuncina makana kenca terjadi
perobahen si tuhu-tuhu i bas diri Raja Josia erpalasken Kata Dibata, melala
perobahen si banci ilakokenna i tengah-tengah Kerajan Juda.
Payo nge Mamre,
khusuna Pengurusna, enggo tuhu-tuhu ngoge ras mpelajari Kata Dibata secara
pribadi ras secara teratur? Ngoge ras erlajar secara pribadi tentuna berbeda
ras megi-megi kai nina kalak kerna Kata Dibata, amin megi-megi e pe penting. Adi
lit denga kita si la pernah ngoge ras mpelajari Kata Dibata secara pribadi maka
e perlu siperobahi, sebab bahan ogenta sendah nuriken bahwa perobahen si
tuhu-tuhu terjadi kenca enggo idatken mulihi kitap Undang-undang e. Ertina Kata
Dibata erkuasa guna mperobahi Raja Josia si sedekah e iakapna enggo tutus ia
nggeluh er-Dibata, tapi la erpalasken Kata Dibata. Tapi kenca enggo ibegina
secara langsung Kata Dibata e makana ia tuhu-tuhu berobah. Reformasi Luther ras
Calvin pe terjadi erkiteken Kata Dibata mulihi ijadiken palas si sedekah e Kata
Dibata e ibuniken ras igantiken alu aturen-aturen si sifatna guna kepentingen
pribadi penguasa gereja paksa si e. Kenca enggo igali Luther ras Calvin mulihi
Kata Dibata, kitap-kitap e kerina iterjemahken ku bahasa lokal, menjadi milik
pribadi kerina jemaat, makana terjadi Reformasi Gereja i bas abad 16.
Adi geluhta enggo
tuhu-tuhu berobah erpalasken ketutusenta ngoge ras erlajar kerna Kata Dibata
secara pribadi maka enggo pasti kai pe dahin pelayanen si ipercayaken Dibata
man banta ertanggung jawab kita guna ndungisa ras setia kita seh ku ujungna kai
pe tantangan si ihadapi kita.
Tidak ada komentar:
Posting Komentar