Khotbah GBKP Minggu 27 Maret 2016

KHOTBAH MINGGU 27 MARET 2016

PASKAH I

Pdt. Larena br. Sinuhadji (Nd. Reynard Tarigan)

Invocatio : “Dibata enggo mpekeke Tuhan i bas si mate nari, janah kita pe enggo ipekekeNa nge pagi alu kuasaNa” (1 Korinti 6:14)

Ogen : Lukas 21:1-12 (Tunggal)

Khotbah : Masmur 118:1-2, 14-28 (Tunggal)

Tema : KuasaNa erbahanca megegeh dingen paguh

Cataten : bahan ogenta sendah la akap kami pas isina ras Paskah, mungkin si pas e me Lukas 24:1-12 si isina kerna kekeken Yesus Kristus.

Masmur 118 si ibere judul “Pertoton pengataken bujur erkiteken kemenangen” (TB - LAI “Nyanyian Puji-pujian”) e me kap kerna seruan Pemasmur gelah umat Tuhan ngataken bujur man Tuhan erkiteken kiniulin si enggo ibahan Tuhan. Biasana Masmur enda iendeken asum perayaan Paskah kalak Jahudi ras wari raya Pondok Daun. Kekelengen Tuhan si la lit batas-batasna, si erpeltep-peltep, rasa lalap seh rasa lalap. Kiniulin ras kekelengen Tuhan teridah jelas i bas ay. 14-17:

• Tuhan si enggo mulahi umatNa i bas erbage-bage perbeben dingen aminna pe mberat si man alanken tetap megegeh ras paguh.
• Kuasa Tuhan si erbahanca umatNa menang i bas peperangen. Padahal jelas kel labo lit kehebaten ras kinimbisan bangsa Israel ibanding bangsa-bangsa si deban (Mesir, Asyur, Babel, subuk tentera ras gereta perangNa. Tapi igejapina kuasa Tuhan si enggo naluken musuh-musuh bangsa Israel.)
• I bas keselahen si ibahan bangsa Israel, penghukumen Tuhan labo erbahanca mate umatNa, tapi gelah sadar dingen bertobat, mulihken ku Tuhan (“Tuhu mberat aku iukum Tuhan, tapi la ipelepasNa aku mate”).

Kekelengen ras kiniulin si enggo igejapken bangsa Israel mabai bangsa enda tetap ersembah ras ngataken bujur man Tuhan. Tuhu mehuli Tuhan, i ja idengkehken Tuhan pingko-pingko bangsaNa i bas mindo penampat man Tuhan (ay. 21). E maka bengket bangsaNa ku Rumah Tuhan si badia lako secara khusus ngataken bujur dingen ermengkah ukur i bas kemenangen si enggo ibereken Tuhan. Jelas, maka bangsa Israel nggejapkenca kemenangen si ialamina erkiteken Tuhan, labo iakapna gegeh ras kengasupenna jine tapi semata erkiteken Tuhan. Ay. 24, “Enda me wari kemenangen Tuhan, marilah sirayaken alu meriah ukur”.

Lukas 24:1-12 e me perikop kerna kekeken Yesus Kristus i bas si mate nari (Mat. 28:1-10, Mark. 16:1-8, Joh. 20:1-10). Kerina kitab Injil nuratken kerna kekeken Yesus Kristus sebab berita kekeken Yesus merupaken pokok sentral kiniteken pengikut Kristus. Erpagi-pagi si lampas i bas wari Minggu e, berkat diberu-diberu (Maria Magdalena, Johana, ras Maria nande Jakub) ku kuburen. Atena jiarah ku kuburen Tuhan Yesus. Tapi idapetina batu si nutupi lubang kuburen e enggo talang. Bengket kalak enda ku bas tapi la lit nari idahna mait Yesus i je. Asum kalak enda sangana kemamangen rempet tedis dua kalak dilaki uisna terang ersinalsa. Tuhu mbiar diberu-diberu e, e maka nembah mungkuk ia seh ku taneh. Ras nina si dua kalak ndai, “Engkai maka idaramindu Kalak si nggeluh i tengah-tengah kalak si enggo mate? Ia la nai i jenda; Ia enggo ipekeke. Ingetlah kai si enggo ikatakenNa man bandu asum Ia i Galilea denga, e me, Anak Manusia si isuruh Dibata la banci lang iendesken man kalak perdosa, ipakuken ku kayu persilang janah i bas wari peteluken nggeluh mulihi”. Kai si ikataken Malekat Tuhan merupaken perkataan si rusur ibelasken Yesus man ajar-ajarNa (bdk. Mat. 16:21; 17:22-23). E maka maka inget diberu-diberu e kai si enggo ikataken Tuhan Yesus.

Kenca si e mulih diberu-diberu e bas kuburen nari ras iturikenna kejadin enda man ajar-ajarna si sepuluh sada kalak bage pe man ajar-ajar si deban. Tapi ajar-ajar la tek akapna kai siikataken diberu-diberu e guak saja. Tapi Simon Petrus ajar-ajar Tuhan Yesus si enggo mersoken ia sekaligus si sangat ekspresif minter kiam ku kuburen ras payo memang idahna uis mbentar balut mait e nari ngenca la lit nari si deban. Alu kemamangen Petrus mulih ku rumah.

Kristus enggo keke janah kekekenNa palas kinitekenta (bdk. 1 Kor. 15:14, “Janah adi Kristus la ipekeke Dibata i bas si mate nari, sia-sia me berita si isehken kami, janah sia-sia pe kinitekenndu”. 1 Kor. 15:17, “Janah adi la kin ipekeke Dibata e Kristus i bas si mate nari, sia-sia me kinitekenndu e janah kam tetap denga i bas dosandu”). Invocatio ngatakenca, “Dibata enggo mpekeke Tuhan i bas si mate nari janah kita pe enggo ipekekeNa nge pagi alu kuasaNa”. Kuasa Dibata si mpekeke Yesus Kristus anakNa si tonggal, dingen kuasa Tuhan ka si mpengasup kita ngalaken erbage-bage perbeben dingen sialami kemenangen.