Bimbingen PJJ Tgl. 6 - 12 Maret 2016

BIMBINGEN PJJ TGL. 6 - 12 MARET 2016

Pdt. Larena br. Sinuhadji (Nd. Rey Tarigan)

Tema : Ersada Arih Guna Muat Si Mehuli (Galati 2:1-10)

Penjelasen Bahan Ogen & Perenungen

Perpulungen-perpulungen i Galati e me rasul Paulus si mantekisa amin pe la lit informasi si jelas ndigan tepatna ia manteki piga-piga perpulungen i wilayah Galati e. Kemungkinen sanga rasul Paulus ras Barnabas reh ku Likaonia (Perb. Rasul 14:6-7) je ipantekina perpulungen i wilayah Galati, sebab Likaonia e me sada kuta si lit i bas wilayah Galati (Alkitab LAI Edisi Studi, 2010, hlm. 1806). Tapi si penting e me, perpulungen Galati ipanteki rasul Paulus sope Sidang i Jerusalem (Perb. Rasul 15), sebab i bas sidang e nge kerasulen ras pelayanen Paulus iakui rasul-rasul si deban, khususna berkaiten ras penjelasen rasul Paulus i bas ogenta sendah.

Bahan ogenta sendah merupaken kelanjuten penjelasen rasul Paulus i bas pasal 1 nari, i je ituriken Paulus kerna tangtana nari ia jadi pengikut Yesus Kristus seh ku legalitas dirina sebage rasul, sebab lit pihak-pihak tertentu si la senang rasul Paulus meritaken Berita si Meriah ku kalangan kalak Junani ras mempertanyaken status kerasulenna (rasul e me gelar si ibereken man 12 ajar-ajar si kin langsung iajari Tuhan Yesus), secara khusus status kerasulen Paulus i tengah-tengah perpulungen-perpulungen i wilayah Galati si enggo leben ipantekina. E maka ay. 1 i bas ogenta merupaken penegasen rasul Paulus bahwa kenca 14 tahun pelayanenna je makana kerasulen Paulus ras pelayananenna nandangi bangsa-bangsa si labo Jahudi iakui i bas Sidang i Jerusalem.

Situasi si terjadi i tengah-tengah perpulungen-perpulungen i Galati teridah secara tersirat i bas ay. 4. Je ituriken Paulus kerna pendahin pihak-pihak tertentu si atena memaksaken sunat i bas tradisi Jahudi nari ku bangsa-bangsa si deban si labo Jahudi. Pengajaren si la benar enda tentu saja itentang rasul Paulus, sebab sunat e labo menyelamatken. Pengajaren si la benar enda enggo mempengaruhi perpulungen-perpulungen i Galati, makana I bas ps. 1:6 isungkun rasul Paulus perpulungen e uga makana murah kel tepengaruh pengajaren-pengajaren si la benar.

Si jadi fokus perenungen i bas PJJ-nta sendah e me i bas ay. 9, i je ituriken Paulus kerna kiniersadaan arih para pemimpin i Jerusalem (Jakup, Petrus, ras Johanes) ras dirina bage pe Barnabas guna radu ras melayani, pembarken Berita si Meriah ku segala bangsa labo saja man bangsa Jahudi. Je enggo iaturken bagin tugas-tugas pelayanen masing-masing, rasul Paulus ras Barnabas enggo itetapken guna melayani ku tengah-tengah bangsa si labo Jahudi. Em si tersurat, si tersirat i bas pernyataan rasul Paulus enda, kerina rasul-rasul pe enggo mengakui bahwasana keselamaten e labo itentuken arah dalanken entah pe la dalanken tradisi Jahudi khususna syarat sunat ndai. Keselamaten e itentuken arah kiniteken nandangi anugerah keselamaten i bas Yesus Kristus (Gal. 2:16).

Kiniersadaan arih, entah pe ersada arih guna muat si mehuli, labo hal si murah guna ngewujudkenca. Sebab tangtangna rasul-rasul pe si kin secara langsung ngaloken pengajaren arah Yesus Kristus nari, lenga banci mpulahi dirina i bas keterikatenna man tradisi Jahudi, sementara Berita si Meriah e arus siberitaken man kerina bangsa si labo Jahudi. Tapi i jenda teridah bahwa rasul-rasul banci mpeteruk dirina i teruh kuasa Kesah si Badia seh maka teralokenna bahwa tradisi-tradisi Jahudi e labo prasyarat mutlak guna ndatken keselamaten i bas Yesus Kristus. Kiniteruken ukur enda isimbolken rasul Paulus i bas ay. 9 ogenta sendah alu “berjabat tangan sebagai tanda persekutuan” (terj. Alkitab Terjemahan Baru, TB-LAI), i bas Alkitab Bahasa Indonesia Sehari-hari (BIS) ikataken, “berjabat tangan sebagai tanda persahabatan”, i bas Pustaka si Badia je lebih proaktif bahasana, “minter isalamina aku ras Barnabas. Selaku teman si sada dahin”. Engkai maka lebih proaktif bahasana? Erkiteken je teridah pengakuan si tulus i bas rasul-rasul si deban nari bahwa kai si enggo idahiken Paulus ras Barnabas e si benar, e maka minter isalamina Paulus ras Barnabas.

Jadi kai saja si banci sirenungken i bas PJJ-nta sendah? Ersada arih guna muat si mehuli membutuhken piga-piga hal si penting e me:

1) Peraten Dibata ijadiken sebage pedoman i bas ersada arih guna muat si mehuli, sebab lit deba labo peraten Dibata si jadi pedoman guna ersada arih, tapi kepentingen-kepentingen sepihak kelompok entah pe pribadi tertentu.

2) Kiniteruken ukur i bas kuasa Kesah si Badia. Engkai maka hal enda penting? Sebab memang pada umumna perukurenta saja si iandalken kita i bas ersada arih guna muat si mehuli, lupa kita bahwa je lit Kesah si Badia si membimbing kita. Jadi i jenda ibutuhken kesadaren ras pengakun i bas dirinta bahwa Kesah si Badia e lit i bas dirinta. Adi Kesah si Badia enggo ngatakenca bas pusuh perukurenta bahwa pendapat kita e la benar entah pe la sue ras peraten Dibata, umpamana, maka bagi rasul-rasul ndai, minter kita meteruk ukur ngakukenca bahwasana pendapat si deban si benar, e maka siikutken pendapat si benar e, umpamana. Sebab i bas kinatana melala usur terjadi, enggo pe siteh bahwa pendapatta salah pe, tetap denga kita berkeras maksakenca kai si jadi peratenta. I bas si sada enda perlu kita mindo pergegeh arah Kesah si Badia nari, sebab terkadang, pendapatta si salah e ihubung-hubungken ras harga dirinta, padahal si tuhuna labo enda soal harga diri ras la lit pe kaitenna ras ise si menang entah pe ise si talu, umpamana. Sebab dahinta i bas gerejanta e me dahin Dibata, kita hanya perpanjangan tan guna mewujudken kai si ngena ate Dibata.

Bahan PJJ-nta sendah salah sadana berkaiten ras Musyawarah Ngawan si mungkin lenga ilakoken i bas runggunta masing-masing, guna si e makana perlu kita mpersiapken dirinta gelah Musyawarah Ngawanta tuhu-tuhu ipergunaken guna ersada arih muat si mehuli ndahiken dahin Dibata.