Bimbingen Khotbah Minggu 13 Maret 2016

BIMBINGEN KHOTBAH MINGGU 13 MARET 2016

Pdt. Larena br. Sinuhadji (Nd. Reynard Tarigan)

Invocatio : “Adi melala buahndu, kam me ajar-ajarKu, janah i bas si e ermulia me Bapangku” (Johanes 15:8)

Ogen : Johanes 12:1-8 (Tunggal)

Khotbah : Jesaya 43:16-21 (Tunggal)

Tema : IPILIH GUNA MPERMULIAKEN TUHAN

Penjelasen Bahan Pustaka Si Badia

I bas ogen jelas ituriken kerna perbahanen sekalak diberu si tuhu-tuhu mpermuliaken Yesus. Peristiwa e terjadi i Betani, kuta i ja Tuhan Yesus mpekeke Lasarus i bas si mate nari, turang Marta ras Maria (Bdk. Joh. 11:38-44). Janah kejadinna enam wari ope Wari Raya Paskah kalak Jahudi (Kebebasen kalak Israel i bas Mesir nari). Marta turang Lasarus alu talentana kuskas nikapken pangan guna ielakenna man Yesus ras temue si deban. Lasarus kundul ras Yesus. La ndekahsa reh Maria, ibabana sada botol galang minak si merim si meherga (Alkitab TB-LAI, “Setengah kati minyak narwastu murni yang mahal harganya”). Icucurkenna ku nahe Yesus, je nari isapuina alu bukna (bdk. Mar. 14, “Ipecahkenna botol minak e”). E maka merim kerina i bas rumah e. Bayangkenlah, biasana adi lit minak wanginta si meherga, pasti sitik-sitik ngenca sipake. Enda la tanggung-tanggung kai si ilakoken Maria, icucurkenna ku nahe Yesus ras isapuina alu bukna (buk e me lambang mahkota diberu si meherga, janah posisina i datas). Ertina, kai si ilakoken Maria, tuhu-tuhu si terbaik, maksimal bahkan tuhu-tuhu sangat maksimal. Kepeken mehuli pe perbahanenta, lit ka kalak si rate cian ras la senang. Sekalak ajar-ajar Yesus si tergelar Judas Iskariot (si ndayaken Yesus), mandangi kai si enggo ibahan Maria. “Engkai maka la idayaken saja minak e telu ratus duit pirak je nari duitna e ibereken man kalak musil?” Jelas teks sendiri ngatakenca, labo erkiteken peduli ras empati Judas man kalak musil tapi perbahan ia nge njemak perduiten i bas kelompok ajar-ajar, janah megati ipakena ras itangkona sen e. Tapi Yesus alu tegas ngatakenca gelah ula Judas nuhsasi diberu enda. Sabab labo sen Judas nge si ipakena, sen Maria sendiri. Ras Maria enggo mereken si terbaik, i ja ibahanna persiapenna guna kematen ras penguburen Yesus. Kesempaten tupung Yesus i tengah-tengah doni er-limit ras enggo ngelakoken si terbaik, sedangken kalak musil tetap nge lit i sekelewetta si kin arus setiap saat ipeduliken ras sisampati. Bagem siidah uga sekalak diberu tuhu-tuhu mpermuliakan Yesus sabab igejapina perkuah ate Tuhan i ja enggo mpekeke turangna, Lasarus.

Bahan khotbahta, ngerana kerna berita pengharapen i bas Tuhan nari arah nabiNa maka tetap min bangsa Israel ernalem man Tuhan aminna pe bas taneh pembuangen Babil nari, sabab janji Tuhan pasti, maka i bas waktuna pagin ibebasken Tuhan nge bangsa e. I bas renungenta si ibere judul “Pulah i Babil nari” (i bas Alkitab TB-LAI la lit judul baru), maka Tuhan mpersingeti kerna kuasa ras penampat Tuhan nandangi bangsa Israel tupung ibebasken Tuhan bangsa Israel i bas Mesir nari, i ja banci erdalan bangsaNa i tengah lawit Merah (ibahan Tuhan pasar arah tengah lawit), sedangken gereta perang ras tentera kalak Mesir amparen kerina. Tapi Tuhan sendiri ngatakenca, “Ola nari inget-inget kai si enggo ndekah jadi, la pedah ipegedang kerna kejadin si nai-nai”. Luar biasa, Tuhan sendiri la pernah ngonggar-ngonggar perbahanenna si mehuli man umatna. Sedangken manusia, sitik saja enggo penampatna man kalak minter terus iingetna ras banci jadi ionggar-onggarna dikenca si enggo sampatina la bagi ukurna. Ertina, penampatna e labo tulus tapi lit motivasi si deban. Ras ate Tuhan tetap erbahan si mehuli nandangi bangsaNa, si nandangi ibahan Tuhan ras situhuna genduari pe enggo mulai jadi, si arus kin banci kita ngidahsa ras nggejapkennca salu mata kinitekenta. Si la mungkin pe banci ibahan Tuhan, sabab la lit si metahat i bas Tuhan. I bahan Tuhan pasar arah gurun pasir janah lau mbelin maler i je. Arah perbahanen Tuhan e, maka rubia-rubia si meliar, biang kerangen, perik unta mpehageken Tuhan sabab labo hanya manusia si ndatken kemalemen ate termasuk rubia-rubia pe. Janah enggo pasti manusia, bangsa Tuhan sendiri pe arus nggejapken perkuah ate Tuhan ras tetap ngendeken puji-puji man Tuhan. Sabab umat Tuhan enggo itepa Tuhan guna Tuhan, guna mpermuliaken Tuhan.

Pengkenaina

Johanes Calvin ngakenca maka kegeluhenta selaku kalak si enggo itepa ras iselamatken Tuhan e me kap mpermuliaken Tuhan i bas kerina dampar geluhta (Soli Deo Gloria). Rikutken bahan khotbah, maka jelas Tuhan sendiri ngatakenca kita itepa guna Tuhan guna mpermuliken Tuhan. Bage pe i bas bahan ogenta, uga Marta melayani Tuhan arah talentana, kebeluhen si lit bas ia. Minter ia kuskas guna ngelai Yesus ras ajar-ajarNa arah mpersiapken pangan si bakal ielaken. Ras Maria luar biasa ia mpehaga ras mpermuliaken Tuhan Yesus. La nari iukurkenna soal untung rugi, tuhu-tuhu la ia ertaktak kai si ilakokenna man Tuhan. Erga minak si merin ndai adi idayaken 300 dinar (1 mina = 100 dinar adalah upah buruh 100 hari). Adi 300 dinar berarti upah buruh 300 hari kerja, kurang lebih setahun. Bagem kekelengn Maria man Tuhan Yesus la nari ia ertaktak, la nari ipikirkenna soal kerugian sabab enggo seh penggejapenna ku bas si terbaik atena iberekenna man Yesus.

Uga kita? Enggo pasti selaku kalak si enggo iselamatken Tuhan dingen ipelihara Tuhan wari lepas wari kegeluhenta e me kap kegeluhen si memuji, dingen mpermuliaken Tuhan arah perukurenta, pengerananta bege pe sikap geluhta. Ula nari min lit waktu si terbuang guna la sipakeken i bas mpermuliaken Tuhan. Setiap saat ras waktu ateta mpermuliken Tuhan, labo hanya arah kata-kata pujian, penyemben ras rende tapi terlebih arah pengkebet geluhta (Mat. 5:16, “Dage, ersinalsal lah min terangndu i lebe-lebe kalak si nterem gelah adi idahna perbahanenndu si mehuli, ipujina Dibata, Bapandu si i Surga”). Bahkan i bas invocationta nina Tuhan Yesus, “Adi melala buahndu, kam me ajar-ajarKu, janah i bas si e ermulia me Bapangku” (Joh. 15:8). Tentuna buah si meramis, si ntebu si lit bas kegeluhenta, subuk arah kekelengen, kebujuren, integritas, rsd., si ilakoken kita.