Bimbingen Pekan Penatalayanan GBKP 2016

SUPLEMEN BIMBINGEN

PEKAN PENATALAYANAN GBKP 2016

Tema Umum : “ARON DIBATA SI ERKOMITMEN” (1 Kor. 3:9; 1 Pet. 2:9-10)

(Pdt. Larena br. Sinuhadji)

WARI PEMENA

Invocatio : “Tetapi kamulah bangsa yang terpilih, imamat yang rajani, bangsa yang kudus, umat kepunyaan Allah sendiri, supaya kamu memberitakan perbuatan-perbuatan yang besar dari Dia, yang telah memanggil kamu keluar dari kegelapan kepada terang-Nya yang ajaib” (1 Petrus 2:9)

Ogen : Pilipi 2:1-4

Renungen : Epesus 4:1-7

Tema : KITA KAP ARON DIBATA

Penjelasen Bahan Pustaka Si Badia

Bahan renungenta merupaken surat penggembalaan Paulus si ituliskenna i bas penjara nari man perpulungen Epesus gelah tetap perpulungen nggeluh bagi si ngena ate Dibata bagi tantangna perpulungen tek man Kristus. Bagem siidah paguhna kiniteken Paulus ras ketedehen ateNa maka perpulungen tetap nggeluh bagi si ngena ate Dibata (hidup sesuai panggilan Tuhan).

Situasi paksa si e melala anggota si mbaru denga masuk jadi perpulungen kalak si tek, si reh i bas erbage-bage latar belakang. Tentu adi la ikelola alu mehuli kinierbagen banci erbahanca turah pengkotak-kotakan ras konflik i bas perpulungen. E maka i jenda ipindoken Paulus  maka perpulungen nggeluh i bas keleng ate ras ersada ras Kristus. Janah dasar i bas banci njagai kiniersadan e nginget maka kita si enggo ipersadaken Dibata e, “sada kula, sada ngenca Kesah, idilo ku bas sada pengarapen, sada Tuhan, sada kiniteken, sada peridin, sada ngenca Dibata, e me Bapa kerinana”. Persadan e me buah pendahin Kesah si Badia si ibenaken i bas wari Pentakosta, i ja enterem kalak pulung i Jerusalem si reh i bas erbage-bage daerah nari tapi banci ersada ras siangkan sada ras si debanna. Kiniersadaan e, si erbahanca kita sehati, sepikir, sada penggejapen. Sada pengarapenta, e me kegeluhen si enggo ipadanken Dibata, i bas kerehen Tuhan Yesus si peduakaliken. Sada Tuhan e me si mada kegeluhenta dingen si ngaturken kegeluhenta. La lit tuhan si deban si isembah perpulungen e. Kiniersadan enda me si arus ijaga ras ipelihara perpulungen. Janah biak kalak si enggo ersada ras Dibata e me arus :

• Meteruk ukur, maka tuhu-tuhu igejapina si lit bas ia rehna i bas Dibata nari seh makana banci ia ngergai kalak si deban sekali pe ndauh hebaten ia asangken temanna ndai.
• Lemah lembut, labo kasar pengerana ras perbahanenna. Iukurkenna lebe ope ia erbelas ras bertindak si tujunna guna kiniulin man kalak si deban. Adi bas bimbingen ikataken, “sanga merawa pe ia la melukai, janah sangana irawai pe la ia murah terluka”.
• Saber, megenggeng.
• La murah pergelut, erkiteken kekelengen si lit i bas kita.

Janah setiap kita enggo ibereken Dibata talenta si pelain-lain i ja rikutken kengasupenta ibereken Dibata alu perkuah ateNa (ay. 7). Janah kengasupen si pelain-lain e me si arus ikelola alu mehuli guna banci membangun ras memajuken gerejaNa sekaligus kehadiren gereja jadi berkat man isi doni enda.

Bage pe i bas ogen si pemena kerna surat Paulus man perpulungen Pilipi sekali nari itekankenna uga pentingna kiniersadan ras Tuhan bage pe perpulungen. Yesus Kristus arus jadi usihen. Kuncina lebe perpulungen arus rembak ras Tuhan gelah KesahNa si Badia si tetap ngajari perpulungen kerna kai si arus idalanken i bas kegeluhen e. Desken koneksi internet, banci kita tersambung sada ras si debanna alu FB, email, LINE, rsd., adi lit saluren internet si banci mpersada kita sada ras si debanna. Bagem banci kita ersada dingen nggeluh sikeleng-kelengen sada ras si debanna, alu lebe kita ersada ras Tuhan. Alu bage biak Kristus nggeluh (mengalir) bas kita: ersada arih, sikeleng-kelengen, meteruk ukur, rsd. Janah virus-virus si erbahanca terjadi perpecahen: egois, merangap, mengajang ukur, ulin siakap kita asangken kalak si deban, rsd., arus sipedauh i bas kita nari.

Aplikasi

Tema: “Kita kap Aron Dibata”, janah tema enda pe menjadi tema umum i bas Pekan Penatalayanen tahun enda. Meriah ukurta sebab ibereken Dibata sada tanggung jawab guna banci kita ras Ia erdahin i bas peken anggurNa. Bekerjasama ras Tuhan, bekerjasama ras sapih-sapih kita pengikut Kristus guna banci kita jadi pasu-pasu man isi doni enda.

Kuncina lebe kita sebagai pengikut Kristus arus tetap membangun kiniersadanta ras Tuhan. Sabab adi kita di luar Tuhan la banci kita erbahan kai pe (bdk. Joh. 15:5). Ersada kita ras teman-temanta sada kiniteken (i tengah keluarga, sesama serayan, serayan ras perpulungen, sesama perpulungen, ersada ras teman-temanta sada kiniteken si berbeda denominasi), gelah banci ka kita jadi berkat man kalak si deban. Tapi melala kita, sesama serayan sendiri pe la banci nggeluh ersada alu mehuli. Erkiteken perbedaan pendapat, persoalan si turah piah dungna terus berlarut-larut, turah akar pahit, dendam. Enggo pasti kita pe la banci jadi saksi si mehuli man perpulungen bage pe man kalak si deban.

WARI PEDUAKEN

Invocatio : “Kalak si megombang dingen meganjang rukur, nggit mandangi dingen jago akapna bana” (Kuan-kuanen 21-24)

Ogen : Jesaya 1:21-23

Renungen : Ketangkasen 2:1-7

Tema : LA NAI ATENDU KELENG BAGI SI GEL-GEL

Penjelasen Bahan Pustaka Si Badia

Kota Epesus e me kota si sangat terkenal i bas propinsi jajahan Roma i Asia; kota pelabuhan si sangat sibuk alu perdagangen (bisnis) ras pusat pemujaan Dewi Artemis (Perb. Rasul 19:27,35), bage pe melala i je ingan perdukunen. Banci kataken rikutken kondisi ras situasi daerah si melala tantangenna erbahanca la berkembang Kekristenan, tapi sebalikna i kota Epesus nge perpulungen kalak Kristen si mbelinna i bas kerina jajahen Roma.

I bas pengenehen Johanes, lit pujian i bas Dibata nari entah pe hal-hal positif si enggo idalanken perpulungen enda, e me kap:

• Jemaat si pekerja keras, semangat (“Kueteh kai si enggo idahikenndu, kueteh kuga latihna iakapndu erdahin. Bhs. Ind.: “Aku tahu segala pekerjaanmu, baik jerih payahmu maupun ketekunanmu”). Tuhan senang kepada jemaat yang dinamis, giat, aktif dan pekerja keras, bukan jemaat yang beku dan suam-suam kuku.
• Jemaat si kritis dingen pang menolak ajaren-ajaren si la sehat bage pe guru-guru palsu. Perpulungen Epesus ipujiken erkiteken serius dengan imannya. Komitmen penuh ras kemurnian ajaren, e maka perpulungen enda kritis nandangi pengajaren-pengajaren si menyimpang i bas kebenaren Kata Dibata. Pengangkan si payo kerna Kata Dibata e nge si erbahanca ngasup dingen pang perpulungen e menolak segala pengajaren si la benar dingen “menelanjangi” kalak si mengaku dirina rasul si labo situhuna rasul.
• Perpulungen Epesus enda pe megenggeng dingen la surut erkiniteken amin mbue tantangen si man alankenna erkiteken kinitekenna man Kristus (sabar dan tahan menderita).

Tapi lit si man pandangen perpulungen enda, enda nuduhkenca maka la lit manusia si sempurna. Maka  enggo urak kekelengen perpulungen e man Tuhan termasuk man sesama manusia (“La nai atendu keleng Aku bagi tantangna nai”). Ertina, perpulungen la banci konsisten njagai kiniteken ras kekelengenna man Tuhan erkiteken erbage-bage tantangen si man hadapen. Enggo ndauh perpulungen e ndabuh ku bas dosa. E maka ipindoken Tuhan gelah perpulungen enda jera ras berubah, dingen ngelakoken bagi si ilakoken tangtangna nai. Sabab adi la jera, iukum Tuhan perpulungen e.

I bas pengogen si pemena pe jelas kerna perubahen i bas kalak Israel, si la banci njagai kesetian kinitekenna rikut ras perbahenna. Kuta si nai patuh genduari bagi diberu si perlua-lua, ertina la nari lit kesetiaanna. Nai kuta e dem alu kalak bujur, tapi gundari kalak pemunuh ringan i je. Nai kam bagi pirak tapi gundari la lit ergandu. Nai bagi anggur si mehuli, genduari lau nari ngenca. Pemimpin-pemimpin enggo berubah, la nari nggeluh alu berintegritas: pemberontak, erteman ras pinangko, kerina ngaloken sogok, rangap nandangi pemere kalak. La ibelana anak melumang ras di beru balu-balu i bas pengadilen.

Aplikasi

Lit lagu judulna “Aku berubah”, i ja ende-enden e mpersingeti kita, maka i bas perjumpanta ras Yesus, tek man Yesus, terjadi perubahen ku arah si mehuli i bas kegeluhenta, subuk perukuren, pengerana ras perbahanenta. Labo sebalikna. Tapi menjaga konsistensi, kesetian, ketaaten, kekelengen gelah ambah wari na reh mehulina, reh sikapna tentu la gampang sabab melala kel tantangen-tangtangen i sekelewetta si banci erbahanca urak bahkan berubah kita ku bas si la mehuli bagi si ialami perpulungen i Epesus ras kalak Jerusalem. “Zona nyaman” entah pe kiniseran banci erbahanca berubah kita ku bas hal-hal si la mehuli.

Tema ngatakenca, “La nai atendu keleng bagi si gel-gel”, mabai kita guna introspeksi diri, maka kekelengen man Tuhan ngenca si mpengasup kita tetap njagai kinitekenta man Tuhan. Perentah si utamana kel bas Tuhan nari man banta e me uga kita banci ngkelengi Tuhan asa ukur, asa tendi dingen asa gegehndu. Bage pe ngkelengi manusia bagi kita ngkelengi dirinta jine. Adi enggo urak keleng ateta man Tuhan, la nari sigejapken ras siinget uga mbelinna perkuah ate Tuhan si nampati kegeluhenta katawari paksa pe.

Syair lagu Karo, “I ja kin keleng ate ndai…” mpersingeti kita maka banci jadi Tuhan ras keluarganta, teman-temanta kidaramen kekelengen si biasa idahna ras igejapina bas kita nari tapi la nari idahna genduari i bas kita. Sabab penting kel kekelengen e nggeluh ras teraplikasi alu mehuli i bas kegeluhenta. Kekelengennta man Tuhan erbahanca kita nggeluh ertanggung jawab man anak jabunta, bujur i bas pendahinta, nggeluh berintegritas, tutus ras setia i bas pelayanenta, rsd. Arusna min lit semangat i bas kita, reh tambahna umur, reh ulina kegeluhen, semakin hari boleh semakin baik, geluhta ernanam man kalak si deban.

WARI PETELUKEN

Invocatio : “Andiko ulina ras senangna adi kalak si ersenina ersada perarih” (Masmur 133:1)

Ogen : Johanes 17:20-23

Renungen : Perbahanen Rasul-rasul 2:43-47

Tema : KERINA GUNA KERINANA (Semua Untuk Semua)

Penjelasen Bahan Pustaka Si Badia

I bas bahan renungenta banci siidah kerna kecibal kegeluhen perpulungen mula-mula si luar biasa teridah kiniersadanna ras kekelengenna sapih-sapih ia. Konteks paksa si e, melala kiniseran si man hadapen erkiteken perpulungen enda tek man Yesus. Tangtangen, kiniseran si erbahanca solid perpulungen e. Tapi erkiteken Kesah si Badia pe e denga icurahken man perpulungen, janah perpulungen pe tutus megiken pengajaren i bas rasul-rasul dingen nggeluh sikeleng-kelengen bagi si ersenina (ay. 42). Erkiteken melala tanda-tanda sengget ras kejadin-kejadin si luar biasa si ibahan rasul-rasul e, ertambah-tambahna kalak si erkemalangen man Dibata. Ertina, kehadiren serayan Tuhan paksa si e, mbue pengaruhna ku bas peningkaten kualitas kiniteken ras kekelengen man perpulungen. Serayan Tuhan tuhu-tuhu jadi usihen. Perpulungen nggeluh sikeleng-kelengen. Kehadiren ras kegeluhen perpulungen jadi kesaksian man kalak si deban i ja ikataken kerina kalak ergena ate man perpulungen e. Piah dungna Tuhan bekerja, i ja secara kuantitas pe itambahi Tuhan ku perpulungen e kalak si iselamatken.

I bas pengogenta si pemena, siidah kerna pertoton Tuhan Yesus man ajar-ajarNa bage pe man kalak si tek man Tuhan gelah tetap banci nggeluh i bas persadan si mehuli. Ersada min perpulungen e lebe ras Tuhan je nari pe nggeluh ersada sapih-sapih ia, bagi Tuhan Yesus ersada ras BapaNa. Kiniersadanta si nteguh lebe sebage kita pengikut Kriustus erbahanca geluhta jadi kesaksin man kalak si deban, janah doni enda pe tek maka Tuhan Yesus me sebage kepala i bas kerinana si enggo iutus Dibata ku doni enda guna ngkelengi ras mpersadaken kerina manusia alu la erdobahen.

Bage pe i bas invocatio, Pemasmur mengungkapken uga senangna ras ulina adi kalak si ersenina ersada perarih. Uga pe beratna persoalen e, adi ersada arihta ras nggeluh sikeleng-kelengen maka persoalen si mberat e jadi ringan ras mesukah ndarami solusi.

Aplikasi

Tema : “Kerina guna kerinana” (semua untuk semua), ertina, perpulungenta si pelain-lain (erbage-bage telenta, gegeh, pemeteh, kiniliten), adi banci itatalayanken alu mehuli merupaken potensi si mehuli guna kita jadi pasu-pasu (berkat), leben man komunitasta, kenca bage man kalak si deban. Visi GBKP 2016-2020 “GBKP aron Dibata guna jadi pasu-pasu man isi doni enda”. Rikutken kerina bahan i bas wari peteluken enda, maka si paling penting e me kap uga kita banci njagai kiniersadanta lebe man Tuhan ras membangun kiniersadan ras sesama perpulungen. Ula situlak kinierbagen, sabab memang kita enggo itepa Dibata alu kinierbagen si fungsina guna kita banci saling melengkapi sada ras si debanna. Menjaga perpulungenta tetap paguh kiniersadanta e perlu jadi perjuangenta i bas paksa gundari, sabab kemajuan jaman erbahanca biak egois, mementingken diri sediri (individualistis) semakin bertumbuh sumbur i tengah-tengah perpulungen.

Peran gereja sebage wadah (lembaga) si banci mpersada perpulungen dingen meteh ras makeken potensi si pelain-lain i bas perpulungen sangat penting guna iberdayaken terus. Gelah ula orang-orang tertentu saja si ikut muat bagin guna geluhna jadi berkat. Selain gereja, jemaat sendiri pe arus ietehna potensina ras alu kesadaren sendiri dingen tanggung jawab nggit make dirina guna berpartisipasi i bas erbage-bage kegiaten si lit (kepanitian, program kesehaten, peningkaten mutu ibadah, memberdayaken IT guna peningkaten pelayanen, rsd).

Si paling penting lebe mari tetap sijagai kiniersadanta e alu mehuli bagi pertoton Tuhan Yesus. Terus kita ertoto guna tetap terjalinna kiniersadanta si mehuli. Amin kai pe si terjadi, entah konflik, perbedaan pendapat, ula e erbahanca ncendai kiniersadanta. Saling menerima ras saling memaafkan e me modal guna banci njagai kiniersadan alu utuh.

WARI PEEMPATKEN

Invocatio : “Aku ibahan Dibata jadi si erdahin guna perpulungen. Dahin ibereken Dibata man bangku guna keperlunndu. Dahin e mpembarken kata Dibata alu serta” (Kolose 1:25)

Ogen : Jesaya 48:20-21

Renungen : 2 Timotius 4:1-5

Tema : BERITAKENLAH KINIULIN TUHAN (Berita Si Mehuli)

Penjelasen Bahan Pustaka Si Badia

Paulus arah suratna man anak rohanina Timotius mereken pergegeh gelah tetap setia pembarken Kata Dibata. Usia tidaklah menjadi patoken si paling penting e me kap kesetian, ketutusen ras tetap berhikmat pindo kepentaren i bas Dibata nari. Alasenna kai? Sabab sada paksa waktu ipindoken Tuhan pertangungjawapenta man baNa kerna kai si enggo idalanken kita sedekah kita nggeluh i bas doni enda (ay. 1, “Jesus Kristus reh denga pagi jadi Hakim nandangi kalak si nggeluh ras si enggo mate”). Beritaken Kata Dibata subuk tenteng ras la tengteng waktuna, ertina i bas kerina dampar kegeluhenta, bahkan i bas lit na kesusahen bas kita sekalipe la sada alangen lako kita banci naksiken berita si mehuli kerna keleng ate Dibata. Alu dem kesaberen siberitaken kebenaren Kata Dibata, si banci isina mpersingeti dingen ncidahken kesalahen kalak, banci jadi ka mpegegehi ia i bas kesusahen si ialamina. Sabab Firman Tuhan memang erguna i bas ngajari kalak kerna si ngena ate Dibata, mandang si lepak, pekena si salah dingen erguna i bas mereken pedah-pedah gelah nggeluh alu mehuli (2 Tim. 3:16). Jadi Firman Tuhan si iberitaken kita, labo hanya si ntabeh-ntabeh saja si man begin bas cupingta, tapi pe si bersifat menegur, mengoreksi gelah geluhta semakin hari boleh semakin baik. Bage i bas kerina waktu, sipakeken kesempaten guna kita meritaken kabar sukacita. Sabab lit kari waktuna, la nari ate kalak megiken pengajaren si tuhu-tuhu, tapi tutus atena megiken turi-turin si la tuhu. Tapi ilumbaken Paulus, maka Timotius arus tetap tegar ras siap sedia meritaken berita si mehuli, amin kai pe si terjadi, ola bene ukurna. Megenggenglah i bas ngenanami kiniseran. Dahikenlah dahin meritaken Berita si Meriah e, janah dalankenlah tanggung jabapna jadi suruh-suruhen Dibata.

I bas bahan pengogen si pemena, berita sukacita i bas pembebasen sialami bangsa Israel arus imomoken ras iberitaken nabi Tuhan alu dem sukacita, maka Tuhan enggo mulahi bangsaNa i bas kepiceten. Labo hanya man bangsa Israel tapi pe man bangsa si deban, maka Dibata e mehuli.

Aplikasi

Tanggung jawab guna meritaken kabar baik arus tetap sidalanken kita, selaku anak-anak Tuhan (bdk. Mat. 28:19-20), sabab merupaken perentah Tuhan man banta ope Ia nangkih ku surga. Meritaken Kata Dibata labo hanya tugas serayan Tuhan tapi pe man banta kalak si tek. Kai si arus siberitaken (saksiken)? Enggo pasti kiniulin Tuhan ras kuasaNa si tetap sialami kita i bas segedang-gedang geluhta. Lagu PEE 77 “Tuhan Dibata penalementa, Penanam-nanam bas geluhta”. Kiniulin Tuhan si enggo sialami e me si arus sisaksiken gelah banci jadi berkat ka man kalak si deban.

Janah PI si paling efektif i bas kegeluhenta bage pe i bas konteks bangsa si banci kataken “moralna ndabuh” uga kita banci nggeluh bujur, berintegritas, adil dingen dem kekelengen. I benaken i bas kita nari, la perlu tuntut kalak si deban, termasuk atasenta sekali pe. Tapi memang mbelin kel pengaruhna, asum ipercayaken Tuhan kita jadi kita serayan, pemimpin, kepala, arah pengkebet geluhta maba efek (pengaruh) si mehuli man kalak si deban, janah e me kesaksin si nggeluh si banci iidah ras igejapken kalak. Seh makana gelar Tuhan si terpuji arah perbahanenta.

WARI PELIMAKEN

Invocatio : “Dage lit telu si tetap arus idalanken, e me: erkiniteken man Tuhan, erpengarapen man Dibata, erkeleng ate man kalak si deban, janah si pentingna i bas si telu e, e me engkelengi kalak si deban” (1 Korinti 13:13)

Ogen : 1 Raja-raja 17:7-16

Renungen : Perbahanen Rasul-Rasul 9:36-43

Tema : NGELAI SEGEDANG GELUH

Penjelasen Bahan Pustaka Si Badia

Tabita (Dorkas) e me sekalak diberu si mehuli ras erkiniteken man Tuhan. Melala perbahanen si ilakokenna man kalak si deban e me mediate nandangi kegeluhen perpulungen khususna kalak musil ras diberu mbalu-mbalu. Erkiteken Tabita beluh njait baju maka melala baju si ijaitna iberekenna man diberu mbalu-mbalu. Rikutken pengogen, maka sakit me Tabita je nari mate. Maitna isemayamken i datas loteng, i rumahna i Jope. Ieteh ajar-ajar si i Jope maka Petrus pe sangana lit pelayanenna i Lida. Kuta Jope la ndauhsa i Lida nari. E maka i suruh ajar-ajar si lit i Jope guna ngelegi Petrus. Kenca reh Petrus minter ibaba ia ku datas loteng ingan Tabita isemayamken. Janah i je pe enggo enterem diberu mbalu-mbalu ngkeleweti maitna dingen janahna tangis icidahkenna uis ras baju si enggo ibahan Tabita asum ia nggeluh denga. Hal enda nuduhkenca, maka kehadiren Tabita asum ia nggeluh denga tuhu-tuhu ernanam man kalak si nterem, seh maka kerina si pulung erceda ate asum ia enggo idilo Dibata.

I bas ogen siidah ibahan Tuhan kelegon i daerah Israel Utara, tapi Nabi Tuhan iperdiateken Tuhan kegeluhenna. Lebe Elia isampati Tuhan i lau Kerit arah kak (burung gagak) si rehen tep-tep erpagi-pagi ras karaben maba roti ras daging man bana. Kenca enggo kerah lau ndai isuruh Tuhan Elia ku Sarfat, i ja Tuhan nampati Elia arah sekalak diberu mbalu-mbalu. Si pemena si banci siidah, Elia patuh. Sabab banci saja Elia la nggit alu alasen la mungkin diberu mbalu-mbalu banci nampati terlebih i bas musim perlego si gedang ka. Janah si peduken, diberu enda pe nggit ipake Tuhan menjadi saluren pasu-pasu amin sekali situasi sialamina paksa si sangat memprihatinken. Asum ipindo Elia man bana sitik roti, alu terus terang katakenna man Elia, maka tading sitik nari tepung bas ia, kenca itasakenna e me pengkeri-kerinna ia ras anakna man. Janah kenca e mate la man me ia ras anakna. Elia mereken pergegeh. Ola mbiar nina Elia, sikapkenndu panganndu, tapi ope dengan si e bahan lebe roti si kitk, je nari baba man bangku. Ibana banci itasakenndu ras anakndu. Sabab nina Tuhan, “Tepung bas mangkuk la keri-keri, minak bas botol pe la kurang-kurang seh ipesusur Tuhan udah ku taneh enda”. Diberu enda patuh, janah idalanken bagi si ikataken Elia. Janah arah kepatuhenna, leben ia melayani serayan Tuhan Elia, maka cukupina bana ras anakna berkat Tuhan bagi si ikataken Elia terus mengalir, tepung si i bas mangkuk la keri-keri, janah minak si lit i bas botol la kurang-kurang.

Aplikasi

Jakub 1:27, “Agama si tuhu-tuhu dingen si mehuli rikutken pengakap Dibata Bapanta e me: pekena-kena anak-anak melumang ras kalak si enggo mbalu si lit i bas kiniseran, bage pe njaga diri gelah ola icedaken doni enda”. Janah Yesus pe selama kurang lebih 3 tahun masa pelayanenNa, tuhu-tuhu ia mediate nandangi  kalak si medanggel, diberu mbalu-mbalu, kalak si kesusahen subuk erkiteken pinakit kula, latih rukur, rsd. E maka nina, “Kai si ibahanndu man sekalak si musilna i bas seninangKu enda, e me si tuhuna perbahanenndu man bangKu”.

Tema: “Ngelai Segedang Nggeluh”. Tabita melayani Tuhan arah ia mperdiateken diberu mbalu-mbalu ras kalak musil arah ketrampilen si ibahanna. Diberu mbalu-mbalu Sarfat pe melayani Tuhan ia nampati Elia paksa si e. Padahal jelas kondisina pe sangat memprihatinkan. Elia pe nampati diberu mbalu-mbalu i Sarfat seh makana tepung ras minak la erkeri-kerin.

Mekatep rusur siban alasen i bas kita ipake Tuhan guna jadi saluren berkat Tuhan, ngelai kalak si deban: secara khusus kalak si tuhu-tuhu man sampaten (menderita erkiteken sakit fisik, pertendin, kemusilien, rsd). Alasen siban kita, “Aku pe man sampaten nge”; “Sibuk la sempat”; “La lit gegehku guna nampati”, rsd. Siidah, maka tokoh bas perikopta labo erkiteken lebih bas ia maka ia ngelai, tapi kekelengen Tuhan si enggo igejapina i bas kegeluhenna si erbanca ngasup ia jadi saluran berkat man kalak si deban. Janah ula sibatasi maka nampati e labo hanya berkisar ku bas materi, uang, tapi pe gegehta, saran si membangun, motivasi, support, tenaga, doanta, kehadirenta, senyumanta, rsd. Hal si kitik, arah keriahen ukur, sukacita si lit bas kita banci e sitransfer man kalak si deban piah dungna temanta ndai baik semangat ras bersukacita geluhna. E maka ula timai bayak, lebih bas kita maka kita ngelai, sabab adi lit penggejapen entah pemahamen si bage asa ndigan pe lalap la pernah kita jadi saluran berkat man kalak si deban. Sabab lalap lit rusur si kurang. Percayalah, bagi pengalamen Tabita ras diberu mbalu-balu Sarfat i bas ipakekenna geluhna guna nampati maka Tuhan tetap memelihara kegeluhenta. Teklah kita i bas si e, kalak si melumbar i bas kai pe la pernah geluhna kekurangen. E maka siban komitmen perpulungen GBKP Rg. Batam Centre guna sipakeken geluhta guna ngelai Tuhan segedang geluh. Ula nai tertaren-taren.

WARI PEENEMKEN

Invocatio : “Alu ukur meriah kupersembahken persembahen man baNdu, dingen ngataken  bujur man baNdu, sabap mehuli kap Kam o TUHAN” (Masmur 54:8)

Ogen : Masmur 22: 26-32

Renungen : Lukas 8:1-3

Tema : NGELAI YESUS ALU KINILITEN (Persembahen ras Keuangen Gereja)

Penjelasen Bahan Pustaka Si Badia

I bas bahan renungenta ituriken kerna enterem diberu-diberu si nampati Yesus ras ajar-ajarNa alu erta-ertana. Diberu-diberu enda kerina si enggo ipepalem Yesus i bas setan ras pinakit-pinakit nari. Lit Maria (gel-gel igelari Magdalena) i ja enggo ipelawes pitu setan bas ia nari, Johana ndehara Kusa Menteri Herodes, Susana ras enterem denga diberu-diberu si deban. Diberu-diberu enda tuhu-tuhu nggejapken uga belinna pertolongen Tuhan man bana ras isehkenna pengataken bujurna arah ia nampati pelayanen Yesus secara khusus alu erta-ertana.

I bas bahan ogen pe teridah penembahen ras pengataken bujur Pemasmur  man Tuhan erkiteken enggo igejapina pertolongen si ibahan Tuhan. Kai si enggo ipadankenna ndube man Tuhan la ia lupa nehkenca. Nina, “Kupersembahken persembahen si enggo kupadanken baNa”. Sabab maun, sangana kita bas kepiceten i je mbue kel janji-janjinta man Tuhan gelah banci kita ipulahiNa. Tapi dikenca enggo ibereken Tuhan serpang pulah banta, lupa kita ngataken bujur man baNa rikut si enggo ipadanken kita.

Aplikasi

I bas berngi sendah secara khusus tema mabai kita guna banci berperan serta, melayani melalui kiniliten si enggo ibereken Tuhan banta, e me alu persembahenta. Kai pe bentukna si nipersembahken kita (lelang, pengakun kiniteken, perpuluhen, struk guna pembangunen Rumah Pertoton, rsd.) si e labo sumbangenta man Tuhan tapi persembahen pengataken bujur man Tuhan, sabab kerina sinasa lit bas kita situhuna rehna i bas Tuhan nari, kita tading ngulihkenca saja. Janah pelayanen Tri-Tugas Gereja (Koinonia, Marturia, Diakonia) banci erdalan alu maksimal i bas litna dukungen dana arah perpulungen nari. Dingen arus ka siinget maka tupung kita ingawanken pe enggo lit perpadanenta ras Tuhan, alu penampat Tuhan, maka asa gegeh, pemeteh ras buatenta lit nanggung tanggungenta i bas perpulungen enda, sabab bas GBKP enda kita ngawan, gelah alu bage erbelangna ras reh ulina Kerajan Dibata dingen terpuji gelar Dibata.

Memang mekatep sungkan adi kita ngerana soal keuangen bas gereja, padahal si e penting ka guna ilumbaken man perpulungen gelah ietehna tanggung jawabna nandangi gereja Tuhan. Janah i bas pihak pengurus gereja pe arus ertanggung jawab ras transparan i bas nehken laporen keuangen man perpulungen, gelah alu bage kai si menjadi kebutuhen gereja tetap banci idukung jemaat erkiteken litna kejelasen.

Mari terus kita erlajar i bas mere man Tuhan guna kebutuhen pelayanen bas gereja Tuhan, sibereken alu ukur si meriah ula terpaksa dingen ula junggut-junggut. Teklah maka tetap i bas si e pe geluhta i pasu-pasu Tuhan. Kesaksian Warren Buffet (pendiri sekaligus CEO Berkshire Hathaway Inc.) bas Renungen  Manna Sorgawi, Selasa 12 Jan. 2016, banci jadi refleksi man banta. Itulisken, “Setiap tahun majalah bisnis Fortune merilis daftar orang-orang terkaya di seluruh dunia. Ada banyak nama-nama beken silih berganti keluar masuk daftar ini. Namun ada satu nama yang selalu konstan berada dalam kelompok tiga besar dari daftar prestisius ini, yaitu Warren Buffet. Ia memiliki kekayan ditaksir lebih dari US$ 72,6 miliar. Dia pernah menyumbangkan sekitar 75% kekayaannya pada yayasan sosial milik Bill Gates, orang terkaya nomor satu di dunia. Namun justru tahun berikutnya, kekayaan Buffet bertambah dan berbalik menjadi orang terkaya nomor satu di dunia, menggeser posisi Bill Gates. Dia mengatakan, “Jika kita diberi kemurahan, Tuhan tidak ingin berkat itu berhenti di kita. Ia ingin berkat itu berkelanjutan kepada orang lain”. Mari ertekad kita guna mereken si terbaik man Tuhan secara khusus arah materi si enggo i titipken Dibata man banta guna kita banci mendukung pelayanan i tengah-tengah gereja Tuhan.

WARI PEPITUKEN

Invocatio : “Kam me si pemena kal ndahiken dahin e, labo saja ndahikenca, tapi pe ukur ersuruh ndahiken dahin e i bas kam me si pemene turah” (2 Korinti 8:10b)

Ogen : Jesaya 6:1-8

Renungen : 1 Korinti 4:1-4

Tema : SURUH-SURUHEN SI LA PERLU ISURUH

Penjelasen Bahan Pustaka Si Badia

Perpulungen Korinti banci kataken perpulungen si mbelin tapi i je turah pengkotak-kotaken, perpecahen, saling menonjolken keunggulen kelompokna masing-masing, alu istilah “kami arah Apolos”, “kami arah Paulus” (ps. 3:4). E maka Paulus ngatakenca maka Paulus ras Apolos ras serayan Tuhan si deban e me kap pelayan-pelayan Dibata si negu-negu perpulungen gelah perpulungen geluh erkiniteken. E maka i bas ps. 4 si jadi bahan renungenta pe, mulihi Paulus menegasken maka perpulungen arus tek dingen mengakui maka la lit perbedaan i bas serayan Tuhan, kerina sada aron, sada tim sebagai suruh-suruhen Kristus dingen pengurus erta-erta Tuhan si ertanggung jawab (ay. 1, “Arus min iakuindu maka kami enda kap suruh-suruhen Kristus”). Arah kata “kami” i je Paulus mencoba mengajari perpulungen gelah ngidah kerina serayan Tuhan si reh melayani ku Korinti sada aron. Sekalak pengurus (serayan Dibata) arus teridah terteki subuk i adep-adepen Dibata ras manusia.

Bage pe i bas pengogen pemena, asum Jesaya idilo Tuhan jadi nabiNa, ibenai alu sada pengenehenen i ja idahna Tuhan i bas Rumah Pertoton. Ia sangana kundul i bas kursi kemulianNa, jubahNa ndemi kerina Rumah Pertoton. I sekelewetna lit tedis Malekat Serafim, si ernala-ernala bagi api, lit 6 kabengna (2 nutupi ayona, nahena dua nari guna ia kabang). Sialon-alon kerina Malekat Serafim e rende muji Tuhan, “Badia, badia, badia Tuhan si mada kuasa badia kap, doni enda dem alu kemulianNa”. Bagem bagi sora koor, merdu, erbolo-bolo, seh makana palas Rumah Pertoton e mugur-ugur ibahan sorana janah Rumah Pertoton dem alu asap. I bas perjumpanna ras Tuhan, sedar Jesaya kerna dirina, sedar ia kerna Dibata mada kuasa si enggo idahna, minter iungkapkenna, “Cilaka me aku”. Itandai Jesaya dirina kalak si perdosa, meluat, tiap ranan si mentas i bas biberna nari dosa kerina, bahkan tading bas lingkungen si perdosa ka. Penggejapen kerna dosana secara pribadi, kinilatungungenna, janah dosa bangsana. Kenca idahna Tuhan, la nai iakapna ia metunggung, la layak. Kenca bage sada i bas Malekat Serafim ndai nari kabang ndahi Jesaya. Ibabana rara si ibuatna i bas batar-batar persembahen nari alu jepit-jepit. Ikuitna biber Jesaya alu rara ndai, jenari nina, “Rara enda enggo ngkenai biberndu, e maka genduari salahndu enggo masap janah dosandu enggo ialemi”. Api e me sada lambang penyucian, pembersihen. Yesaya isuciken alu api sebagai lambang ia enggo ibersihken, ikudusken seh makana la nari seri ia ras situasi sekelewetna. Jesaya nggejapken, ia si awalna la metunggung, enggo ipetunggungken Tuhan, lit proses perdamaian arah pengalemi dosa i bas Dibata nari, si erbahanca gundari lit perbedaanna, lit gegeh si mbaru, semangat si mbaru. Yesaya ijadiken Tuhan Jesaya si mbaru, tampil beda ras kalak si deban.

E maka nina Tuhan, “Ise enda Kusuruh, ise si nggit maba berita i bas Aku nari?” E maka minter ialoi Jesaya, “Enda aku Tuhan, suruhlah aku”. Gejapi Yesaya Tuhan si petunggungken Ia, si melayaken Ia, si mereken gegeh, makana pang ia ngatakenca “I jenda aku Tuhan suruhlah aku”.

Aplikasi

Arah bahan-bahan si jadi perenungen i bas Pekan Penalatayanen wari terakhir mulihi kita ipersingeti maka kerina kita serayan-serayan Tuhan, si ipercayaken Tuhan guna melayani Ia. Subuk, serayan Tuhan si secara khusus idilo guna erdahin i peken anggurNa bage pe kerina kita anak-anakNa si enggo idiloNa (1 Pet. 2:9, “Anak-anak Dibata si ipilih guna meritaken perbahanen-perbahanen Dibata si mbelin”).

Tema: “Suruh-suruhen si la perlu isuruh” merekan sada pengangkan man banta sebage suruh-suruhen Tuhan si enggo ietehna tanggung jawabna, dingen la nari man suruh-suruhen. Bandingken invocatio, kita ipersingeti guna melayani Tuhan alu ukur ersuruh. Ertina, labo erkiteken paksaan, ikut-ikuten, tapi ukur ersuruh erkiteken sigejapken kita enggo iselamatkenNa. Bakti dingen pengataken bujurta man Tuhan arah kita melayani Tuhan. Kepercayaan Tuhan man banta arus sidahiken alu mehuli, jadilah kita suruh-suruhen si terteki ertina tetap sijaga integritasta. Kai sibelasken e ka sidalanken kita, subuk i gereja, i rumah, i bas ingan erdahin, i ja pa pe erusaha kita nggeluh sentudu bagi si ngena ateNa. Sabab ja pa pe kita suruh-suruhenNa, labo hanya i gereja. Bage pe erlajar kita arah jawaban Jesaya, ise enda ku suruh nina Tuhan, nina “I jenda aku Tuhan, suruhlah aku”. La ia erdalih, tapi minter itangkapna kepercayaan Tuhan e, alu mereken diriNa jadi suruh-suruhen Tuhan.

Tahun enda, e me tahun peningkaten komitmen warga GBKP yang missioner untuk berpartisipasi dalam pelayanan. E maka iarapken kerina kita perpulungen muat bagin berpartisipasi guna melayani Tuhan rikutken kengasupenna masing-masing. Biak mejingkat, tulus, tutus, dingen la ngarapken pujin i bas manusia nari tapi alu pusuh si bersih sidahiken dahinta. Alu bage, lit pe tantangen sihadapi labo e erbahanca kita surut dingen mengeluh sabab e salah sada resiko sebage serayan (pelayan). Ula nari jadi serayan Tuhan si kurang tutus ras mudah pergelut, ula nari jadi pengurus si la aktif, ula nari jadi perpulungen si man iah-iahen ras endik-endiken. Tupung ibereken Tuhan denga waktu ras kesempaten, mari sipake kesempaten e alu maksimal, geluhta ermakna man kalak si deban.