Bimbingen Khotbah Minggu 10 Januari 2016

BIMBINGEN KHOTBAH MINGGU 10 JANUARI 2016

MINGGU EPIPHANIAS II

Pdt. Larena br. Sinuhadji (Nd. Reynard Tarigan)

Invocatio : “Erjabab Johanes, “aku mperidiken alu lau; tapi i tengah-tengahndu nari reh me Sekalak si la itandaindu. Ia reh pudin asa aku, tapi ngosari tinali sepatuNa pe aku la metunggung” (Johanes 1:26-27)

Ogen : Masmur 29:1-11 (Responsoria)

Khotbah : Lukas 3:15-17, 21-22 (Tunggal)

Tema : YESUS SI NEHKEN PERATEN DIBATA

Penjelasen Bahan Pustaka Si Badia

Perikopta i bas bahan khotbahta merupaken bagin i bas khotbah Johanes Peridin si ngelumbakenca man kalak si nterem gelah jera i bas dosa-dosa nari ras tanda maka enggo jera arus iperidiken, gelah dosana ialemi Dibata. Janah empat kitab Injil nuriken kerna dahin Johanes Peridiken i taneh mesawang enda i bas ia ipake Dibata guna ngerentes dalen man Tuhan Yesus (Mat. 3:12; Mrk. 1:1-8; Joh. 1:19-28). Erkiteken luar biasana pemberitaan Johanes ras paksa si e enterem kalak sangana nima-nimai dingen ngarapken kerehen Mesias si ipadanken Dibata, e maka sisungkun-sungkunen jelma si nterem ndai bahkan nungkun bas ukurna, entah Johanes e kin Mesias si nipadanken Dibata? Tapi Johanes la ibuatna kesempaten e guna peganjangkenna bana, tetap ia meteruk ukur. Alu terus-terang ikatakenna maka labo ia Mesias, tapi reh Sekalak si belinen asangken ia. Ngosari tinali sepatuNa pe la akapna ia metunggung.

Janah kenca kerina kalak paksa si e iperidiken, Yesus pe iperidiken ka. Peristiwa Yesus iperiken i sungai Jordan e me kap sada peristiwa i ja Dibata menahbisken Yesus sebage Kristus (yang diurapi Roh Kudus), si jadi Juruselamat bagi si enggo ipadankenNa ndube. I lebe-lebe jelma si nterem, Dibata enggo memproklamasikan Yesus e me kap Mesias bagi si itimai jelma si nterem alu perkataan, “Kam kap anakKu si Kukelengi. Kam kap si ngena ateKu”.

I bas peristiwa peridin Yesus i sungai Jordan, teridah i je hubungen ketritunggalen (trinitas) Bapa, Anak, ras Kesah si Badia. Terlihat kedirian Allah yang Esa dengan keunikan identitasNya masing-masing (Y. B. Mulyono, Pelita Umat, hlm. 247). Nderapati si nusur ku babo Yesus e me kap sebage bentuk Kesah si Badia. Sora si ngerana e me kap Dibata Bapa ras si iperidiken e me kap Yesus Kristus sebage Anak Dibata. Penyingkapen diri Dibata i lebe-lebe jelma si nterem, ertujun gelah kalak si nterem tek maka Yesus me anak Dibata si jadi Mesias guna nehi karya keselamaten Dibata i bas doni enda. Ertina, kai si enggo terjadi i bas peristiwa peridin Yesus mpersiapken dirinta ngaloken Yesus Kristus ras karyaNa guna nelamatken manusia i bas dosa-dosa nari bagi si enggo ipadanken Dibat ndube.

Bahan ogen ngerana kerna seruan Pemasmur gelah kerina si nggeluh i surga ras i doni muji-muji Tuhan erkiteken kemulian ras ke-Mahakuasa-anNa. Lit i je gambaren kerna sora Tuhan si luar biasa. Sora Tuhan si dem alu kuasa. Sora Tuhan si banci menggelken batang-batang kayu, erbahanca mugur-ugur taneh mesawang, bulung-bulung nartaren, rsd. Si e kerina ngingetken kita kerna ke-Mahakuasa-an Dibata si alu soraNa saja enggo banci ijadikenNa doni enda. Seruan Pemasmur ngajuk kita, alu kiniteruken ukurta, guna mengakui kuasa ras kemulian Dibata i bas geluhta. Dibata mereken gegeh, dame, ras pasu-pasuNa man kerina jelma si tek (mengakui dan merendahkan diri) man baNa.   

Aplikasi

Dibata enggo mpetandaken Yesus Kristus sebage Mesias si jadi Juruselamat manusia bagi si enggo ipadankenNa ndube. Responta labo hanya sebage penonton, tapi ngaloken Ia dingen tuhu-tuhu tek man baNa.

Karakter Johanes ras Yesus duana nuduhken spiritualitas kiniteruken ukur. Johanes peridin la muat kesempaten guna menonjolken dirina tapi tetap Tuhan Yesus si ipehagana. Mbuka tinali sepatuna pe la akapna ia metunggung. Padahal mbuka tali sepatu e me kap dahin sekalak pelayan si rendahna kel, e pe la akapna ia metunggung erkiteken ke-Mahakuasa-an Yesus Kristus. Janah jelma si nterem paksa si e langa nandai Yesus sebage Mesias. Murah paksa si e, Johanes muat kesempaten guna peganjang bana, tapi si e la ilakokenna erkiteken ietehna tugasna hanya sebage si mbuka dalen. Bage pe i bas Yesus Kristus iperideken Johanes enggo iperseriNa diriNa ras kalak perdosa, sabab peridin Johanes ibenai alu pertobaten, jera i bas dosa-dosa nari padahal jelas Yesus labo Ia erdosa (bdk. Heber 4:15). Spiritualitas kiniteruken ukur e me peraten Dibata si isehken Yesus Kristus man banta.

Adi spiritualitas kiniteruken ukur bagi si enggo ilakoken Yesus ras Johanes nggeluh bas kita, maka lit kesadaren i bas dirinta bahwa kerina si lit bas kita situhuna rehna i bas Dibata nari. Lit kesadaren bas dirinta, maka banci kita melayani, banci kita mere man kalak, nehken kekelengen, si e kerina guna kemulian Tuhan. E maka, renungenta sendah, ngajuk kita guna belajar menjadi rendah hati. Kerendahatian maba kita ku bas mawas diri (sadar akan keberadaan diri kita di hadapan Tuhan bahwa kita hanyalah ciptaan). E maka adi pintar pe kita, bayak pe kita, lit kekuasaanta, si e kerina la erbahanca kita sombong, sepele man kalak, ate-ate arah kekuasaan si lit bas kita. Ipengasup Dibata kita guna jadi alatNa mpegegehi, maba dame ras pasu-pasuNa man sekelewetta.