Bimbingen PJJ Tgl. 24 - 30 Januari 2016

BIMBINGEN PJJ TGL. 24 - 30 JANUARI 2016

Pdt. Larena br. Sinuhadji (Nd. Reynard Tarigan)

Ogen : Matius 7:21-27

Tema : CIDAHKENLAH KINITEKNDU ARAH PERBAHANENNDU

Penjelasen Bahan Pustaka Si Badia

Dua perikop i bas bahan ogenta (ay. 21-23; ay. 24-27), merupaken bagin terakhir i bas khotbah Tuhan Yesus i datas uruk. Jelas arah khotbah Yesus maka si itekanken e me kap geluh berintegritas (utuh, sedalanen min antara kata ras perbahanen). Piga-piga kali Yesus nekanken soal ngelakoken rikutken si ngena ate Dibata. Labo hanya soal pemeteh kerna kata Dibata, kalak si suari bengi ngelebuh gelar Tuhan, tutus megiken Kata Dibata, kalak si lit kebeluhenna guna erkhotbah, mpelawes setan ras erbahan tanda mujijat tapi si banci bengket ku bas Kinirajan Surga e me kalak si megiken kata Dibata dingen makekenca i bas kegeluhenna.

Kalak si megiken Kata Dibata ras ndalankenca ipebali ras kalak si mbangun rumahna i babo batu. Amin reh banjir ras angin meter nderpa, rumah e tetap paguh sabab rumah e ipajekken i babo batu. Ertina, kalak si tuhu-tuhu ernalem man Tuhan, i bas kerina dampar geluhna, amin kai pe si terjadi i bas geluhna tetap ia megegeh bahkan ngasup denga ia ngataken bujur ras geluhna jadi kesaksin man kalak si deban. Firman Tuhan si enggo ialokenna tuhu-tuhu ipakekenna i bas kegeluhenna. Kebalikenna, adi hanya megi-megi saja tapi la idalanken bali ras kalak si majekenna rumahna i babo kersik. Asum reh banjir, minter sontar rumah e.  La megegeh pondasi  kinitekenta, si erbahanca murah kita putus asa, labuh ras terbawa arus jaman.

Dua hal si itekanken Tuhan Yesus arah pengajarenNa e me kap : 1) Erkiniteken, seri ertina ras ndalanken peraten Dibata i bas kegeluhenta. Tentu labo hal si murah, e maka kalak si tek arus tetap ernalem man Tuhan, gelah Kesah si Badia tetap nampati kita guna ndalankenca. E maka arus tetap lit kesadaren bas kita, maka kita kalak si enggo iselamatken Dibata ras iutus guna jadi saksiNa man doni enda. 2) Metenget nandangi kerina pengajaren si la mehuli. Cara guna menilai apakah suatu pengajaren e payo entah lang, e me kap arah buah-buah perbahanen si ngajarkenca (bdk. Luk. 3:8; Yak. 2:17; 2 Tes. 2:9; dsb.).

Perenungen & Aplikasi

Cara erlajar si mehuli ras benar e me kap learning by doing, erlajar alu ndalankenca entah pe ngelakokenca. I bas metode pengajaren si baik dan benar ikataken, “Seorang naradidik akan menyerap dengan baik dan benar suatu pengajaran bila ia mendengar, melihat, mendiskusikan dan melakukannya”. Janah enda pe banci iterapken i bas kegeluhen erkiniteken. Enggo piga tahun kita jadi kalak Kristen (pengikut Kristus)? Enggo me melala sura-sura Dibata sidalanken i bas kegeluhenta entah sebalikna? Penungkunen reflektif man banta kerina.

Arah bahan PJJ sekali enda mulihi kita ipersingeti guna ndalanken peraten Dibata i bas kegeluhenta. Ras memang butuh latihen entah pe proses si la erngadi-ngadi. Mbue kel bas Pustaka si Badia si niperentahken Dibata guna banci sidalanken i bas kegeluhenta, umpamana “hukum kasih” (Mat. 7:12; 22:39-40) ras “buah-buah Roh” (Gal. 5:22-23). Mari sicubaken selama 1 minggu enda ras kenca si e sievaluasi ka i bas minggu si reh. Seh makana kurang lebih setahun kita ngikuti PJJ erbuena perbahanen si mehuli si banci sitransfer arah kegeluhentta nari man sekelewetta.

Sasaren GBKP i bas periode 2016 - 2020 e me “Terjadinya transformasi warga GBKP secara efektif”. Transformasi ertina perubahan si terjadi arah pertobatenta si tep-tep wari. Efektif ertina berdampak positif man dirinta bage pe sekelewetta. Janah khusus i bas tahun enda sasaren si ateta icapai e me “Meningkatken komitmen warga GBKP yang missioner untuk berpartisipasi dalam pelayanan”. Ertina, iarapken secara bertahap (proses) si la erngadi-ngadi seh maka terjadi perubahan si mehuli nandangi perpulungen GBKP. Tapi kerina sasaren e la banci seh ku tujunna adi ngerana ngenca kita beluh tapi la pernah sibenaken guna ngelakokenca i bas geluhta tep-tep wari. E maka mari radu ras sibenaken guna ngelakoken kerina peraten Dibata i bas geluhta. Renungkan, lakukan, evaluasi, renungkan dan lakukan lagi. Dibata si masu-masu kita kerina.