Bimbingen Khotbah Minggu 31 Januari 2016

BIMBINGEN KHOTBAH MINGGU 31 JANUARI 2016

Pdt. Larena br. Sinuhadji (Nd. Reynard Tarigan)

Invocatio : “Tapi Dibata, i bas lias ateNa enggo milih aku ope denga aku tubuh pe, janah idiloNa aku” (Galatia 1:15)

Ogen : 1 Korinti 13:1-13

Khotbah : Jeremia 1:4-110

Tema : DALANKENLAH RAS PESEH PERENTAH DIBATA

Penjelasen Bahan Pustaka Si Badia

Konteks bahan invocatio-nta, Paulus nuriken latar belakangna uga makana ia jadi rasul Tuhan. I ja awalna erkiteken ketutusenna i bas eragama selaku kalak Yahudi maka pesega-sega ras bunuhna kalak Kristen. Tapi erkiteken lias ate Dibata, malah ipilih Dibata Paulus jadi si maba Berita si Meriah nuriken kerna Yesus  Kristus man bangsa si labo Yahudi.

I bas bahan pengogenta si pemena, ituriken kerna konteks perpulungen Korinti, selain lit turah kelompok-kelompok, banci kataken lit kiniganjangen ukurna erkiteken secara finansial cukup berada ras lit karunia si erbage-bage. E maka ilumbaken Paulus man perpulungen Korinti, uga pentingna kekelengen lit i bas manusia. Sabab bicara beluh pe Paulus ngerana kerna i bas kerina cakap manusia, pemere guna ernubuat janah lit bas ia kerina pemeteh rsd., tapi adi la lit kekeleng man kalak si deban sia-sia si ilakokenna sedekah enda.

Bahan khotbahta ngerana kerna Jeremia e me anak iman Hilkia, si idilo Tuhan jadi nabiNa i bas masa pemerentahen Yosia, Yoyakim ras Sedekia jadi raja Israel. Jeremia enggo ipilih ras iserapken Tuhan jadi nabi man bangsa-bangsa. Adi siidah bas perikopta maka awalna lit penolaken i bas Jeremia, i bas ia ipilih Tuhan jadi nabiNa. Alasenna, erkiteken ngudasa denga akapna, ras la beluh ia ngerana. Sabab modal utama sekalak nabi e me kap beluh ras pang ngerana kerna sora kenabian Tuhan. Selain si e, faktor usia menentuken, sabab umumna adi kalak muda banci jadi kurang iterima i tengah-tengah perpulungen si erbahanca mapas perpulungen e man bana (bdk. perkataan Paulus man Timotius si nguda denga: “Ola kal pelepas ise pe mapas man bandu erkiteken kam nguda denga. Tapi jadilah kam man usihen kalak si tek, subuk i bas pengeranandu, i bas lagu langkahndu, i bas kam nehken keleng ate, i bas kinitekenndu bage pe i bas ukurndu bujur”, 1 Tim. 4:12).

Jelas misi si arus idalanken Jeremia, i ja Jeremia arus patuh nandangi kai si iperentahken Tuhan. Lawes ku bangsa-bangsa si isuruh Tuhan ras melasken kerna kai si enggo iperentahken Tuhan. Ras ibereken Tuhan kuasa guna bangsa-bangsa ras kerajaan-kerajaan lako ngeruntuhken ras mbungkarken, lako ngkernepken dingen ngeradasken, lako manteki dingen nuan. Ertina, Jeremia isuruh Tuhan guna membongkar kerina kebiasaan-kebiasaan nggeluh kalak Israel si la erkemalangen man Tuhan ras ibimbingna guna banci nggeluh i bas pertobaten, ndalanken si ngena ate Dibata, uga nggeluh i bas ernalem man Tuhan. Ras kalak siipake Dibata guna ndalanken sura-sura Dibata enggo pasti iperlengkapi Dibata. Dibata ngkawali suruh-suruhenNa. E maka ula Jeremia mbiar. Dingen Dibata sendiri si masu-masu biber Jeremia, i ja ipepinter ras ikuit Tuhan biber Jeremia, gelah ola ia mbiar-mbiaren mbelasken kai si arus iperkatakenna.

Aplikasi

Ise pe kita  si enggo iselamatken Dibata idilo Tuhan guna er-misi ku tengah-tengah doni enda (bdk. 1 Pet. 2:9, “Anak-anak Dibata si ipilih guna meritaken perbahanen-perbahanen Dibata si mbelin”). Lit memang si secara khusus idilo Dibata guna jadi si erdahinNa, subuk pendeta, pertua ras diaken. Tapi kerina kita kalak si enggo ngaloken perkuah ate Dibata rutang pusuhta guna meritaken Berita si Meriah ku sekelewetta, terutama man senina turangna si tetap denga nggeluh i bas kegelapen (dosa). Arah erbage-bage profesi si enggo ibereken Dibata man banta guna banci tetap kita ber-misi. Si paling penting, selaku kita alat Dibata, arus lebe kita jadi teladan subuk arah kata, pengerana ras perbahanenta man kalak si deban.

Erbage-bage cara Dibata ndilo kita guna banci jadi alatNa (bdk. Jeremia ras Paulus). Si paling penting arus sisedari maka i bas Dibata ndilo kita, maka pasti iperlengkapi ras ikawaliNa kita. Tugas guna membongkar, ngeradasken, ngeruntuhken dingen ngkernepken hal-hal si la mehuli arus tetap silakoken. Perang terhadap narkoba, judi, korupsi, pinakit-pinakit sosial si deban si arus itangani alu serius. Ibenaken i bas jabunta, lingkungenta, masyarakat bahkan banci jadi lit anggota perpulungenta si terlibat hal-hal si bagenda rupana, tapi banci jadi pelayanenta lenga menyentuh ku je. Marilah sidalanken perentah Dibata enda, aminna mbue tantangen si man hadapen, tapi Dibata tetap mereken dalan pulah man banta.