SUPLEMEN PJJ GBKP TGL. 9 - 15 NOVEMBER 2025

Pdt. Larena Sinuhadji (Nd. ReyRapha Tarigan)

TUBUH SECARA PERTENDIN - Johanes 3:1-21

(Natal & Advent)

Penaruh

La tergejap PJJ sendah e me PJJ si terakhir i bas tahun 2025. Kentisik nari radu ras kita bengket ku bas Minggu-minggu Adven. Adven ertina kedatangan. E maka i bas Minggu-minggu Adven biasana radu ras kita ersikap guna ngalo-ngalo kerehen Mesias, Yesus Kristus Juruselamat, si tubuh i Betlehem. Tapi Minggu-minggu Adven labo terjeng ngenehen ku masa lalu, i ja radu ras kita ersikap guna mperingeti wari ketubuhen Yesus. Minggu-minggu Adven pe mengacu ku masa depan, i ja radu ras kita ersikap guna ngalo-ngalo kerehen Tuhan Yesus si peduakaliken.

I bas PJJ si terakhir i bas tahun 2025 enda, radu ras kita erlajar kerna tubuh secara pertendin. Mbera-mbera banci nampati kita ersikap guna bengket ku bas masa Adven ras Natal.

Mpebagesi Ogen

Judul i bas perikop ogenta sendah e me “Yesus ras Nikodemus,” i bas terj. TB-LAI nina, “Percakapan dengan Nikodemus.” Judul enda banci saling melengkapi, sebab isina memang percakapen Yesus ras Nikodemus. Tapi banci ka iantusi maka i bas perikop enda nari radu ras kita erlajar arah tokoh si berbeda, Yesus ras Nikodemus.

Ogenta nuriken kerna percakapen Yesus ras Nikodemus sekalak Farisi peminpin agama Yahudi. Farisi e me salah sada kelompok i bas masyarakat Yahudi si ncikep alu paguh Undang-undang Musa (Hukum Taurat), janah Undang-undang e ilaksanakenna alu cermat, bahkan cenderung cermatsa seh makana merasa berhak menghakimi kalak si deban. Yesus rusur mengkritik kalak Farisi si perbahanenna la sue ras Kata Dibata, umpamana i bas Mat. 3:7, rsd. Erkiteken si e maka kalak Farisi termasuk kelompok si menentang ajaren-ajaren Yesus.

Mungkin erkiteken mamang Nikodemus maka idahina Yesus i bas berngi gelah la iidah teman-temanna sesama kalak Farisi. I bas percakapen e situhuna enggo iteh Nikodemus maka Yesus e me utusen Dibata (Dibata ras Yesus) alu tanda-tanda sengget si icidahkenNa. Tapi mungkin lenga tuhu-tuhu yakin Nikodemus maka Yesus e me utusen Dibata, entah pe Mesias. Yesus ngaloi alu pengajaren kerna sekalak Mesias si enggo iberitaken nabi-nabi. Rikutken ajaren nabi-nabi Israel, adi sekalak Mesias reh alu tanda-tanda sengget maka arus kalak Isarel tek man baNa. Tentuna sebage sekalak Farisi si enggo ipelajarina Taurat ras Kitab Nabi-nabi enggo iteh Nikodemus kai si imaksudken Yesus. Tandana kalak tek nandangi Yesus sebage Anak Manusia si iutus Dibata guna nelamatken doni enda i bas keleng ateNa, e me harus tubuh peduakaliken. Tubuh peduakaliken maksudna jera (bertobat), tek man Yesus sebage utusen Dibata, janah geluh i bas kegeluhen si mbaru.

Penungkunen Nikodemus kerna si e bagi nuduhken maka tetap ia la tek man Yesus. La ituriken uga kelanjuten percakapen enda ras uga tanggapen Nikodemus, tapi injil Yohanes nurikenca secara tersirat maka Nikodemus enda tek man Yesus. Ibelana Yesus i bas Yoh. 7:45-52. Nikodemus reh ndahi mayit Yesus kenca mate i kayu persilang i bas Yoh. 19:39. Ertina perjumpan Nikodemus ras Yesus erbahanca Nikodemus berobah jadi tek man Yesus amin pe teman-temanna si deban kalak Farisi termasuk kelompok si ikut erkonspirasi guna munuh Yesus. Iingetna denga perjumpanna ras Yesus maka idahina Yesus amin pe enggo mate. 

Pengkenaina

Tema PJJ-ta sendah ibuat i bas ay. 6 nari, “Manusia tubuh i bas orang tuana nari secara daging, tapi i bas Kesah Dibata ia tubuh secara pertendin.” Adi sioge i bas ay. 3-8 lit je kata-kata “lau” ras “Kesah”. Lau ertina media guna mbersihken si melket, khususna dosa-dosa manusia. Kesah ertina si mpelimbarui pusuh perukuren manusia si tek man Dibata i bas Yesus Kristus. Enggo tangkas maka tubuh secara pertendin ngajuk kita kerina gelah nggeluh i bas kegeluhen si mbaru i bas Yesus Kristus (lahir baru).

Sedekah tahun 2025 enggo radu ras kita erlajar kerna “Dewasa Menerima Perbedaan.” Enda pe wujud nyata kegeluhen si mbaru i bas Kristus. Arah kerina tema Kebaktin-kebaktin Minggu, PJJ ras PA-PA Kategorial si enggo radu ras siikuti, iarapken gelah reh dewasana kita mengelola perbedaan si lit guna membangun kula ni Kristus. Janah kentisik nari bengket kita ku bas tema pelayanen si mbaru i bas tahun 2026 e me “Relasi dengan Tuhan” (Nandai Dibata). Erpalasken GBP GBKP 2026-2030, radu ras kita berfokus ku bas lima relasi spiritual (5R). I bas tahun si reh, bengket kita ku bas “R” si pemena, “Relasi dengan Tuhan” si tujunna guna menguatkan spiritual Jemaat melalui doa, ibadah dan kedekatan dengan Allah. Enda akap kami banci erbahanca reh tutusna kita nggeluh i bas kegeluhen si mbaru i bas Kristus.  

Secara khusus i bas kita menyambut masa Adven ras Natal 2025 enda. Marilah sipakeken masa Adven tahun enda guna merenung, mengevaluasi diri, enggo nge sedekah tahun 2024 enda kita tuhu-tuhu nggeluh i bas kegeluhen si mbaru i bas Kristus? Adi rikutken liturgi masa Adven, iajuk kita gelah nggeluh alu saber dingen megenggeng. Iajuk kita gelah banci nikapken dirinta alu encidahken persikapenta subuk arah perukuren, pengerana ras perbahanenta i bas kegeluhenta. Iajuk kita gelah reh tutusna erpengarapen nandangi kempak kegeluhen si rasa lalap i bas Kristus. I bas si e, idilo Dibata kita gelah tetap nggeluh selaku anak-anak kinirajan surga si enggo iselamatken Dibata, si teridah arah perukuren, pengerana ras perbahanenta. Dibata si mpengasup kita nggeluh i bas kegeluhen si mbaru i bas Kristus.

Bujur ikataken kami i bas kerehenndu ku bas blogspot enda sedekah tahun 2025. Mindo maaf adi sedekah enda kurang ngasup kami melayani secara maksimal i bas blogspot enda. Pengarapen kami semoga kerina si enggo isehken kami i bas blogspot enda banci nampati pelayanen i bas Gerejanta masing-masing. Adi lit kritik saran, alu meriah ukur ialoken kami i bas kam nari. Selamat memasuki masa-masa Advent, Natal 2025, ras Tahun Baru 2026. Dibata si masu-masu kita kerina.