SUPLEMEN RENUNGAN PEKAN KEBAKTIN KELUARGA GBKP 2025
Pdt. Larena Sinuhadji (Nd. ReyRapha Tarigan)
Wari I - Minggu 16 November 2025
Invocatio : “Kam enggo ipilih rikutken sura-sura Dibata Bapa, janah ijadiken KesahNa jadi anak-anakNa si badia, gelah kam ngikutken Jesus Kristus dingen bersih kam ibahan darehNa” (1 Petrus 1:2)
Ogen : Kejadin 12:1-3
Khotbah : Epesus 2:19-20
Tema : KELUARGA DIBATA
Penaruh
Setiap tahun radu ras silakoken Pekan Kebaktin Keluarga (PKK) GBKP. Enda akap kami erkiteken enggo radu ras siteh maka jabu-jabu kalak si tek e me pondasi Gereja. Adi mehuli jabu-jabu kalak si tek, enggo pasti misi keselamaten Kristus i tengah-tengah doni enda banci siwujudken alu mehuli erkelangken GerejaNa. Ertina alu ilitkenna PKK i bas Gerejanta, iarapken gelah reh mehulina kualitas jabu-jabu i bas konteks GBKP. Janah tema umum si ibahan i bas PKK GBKP tahun 2025 enda e me “Keluarga Dibata”. Tentu jadi sada kemegahen, sebab kerina kalak si tek enggo ilayakken Dibata jadi anggota keluargaNa. I bas kesempaten enda radu ras kita mulihi erlajar kerna tugas tanggung jawabta selaku anggota keluarga Dibata.
Mpebagesi Bahan Pustaka Si Badia
Surat Rasul Paulus man Perp. Epesus si ipantekina (bdk. Perb. Rasul 18:19-21; 19:1-20; 20:17-38) ertujun guna mpeteguhi kiniteken perpulungen man Dibata i bas Yesus Kristus, bage pe guna mpeteguhi kiniersadan i bas perpulungen. Judul perikop si jadi renungenta sendah eme “Ersada i bas Kristus” (terj. TB-LAI, “Dipersatukan di dalam Kristus”, terj. BIMK, “Satu karena Kristus”). Rikutken judul perikop jelas maka tujun Rasul Paulus nuliskenca si jadi bahan renungenta sendah, gelah perpulungen ersada i bas Kristus, ula nai lit pembedaan-pembedaan antara kalak Yahudi ras si labo Yahudi, kerinana enggo ipersadaken Kristus.
I bas ay. 19 teridah keadaan perpulungen paksa si e, lit denga pembedaan (diskriminasi) antara kalak si tek si berlatar belakang Yahudi ras si labo kalak Yahudi. Kalak si labo kalak Yahudi rusur ianggap warga kelas dua, “la ersunat” (ay. 11), pertandang, entah pe kalak asing. I bas si e Rasul Paulus ngingetkenca maka kerina kalak si tek ndatken hak si seri i lebe-lebe Dibata, erkiteken kerehen Kristus ku tengah-tengah doni enda guna meritaken Berita Si Mehuli kerna perdamen man kerina jelma. Emaka Rasul Paulus ngajuk perpulungen gelah ersada i bas Kristus, ula nai lit diskriminasi, sebab kerinana enggo jadi anggota keluarga Dibata.
I bas ay. 20-22 Rasul Paulus negaskenca, sebage anggota keluarga Dibata kerina kalak si tek harus njadiken Yesus Kristus palas persukina, gelah i bas persadan kalak si tek, pajek Rumah Pertoton Si Badia i ja Dibata ringan alu KesahNa. Alu bage kerina si jadi peraten Dibata banci tersehi i tengah-tengah doni enda erkelangken gerejaNa. Emaka kerina anggota keluarga Dibata harus ikut muat bagin i bas ndahiken dahin-dahin si mehuli si enggo leben irencanakenNa (bdk. ay. 10).
Ogen bage pe invocatio ncidahkenca hak-hak istimewa si ialoken kalak si erkiniteken. Pasu-pasu si luar biasa ialoken Abraham i bas Dibata nari, janah i bas invocatio ikataken maka kerina kalak si tek enggo jadi anak-anak Dibata. Tapi labo terjeng je saja, iutus Dibata kerina kalak si tek gelah jadi pasu-pasu man sekelewetna.
Pengkenaina
I bas PKK wari si pemena enda radu ras kita isingetken mulihi kerna statusta sebage anggota keluarga Dibata. Invocatio ngingetken kita maka kerina kalak si tek enggo ipilih rikutken sura-sura Dibata. Sebage anggota keluarga Dibata tentuna melala hak-hak istimewa si ialoken kita. Keselamaten i surga ras i doni enggo jadi sikerajangenta. Pasu-pasu Dibata nari enggo ialoken kita. Dame sejahtera enggo sigejapken kita, rsd. Invocatio bage pe ogenta si pemena encidahkenca hak-hak istimewa si ialoken kita selaku anak-anak Dibata. Tapi selaku anggota keluarga Dibata kita pe iajuk gelah jadi pasu-pasu ras er-Berita Si Mehuli man sekelewetta, arah pengerananta, perukurenta, bagepe perbahanenta, gelah kerina kalak nandai Yesus Kristus erkelangken kita.
Mari radu ras sibenaken i bas jabunta masing-masing. Internalisasi kerna nilai-nilai keluarga Dibata harus sibenaken i bas jabunta masing-masing. Orang tua harus nggit jadi teladan man anak-anakna, i ja sebage jabu-jabu si erkiniteken man Dibata i bas Yesus Kristus, harus nggit erlajar ngelakoken misi Kristus ku tengah-tengah doni enda. Misi keselamaten Kristus secara konkrit banci sigejapken i bas nilai-nilai: kekelengen, keriahen, kemalemen ate, kesabaren, kemurahan, kiniulin, kesetiaan, kiniteruken ukur, ras penguasaan diri. Nilai-nilai Kristus enda harus siwujudnyataken i bas kegeluhenta si tep-tep wari. Gelah alu bage anak-anak bage pe anggota jabunta kerina banci ngusih Kristus erkelangken kita orang tuana.
Wari II - Senin 17 November 2025
Invocatio : “Tapi tetaplah kam ertambah-tambah i bas lias ate Dibata bage pe ertambah-tambah pemetehNdu kerna Tuhan ras si ngkelini kita, Yesus Kristus. Terpujilah Ia genduari seh rasa lalap. Amin!” (2 Petrus 3:18)
Ogen : Kejadin 4:25-26
Khotbah : Perb. Rasul 16:31-34
Tema : JABU SI ERKINITEKEN
Penaruh
Ungkapan keluarga yang beriman (jabu si erkiniteken) menekanken pentingna spiritualitas Kristen labo i bas ruang-ruang ibadah saja tapi terutama nggeluh i tengah jabu, i bas keseharian, i meja makan, i bas perdalanen, i bas percakapen tep-tep wari, bahkan i bas erbage pergumulen si ialami bas jabu. Bagem sigejapken i bas jabu, i bas keseharian, menyiapkan sarapan, bekerja, belajar, Tuhan hadir ras kita. Tuhan hadir ras berkarya i bas jabunta.
Mpebagesi Bahan Pustaka Si Badia
Perikopta renungenta lit i teruh judul “Paulus ras Silas ipenjaraken i Pilipi”. I ja ilatarbelakangi litna sekalak diberu si lit jinungjungna, seh makana melala untung tuanna arah ia. Ikut-ikutna pelayanen Paulus ras Silas, bahkan seolah-olah itandaina Dibata i bas Jesus Kristus. Erkiteken terus-menerus iikutkenna Paulus ras Silas, erkusur ukur Paulus ras ipelawesna kuasa setan si lit i bas diberu ndai. Kedungenna, la nari banci dat duit tuanna e arah diberu ndai. E me dalanna duana kalak enda ipenjaraken, alu pemberitaan hoax maka Paulus ras Silas alu berita maka dua kalak enda pelaku huru-hara, “Duana kalak enda, kalak Jahudi, janah iajarkenna adat si la banci sibahan rikutken Undang-undang kalak Roma.” E me dalan-dalanna Paulus ras Silas ipenjaraken, alu ibenai iligas alu mesangat. Duana kalak enda itamaken ku bas kamar si arah tengahna kel. Nahena ipasung i bas beloti si galang.
Tapi kai si terjadi man duana kalak enda, labo erbahanca kalak enda surut ersembah man Tuhan. Tengah berngi Paulus ras Silas ertoto dingen rende muji Dibata. Rempet terjadi linur si mahantu si erbahanca mugur-ugur palas penjara, talang kerina pintun rumah penjara bage pe rante-rante si mengiket tan kalak tahanen nantangen. Kai si terjadi erbahanca kepala penjara bunuhna atena bana, sebab iakapna enggo kiamen kerina kalak tahanen. Tapi asum Paulus ngerana alu sora si megang, “Ola sakitindu bandu, sebab i jenda denga nge kami kerina,” erbanca kepala penjara takjub ras bertobat. “O Tuan kai arus ku bahan gelah aku terkelin?”
Penungkunen kepala penjara menjadi jalan masuk man Paulus ras Silas mperkenalkan kerna Jesus Kristus. Ialoi duana rasul ndai, “Teklah kam man Tuhan Jesus gelah kam terkelin, e me kam ras seisi jabundu.” Je nari iberitaken rasul-rasul e Kata Tuhan man kepala penjara ndai ras man kerina isi jabuna.
Piga-piga hal penting si banci siidah i bas perikop enda:
Pengkenaina
- Keselamaten i bas Jesus Kristus ngenca, hanya di dalam Jesus Kristus (ay. 31). Keselamaten labo arah usaha manusia (ritual, perbahanen si mehuli), tapi arah kiniteken man Jesus Kristus. Tuhan Jesus si enggo mate ras keke i bas si mate nari guna keselamaten kalak perdosa. Ertina, perkuah ate Tuhan (sola gratia) harus irespon alu kita tek man baNa.
- Keselamaten jabu. Janji keselamaten iperluas man seisi jabu. Tapi tetap harus siinget, maka setiap pribadi anggota jabu harus muat keputusen pribadi guna tek man Tuhan Jesus Kristus. Adi siterusken i bas ay. 34, ibaba kepala penjara e rasul-rasul ndai ku rumahna je nari isuruhna man. Meriah ukur kepala penjara ras isi jabuna, perban enggo tek ia man Dibata (bhs. Ind., “Dan ia sangat bergembira, bahwa ia dan seisi rumahnya telah menjadi percaya kepada Allah”).
- Pentingna pemberitaan Kata Dibata (ay. 32). Iberitaken rasul-rasul e Kata Tuhan man kepala penjara ras man kerina isi jabuna. Roma 10:17 maka kiniteken banci turah arah megi Kata Dibata (“Jadi iman timbul dari pendengaran dan pendengaran oleh Firman Kristus”). Jadi sope tek man Jesus Kristus, kepala penjara ras kerina jabuna ngaloken Kata Dibata lebe.
- Terjadi pertobatan si nyata ras holistik (ay. 33). Terjadi perobahen si nyata i bas kepala penjara. Si awalna kejam, tapi berobah i ja icidahkenna keleng atena man duana rasul ndai alu nambari luka-lukana. Pertobaten sejati teridah arah perobahen perilaku ras sikap nandangi kalak si deban. Bahkan kedungenna ia iperidiken, sada tanda maka enggo tuhu-tuhu ia tek man Tuhan Dibata i bas Jesus Kristus, ras iakui secara umum ras mulai je nari ibenakenna hidup baru i bas Jesus Kristus. Labo terjeng je saja, terjadi persekutuan si mehuli i ja enggo isikapkenna pangan lako ipan duana rasul ndai. Meriah ukur kepala penjara ras isi jabuna perbahan enggo tek ia man Dibata. Ertina ulu keriahen ukur kepala penjara ras seisi jabuna labo erkiteken jabatan, keduduken tapi erkiteken enggo tek man Jesus Kristus.
Tema: “Jabu si erkiniteken.” Jabu e me lembaga si pemena ras terpenting si ibentuk Tuhan, si ipersadaken Tuhan guna nehi sura-sura Tuhan. Jabu si erkiniteken labo jabu si bebas i bas masalah tapi keluarga si tetap njadiken Tuhan ingan penalemenna, seh makana aminna pe lit godaan ras perbeben, jabu e tetap berusaha ndalanken bagi si ngena iakap Tuhan.
Kepala penjara si enggo tek man Tuhan, la malem atena adi ia saja tek man Tuhan Jesus Kristus. Emaka ibabana duana rasul ndai ku rumahna guna mberitaken Kata Dibata ras kedungenna ia ras kerina isi jabuna iperidiken. Tambah-tambah keriahen ukurna erkiteken enggo ia tek man Tuhan Jesus.
Kepala penjara si enggo tek man Tuhan, la malem atena adi ia saja tek man Tuhan Jesus Kristus. Emaka ibabana duana rasul ndai ku rumahna guna mberitaken Kata Dibata ras kedungenna ia ras kerina isi jabuna iperidiken. Tambah-tambah keriahen ukurna erkiteken enggo ia tek man Tuhan Jesus.
Jabu si erkiniteken ibenai alu bapa ras nande sebage orang tua jadi teladan baik man anak-anak. Lebe orang tua, bapa (imam) ras nande ersada arih mabai keluarga nggeluh erkemalangen man Tuhan. Labo terjeng teori baik tapi teridah arah nilai-nilai Kristus si nggeluh si icidahken orang tua e i bas jabu. Bapa ras nande siergan, menghadapi persoalen alu tetap mengandalkan Tuhan (la ndarami solusi di luar cara Tuhan). Anak-anak ngusih orang tuana, bahkan keluarga enda tetap makeken Kata Dibata i bas keseharian geluhna. Keluarga si saling mengasihi, mendukung, tertawa ras menangis bersama.
Wari III - Selasa 18 November 2025
Keluarga Allah Yang Inklusif (Disabilitas)
Invocatio : “Sebab kerina manusia bali nge i lebe-lebe Dibata” (Roma 2:11)
Ogen : 2 Samuel 9:1-13
Khotbah : Lukas 14:7-14
Tema : MPEHAGA TEMAN
Penaruh
Mpehaga teman (menghormati orang lain) merupaken salah satu latihen spiritual si sederhana tapi sulit, sebab ratana kita ingin ipehaga (kita ateta ihamati - iergai).
Asum Paulus nulisken, “Hendaklah kamu saling mendahului dalam memberi hormat” (Roma 12:10b), Paulus labo ngerana kerna sopan santun berelasi saja tapi ia ngerana kerna spiritualitas proaktif i bas engkelengi. I bas tradisi gereja, salam labo hanya sekedar sapaan tapi tindaken liturgis - tanda nyata Shalom i bas Dibata nari si harus ka sibereken man kalak si deban. Berarti adi temanta ngerana kerna mpehaga teman, kita harus memulai i bas mpehaga teman, ula timai kalak si deban (proaktif). Si peduaken, mampu kita meruntuhkan tembok-tembok si erbahnca lit sekat-sekat entah pe kelompok-kelompok subuk erkiteken suku, tingkat sosial, tingkat ekonomi, rsd. I bas kita leben mpegahaga teman, tanpa kecuali kehadirenta ngasup mempererat mulihi, mperdamaikan mulihi, sekat-sekat si lit.
Asum Paulus nulisken, “Hendaklah kamu saling mendahului dalam memberi hormat” (Roma 12:10b), Paulus labo ngerana kerna sopan santun berelasi saja tapi ia ngerana kerna spiritualitas proaktif i bas engkelengi. I bas tradisi gereja, salam labo hanya sekedar sapaan tapi tindaken liturgis - tanda nyata Shalom i bas Dibata nari si harus ka sibereken man kalak si deban. Berarti adi temanta ngerana kerna mpehaga teman, kita harus memulai i bas mpehaga teman, ula timai kalak si deban (proaktif). Si peduaken, mampu kita meruntuhkan tembok-tembok si erbahnca lit sekat-sekat entah pe kelompok-kelompok subuk erkiteken suku, tingkat sosial, tingkat ekonomi, rsd. I bas kita leben mpegahaga teman, tanpa kecuali kehadirenta ngasup mempererat mulihi, mperdamaikan mulihi, sekat-sekat si lit.
Emaka arah firman Tuhan pekan keluarga wari pe-3-ken enda ibabai kita sebage keluarga Dibata, ngasup kita mpehaga teman bukan sebaliknya, mpekitik (mempermalukan) teman.
Mpebagesi Bahan Pustaka Si Badia
Lukas 14:7-14 e me ajaren Jesus man banta kerna kiniteruken ukur ras terbuka berbela rasa man kalak si berkebutuhen khusus, si musil, si la ngasup ersemulih man banta, gelah tuhu-tuhu tulus perbahanenta si mehuli sibereken kita man kalak.
Kecendrungan kita manusia e me ingin dihormati, iergai. Maka asum kurang kita iergai entah ihamati kalak terkadang minter kita sakit hati. Iperdiateken Jesus piga-piga temue asum itenahken si mada kerja milih ingan kundul arah ingan si mehamat (VVIP). Maka iturikenNa sada perumpamaan guna merubah cara pandang kalak si hadir paksa si e. “Adi iundang kalak kam, ulin kundul arah suah gelah adina reh pe si mada kerja, “O teman, mari kundulken i bas inagan si mehamat enda”. La kam ipermalukenna, tapi ipehagana ka i lebe-lebe kalak si enterem. Emaka ola min sempat asum iundang kita ku kerja-kerja erdemu bayu, kundul kita arah ingan si mehamat (merasa diri hebat), gelah bicara lit gia temue si deban si reh, beliden asangken kita, la kita ipermelakenna alu perkatanna, “Miser kam, temanta enda i je kundul.” Adi bage si terjadi tuhu mela kel kita, sebab harus kita pindah ku ingan si arah suah. Sikap enda pe labo ka pas, mpermaluken kalak bas jelma si enterem.
Jadi ulin asum itenahken kalak kita, pilihlah ingan si meterukna. Entah pe milikilah sikap meteruk ukur. Prinsip si mendasari ajaren Jesus enda e me i bas ay. 11, “Sebab ise si peganjangken bana ia me pagi ipeteruk, janah ise si peteruk bana ia me pagi ipeganjangken.” Prinsip enda sedalanen arah kai si enggo leben idalanken Jesus Kristus, i ja bas IA lit biak Dibata tapi si enda la ipertahankenNa, arah ukurNa jine itadingkenNa kerina si lit bas IA. Jadi seri ras manusia, nggeluh bagi sekalak juak-juah (bdK. Pilipi 2:6-8).
Prinsip si peduaken si iajarken Jesus, e me keramahan. Adi nina Pdt. Joas, “Keramahan si radikal” si la pernah ilakoken bage. “Adi kam erbahan kerja suari entah berngi, ola undang teman-temanndu entah seninandu entah kade-kadendu entah pe anak kutandu si bayak-bayak gelah ola ia ersemulih man bandu. Tapi si harus itenahken e me kalak musil, kalak cempang-cempang ras kalak pentang. Malem tuhu-tuhu atendu sebab la ia ngasup ersemulih. Dibata pagi si ersemulih man banta i bas kekeken kalak si benar. Secara khusus isebutken Jesus gelar kalak musil, pentang ras cempang. Enda me kelompok si mekatep ilupaken, idiskriminasi masyakarat. Tapi Jesus memprioritasken kalak enda kerina. Janji Tuhan, asum kita ngkelengi kalak si deban tanpa ngarapken balas, situhuna Dibata sendiri si ersemulih man banta.
Bahan ogen. Perikop enda nuriken uga Daud nehken kekelengen man kesusuren Raja Saul erkiteken persahabaten si sejati antara Daud ras Jonatan, anak Saul (bdk. 1 Sam. 18:1-4). Daud berinisiatif bertanya. Lit denga nge tading keluarga Saul? Adi lit kucidahken ateku keleng erkiteken Jonathan. Janah lit pelayan keluarga Saul gelarna Siba. Emaka sekali nari ituriken Daud atena ncidahken kesetianna ras keleng atena bagi si enggo ipadankenna man Dibata. Jadi jelas, i jenda ikaten keleng ate antara Daud ras Jonatha ipalasi keleng ate ras perpadanen ras Dibata. Ijawab Siba, lit, e me Mepiboset anak Jonathan si dilaki tapi cempang.
Tantangna jumpa Daud ras Mepiboset, kata-kata si ndarat i bas Daud nari, kata-kata si menguatkan, menenangkan. Sebab radu ras sieteh kita, nini bulangna Raja Saul ngayak-ngayak Daud guna munuh ia. Banci jadi mbiar kel Mepiboset jumpa ras Daud. Tapi perbahanen Daud, di luar dari si ipikirkenna. “Ola mbiar, kukelengi ateku kam erkiteken bapandu Jonatan. Kuulihken kerina taneh sikerajangen ninindu Saul, janah kam banci tetap man i istana." Perbuatan Daud luar biasa. Biasana sikerajangen musuh, terlebih si pernah nakiti ia, ibuatna, ras kesusurenna ibunuhna. Tapi Daud mengembaliken kerina sikerajangen Jonatan, ras Mepiboset, anakta, terus keluarga Siba si erdahin keluarga Saul tetap ipeliharana arah nuani taneh sikerajangen Saul. Sedangken Mepiboset si duana nahena cempang, tading i Jerusalem, tetap man i istana raja.
Pengkenaina
Tema i bas PKK wari pe-3-ken “Mpehaga teman” (menghormati orang lain). Kai pesan Firman Tuhan i bas PKK wari pe-3-ken enda?
- Ula kita mpekitik kalak, tapi saling menghormatilah kita sada ras si debanna. Bahkan rikutken surat Paulus man Perp. Roma, kita menakenca guna mpehaga kalak si deban (kita mbenakenca) “Sileben-lebenlah kam i bas mpehaga teman” (“Saling mendahului dalam memberi hormat” Roma 12:10b). Memang labo pas sikap silakoken temue asum itenahken si mada kerja i bas bahan khotbahta ndai, daramina lebe ingan si terhormatna, kepeken ingan e labo man bana seh makana ia ipindahken i bas inganna nari. Si mada kerja mpermalukan temuena (mpekitik temuena). Sebab enggo ka reh tamu kehormatenna. Si mada kerja mpermaluken temue, banci jadi kalak si biasa-biasa saja (la lit kedudukenna). Banci jadi temuena salah kundul ia bas ingan si labo man bana, tapi sikap mpermaluken kalak si deban i lebe jelma si enterem pe labo ka pas. Bahkan mekatep si terjadi, senang kita, entah sinik saja kita asum lit kalak si deban irendahken (ipermalukan) i lebe jelma si enterem.
- Kerina kalak meherga, termasuk kalak si berkebutuhen khusus, sebab Dibata si nepa kita kerina. Bahkan invocatio-nta ngatakenca, “Sebab kerina manusia bali nge i lebe-lebe Dibata” (Roma 2:11). Kai si ilakoken Jesus i bas bahan khotbahta, mengubah mindset kita man kalak si berkebutuhen khusus. Jesus nuriken keduduken kalak musil, pentang ras cempang-cempang sebage tamu si harusna iundang. Kalak si la ngasup ersemulihlah si harus ndatken perhatin utama i bas kita nari, sebab arah si e, jelas tuhu-tuhu kekelengenta, kepedulianta si la ngarapken balas. Daud enggo mereken sada usihen si luar biasa. Aminna pe ia ijahati Raja Saul, la ia nggit membalas dendam, malah kesusuren Saul arah Jonathan e me Mebiposet si cempang-cempang ndatken kekelengen i bas Daud nari.
- Gereja subuk secara institusi, bage pe kita, kam ras aku, harus terbuka, membuka diri, membangun relasi persahabaten si sejati, labo relasi belas kasihan sepihak, tapi persahabatan si saling memperkaya (pengalaman Henry Nouwen ras Adam i L’Arche). Harus ngasup kita, menghapus struktur eksklusif (tertutup) subuk gereja bage pe masyarakat, si mengabaikan peran kalak disabilitas i bas kegeluhen. Arah teman-temanta si berkebutuhen khusus pe, kita banci erlajar kerna perbahanen ras keleng ate Tuhan si banci radu ras si-sharing-ken (ibagiken). Tema “Dewasa menerima perbedaan” mabai kita ngasup berbagi ras erlajar bersama ras teman-temanta si berkebutuhen khusus.
Wari IV - Rabu 19 November 2025
Invocatio : “Metemuelah kam alu la jungut-jungut” (1 Petrus 4:9)
Ogen : Jesaya 58:6-7
Khotbah : Heber 13:1-3
Tema : ERSENINA I BAS KRISTUS
Penaruh
Nggeluh ersenina i bas Kristus harus terus isingetken guna mpeteguhi kiniersadan i bas perpulungen kalak si tek. Engkai maka bage? Erkiteken kuasa Iblis terus-menerus berusaha encedaken kiniersadaan i bas Kristus nai-nai nari alu erbage-bage cara. Sebage contoh, gereja-gereja i Eropa gundari enggo itadingken jemaatna erkiteken erbage-bage masalah si seharusna la terjadi: pelecehan seksual, penyalahgunaan keuangan, rsd. Emaka i bas kesempaten enda radu ras kita mulihi ipersingeti kerna pentingna nggeluh ersenina i bas Kristus.
Mpebagesi Bahan Pustaka Si Badia
Si jadi bahan khotbahta i bas PKK wari si pe-4-ken enda, e me bagin terakhir Surat Heber man perpulungen kalak si tek paksa si e, si sangana mengalami erbage-bage perbeben. Emaka tujun surat enda tangkas maka gelah perpulungen kalak si tek paksa si e tetap megegeh kinitekenna, ras megenggeng, i bas ngalaken erbage-bage tantangen i darat nari bage pe tantangen si terjadi i tengah-tengah perpulungen sendiri. Si jadi renungenta sendah isina e me pedah-pedah etis praktis kristiani si harus ilakoken perpulungen gelah tetap ersada i bas Kristus, emaka judul perikopna pe “Cara ndalanken si ngena ate Dibata.”
Lit dua makna kata “ersenina” (bersaudara, persaudaraan) i bas ay. 1 ras 2, e me: philadelphia : kasih persaudaraan di dalam komunitas iman, ras philoxenia : kasih kepada orang asing, atau hospitalitas. Tapi situhuna dua model sikeleng-kelengen i bas ersenina enda sada sumberna e me keleng ate Kristus. I bas erkeleng ate man sapih-sapih kalak si tek, radu ras kita njagai kiniersadaan. I bas erkeleng ate man kalak asing pe radu ras kita ersaksi kerna keleng ate Kristus (bdk. Mrk. 3:35). Janah harus ka siinget maka keleng ate Kristus itujuken man kerina kalak, labo terjeng man banta saja (eksklusif). Kalak si tek e me perpanjangen tan Tuhan i bas nehken keleng ate Dibata si universal.
I bas ay. 3 iajuk perpulungen kalak si tek gelah nginget kalak si lit i bas penjara. Lit dua antusen kerna ayat enda. Si pemena, kalak si lit i bas penjara e me anding-andingen kalak si lit i bas kiniseran, khususna i bas konteks ketidakadilan sosial, politik ras ekonomi paksa si e. Si peduaken, ayat enda encidahkenca maka lit sebagian kalak si tek si ipenjara erkiteken kinitekenna, bagi si inanami Rasul Paulus. Penjara paksa si e labo seri ras kita i bas jaman gundari enda. Penjara paksa si e ingan sementara sope si bersangkuten iputusken perkarana i bas pengadilen. I bas paksa penahanen sementara enda la lit kai pe ibereken pihak berwenang, la lit pangan janah la lit inemen. Emaka dukungen pihak keluarga sangat ibutuhken. Memang adi reh ndahi sesama perpulungen si sangana itahan i penjara, resikona banci icurigai ras itangkap. Tapi kata “ingetlah” (Yun. mnemoneuete) labo terjeng notoken saja, tapi tuhu-tuhu reh ndahi ku penjara sebage tanda solidaritas, ikut ngenanami kiniseran.
Si jadi ogenta e me persinget Nabi Jesaya man bangsa Israel maka ibadah si tuhu-tuhu labo terjeng rutinitas, seremonial, entah gelah teridah kalak saja. Ibadah si tuhu-tuhu e me si mperjuangken keadilan sosial, berpihak man kalak si kelihen alu mereken man, man kalak si musil alu mereken tumpangan, man kalak si la lit uisna alu mereken uis, janah mereken penampat man kade-kadena. Si jadi invocationta ngerana kerna kegeluhen kalak si tek si ngena ate Dibata, salah sadana e me mereken tumpangan man kalak si membutuhken alu meriah ukur.
Pengkenaina
Tema si seh man banta i bas PKK wari pe-4-ken enda e me “Ersenina i bas Kristus,” ngajuk kita kerina gelah, si pemena, kembali mengevaluasi dirinta masing-masing. Enggo kin sedekah enda kita erkeleng ate man senina turangta sapih-sapih perpulungen alu tutus ras tulus? Adi lenga, mari siperobahi. Usihlah keleng ate Kristus si tutus ras tulus, tanpa pamrih, entah pe la ngarapken balasen. Mungkin sedekah enda la terukurken kita maka keleng ate Kristus e situhuna enggo sialoken kita sedekah geluhta i doni enda. I bas si e marilah ngadi kentisik, sirenungken uga belinna keleng ate Kristus i bas kegeluhenta. Adi enggo sikelengi senina turangta sapih-sapih perpulungen, marilah sitingkatken kuantitas ras kualitasna. Pindo gegeh i bas Dibata nari gelah ipengaspuNa kita nggeluh ersenina i bas Kristus.
Si peduaken, i bas kesempaten enda pe, iajuk kita gelah erkeleng ate man kalak si deban si la itandai kita, khususna man kalak si lit i bas kiniseran. Adi sedekah enda lebih cenderung kita egois, hanya ngukurken diri sendiri ngenca, marilah siperobahi. Mediatelah nandangi kalak si lit i bas kesusahen i sekelewetta. Alu bage, kita enggo jadi perpanjangen tan Tuhan i bas nehken keleng ate Kristus si kin memang harus isehken man kalak si deban si lenga nandai Kristus. Adi sedekah enda enggo kita secara proaktif mediate ras nampati kalak si kesusahen, marilah sitingkatken kuantitas ras kualitasna. I bas kita mediate ras nampati kalak, labo kita kekurangen, justru sebalikna, ipasu-pasu Dibata kegeluhenta. Pindo gegeh i bas Dibata nari gelah ipengasupNa kita jadi saluran pasu-pasu man kalak si deban.
Wari V - Kamis 20 November 2025
Invocatio : “Ola balas perbahanen si jahat alu si jahat, entah sumpah alu sumpah. Tapi balaslah alu pasu-pasu, sebab pasu-pasu me si ipadanken Dibata iberekenNa man bandu, asum kam idiloNa” (1 Petrus 3:9)
Ogen : Matius 27:27-31
Khotbah : Kejadian 45:1-8
Tema : MARI AKU KAP SENINANDU
Penaruh
Mungkin pernah sibegi istilah “at home”. Istilah “at home” berarti berada di rumah sebagai tempat tinggal, nyaman, dan tempat seseorang merasa aman dan betah. Frasa ini bisa juga merujuk pada lokasi rumah seseorang secara fisik atau kondisi psikologis di mana seseorang merasa nyaman dan menjadi dirinya sendiri, seperti “merasa betah” atau “merasa seperti di rumah sendiri.” Rumah i bas kondisi tertentu memang banci mereken rasa aman ras nyaman man isi jabu (penghunina). Tapi si paling penting e me kalak si tading bas jabu e. I ja setiap anggota jabu, banci mereken rasa aman, nyaman, sada ras si debanna.
E maka i bas wari pe-5-ken PKK enda iajuk kita guna banci mereken rasa aman ras nyaman alu cara sikeleng-kelengen ras saling mengampuni, bagi Jusup ras senina-seninana.
Penjelasen Bahan Pustaka Si Badia
Bahan khotbah nuriken puncak konflik antara Jusup ras senina-senina. I bas Kej. 37, ituriken uga Jusup idayaken senina-senina man kafilah Ismael, erkiteken cian ate senina-seninana man Jusuf. Tahun berganti tahun, Jusuf ndauh sirang ras bapana bage pe keluargana, mbue pengalamen si la menyenangken ialamina. Tapi Jusuf tetap ikawali Tuhan, i ja kedungenna ia iangkat jadi penguasa i Mesir. Terjadi bencana kelihen si mesangat i negeri Mesir ras negeri-negeri si deban 7 tahun dekahna, kenca enggo 7 tahun masa eriba-iba (kelimpahan). Keluarga Jakub terpaksa nukur gandum ku negara Mesir. I jenda me Jusup jumpa ras senina-seninana, kenca enggo bage dekahna kalak enda la nari jumpa. Perjumpaan enda, labo hanya menjadi moment mburo ate tedeh (melepas rindu), tapi si paling penting e me terjadina rekonsiliasai (perdamaian) i antara Jusup ras senina-seninana.
Piga-piga poin penting arah proses rekonsialiasi si banci siidah i bas teks : si pemena, lit keberanian i bas diri Jusup guna jujur kerna luka batin si ialamina. La nai tertahan Jusup ukurna i lebe-lebe suruh-suruhenna kerina perban gangna sorana tangis (“Yusuf menangis keras-keras”), e me sada tanda i ja Jusup menerima luka i bas dirina (ay. 1-2). Enda langkah awal rekonsialiasi, berani menerima peristiwa menyakitkan i masa lalu si enggo ialamina, ras ilepaskenna pengampunan man senina-seninana si enggo nakiti ia. Si peduaken, Jusup ngasup ngidah kiniseran si ialamina i bas visi Dibata, seh makana la ipakena kesempaten si lit guna membalas dendam. Sangat wajar adi Jusup membalas dendam. Tapi ipilihna dalan si berbeda. Jusup ngasup ngidah tan Dibata si erdahin melampaui kerina si la mehuli si enggo ibahan senina-senina (ay. 5-7).
Jusup ngasup ngidah kiniseran si ialamina alu kacamata Dibata, di balik peristiwa si menyakitkan, lit sura-sura Dibata si mbelin guna nelamatken bangaNa. Jusup menolak menjadi korban permanen kejahaten, tapi ia mengambil identitas baru sebage bagin i bas rencana Dibata. Enda me langkah rekonsialiasi si peduaken. Jusup ngasup memaknai kiniseran entah luka batin si ialamina i bas sudut pandang Dibata. Tujunna, maka keselamaten labo hanya man keluargana tapi pe man enterem kalak, bage pe guna mendewasaken kinitekenna gelah reh dewasana kinitekenna.
Ogen e me salah sada bagian kerna kiniseran sialami Tuhan Jesus. Judul si ibereken Alkitab TB-LAI “Yesus diolok-olok,” - “Yesus igombang-ngombangi Perajurit.” Yesus iperlakukan desken sekalak penjahat kelas kakap. Ibenai, alu Jesus ibaba prajurit ku istana gubernur (gedung pengadilen), i ja kerina pasuken ngkeleweti Jesus. Kenca bage itangtangina uis Jesus je nari ipakekenna man Jesus uis si megara (mengenaken jubah ungu). Kenca bage ibahanna sada tengkuluk duru je nari itamakenna ku takal Jesus. Igombang-ngombangi kalak e Jesus, erjimpuh ia ilebe-lebeNa je nari nina “Tabi o Raja kalak Jahudi!” La terjeng je saja, iteruskenna ija icidurina Jesus, ibuatna buluh e, ipek-pekenna ku takal Jesus. Kenca puas nggombang-nggombangi Jesus, itang-tangina uis si megara e je nari ipakekenna ka mulihken uis Jesus si tang-tangna ndai. Kenca bage ibabana Jesus ndarat gelah ipakuken ku kayu persilang. Luar biasa kiniseran si ialami Jesus, tapi Jesus ngasup melasken “O, Bapa alemilah salah kalak enda kerina, sebab la iangkana kai si ibahanna enda” (bdk. Luk. 23:34).
Invocatio e me Firman Tuhan si ipeseh Petrus man perpulungen i ja paksa si e perpulungen ngenanami kiniseran erkiteken kinitekenna. Kejahatan ula ibalas alu kejahatan, sebab kejahaten (kekerasan) la pernah banci ngadi desken lingkaren setan. Kejahaten hanya banci ipengadi alu keleng ate. Tapi balaslah kejahaten alu pasu-pasu, sebab pasu-pasu me si ipadanken Dibata iberekenNa man banta, asum kam idiloNa. Kerehen kalak si tek, harus maba pasu-pasu ija pe ia ringan.
Pengkenaina
Tema ndilo kita guna mereken rasa aman ras nyaman man kalak i sekelewetta, khususna keluarganta. Rasa aman ras nyaman banci iwujudken alu meneladani Jusup. Jusup korban kejahaten labo pelaku kejahaten. Rasa aman ras nyaman iberekenna man senina-seninana si enggo nakiti ia. Dari kacamata Henri Nouwen, kita diajak untuk secara proaktif menjadi “penyembuh-penyembuh yang terluka.” Walaupe banci jadi kita e me korban arah erbage kejahaten si jadi entah kekerasan, sarat dengan luka batin, tapi kita ipersingeti gelah memiliki daya lenting (seperti bekel). Beri kesempatan bagi diri kita untuk disembuhkan dan berdamai dengan masa lalu yang tidak menyenangkan, gelah ula ka kita menjadi pelaku kekerasan man kalak si deban.
Usihen si mehuli enggo ibereken Tuhan Jesus i bas kiniseran si ialamiNa. La isalahkenna kalak si deban, bahkan la ia berusaha ndilo kalak si deban bengket ku bas kiniseran sialamiNa. IkorbankenNa diriNa gelah manusia banci terkelin. Ertina, harus lit si ikorbanken kita guna mereken rasa aman - nyaman man kalak si lit isekelewetta, secara khusus bas keluarganta. Banci jadi waktu, tenaga, materi bahkan korban perasaan. Rasul Petrus mereken usihen gelah banci ngasup kita erbahan si mehuli i ja pe kita ringan. Mari bertekad kita guna jadi pelaku-pelaku perdamain bukan kekerasan. Sipindo gegeh man Dibata nari gelah ipengasupNa kita ngerana alu tulus, “Marilah aku kap seninandu, kukelengi kam, kubere ras aman ras nyaman.”
Wari VI - Jumat 21 November 2025
Invocatio : “Ajarkenlah man anak uga kearusen nggeluh, maka ikutkenna asa umurna nggeluh” (Kuan-Kuanen 22:6)
Ogen : 2 Samuel 13:23-29
Khotbah : Epesus 6:1-4
Tema : KERNA ANAK RAS ORANG TUA
Penaruh
Hubungen orang tua ras anak e me salah sada relasi si paling penting i bas keluarga. Hubungen si terjalin labo hanya ngerana soal kebutuhan jasmani entah pe biologis tapi pe harus ipenuhi kebutuhan rohani, mental ras moralna. Alu bage, kai si iarapken kita bas keluarga, khususna hubungen antara orang tua ras anak banci terjalin akrab ras harmonis. Sebab melala kel i bas jaman genduari enda, hubungen si la harmonis i bas jabu antara orang tua ras anak, bahkan si mengerikan konflik antara orang tua ras anak si berakhir i bas pembunuhan. Mulihi i bas pekan keluarga wari pe-6-ken erlajar kita subuk sebage orang tua, bage pe anak, gelah tetap terjalin hubungen si harmonis, tercipta keluarga si bahagia, bahkan anak-anakta menjadi kebanggaan keluarga, masyarkat, terlebih memuliakan Tuhan.
Mpebagesi Bahan Pustaka Si Badia
I bas bahan khotbah Rasul Paulus mpersingeti perpulungen i Epesus kerna tanggung jawab si harus idalanken orang tua bage pe anak-anak i tengah jabu, gelah jabu e tetap paguh ras harmonis. Anak-anak harus ngikutken ajar orang tua, rikutken si ngena ate Tuhan. Ras orang tua harus ngkelengi anakna, ola pesega-sega anakna si erbahanca ia merawa (terj. TB-LAI : “jangan bangkitkan amarah di dalam hati anakmu”). Adina lit penungkunen, ise lebe ndalanken tanggung jawab, orang tua nandangi anak entah sebalikna, anak nandangi orang tua? Enggo pasti orang tua. Sebab orang tua e me kap wakil Dibata i ja anak e ititipken Dibata man banta. Maka tanggung jawab si pemena lebe harus idalanken orang tua, uga makana orang tua banci ngepkep, engkelengi ras mabai anakta geluh erkemalangen man Tuhan. Sebab mekatep orang tua lalai i bas tanggung jawabna si mbelin e.
Paulus mpersingeti kerna kewajiben anak e me patuh man orang tua (ay. 1). Patuh ngikutken ajar orang tua, sue ras peraten Tuhan. Anak-anak banci patuh asum orang tua tuhu-tuhu jadi usihen si mehuli man anakna. Sebab mbue orang tua beluh ngajarken si mehuli (kejujuran, mengampuni, taat, rsd.) tapi ia sendiri la ndalankenca. Enggo pasti membal i bas cuping anak-anakta nari kerina si mehuli si iajarken kita ndai. Bahkan anak-anak sulit guna makekenca perban kita pe orang tua la ndalankenca. E maka lit istilah ngatakenca “Children do what they see” (anak-anak melakukan apa yang mereka lihat dari orang tuanya); “Satu perbuatan lebih berharga dari pada seribu kata-kata.” Ertina, ipindoken man orang tua i jenda gelah leben jadi usihen si mehuli man anakna, alu bage anak-anak e patuh ngikutken kai si iajarken orang tua, sebab palasna kai si iajarken Tuhan.
Ay. 2, mpehaga nande ras bapa. Enda bagin i bas 10 Perentah Tuhan si ibereken Dibata man Musa i Deleng Sinai, e me perentah si pelimaken. Anak-anak mpehaga orang tua sebab tanggung jawab si mehuli si enggo ilakoken orang tua, labo hanya dalam rangka anak ngataken bujur man orang tua, ras erbahanca orat geluh anak e mehuli. Tanggung jawab orang tua e me kap ngkelengi ras mpebelin anak-anak, bagi si ngena ate Tuhan. Ertina, si ibereken kita man anak e sumberna e me kap Kata Dibata gelah si ngena ateNa silakoken kita i bas nehi tanggung jawab. Sebab banci jadi labo sura-sura Tuhan si ipelebeken tapi sura-suranta orang tua. Lit orang tua memaksaken kehendak gelah anak menjadi “number one” tapi la ietehna kemampuan ras sura-sura anak. Si penting lit kebanggaan tersendiri asum anak e tampil berprestasi. Enda labo salah, asal sura-sura anak ras passion anak siikutken (idampingi) labo keinginenta. Orang tua harus ngelitken waktu si utama guna anak i bas membangun kedekaten ras komunikasi si mehuli man anak. Ula sempat la sieteh kai kebiasanna, biakna, teman-temanna, hobina, rsd. erkiteken kurang sibangun kedekatenta ras anakta.
Bahan ogen ibere judul “Absalom erbalas man Amnon.” Pembalasen dendam ras kedungenna Absalom membunuh Amnon labo terlepas i bas peran Daud sebage bapa si la tanggap ndungi persoalen i tengah jabuna, khususna anak-anakna si pedauh nande. Kai latar belakang pembalasen dendam Absalom? I bas bindu 13 ituriken kerna Amnon si pedauh nande ras Tamar turang Absalom sada nande ras Tamar, memperkosa Tamar (ay. 14). Peristiwa enda erbahanca terluka Tamar. Absalom pe meteh persoalen enda. Kenca peristiwa e, tading Tamar i rumah turangna Absalom, ceda atena dingen melungen kel iakapna. Kepedihan hatinya tidak ada yang mendapingi guna ngapulisa ras dungi persoalen si ialamina. Termasuk Daud bapana, terjeng merawa saja (ay. 21). La ieteh ras ise ia merawa kel, apakah man Amnon? Peristiwa enda membekas i bas pusuh Absalom si erbahanca ia menaruh dendam ras Amnon. Dalanna enggo putus komunikasi antara Absalom ras Amnon, i ja la nari nggit Absalom mperkuanken Amnon.
Dua tahun berselang, asum Absalom nggunting bulu biri-birina i Baal Hazor, kerina anak Raja Daud iundangna, termasuk pe berencana ia mengundang bapana Daud. Tapi Daud menolak. Ras itenahken Absalom maka seninana Amnon saja si reh. Awalna, enggo itulak Daud (la perlu). Tapi perban isek-seki Absalom kedungenna ibere Daud. Situhuna, adi megermet ras mediate Daud sebage bapa, je saja enggo ia curiga, sebab selama enggo dua tahun kalak enda la nari berkomunikasi. Bas kerja man-man ndai me Absalom membunuh Amnon alu merentahken suruh-suruhenna.
Arah turin-turin enda, persoalen si terjadi bas jabu, baik orang tua ku anak, antar anak, harus segera iselesaikan, gelah ula sempat enggo mbelin persoalen dingen enggo mesera guna iselesaiken (enggo berurat berakar, enggo turah kepahitan dan kemarahan, dendam kesumat).
Pengkenaina
Tema i bas wari pe-6-ken PKK ngerana kerna anak ras orang tua. Si pemena lebe sebage orang tua, harus kita bersyukur ibereken Tuhan kesempaten jadi orang tua. Pakeken kesempaten e alu mehuli. Jadilah orang tua si mehuli rikutken si ngena ate Tuhan. Memang labo lit orang tua si sempurna (perfect), tapi paling tidak, peran, tanggung jawab, si harus sidalanken kita, ilakoken alu mehuli.
Si peduaken, mendidik anakta nggeluh erkemalangen man Tuhan. Ajarken Firman Tuhan rikutken nilai-nilai kekristenan: kasih, mengampuni, peduli, sukacita, bersyukur, rsd. Mulai bas bertin nari, balita, terus seh ku remaja bahkan pemuda/i (PERMATA), totoken, ras babai ku gereja bahkan terlibat aktif i bas pelayanen gereja.
Si peteluken, sibereken kekelengen ras perhatian man bana. Jaman enggo pasti berubah, tapi perhatian ras keleng ate tetap ibutuhken anak dari jaman ke jaman rikutken perkembangen usia anak (fase pertumbuhan anak).
Si peempatken, orang tua menjadi teladan si mehuli man anak-anakna subuk alu kata ras perbahanen.
Wari VII - Sabtu 22 November 2025
Invocatio : “Dage ersinalsallah min terangndu i lebe-lebe kalak si enterem gelah adi idahna perbahanenndu si mehuli, ipujina Dibata, Bapandu si ni surga” (Matius 5:16).
Ogen : Markus 3:31-35
Khotbah : Mazmur 78:1-8
Tema : TURIKEN MAN KESUSUREN (CERITAKAN KEPADA KETURUNAN)
Penaruh
Metode mengajar alu nuri-nuri, bercerita (storytelling), e me metode si cukup tua ras akap kami tetap relevan si banci ipake i bas ngajarken anak-anakta (kesusurenta). Enggo pasti mbue kel keuntungenna i bas banci kita nuri-nuri man kesusurenta; selain memperkuat identitas ras jadi diri, ietehna kerna asal-usul dirina, banci ka mempererat hubungen keluarga (ikatan emosial terbangun), banci ka ipake guna nuanken nilai-nilai si mehuli man kesusurenna, subuk pengalamen si mehuli entah pe sebalikna si banci ipake kesusurenta jadi pelajaren si meherga man bana.
Emaka i bas wari terakhir PKK i bas tahun 2025 erlajar kita arah Kata Dibata si jadi oratenta, uga sebage orang tua - nini bulang makeken waktu guna nuriken kerna kiniulin Tuhan.
Mpebagesi Bahan Pustaka Si Badia
Bahan khotbah, Masmur siibere judul “Dibata ras bangsaNa” e me ende-enden Asap. Asap e me pemimpin musik ras rende i bas Suku Lewi nari i bas jaman Raja Daud. Ibenaken alu pendilo guna megi (ajakan untuk mendengar), megiken labo alu cuping saja tapi alu pusuh ras ukurna. Metedeh ate Pemasmur gelah enterem kalak si banci erlajar turi-turin kegeluhen enda e me kerna Dibata si setia ras manusia si rusuren ngelupaken keleng ate Tuhan.
Masmur enda mbue ngerana kerna pengalamen padang gurun, si banci nampati kesusuren bangsa Israel ngidah ras nggejapken kerna keleng ate Dibata si ndube nampati nini tudungna, si tetap mabai bangsa enda setia ernalem man Tuhan. Nina Pemasmur, “La ateta e sibuniken man anak-anakta, tapi situriken man kesusurenta kerna Kuasa Tuhan ras perbahanenNa si mejin bage pe tanda-tanda kuasa si ilakokenNa.” Ertina, sada kewajiben man orang tua - nini tudung, nginget ras nuriken man kesusurenna ula ibuniken kerna perbahanen Tuhan si mbisa. Dari generasi ke generasi nuriken kerna kuasa ras keleng ate Tuhan. Ay. 5c, “Isuruhna nini-nininta ngajarken man anak-anakna. Gelah sundut si arah pudi pe metehsa, janah anak-anak si lenga tubuh pe nurikenca ka man anak-anakna.” Ertina, Bani Asap si bertugas sebage pemimpin pujian si enggo megi perbahanen Tuhas si luar biasa arah nini-ninina, genduari kai si ibegikenna e iteruskenna ka man anak kempuna, bage seterusna bagi kalak kiam secara estafet.
Tujunna jelas, gelah Tuhan tetap jadi ingan penalemenNa. I bas Bhs. Ind.:
- Supaya mereka manaruh kepercayaan kepada Allah (ay. 7a)
- Supaya mereka tidak melupakan perbuatan-perbuatan Allah (ay. 7b)
- Supaya mereka memegang perintah-perintahNya (ay. 7c).
Pengkenaina
Tema i bas wari terakhir PKK “Turiken man kesusuren.” Kai si harus ituriken enggo pasti keleng ate ras kuasa Dibata si tetap nemani ras masu-masu kegeluhenta (bapa - nande) bage pe jabunta. E maka si harus lebe lit bas kita orang tua, entah nini bulang, e me penggejapen Tuhan si erkuasa i bas kegeluhenta. Gelah ula sempat i bas kita nuri-nuri man kesusurenta, lebih kita menonjolken diri, encidahken kehebatenta i bas keberhasilenta. Tapi tetap si berotoritas penuh i bas geluhta e me Tuhan Dibata si mada kuasa.
Si peduaken, harus lit komitmen bersama orang tua ras anak guna ngelitken waktu si banci ipakeken bersama guna sharing, bercerita. Bagi nina Kitab Ulangen 6:7 “Ajarkenlah e man anak-anakndu. Persingetilah rusur subuk sanga kam i rumah, entah sanga kam i bas perdalanen, subuk sanga kam ngadi-ngadi entah pe sanga kam erdahin.” Intinya adalah kerinduan bersama, khususna orang tua. Sesibuk apa pun kita, asal sisikapken waktu, bahkan di sela-sela jalan pagi, makan bersama di meja makan, dalam perjalanan tamasya, sipakeken guna nuriken kiniulin Tuhan. Termasuk kisah keterpuruken, kegagalanta pe banci jadi pelajaren si meherga man kesusurenta. Maka Tuhan tetap setia ngkelengi anak-anakNya. Tiap kesempaten banci ipakeken guna nuriken nilai-nilai si mehuli selaku kalak si erkiniteken: nggeluh sikelengen, berdamai, sisampat-sampaten, meteruk ukur, mampu bekerja sama ras kalak si deban, rsd. Ertina siusahken arah keluarganta, terang Kristus ersinalsal man kalak si lit isekelewetta. Kehadirenta enggo pasti mpermuliaken Tuhan Dibata (invocatio).
Sipeteluken, harus lit komitmen bas keluarganta, sekali Tuhan Jesus jadi Juruselamatta, tetap rasa lalap IA jadi Juruselamatta.
SELAMAT MENGIKUTI LAKON PERSADAN SI BADIA SI TERAKHIR I BAS TAHUN 2025. SELAMAT MENYAMBUT MINGGU-MINGGU ADVENT RAS MERAYAKAN NATAL TAHUN 2025. BUJUR RAS MEJUAH-JUAH. DIBATA SI MASU-MASU KITA KERINA.
Tidak ada komentar:
Posting Komentar