SUPLEMEN PEKAN KEBAKTIN PENATALAYANEN GBKP 2025
Pdt. Larena Sinuhadji (Nd. ReyRapha Tarigan)
Tema Umum : ERBAHAN PERDAMEN (Matius 5:9)
Liturgi Pekan Silahkan Klik : https://drive.google.com/file/d/1twBKKqh6zSSGnSGcTv2Cmn0OnRDJiHCO/view?usp=sharing
Wari Peduaken, Senin 20 Januari 2025
Invocatio : 1 Korinti 11:12
Ogen : Kolose 3:10b-11
Renungen : Kejadin 1:26-28
Tema : DIBATA NEPA MANUSIA PELAIN-LAIN
Penaruh
Tinepa Dibata si pelain-lain encidahkenca man banta maka Dibata e Maha Kuasa. Ngasup Dibata njadiken kerinana, bahkan tinepa-tinepa si la terantusi perukurenta. I bas si e, perbedaan si lit i sekelewetta harus imaknai sebage potensi si mehuli guna saling melengkapi sada ras si debanna.
Mpebagesi Kata Dibata
Bahan renungenta sendah nuriken kerna manusia si ijadiken Dibata alu cara si istimewa. Si pemena lebe, manusia ijadiken Dibata kenca kerina sarana pendukung kegeluhenna enggo sikap. Si peduaken, manusia ijadiken Dibata sentudu ras tempasNa, si menam seri ras Dibata. Si peteluken, manusia ijadiken Dibata dilaki ras diberu. Si peempatken, manusia ipasu-pasu Dibata guna ertuah enterem janah engkuasai tinepa si deban. Keistimewaan enda akap kami labo ituriken lit i bas tinepa-tinepa si deban. Tapi i bas kesempaten enda fokus kita ku bas keistimewaan si peteluken, manusia ijadiken Dibata dilaki ras diberu. Kai enda antusenna?
Si pemena lebe, tentu guna tujun prokreasi, regenerasi, entah pe ertuah jadi nterem i bas konteks perjabun (keluarga). Enda tentu labo terjeng gelah ertuah jadi nterem ngenca, lit hal si deban si lebih penting, e me lit jaminen keberlangsungen nggeluh erkiniteken man Dibata. Emaka keluarga jadi ingan si pentingna i bas pendidiken nggeluh erkiniteken. Si peduaken, manusia ijadiken Dibata dilaki ras diberu antusenna gelah saling melengkapi sada ras si debanna. Adi sioge Kej. 2:20-22, Dibata njadiken manusia guna jadi teman si cocok, si banci sisampat-sampaten sada ras si debanna. Si peteluken, manusia ijadiken Dibata sentudu ras tempasNa, si menam seri ras Dibata. Antusenna, dilaki ras diberu harus saling melengkapi bage pe sisampat-sampaten i bas mewujudnyataken kerina si jadi peraten Dibata i tengah-tengah doni enda.
Ogenta si pemena e me pengajuk rasul Paulus man perpulungen kalak si tek i kota Kolose gelah nggeluh i bas kegeluhen si mbaru. Kegeluhen si mbaru i bas Kristus enda labo pilihen. Maksudna, kerina kalak si tek man Dibata i bas Yesus Kristus harus nggeluh i bas kegeluhen si mbaru. Kalak Jahudi sekali pe si banci ikataken enggo leben megi kerna kerehen Mesias arah Taurat ras kitab Nabi-nabi nari, adi enggo ngaloken Yesus Kristus sebage Tuhan ras Juruselamat, harus nggeluh i bas kegeluhen si mbaru. Sebab i bas Kristus enggo lanai lit pembedaan-pembedaan, sebab si jadi fokus e me Dibata i bas Yesus Kristus. Emaka i bas ay. 11 ikataken, “Sebab Kristus kap kerina. Kristus ersada ras kerinana.” Invocatio nuriken kerna pedah-pedah si ibereken Paulus man perpulungen Korinti guna kiniraturen i beribadah rikutken konteks budaya paksa si e. Tapi si jadi fokus i bas renungenta sendah e me kerna peran dilaki ras diberu si saling harus melengkapi sada ras si debanna
Pengkenaina
Tema si seh man banta i bas wari peduaken Pekan Kebaktin Penatalayanen e me “Dibata nepa manusia pelain-lain.” I bas tema enda lebe, tek kita maka manusia si pelain-lain e Dibata si nepasa. Ertina, Dibata si menciptakan perbedaan guna saling melengkapi, saling memperkaya, saling menopang, saling menolong, rsd.-na. Tapi tujun si mehuli enda jadi ceda erkiteken dosa. Manusia cenderung memanipulasi perbedaan-perbedaan si lit guna keuntungen pribadina. Emaka si terjadi i bas perdalanen sejarah doni enda e me pembedaan-pembedaan erpalasken gender, suku, ras, agama, bage pe antar golongan (SARA).
Emaka i bas kesempaten enda iajuk kita gelah mulihken ku tujun awal Dibata njadiken manusia si pelain-lain, e me guna saling melengkapi, saling memperkaya, saling menopang, saling menolong, janah si pentingna e me guna encidahken kemuliaan Dibata arah pengkebet geluhna i japa pe ringan. Bahan renungenta ngingetken maka kita enda ijadiken Dibata sentudu ras tempasNa. Emaka marilah sipakeken keistimewaan si lit i bas kita guna encidahken keleng ate Dibata. Ogen ras invocatio ngajuk kita gelah tuhu-tuhu nggeluh i bas kegeluhen si mbaru si encidahken kemuliaan Dibata i bas kegeluhenta.
Wari Peempatken, Rabu 22 Januari 2025
Invocatio : Efesus 4:26
Ogen : Matius 5:21-25
Renungen : Kejadin 26:26-33
Tema : TETAP ERTEMAN
Penaruh
Kerina kita banci jadi pernah rubat, la sicakapen, sikiu (sikitiken ukur), berkonflik. Ras e umumna terjadi ras orang si ndeher ras kita, si mekatep kita jumpa, si lit hubungenna ras kita. Banci keluarganta, ndehara, perbulangen, anakta, semetuanta, cimbang, beru, eda, turang, permen, teman sada PJJ, teman sada gereja, sesama serayan, teman erdahin, ras jiran tetangga. Umumna kita berkonflik ras kalak si itandai kita. Jarang kita rubat ras kalak si la sitandai ras la ndeher ras kita, kecuali ia ngelakoken tindaken kejahaten (la sitandai jelmana). Ras rubat adalah biasa, sebab banci jadi berbeda pendapat, sura-sura si petembil, terjadi mis komunikasi, kepribadian si berbeda. Si penting ula sampai berlarut-larut. Adi nina invocatio, “ula simpan rawandu seh ben wari” (Ef. 4:26). Rubat banci tapi mulihken erteman.
Bas Pustaka Si Badia, melala contoh-contoh kalak si rubat, si kedungenna ertemanka mulihken (Esau ras Yakub, Yusuf ras senina-seninana, Paulus ras Markus, tapi lit ka si berakhir alu sibunuhen: Kain ras Habil). Rikutken tema-ta i bas Pekan Penatalayanen wari pe-4-ken, ibabai kita tetap erteman, aminna enggo terjadi konflik.
Mpebagesi Kata Dibata
Perikopta ngerana arih-arih si mehuli, perjanjian damai antara Ishak ras Abimelek. Kisah enda ilatarbelakangi i bas bindu 26 nari kerna perdalanen Ishak si harus ndarat bas Kanaan nari erkiteken terjadi kelihen bas negeri e (kisah enda mengulang bagi si enggo pernah terjadi i bas jaman bapana Abraham, Kej 21:22-34). Sura-sura Ishak ku Mesir, tapi isuruh Tuhan gelah Ishak tading i daerah Gerar, daerah kalak Filistin. Sabab janji Tuhan tetap masu-masu Ishak erkiteken bapana Abraham (ay. 3-5). Ras terbukti aminna paceklik tapi Tuhan memberkati usaha Ishak. Ierdangi Ishak taneh e janah iperanina seratus kali lipat, erkiteken ipasu-pasu Tuhan ia (ay. 12). Cian ate kalak Pilisti, emaka itutupi kalak Pilisti kerina sumur-sumur si enggo iakali suruh-suruhen Abraham, sanga nggeluh denga nai bapana. Kedungenna, Abimelek raja Pilisti mpelawes Ishak sabab enggo ndauh beliden kuasa Ishak asangken kuasa kalak Pilisti. Berkat ka Ishak ku baluren Gerar, i je pe jumpa ia ras sumbul si erburak-burak launa. Piah dungna rubati ka suruh-suruhen kalak Gerer ras si ermakan Ishak. Bage seterusna, enggo pe ipelawes ras ikalina sumur si mbaru, Tuhan tetap masu-masu Ishak. Seh kedungenna tading Ishak ras keluargana i Berseba.
Kenca kejadin si ndai reh Abimelek rikut ras penasehatna bage pe panglimana ndahi Ishak. Piga piga poin penting si banci siidah:
- Abimelek menyadari kesalahenna ras berinisiatif menjumpai Ishak. Enggo isedari raja Abimelek maka la banci iambati pasu-pasu Dibata man Ishak. Janah labo lit untung ngasuhi cian ate, bage pe sikap rate-ate (semena-mena) man kalak si deban. Isedarina maka ulu pasu-pasu e Tuhan, labo ingan (sumur). Isedarina, maka Ishak ipasu-pasu Tuhan.
- Ibahanna padan perdamen (kenca iukuri kami, ulin iakap kami maka sibahanlah iketeken perpadanen, ay. 28-29). Situhuna, mbiar nge Abimelek iganggu Ishak, maka ilebeina negosiasi, gelah ula ibahan Ishak si jahat man Abimelek ras bangsana, bage pe sebalikna, Abimelek la ndigan pe erbahan jahat man Ishak. Banci Ishak lawes alu dame, sebab mehuli perbahanen Abimelek man Ishak.
- Tuhu-tuhu enggo tangkas igejapina maka Tuhan nge si masu-masu Ishak.
- Gayung bersambut, Ishak pe nggit erdame ras Abimelek (mau memberi pengampunan). Rekonsiliasi terjadi adi kedua belah pihak si berkonflik sama-sama nggit erdame. Bahkan ibahan Ishak pesta guna kalak enda. Ras pepagina, sekalak-sekalak ia melasken padanna janah idungi alu ersumpah (adi kedua belak pihak si berkonflik sama-sama mau berdamai, merendahkan hati, tidak perlu orang ketiga/mediator).
- Sirang kalak enda tapi tetap erteman, ertina, la nari rubat. Enggo pulih pertememanenna. Janah i bas wari e ka me reh suruh-suruhen Ishak meritaken kerna sumur si enggo ikalina. Janah jumpa ka lau, tanda Tuhan tetap masu-masu. Ibahanna gelarna Berseba si dungna jadi kuta ingan tading enterem jelma.
I bas ogen si pemena, Tuhan Yesus mpersingeti kalak si nterem i bas khotbahNa i datas uruk, gelah ula ernembeh ate ras merawa nandangi seninana (temanna), kalak si bage iadili pagin. Labo si paling penting nehken persembahen man Tuhan adi pusuh lenga lit bas dame. Tadingken persembahen e, jenari erdame ras kalak si sangkut ukurna nandangi kita. Kenca bage persembahkenlah persembahenndu man Dibata. Perdamaian di atas segalanya dibandingkan persembahen man Tuhan.
Pengkenaina
Konflik labo perlu ihindari, labo ka perlu icari-cari. Tapi adi terjadi pe konflik arus iselesaikan alu mehuli, gelah ula berlarut-larut. Sidungi alu mehuli. Si paling baik, bagi si terjadi antara Abimelek ras Ishak, perdamaian terjadi tanpa arus lit mediator. Masing-masing pihak menyadari kekurangen, kesalahen ras nggit ndungi persoalen alu mehuli. Sebab la lit ertina menyimpan kemarahan, menyiman sakit hati (dendam). Amsal 27:3 “Batu adalah berat dan pasir pun ada beratnya, tetapi lebih berat dari kedua-duannya adalah sakit hati terhadap orang bodoh.” Ishak la menyimpan kemarahan dan sakit hatinya asum Abimelek mpelaus Ishak ras permakan-permakanna. Ishak tetap erbahan si mehuli ras tetap ingetna padan Tuhan, maka tetap ipasu-pasu Tuhan geluhna (ay. 5).
Jadilah kita benang penjarumi asum terjadi konflik i tengah-tengah kegeluhenta. Kehadirenta mperdamekenca, mendinginkan persoalen. Ula kita jadi kompor, bensin entah pe gunting si erbahanca reh garana persoalen e bahkan terjadi perpercahen. Lit peribahasa ngatakenca, “Seribu teman kurangsa denga, sada musuh terlalu banyak.” Mari siusahken guna banci membangun relasi si mehuli i bas pertemanenta. Karakter Kristus, biak-biak Kesah Si Badia nggeluh bas kita. Meteruk ukurta, lit penguasaan dirinta, pedauh sifat egois, meganjang ukur, merasa diri paling benar.
Wari Peenemken, Jumat 24 Januari 2025
Invocatio : Jesaya 28:6
Ogen : 1 Kronika 13:1-4
Renungen : Roma 15:14-21
Tema : MEHULI, ERPEMETEH, DINGEN NGASUP SIAJAR-AJAREN
Penaruh
Salah sada bentuk kecerdasan e me kecerdasan sosial (social intelligence). Nina Gemini AI, kecerdasan sosial penting untuk membangun hubungan yang harmonis dan produktif dengan orang lain. Kecerdasan sosial dapat membantu seseorang untuk: membaca orang, berteman, membangun hubungan dan kerja sama dengan orang lain, menangani konflik dengan bijaksana, beradaptasi dengan lingkungan sosial yang berbeda. I bas kesempaten enda radu ras kita erlajar arah tokoh-tokoh Alkitab si lit i bas ia karakter mehuli, erpemeteh, dingen ngasup siajar-ajaren si akap kami lit kaitenna ras kecerdasan sosial.
Mpebagesi Kata Dibata
I bas surat Roma 1:5 je ikataken Paulus maka ialokenna i bas Dibata nari “jabatan rasul untuk menuntun semua bangsa.” Ertina bena-bena pelayanenna enggo terbeban Paulus guna er-Berita Si Mehuli man bangsa-bangsa si deban si labo bangsa Yahudi. Lit mediate i bas diri Paulus nandangi bangsa-bangsa si deban si lenga itandaina Yesus Kristus. I bas bahan renungenta sendah, mulihi ipertegas Paulus kerna panggilen pelayanenna (mediatena) man bangsa-bangsa si deban si lenga itehna kerna berita keselamaten i bas Yesus Kristus. Si pemena, i bas ay. 16 mulihi isaksiken Paulus kerna tugas perutusenna guna meritaken Berita Si Mehuli guna kalak si labo Yahudi. Tek Paulus maka Dibata ngutus ia erkiteken lias ate Dibata man bana. Amin pe lit kebeluhen i bas diri Paulus i bas er-Berita Si Mehuli, tapi alu meteruk ukur i lebe-lebe Dibata, tek ia maka si e kerina erkiteken lias ate Dibata man bana.
Si peduaken, megah iakap Paulus erkiteken persadanna ras Kritsus erbahanca kerina dahin-dahin pelayanen guna er-Berita Si Mehuli banci ilaksanakenna alu mehuli. Erkiteken persadanna ras Kristus, Kesah Si Badia erdahin seh makana kalak si labo Yahudi patuh man Dibata (ay. 18). Kesah Si Badia si mpengasup ia erbahan tanda-tanda sengget si mbelin, janah Kesah Si Badia pe si mereken gegeh si luar biasa i bas ia niari daerah-daerah si lenga tersiari guna er-Berita Si Mehuli (ay. 19-21). Ertina i bas si e ersaksi Paulus maka i bas ia er-Berita Si Mehuli la lit gegeh si deban selain gegeh i bas Kesah Si Badia nari erkiteken persadanna ras Kristus. Kiniersadan ras Kristus penting i bas er-Berita Si Mehuli.
Si peduaken, megah iakap Paulus erkiteken persadanna ras Kritsus erbahanca kerina dahin-dahin pelayanen guna er-Berita Si Mehuli banci ilaksanakenna alu mehuli. Erkiteken persadanna ras Kristus, Kesah Si Badia erdahin seh makana kalak si labo Yahudi patuh man Dibata (ay. 18). Kesah Si Badia si mpengasup ia erbahan tanda-tanda sengget si mbelin, janah Kesah Si Badia pe si mereken gegeh si luar biasa i bas ia niari daerah-daerah si lenga tersiari guna er-Berita Si Mehuli (ay. 19-21). Ertina i bas si e ersaksi Paulus maka i bas ia er-Berita Si Mehuli la lit gegeh si deban selain gegeh i bas Kesah Si Badia nari erkiteken persadanna ras Kristus. Kiniersadan ras Kristus penting i bas er-Berita Si Mehuli.
Ogen si pemena nuriken kerna kiniersadaan arih Raja Daud ras kerina pemimpin pasuken si seribu kalak ras si seratus kalak guna ngelegi Peti Perpadanen Kiryat Jearim nari ku Jerusalem. Arah invocatio sendah radu ras siteh maka perukuren si bujur ras kinimbisan rehna i bas Dibata nari.
Pengkenaina
Bagi si enggo isingetken i bas bagin penaruh i datas, kecerdasan sosial e me hal si penting i bas kita menjalin relasi ras kalak si deban. Janah adi sikaitken ras sasaren pelayanen GBKP 2025 akap kami kecerdasen sosial enda harus sipelajari alu mehuli gelah dewasa kita menerima perbedaan. Bahkan labo terjeng dewasa menerima saja, tapi ngasup pe kita mengelola perbedaan si lit jadi potensi si mehuli guna kiniulin kegeluhenta. I bas si e lit piga-piga hal si banci sipelajari arah tokoh-tokoh Alkitab sendah, si akap kami lit denga kaitenna ras kecerdasen sosial.
Tema si seh man banta i bas Pekan Kebaktin Penatalayanen wari peenemken enda e me “Mehuli, Erpemeteh, dingen Ngasup Siajar-ajaren.” Arah Paulus nari erlajar kita kerna mediate (kepedulian) ras kiniulin nandangi kalak si deban, pemeteh guna er-Berita Si Mehuli, bage pe kininggitenna iajari Kesah Si Badia. Arah ogenta sendah, erlajar pe kita arah Daud nari i bas kebeluhenna bekerja sama ras kalak si deban guna ndahiken dahin-dahin Dibata. Janah arah invocationta erlajar kita maka kerina si mehuli rehna i bas Dibata nari. Enda kerina akap kami banci nambahi pemetehnta guna mendukung sasaran pelayanan GBKP tahun enda, reh dewasana kita menerima perbedaan si lit i sekelewetta.
Tidak ada komentar:
Posting Komentar